Поладкстомо (2016)/Поладкстомо/7
| ←VI глава | Поладкстомо (2016) by VII глава |
VIII глава→ |
| Нуянь Видяз. Поладкстомо. Без продолжения. — Саранск, 2016. — с. 84—93 |
[84]
VII
«...Куш Катянь неемс... Зяро иеть ютасть сеть кенярксто-ризкстэ пешксе, зярдояк астувтовиця Читнеде-ветнеде мейле? А кемевияк — комсте ламо! Косо ней сон эри? Пишти-арась мейсэяк? Косо важоди? Мезть ледстнемс, содазь, умок мирде экшсэ. Эседензэ сэрейть эйкакшонзо. Вейке, кавто? Цёра, тейтерь? Эли ве сымень? А кемеви — эри ськамонзо. Ули ломанезэ, ули...
Шкась потамот а соды. Мезе ульнесь — ульнесь, а велявтсак, а усксак мекев. Пароль таргамс тосто, ютазестэнть, эрьвела ёжосо, кольнезь эрязь читнень, сеть чопода ветнень. Сыненсткак кецневлинь. Ансяк...» — Видяй нупонесь моданть коймесэнзэ, сонсь арсесь арсеманзо. Тевесь — велявтнемс начко моданть — аволь шождынетнеде, ялатеке бизныця мельтне прястонзо эзть кшувавтово. Сынст оймавтницяст — удомась.
Кодамо питнейдеяк питней сюпавчи-казне макссь ломантненень Чипазось — арсема! Сон лиясто сайтянзат, вастовттанзат эйкакшшкань кодамояк уликсчи марто; а ашти мезеяк варштамс васень вечкевиксэть сельмес, ледстямс васень паламот, урьвакстомат, сехте нусманя чить — малавиксэть калмамост. Секскак весемеде пайстомот сеть, кить кодамояк ормадо-мезде ёмавтызь арсема лувост.
Аштемковонь куншка чи. Вармась окойники полавтызе ёнксонзо — кармась лексеме чивалгома ёнксонь летьке коштсо. Ёмавтызе пелевеёнксонь экшесэ чамань палсиця виензэ. «Вармав тундо» — истя лемдизь тедедень кизэнть Московонь синоптиктне. Алкукскак, варматне кона ёндо ды кода, кодамо вийсэ ансяк а пувить. Течи, маряви, сайсть мель оймсемс. Ушосонть сэтьме, маней, пси. Килеень лопатне цинсть оймасть, натой а лыказевитькак. Теде седе марявиксстэ кайсететсть [85] икельгаст вирьстэнть нармунень вайгельтне. Кизэкуншкань алкуксонь чи — кизэнь седей.
Зярдо пейдиця чипаесь пачкодсь тёкш тарказонзо, Кузоваткинтнэнь вальмаст икелев лоткась омбомасторонь ашо машина. Лиссть эйстэнзэ аволь сэрей, штадо лавтовонзо ланга нолдазь валдо черь ава ды кеменьшка иесэ цёрыне. Эйкакшось ахолдась кедьсэнзэ Кузоваткинтнэнь сэнь сельме кудост ёнов ды ношкстась ков тензэ эряви.
Авась ваннозь — понгсь асодавикс таркас — ютась малав, панжизе пирекенкшкенть. Рацяня килеенть алга янганть пачкодсь кузтемпес. Кияк эзь неяво. Кузсь-совась кудонтень.
«Шумбрачи!» — пшкадсь тарчкслангсто.
Каршо а куш а каш.
Ёвтызе валонть, седе марявиксстэ, омбоцеде.
Теке.
«Пиресэть, маряви», — сась мельс. Лиссь мекев, валгсь кузтемаванть, сыргась пиренть кувалт пандятнень юткова янганть.
Эзь маняво. Видяй ды авазо, пандя вельксэс комазь, кочксть-чуролгавтсть пурькат. Эмежень эрьва кастыцясь содасы, мезе те истямось — кочкомс пурькат.
Васенцекс кепедизе прянзо Видяй, мельганзо — авазо. Мельга-мельцек видемтизь рунгост.
Абунгадсть. Эзь кемеве тенст. Теке мерят Рафаэлень артовкссто валгсь ды эскели каршост сонсь Мадонна. Ансяк кедьсэнзэ пакша эзь кирде. Лангсонзо човине коцтонь лов ашо кувака платия. Эскелясь кочкицятнень ёнов... Катя-Катрин!
— Катя, тейтерем! — цёкордыця вайгельсэ васенцекс вастызе сыцянть Юлия Григорьевна, эскельдясь каршонзо, эль эзизе кутморда; сюк, ледсь мелезэнзэ — кедензэ модавт-рудазовт.
— Те тонь истя косто пазось кандынзить? — аванзо мельга сеске макссь кеняркстонть гай вайгель Видяй, вансь ды кодаяк эзь саеве вановтозо икелень нинзэ эйстэ.
«Комсь иетне вакска эзть юта, ялатеке Видяй кадовсь Видяекс, сакалонзо вана арасельть», — сэль пакшкекс ютась пряванзо мелесь, умонь поланзо лангс ванозь.
Видяйнень истя вечкевсь икелень нинзэ эчкела, мештестэ лисиця вайгелезэ! «Чачозо аламнеде полавтовсь, аволь истямо валаня, а вана вайгелезэ, сельмензэ...»
— Адядо, адядо кудос, — мель явсь исень ававтось ды сыргась пиренть куншкава шешкезь янганть сэнь вальма кудонть ёнов.
Мельганзо текень теизь Видяй ды Катя.
— Мон, Юлия Григорьевна, аволь куватьс, — кузтемпес пачкодезь, мерсь Катя ды путызе кедензэ ававтонзо кедь-серька лангс.
— Зярс илязо уле, авадря аштемс кузтемпесэ, совак.
— Адядо верандас, — тердинзе каршонзо аштицятнень Видяй.
Колмонест чатьмонезь совасть, ловт, эрьва ёндо суликасо пирязь нупальс. Эйсэнзэ стувор, диван, колмо стулт, книгадо пешксе этажерка. Диванонть каршо чаво стенасонть Рафаэлень «Мадоннанзо» мазый кундосо покш паро репродукциязо.
— Тынь эно кортнеде, мон молян чайне анокстан, — неть валтнэнь ёвтазь, Юлия Григорьевна вырк ютась панинупалев.
— Те тон, видеяк, кода истя зняро иень ютазь понгить тей? Кода эрямо тарканок муик? Яла кортыть, дюният а эрсить моданть лангсо. Кода а эрсить? Течи валске таркасо мадезь аштемстэ сакшныть мелезэнь, ледстнитинь. Чикуншка — тон монь икелят. Те каня а дюния?
— Вешницясь Вешневиксэнть мусы. Кучимизь командировкас. Эсенек телезаводс. Эзик стувто? Ды вана сынь мельс муемс тонь, косо илязат уле, варштамс лангозот. Ванан, аволь комсь иесэ цёрат, ялатеке ванстовить. Вана истя. Эрямо тарканк? Муия, кись ветимим...
Видяй кунсолось. Кунсолось се вайгеленть, конань васенцеде марякшнызе телень чокшне ламо иеде икеле.
[87] Теке эзть явовояк сеть астувтовикс минутатне кизэнь неень чиденть. Тунь эзь полавтово васенцеде марязь се вайгелесь. Лиси сон та-косто потсто, мештестэ. Жойниця, эчке. Морамсто истямонтень мерить омбоце. Вастневи аватнень ютксо чуросто. Видяй кунсолось. Ды аноколь кунсоломс певтеме.
— Парсте теить, ардыть миненек... Казить тень покшчи. Сюкпря, Катя-Катрин, — ёжотнеде токавсь, каладсь седеезэ, начксть, маризе, сельмекочкарянзо. Валозь валовсть умок ютазь шкадонть ледстнематне.
— Ульнесь ютксонок вечкема, ульнесть кемемат... Эрямось, марявсь, пе а соды. Кода а варштамс? — черькавтызе валдо черь прянзо авась. Лыказевсь, кедензэ путызе кумажанзо лангс.
— Вечкилинек... — нусманясто, тошказь ливтизе валонть цёрась, нежедизе кутьмерензэ диванонтень. Чатьмонезевсь. Вансь этажеркасо книгатнень ёнов, прок юткозост кекшсь ды эри тосо те умонь валдо ёжось.
— Кавонек... Ансяк мекев мезеяк а велявтат, мезе ульнесь — ульнесь, — Видяй марто вемельс сась Катя. — Кода тонсь? Кода эрят? Важодят косо? — певерсть Катя-Катринэнь турванзо ютксто кевкстематне. — Эриця ялгат ули?
Чатьмонема.
— Арась, — таргизе валонть Видяй. — Уш зяроце ие косояк а важодян. Бути а ловомс важодемакс кудоютконь, пирень-кардазонь тевтнень, лиси, мон нузякс кандо. Эйстэст, истят тевтнеде, — вирь. Неень кельсэ — фермерэнь кондяман, истяяк меревлинь — пирень агрономан! — марямга пейдезевсь. — Кода тонсь?
— Кода монсь? — кевкстеманть каршо кевкстемасо пшкадсь Катя-Катрин ды лепштинзе турванзо. — Кода меремс...
Теевсь општ.
— Мезеяк эрямосон эзь полавтово. Омбоце свадьба эзинь налксе. «Коськестэ», чарькодеви, эзинь эря, нейгак... Ансяк весе те... — эзизе прядо арсеманзо Катя. — Лия ёндо, [88] ламо мезе полавтовсь. Комсь иеть — те аволь комсь чить. Калмия авань, мельганзо куроксто — патянь. Ней ськамон. Эри мартон эрзянь «а куш а кашось». Ансяк.
— Те кода истя — омбоцеде мирденень эзить лисне? — абунгадомань гайтькеть марявсть Видяень сэрей, аванзо ёнов молиця вайгельсэ.
— Эзь саво, — кончтась сельмесэнзэ авась, — эрямосонть ламось максови ансяк весть.
— Эйкакшке муевлить, — койсэнзэ, превть макссь Видяй; лавтовозо, маризе, токавсь Катянь лавтовс.
— Те кортамось лия...
Совась Юлия Григорьевна. Кандтнемкайсэ кандсь пси сувсо лексиця чай марто кавто кечинеть, эсензэ паневть жомкат, цяплынесэ сахар. Путынзе Видяень ды Катя икелев.
— Чаесь, эйкакшт, анок. Зярс пси — симеде. Чикуншка ёнкстнэсэ, марсинь, псиденть пря идить ансяк лакавтозь тусто чайсэ. Симема, келя, парсте явавты. Пси течи ушосонть, — ледстизе, кортась-чоледсь Юлия Григорьевна, стуворонть песэ стядо аштезь.
— Сюкпря, Юлия Григорьевна! — мерсь Катя, саизе ве кечиненть эстензэ, омбоценть путызе Видяень икелев.
— Симеде. Мон варштан пирев. Кеман, кадоват удомо, — лисемстэ «тердизе» чайсэ каваницясь икелень урьванзо.
— Арась, Юлия Григорьевна, мон мекев-васов! — серьгедсь мельганзо инжесь.
Кадовсть нупалентень кавонест, Видяй ды Катя.
— Мерят, эзь саво лисемс омбоцеде... Истя-а-а... Аволь педе-пес правттано эсенек лангсо. Эрьванть эсензэ азорозо. Важодят косо? — лиядо кевкстсь Видяй.
— Важодян покш заводсо, тагояк ОТК-со. Мельсэть? Эзик стувто телезаводонь умонь профессиям? Тосо нежедезь ютавтан эрямом... — Катянь вить кедезэ апак учо путовсь, эзь марявояк, Видяень кумажа лангс.
— А эряви, Катя, — сорк мерсь Видяй ды айгизе кумажанзо лангсто аванть кедензэ. — Мекс эрямонок чикор-лакор моли? Мекс монь истя — тонсь содат. Мекс тонь эзь лисе? Мекс тон мельгат пуло эзить кадо? — Видяень [89] валонзо, вечкевсть-эзть Катянень, мольсть сялдома-пупсема ёнов.
— Лисни истя: уцясканок ламонь кувалма вейкеть, — сась нусманя мельс Катя.
— Пиринеть, дачат кодамояк ули? — ледсь Видяень мельс неень «тевезэ» ды кевкстизе вакссонзо аштиця, а кемевияк, зярдо-бутинь нинзэ.
— Арась, Видяй. Монь «пиринем» — балягат-чахрат. Эйстэст кодат ансяк арасть! Якстереть, сэнть, пижеть, ожот, тюжат... Улить мик раужоткак. Касыть эрьва кува! Кудопотмом эйстэст пешксе. Секень вант ваян потмозост. Баляга потс ваязь одирьван... — пейдемадонть явовсть Катянь валдо-якстерестэ артозь мазый турванзо. — Маряви тень, сакшнынь одкс шказон. Ну, Видяй, шказо сыргамонь. Кортынек, неинек вейкенек-вейкенек, ней — килангов. Маряви, теде мейле уш зярдояк а вастовтано. Зяр-до-як... Те вастовомась миненек — меельце чилисема.
— Аштевлить аламос, — Видяй варштась эйзэнзэ лекшкадозь аштиця Катянь сельмес, путызе кедензэ аванть кедь лангс.
— Арась, арась, Видяй! — неть валтнэнь ёвтазь, Катя кавксть-колмоксть копордась кельмиця чайденть, ёжомарязь нардызе кургонзо пацинесэ, стясь.
Мельганзо видемтизе рунгонзо, стясь каршонзо Видяйгак.
Вансть сельмеде-сельмес. Яла тенст эзь кемеве — неить вейкест-вейкест меельцеде.
— Мезе, пе? Килангов? — тошкстась Видяй.
— Шказо, — нулновтызе прянзо Катя.
«Аволь сырят, Катине, ды уш аволь од тейтеряткак. Васов туить кемгавксово иесэ се Катинестэнть, конань кутморинь комсь иеде икеле. Арасельть сельметь чирестэ туиця налнэтне, седе валдосто цитнильть сельметь, арасель эйсэст редявикс нусманячись. Неявить эрязь иетне. Неявить-арась, кавшаня череть, эйстэст качадыця медень чинесь, вайгелеть, ёлганя рунгот кемевтить: икелеть Катя».
— Аштевлить эно, — ледстизе Видяй омбоцеде.
Валгсть кузтемпес. Сыргасть вальмало Катя-Катринэнь ашосо цитниця «Шевролензэ» ёнов. Мольсть састо, нурькинестэ эскелязь. Мольсть малацек-малацек — сэрей Видяй ды алкине, тензэ лавтовга, Катя, умонь-умонь седейпельксэзэ. Пачкодсть. Видяй келес панжизе машинань икельце кенкшенть.
Катя сеске эзь оза.
— Эрь эно, Видяй, меельцеде палатан, — тошкстась сон, стясь пильгесур лангс, кутмордызе, кода кутмордавсь, ды педявтынзе турванзо цёранть турвас. Шкань неть пелькстнэнь перть Видяй ёмакшнось эрямонь чадынтень, мезеяк эзь маря, эзь нее... Зярдо турваст явовсть, Катя лекшкадсь, путызе прянзо Видяень мештес.
— Вечкилитинь, Видяй, вечкилитинь од тейтерень ванькс, валдо вечкемасо! Нейгак вечктян. Ансяк, куш череть раздек, мезеяк а полавтат, уцяска... Вере эрицясь секень вант истя мерсь. — Катя эрязасто явовсь Видяйде ды озась чарынькаенть-руленть экшс.
— Сюк-сюк, Катя, сакшномат кис! Эзимик стувто. Мартот вастовомась — ормаменькс. Тагояк сюконян теть, вечкемам! — кеняркс-нусманя ёжотнеде Видяень летькемсть, маризе, сельмензэ.
Мотордозевсь моторось. Катя пекстызе кенкшкенть, панжадо вальминеванть кавксть-колмоксть ахолдась кедьсэнзэ. Машинась сыргась таркастонзо. Седеяк токавсь Видяень седеезэ, зярдо Катя тензэ бибикстась.
Видяйнень марявсь, пильгензэ педясть модантень. Сон кувать вансь ашосо кувтолдыця машинанть мельга. Вансь натой сестэ, зярдо ёмась сельмензэ икельде прок ёвкссто сазь «ашо нармунесь».
«Те мезе ульнесь? Он? Прок шкась кармакшнось чарамо каршо ёнов ды пачтякшнымизь умок ютазь цёковонь кунсолома шказонок. Тов, косо ламольть ванькс чилисематне, кеняркстнэ ды, сави меремс, аволь седе аламольть [91] ризкстнэ-мелявкстнэ, телень цят якшамо читне. Катянь самозо, вастовоманок, теке чопода-тандавтниця пель экшстэ кивчк валдо чинал.
Иетне кеверезь кеверить. Эзь марявояк, кода ютасть комсь иень буенть трокс. Ульнинь од, верьга ливтниця, стакачинь а содыця цёра. Катя — однэ, уцяскав эрямодо арсиця тейтерь. Сон неявсь тень, теке ламо иетнеяк эзть юта, ашо чама пейделькакс. А черензэ, черензэ... Олгонь тюсост, кода икелеяк, чадозь чады лавтовонзо ланга. Маласо, кортыть, Кенерепакаресь, ды а сусксак. Э-э-эх!.. Сусковольгак?..
Артём, тон одёр цёра, — апак учо вельмесь икелензэ «Видьмевтеме» ёвтнемастонть откересь, — кемень иеде ламо эрить Светат марто цёракс, ней пеняцят. Светат, кона чачтась теть кавто цёрат, Катя-Катрин марто теке кавтаськеть. Артём, тон а чумо, чарькодян... Паряк, эрямот эрявликак веёнга лытыця ревенть марто, трявлить-кастовлить «муезь» эйкакштнень, аволизе ветяяк рузонь тетяст. Ковгак а молят, эрьванть эсензэ эрямо кизэ. Эрьванть эсензэ, Эрьвасо мезе ансяк арась, мезе ансяк а кирдеви», — истя ледстнезь-арсезь, Видяй эзизе редяяк, кода пачкодсь кузтемпес.
Совась кудос. Ютась верандас. Тесэ, вана те дивансонть, зярыя минутадо икеле озадо аштесь, лексесь, кортась, кунсолось, копорясь пси чайде Катя. Озась сонзэ таркас...
Совась-сась «эмежпаксясто» авазо. Ансяк пекстызе мельганзо кенкшенть, кевкстема:
— Мекс эзик корта кадовомс удомо?
Видяй мезеяк эзь мере. «Эх, авай-авинем! — ютась пряванзо сюмора мельнесь. — Кадовлик... Каня а чарькодят, Катянень кадовомс удомо а мезекс. Мезекс те валонть ёвтык?»
Юлия Григорьевна сускинзе турванзо, чарькодизе: лиссь кургостонзо аволь се валось. Секскак мель путсь витемс ильведьксэнзэ, нардамс апак арсевть, покордыця кевкстеманть.
— Оршазь кода мазыйстэ! Содазь-чарькодезь. Малав истя оршнинек од шкастонок минь. Аволь кода ней, [92] понксонь таркас кандтнинек нурька ожа, каркске марто, алга келей платиинеть. Кумажадо аламнеде алга. Катянь лангсо — полда видьга. Ашо кувака платиясь парсте невтсь ёлганя, теке од тейтерень, рунгонзо. Мазый...
— Мазый, — мельтеме путсь питне ёвтазь валонтень Видяй.
— Превейгак, неяви, авась... Мекс эно мирденень эзь лисе? Эйкакшонзояк, кода чарькодинь, арасть... — Юлия Григорьевнань мельс, улема, сась стядо аштемадо валмеревксэсь, ды сон ютась икелев, новольсь диванонтень.
— Мекс, мекс... — музгордезевсь Видяй. — Каня аламо тенень тувталтнэде? Умок редязь: превейтне, кинь лавтов лангсо аволь чакш, седе сеедьстэ мирдеяк а мукшныть. Кочксить, кочксить... Теяк, зяро иля кочксе... Кинень лисят? Тюрьматне пешксеть. И-и-и, зяро эйстэст! Тосонь эрицятне васняяк — цёрат. Ней арсек... Ды мезть кортамс, тон, авай, мондень парсте неть тевтнеде содат. Оно, Интернетэсь лажны!
— Видеть валот. Арсемс кувать а сави. Те статистиканть марто содавикст ламот, — путыксэль пе теде кортамонтень Юлия Григорьевна.
— Паряк, секс, авай, Катя лиядськак кадалькакс, — поладызе кортамонть Видяй, — эрямось полавтовсь. Катя чачсь 60-це иень Даволковсто. А мезе ней моли?! Череть лыказевить... Ней лиякс арсить: мезекс мирдесь, мезекс эйкакштне. Сынь аволь канст, сынь мелявксонь улав. Чачтт, сэредькст кирдть, тряк-кастт... Мирдень-нинь мель ванома... Мезекс весе те?! Озак «Жигулизэть» эли «Фордозот» ды ливтяк ков мелеть, куш Ковонтень! Мезде мелеть ярсак, мезе мелеть оршак, удок зяро мелеть. Ней ламот одтнэстэ мезе мартояк а полавтсызь те ламбамо, шождыне эрямонть кудораськень-семиянь пизэ лангс. Аватне допрок лоткасть теемадо сень, мезень туртов Чипазось нолдакшнынзе моданть лангс. Лоткасть чачтнемадо. Мезекс? Катядо... Сон аволь «неенсетнеде». Вановтозо эрямонть лангс лия. Мекс эзь лисе мирденень? Мекс кадовсь эйкакштомо? Кортамось аволь шождынетнеде, аволь чик [93] шканьгак, — Видяй чатьмонезевсь, нурька шкань ютазь пейдезевсь: — Лекциям, авай, прядыя, тон теде монтеменьгак содат. Нолдык чумом монологом кис.
Авась цёранзо кунсолозь кунсолось. «Видеть Видяень валонзо, а мезе меремс», — эсь пачканзо путсь питне марязентень. Марямга поладсь:
— Мон, сыре ломань, ава, истя меревлинь: пертьпелькссэнть чачтнить-левксыить карвотне-сеськетнеяк. Кастомс чачтозестэнть Ломань, аволь левкс, — вана мезде тенек эряви превть яжамс. Чачтнемс — тюрьматнень, кода тон мерить, пештямс? Те а тев. Теяк а тев: ламот чачтнить ансяк... вейке, — ёвтызе Юлия Григорьевна меельце валонть ды теевсь тензэ визькс. Натой сеть шкатнестэ, зярдо чачтызе Видяень, аватне чиремекшнесть вейке ёнов; эзть сода, эзть арсе, мезес те пачти ломанень сыменть. Сестэ уш апарось — нолдамс вейке, а раштамс — покшоль. Ней...
— Мон педе-пес а содан, мекс Катя эзь муе мирде, мекс кадовсь «пуловтомокс». Превей — те истя. Истятнэ кадновить ськамост — теяк истя. Сон мезеяк эзь ёвтне. Илязо мендяво, пелян, шожда эрямонть ёнов. Машиназо оно кодамо... Сельметь сявады! Мезекс мирдесь? — Видяй прядызе кортамонзо, стясь, ютась ды арась вальмантень, педявтызе вановтонзо пиже, мазыйстэ судрязь пря, сэрейдеяк сэрей пичетнес. «Кодат сынь видеть, сэрейть ды кувать эрицят! Превейтькак... Сэтьме шкасто истят домка арсемат арсить, а чулговить сехте вере эрицянтеньгак. Паряк, сынь зярдояк ёвтасызь, кода идемс ломанень сыменть ёмамодо, кода седе превиявтомс сонзэ...» — арсезевсь сон, ожо пильге маралятнень лангс ванозь.