Поладкстомо (2016)/Поладкстомо/5
[59]
V
Истляев Николай Ёвтнема
ВИДЬМЕВТЕМЕ
Иняень Пиченькужосо содасызь бизмолкай эйкакшонь пес. Ды кода эно лиякс? Пиченькужось — аволь ош. Веле. Васов кадовозь иетнестэ, зярдо ломантнень ютксо кода ней човорявомат пек арасельть, эрицянзо полавтневсть пек-етамбаро. Секскак содасть вейкест-вейкест весе.
Сеть умонь шкатнестэ, зярдо эрямонтень ушолесть совамо Трактортнэ-машинатне, Иняйтне покш цёрынест вельсоветсэ лемдекшнизь Артёмокс.
Ютасть иеть. Шабра велесэ прядынзе тонавтнемань кемень классонзо, седе тов институтсо-косо тонавтнемадо пек эзь арсе.
[60] Ковгак эзь туе зепень пештямояк. Прядсь механизациянь школа ды кадовсь чачома велезэнзэ.
Цёрась Артём мазый, мазычисэнзэ мейсэ-бути моли ава ёнов. Паряк, чамаумарьсэнзэ яндавинетнесэ? Сэрей. Лавтовонь келейчисэяк Пазось эзизе покорда. Корозо сэтьме, а капшиця, вайгель а кепси, а пижни. Неть ёнкстнэ, а стака редямс, аволь авань. Машты прянзо кирдеме. Колхозсонть ловови тракторонь дока содыцякс. Содасы сонзэ меельце гайкинень пес.
Веле. Тевтне аволь кода ошсо. Прядовома а содыть. Эно кода сынтемест? Те ошсо — онкставить чассо. Аволь педе-пес истя. Велесэяк улить част — те чипаесь.
Тонавтнема шкасто саезь Артём кирдсь седеензэ маласо Света лемень кандтницянть. Тонаяк эзь «орголе» Артём лемденть. Вечксть салава, ёжост киненьгак апак невтне. Эсь пачкаст. Светанень тетянзо-аванзо максокшнызь лементь лияназ ашо черензэ кувалма. Вадряль седе эрзякс лемдемс — Валда. Шкатне лиятальть, ки теде сестэ арсесь.
Вечкевсь Света тейтересь ламонень. Ульнесь мезень кис. Покш сельмензэ маней чистэ эрькень сэньшть, секень вант ваят, судопринезэ аламнеде ноцковтовозь верев, турванзо човинеть, верцесь аламнеде лисезь икелев. Теде маряви, свал мизолды. Эрьвась редясынзе ашо пеензэ. Пейдезеви — мерят чипаесь гувк варшты чопода пельтнень экшстэ. Сэрьскак мельс тукшнось. Артёмнень лавтовга. Эчкела рунго. Весемесь, кода кортыть, мартонзо.
Школань прядома иестэнть, талай сёксня, Иняень вете стенасо кудост зэрнесь моротнеде ды сорнось киштемань дубордоматнеде — чиявтсть урьва, урьвакстсь Артём цёраст. Фатасо копачазь, каштомикеле озадо ашти Света. Эрьвась, кинь мелезэ варштамс одирьванть лангс, кепедьсы копачавксонть. Тень кис эряви пандомс — каямс, невтемань кис, зярыя трёшникть ярмакт. Кезэрень пингень, умонь-умонь шкань кой.
Мазыельть, сюпавольть мельсэ-валсо, каванямосо эрзянь умонь шкань урьвань саемань койтне. Секскак Иняйтне мель путсть ламо мезе тешкстамс эрзякс. Мазыельть... Ансяк аволь свал, кирдема превсэ, парось прялеви паросо, мазыесь мазысэ.
...Эрить Артём ды Света колмо малава иеть. Света теке аволь мирде экшсэяк, а пекии. Кевкстнесь, пшкалесь тень кувалма малавикс аватненень, кортнесь. Макснесть превть. Лезэ — кодамояк. Савсь [61] тензэ молемс — паро, аволь васоло — буень пичкамкудов. Эрьва кодамо вешнемадо-ванномадо мейле ашо халатонь кандтницятне ёвтасть: талномс, келя, тонеть, ава, а мезть, авань шумбрачить мартот, тувталось — мирдесэть. Эряви сонзэ ванномс.
Теке чинь чокшне, зярдо Артём сась важодемстэ, Света ёвтызе поланстэнь, мезе мерсть тензэ пичкзмкудосо.
Ризксэв кулясь — мирдеть пельде эйкакш иля учо — токинзе, скирдынзе седеест. Кавонест кармавтынзе арсеме: кода улемс, мезе теемс, кода эрямс икеле шкане?
Эрямось удома-оймсема а соды. Свал тевсэ. Соки-види, моры-лайши, чачты-калми... Ушосонть теле — теи телень тевть, тундо — тундонь.
Колмошка иень ютазь, пичкамкудова-кува од ломантнень яксемадост мейле, вейке маней, цятор якшамо чистэ Иняень кудос сась од эриця — Света чачтась цёрыне. Кедте-кедьс кундазь совасть кудонтень кеняркс ды чирень а содыця ризкс. Кода а эрьгелемс, кода а кецнемс, Света ней — ава! Алкуксонь. Аволь олгонь. Аволь конёвс сёрмадозьгак. Кармась содамо, кодамо питнейчизэ модамасторонть лангсо. Чарькодизе, мезе аштить авань мелявкстнэ: пакшань андомась, мадстемась, вень куншкат стякшномась...
Артёмонь те кулясь лоштядизе пилеюрга. Аволь кецнемань, допрок лия ёжот сэвсть седеензэ, сезнесть удоманзо: кие, кодамо алюха лездась, лепиявтызе нинзэ? Те кевкстеманть марто сакшнось лияяк, седе оймавтниця: «Паряк, тунь а кияк — монсь? Каня врачтне пазт, каня а ильвелить? Оно Сёвонень Ванянь Олда низэ ниле иеть чаво якась. Ды мезе? Ветеце иестэнть — цяр — кавтаськеть! Кавто цёрынеть. Вана теть ачачтакай Олда! Эряви одс варштамс пичкамкудов, — юв-яв ютась пряудемганзо. — Паряк, мезеяк полавтовсь эйсэнь?». Те меленть коцькердизе допрок лия: «А мезть азгондемс. Сындест парсте содат; цёравтомо чачтась ансяк ёвксонь «девась». Секскак а мезть лытамс, шка ютавтнемс, пичкамкудотнева».
Арась, эзь кирдеве цёрась. Кочкась тевтнеде седе оля чи ды сыргась шабра велев, ков макснесь вал а якамс. Молемстэ ледсь мелезэнзэ васень якамозо. Понгомс докторонтень ульнесь ашождыне. Савсь зярыя част учомс. Эйсэнзэ сэвсть визькс ды мезде-бути пелема.
Видельть Артёмонь икелень арсеманзо. Буекуншкав якамозо паро ёжот эзь казе, диагнозось — «цёрань лавшочи» — кадовсь теке: [62] учомс эрямонь поладыця тензэ эзь савкшно. Теде седеяк пштистэ кармась сялгонеме седеезэ, седеяк марявиксэкс теевсть кевкстематне: кинь пельде эйкакшось? ков пачколесь Света? мезе теемс, кода улемс седе тов?
Теке чинь чокшне кавонест ютксо ульнесь кортамо. Аволь шождыне. Теке кавто тюрьган атякшт анокольть каявомс вейкест-вейкест лангс. Эрсесть недявомат икелеяк, зярс Света кандтнесь пеке. Сестэ кода а кода Артемонь потсо типельдсь кемема — пакшась сонзэ. Ней...
— Кие? — видьстэ сельмезэнзэ ванозь, уш зяроцеде кевкстнесь нинзэ Артём. Вайгелезэ сорнось кежтнеде.
— А кемат?! — серьгедсь авась верьга вайгельть, сэнь сельмесэнзэ кивчкаесть толт. — Тонь, тонь!
— Арась, а кеман. Врачтне мезеяк од эзть ёвта. Диагнозось кадовсь секесь! Косто монь?! Кона ёндо?! Ёртовлинь, ды а ёртовить прястон теде икеле ёмсемадот мельтне. Косолить сестэ? Чоп араселить... Козонь кадновить вейксэ ковдо икеле? Кие пакшанть тетязо? Видькстак! — цярнось кудосонть Артёмонь граж вайгелезэ.
— Тон, тон! Саты теде! — текень содась Света, автордызе ужосто тенстенть ды выр-выр педясь тенсеме истякояк ванькс кияксонть.
— Иля кенгеле! Мон, содат, тетякс а маштован. Кинень макснить? Кие пакшанть тетязо? Ёвтык! — эзь оймаво, серьгедсь Артём, кундызе тенсицянть вить кедте ды вийсэ сорновтызе. — Кие? Таго кевксттян, аломанень пона!
— Мон уш ёвтыя теть валом, саты теде, саты, — серьгединзе Света некеть валтнэнь ды вийсэ ноцковтызе кедензэ Артёмонь кедьстэ.
— Э-эх тон, усксевиця! Мейсэяк а пештяват, яла теть аламо! — рангстась меельцекс Артём, эрязкалезь оршнесь ды лиссь «пси» кудостонть ушов.
«Кодамо визьксчама! Кодамо нулгодькс, чопода ойме ломань! Ранги-пижни текень: «Тон, тон тетязо!». Косто мон, бути... Кие нолдтни моданть лангс истятнэнь, кие?
Арасть эйкакшонок... Мезеяк а теят. Куш модаварява прак — арасть. Чарькодян, мелявты теде, ризны-палы Светаяк. Эседень кортамскак а мезть! Кода цёра топавтан мелензэ, а пеняци лангозон. Мезе эряви аваломаннень — максан... А сялды. Эйкакш вана... Паряк, саемаль эйдень кудосто? Сон оно мезе тейсь, нулгодькс ломань...» — эзть лисне Артёмонь превстэ назой мельтне кардазонь [63] мелявкстнэнь топавтомстояк. Макссь ракшатненень тикше, симдинзе. Сайсь сянго, совась кардос, кундась удсема таркаст урядамо.
«Мезе теемс? Мезе теемс?» — оймамонь а содыця баягинекс чавсть удемень менчевкстнэсэ неть кавто валтнэ, зярс котьмась, тейсь эрьва чинь тевензэ кардазъютксо, таштыльть, кекшильть зярскак кодамо-бути варинес, аламос аштезь лисильть мекев.
Ледсть мелезэнзэ — аволь васенцеде — умок удалов кадовозь урьвакстомань чинзэ. «Зяро паро, эрявикс, превей арсемат ёвтазельть, зяро кеняркс ульнесь сеть читнестэ-ветнестэ! Каня совсесь превс мелесь, мезес пачкодтяно, козонь пачтясамизь эрямонь леесь... Бути арась эйсэнь видицянь вий, эряволь кодаяк вейсэ арсемс, онкстамс, кода улемс, косто ды кода саемс-муемс кака. Тень таркас Света...»
Прядынзе Артём кардаз-кардонь мелявксонзо. Шождасто лекстясь. Чукинзе кузтемпесэ, сайсь тенсть, «ушонь» кемензэ. Совась кудос. Каштомикельксэнь стуворсонть учость эйсэнзэ пси ям вакан, ниле-вете кшипечтть, чай кечине. Стуворонть песэ аштесь озадо Света.
Каинзе Артём оршамонзо, ёрвалдынзе кедензэ. Ансяк ушодсть ярсамо, икеле кудосто каятотсь, теке кияк кармавтызе, пакшань авардема вайгель. Света шалт путызе пенчензэ, стясь ды ношкстась лайшеманть оймавтомо.
...Эрямось эскельдясь сёвноматнень, ацирьгалематнень трокс. Сонензэ весе неть пижнематне-лайшематне... Теке чадыведте мейле, эрямонь леесь кармась аламонь-аламонь совамо чирезэнзэ, скимеме.
1935-це ие. Ушосонть валдосонзо элякалесь эйзюрковонь 30-це чись. Самай те чистэнть Артём васенцеде варчизе коштонть танстензэ. Чачома чизэ. Эряволь пурнамс стувор, тешкстамс, кода икеле тейнесть. Моро серьгедемс. Тень таркас... Течи тешкстызе сонзэ Артём ансяк эсь пачканзо. Кодат чачома чить, зярдо седееть ангорить сядо пинеть?
Кудонь-кардазонь, колхозонь тевтнесэ чинек-венек пивтезь, эзть марявояк, ютасть Светань чачтомадо мейле кавто иеть. Шка, шка, ков тон истя капшат, ков панят?!
Полатнень эрямо лувсо ульнесть эрьва кодат лехат. Маней, валдосо налксиця читнень полавтнесть ловт-бурят, мизолкстнэнь — пеень чикордомат, чирь вановтт. «Муезь», кода ловсь Артём, [64] цёрынентень топодсть кавто иеть. Пекекиське лангсо ёзмолдомань таркас кармась якамо. «Авай» валонть цинсть ваньксстэ кудонь келес гайгевтсь.
Ды тесэ «кецневтизе» Артемонь, колызе сэтьмечинзэ од куля: низэ... пешксесэ. Таго... Ней те сонзэ истя, кода кавто иеде икеле, эзизе абунгавтояк. Теде икеле Света зярыяксть ардтнесь, мукшнось тувтал, шка, буекуншкав. Ков, мезекс — ансяк сонсь содась. Артём кода маштсь кардась эйсэнзэ — стяко, Марицякскак эзь тейне. Кунсоломонзо Артёмонь эзь арсеяк. Тосто велявтнесь талай чикуншкадо мейле, меельцекс — чопоньпелев. Кавто иесэ «Муевкскенть» ваномо кадновсь... тетязо Артём. «Вант! Эряви — омбоце муян!» — марявсь Артёмнень, кирдсь превсэнзэ Света.
Ормаменьксэкс Артёмнень ульнесть тевтне. Кодат ансяк тевть эзь сявордо сюмора шкатнестэ. Кода ансяк эзь пансе прянь ды оймень сэредькстнэнь — чарыця-велиця даволтнэ эзизь кадно. Низэ таго пеке кандтни... омбоцеде... Таго карми човт нолдамо кургостонзо: «Тонь пельде!». А кемевияк, улить истят кенгелицят.
Артём а весть кармавтнесь «мукшныцянть»: «Видькстак, седейкельмевкс, визькстэме, кинь истя вечксак, кие эйкакшонть (ней уш, ловт, омбоценть) тетязо?». Арась, Артёмкс эзь лисе. Низэ видькстамодо эзь арсеяк. Вейкень содась: «Тон!». Валонть ёвтась прок магнитэнь лентас сёрмадозь, конань аноколь омбокстнемс куш сядоксть.
Чачтома кудов Светань ильтямо Артём эзь лисе. Мезеяк эзь анокста, мезень кисэяк эзь мелявто. Сонсь Света вень куншкат, зярдо куродызе, шабратнень кедьстэ гайневтсь ды тердсь «капшакай», самозонзо лиссь ушов.
Таргонь ютазь Иняень эрямо пизэст сюпалгавтызе цирниця-вешиця вайгельсэнзэ омбоце цёрыне. Кецнек, Артём! Кецнек! Света, зярдо ускизь чачтома кудосто, капшазь совась покольнензэ марто икеле кудос ды путызе пакшанть анокстазь-ацазь лавсентень, конань понгавтокшнызе чачтомо туемадонзо икеле. Эзь кенере кайсеме, лавсесь лыказевсь, каятотсь човине гайтьке. Авась седе курок каизе шубанзо, юксизе палямештензэ, комась вешицянть вельксэс ды макссь поте.
Артём те шкастонть важодема таркасоль, машинань-тракторонь парксоль. Сась сундерьгадозь. Каинзе удало кудос содов-оев оршамонзо, бульдерь-бульдерь шлясь, кармась мезе муи ярсамс пурнамо. Якшамкайстэ таргизе (исяк пидизе) кснав ямонть. Каясь ваканс, эждизе.
[65] Печксесь кши, путсь чаекс лакамо ведь ды озась стувор экшс. Чоп вачоль, секс амолясь кснав ямдонть паро мельсэ. Лаказевсь ведесь, тейсь чай. «Вана паро, ней лия эрямом!» — мерсь стувор экшстэ стямсто.
Чи-и-икорк тейсь икеле кудонь кенкшесь, ды совась Света. Кедьсэнзэ, мештезэнзэ лавшинестэ лепштязь, кирдсь ашо тапарксот эйдензэ. Чамакиськезэ ловтаня, сельмензэ нусманят. Эскельдясь мирдензэ малас, венстизе тякиненть.
— Эрь, варштак цёрать лангс, тетя! — мерсь, нусманячинь пачк мизолдозь, теке кодаткак кечкеремат ютксост арасельть.
— Пандя раксемс, визькстэме! — Лип кашт, ды: — Апештявикс! — марясь авась каршо.
Каня истят валт мариксэль сон, моданть-масторонть лангс од эрицянь нолдыцясь? Бути эйкакштне аволь Артёмонь, лия валт, марязтнеде башка, аволь учояк. Теяк паро. Седе кельмевтицяткак а стакаль марямс. Содындерят, совсить пежетьс, эйкакшот тетяст алкукскак допрок лия, аволь Артём, кадови вейке — чатьмонемс.
Улиндеряй Артём?
Эрямосонть мезть ансяк а эрсить, кодат тамашат ансяк а вастневить! Сестэ Артёмонь кургосто марязь валтнэде, истя вастомадонть покордавомась — аонкставиця.
Света вадяшизе мештензэ ёжосо тапаркскенть, комавтызе прянзо, цюцьк палызе ды апак капша совась, панжизе кенкшенть, мекев икеле кудос.
Артём шлинзе-нардынзе пенчтнень-вакантнэнь, оршнесь ды лиссь ушов. Вельмевтизе кардазонь толонть. Тевтнень, кодат ёндол марто пурьгинеть иляст зэрне, кодат кандыловт иляст вешке-тандавтне, теема. Нолдындерясыть олячис, кузить сявдиксэть лангс, кшикопша стуворот лангс а «валги». Тень мельсэ кирдезь, Артём кундась кардазъютконь тевезэнзэ.
Совамаль кудос, варштамаль ансяк чачозь пакшанть лангс, ды мелезэ арасель. Содамс, ки ёнов моли? Вельть вишкине, кодат содамот. А мезть ледстнемскак теде... «Ёртык прястот!» — путсь чапо те мелентень. Васенцесь, Микольне, Артём ёнов дух а моли, куш ве кикске эйсэнзэ улевель Артёмонь. Оймавтнесь лажныця томбазь седеензэ вейкесэ — аволь раужо черь, «эсест».
Велесэнть весе ловсть Миколень тетякс Артёмонь. Кодат кавтолдомат, вельсоветэнь конёвтнесэ истя сёрмадозьгак: Иняев Николай [66] Артемьевич. Артём тень каршо молеме эзь арсеяк. Ков молят? А лисят велекуншкас, а серьгедят цятор вайгельсэ: эйкакшось кирмалав потсто муезь! Садо, ванодо!
Ней таго канст, таго пря яжак — кода лемдемс омбоценть. «Инешкипаз, те истя мезде мон мелявтан? Монень кодамо тев! Света кадык арси», — апак учо содавтызе Артёмонь мелесь.
Вана теть а пачтниця, вана чаво видьме! Эйпаро уцыз-кудо-раське пурнась — ниленест. Артёмнень ашождыне. «Сокамс ды сокамс эряви, — а весть совсесь пряпотмозонзо. — Кие-бути тень эйкакшт «чулгони», мон карязт яжан...» Седеень киртыця те меленть шкань-шкань айгшизе лия: «Мезе эно, бути эстеть а чачтовить? Паро, лия муевсь. Цидярдт, цёра». Ёвтави кодаяк «цёра» валось, мельтне таго чудикерькскекс поладовить: «Цёра... кодамо цёра — пичкавтозь айгор».
Неть мельтне-арсематне ульнесть Артёмнень ризксэнь пургондавтыця^ ды, ковгак а тейсак, ёжонь... витицякс.
Потмовий тензэ макссь се: Света кудоютконь малав весе тевтнень-мелявкстнэнь усксь апак пеняця, ловсь эсензэ, ансяк эсензэ тевекс. «А сими, теяк паро... — оймавтнесь эсь прянзо Артём. — Аволь улеяк те...»
Таргонь ютазь омбоце «муевкскентень» лемень максомадо Иняев Артёмонь арсеманзо полавтовсть. Кадык алтакшнось а эцнемс те тевентень, эзь кирдеве, ёвтызе мелензэ. Света каршо валгак эзь мере, лемдизь Алексеекс, Лёшакс.
Эрямось ве таркасо шешкема, нузяксчи а соды. Свал-свал килангсо, свал тевсэ. Цёрынетне, Миколь ды Лёша, кассть прок паро модас озавтозь туминеть тундонь лембе пиземетнеде мейле. Покшось, Миколь, тедеде сёксня васенцеде сови васень классос, веженсенть, Лёшань, ветнить эйдень кужов. Сонгак омбоце иень ютазь эскельди лелянзо мельга. Эйкакштне виевть-шумбрат, чартьчивть, эрязат: чийнить-кирнявтнить — сизема а содыть. Ули мейсэ каштангалемс ды мейсэ пря идемс. Аволь ансяк Светанень...
Мольсь Иняевтнень эрямост, кода велесэ малав весе эрицятнень — певтеме мелявкссо-важодемасо. Чоподасто чоподас. Васня кудонь тевть — стяк ашолгадозь, мельгаст — колхозонь: сокамот-видемат, нуемат-пивсэмат... Ансяк кенерть чарамо, карязтнэнь ливчакавтомс.
[67] Света, ансяк совавтовсь веженсь цёрынесь эйдень кужов, сиведизе прянзо колхозонь фермасо вазонь андыцякс. Арыксэль скалонь потявтыцякс, савсь те меленть кадомс: чоп сюлмазят тевезэть. Скалтнэнь потявтома кавксть — валске ашолгадозь ды чокшне, — лиясто колмоксть. Истямо «кувака» лувсо эйкакштнень мельга кодаяк а якават, кадовить пельсурозокс. Сынст мельга вант ды вант! Сельметь улест оржат. Эйкакшт, ков ансяк а эцить. Секскак меленть, улемс потявтыцякс, савсь прястонть ёртомс.
Тевть, тевть, тевть... Истямокс уш шкинизь-чачтызь ломанень сыменть. Важодемась теизеяк ломаненть ломанекс. Ней малав весе кедень-превень тевтне, мезе тейсь ламо-ламо пингень перть, сявордозь машинань «лавтовтнень» лангс. Мезес те пачти, ков вети те кись, а арси. Ламотнень превсэ вейке — «ялатеке».
Омбоце цёрыненть «муемадо» мейле Артём ды Света ютксо якстере кортамост верьгелесть седе чуросто. Пирявксокс тенст ульнесть пень-чирень а содыця мелявкстнэ, кшинь-салонь кис нерьгемась. Те пирявксось ульнесь васень мадстицякс гувнозь паломатненень. Паряк, ведтеяк пек лездась. Виде, пувазевильть лиясто лажныця вармат. Ульнесть, ульнесть... Ансяк сынь ютнесть седе куроксто, зыянтомо. Кинь кудосо сёвномат-ацирьгалемат а верьгелить? Ломанесь тонады. Ули истямо ёнкс обуцясонзо. Эрьва мезес тонады.
...Кизэ. Менелесь, маряви, налкставсь пелевеёндо ков-бути капшиця чопода-сэнь пельтнеде. Ков эрязкалить, сынськак а содыть. Содыть сынь вейкень: уить ды уить. Ули-арась кияк учицяст чилисема ёно? Кинень тосо эрявить? Уить тарго, мельганзо омбоце... Окойники оймасть, паряк, маштсь илыкест. Ней ванстыть менеленть ваньксчинзэ тия-тува кадовозь кавшаня ашо панкст. Ковгак а капшить, нувсить, удомат явавтнить.
Таргочи. Света прядынзе-яксевтинзе кудоютконь ды фермань валскень тевензэ, пурнась-сэрнясь ды сыргась буекуншкав, базаров. Эрявсь рамамс тень-тонань. Кудоюртсо свал мезеяк эряви, а саты. Чольдерькай кель цёрынетнень марто кадовсь Артём. Тевесь ашождыне, вант. Сельметь икельде илить нолдтне.
Света сыргась ялго, машинань учнеме эзь карма. Мезе неть колмо вайгельпетне! Эскелясь келей кинть чирева капшазь. Сонськак эзь сода, кодамо вий пансь эйсэнзэ. Молемань перть эзь тукшно превстэнзэ вейкесь: седе курок вастовомс ды ёвтнемс мелензэ [68] икелечинь вейсэнь эрямодост, эйкакштнеде ды ламодо мезде лиядо. Кецнесь эсь пачканзо: кенгелезь эрямонтень, оймеёжонь майсематненень путы пе, ушоды од, седе вадря эрямо. Кавтолдомат тень коряс превсэнзэ арасельть.
Велявтсь Света чикуншкадо мейде. Сась мартонзо асодавикс, эседензэ, неявсь, седе од, нурькинестэ наразь валдо тусто черь цёра. Светань сэрьсэ, чаматюсозо валдо.
Артём удало кудосо стувор экшсэ витнесь-петнесь нузялдыця яксякай часост. Кепедизе прянзо, варштась совицятнень лангс. «Те таго мезень яксиця?» — ютась пряванзо.
Света ды асодавикс цёрась путызь кияксос юдмаст-канстост, юксизь-каизь котаст, эскельдясть икелев. Артём марто эзть шумбракстнеяк. Икеле кудосто либорк лиссть, теке ве пизэнь озязлевкст, эйкакштне. Сынь чарасть-велясть аваст перька, кецнесть, учость, тенст венстить базарсто тантей рамавкске. Комась аваст ды мезе-бути таргась кияксос путозь юдмастонзо. Теке басом саинзе «левксэнзэ» икеле кудос.
Куроксто мекев лисезь, Света ютась чатьмонезь стядо аштиця ашо панарсо цёранть ваксс. Саизе коморозонзо сонзэ вить кеденть ды пшкадсь жойниця вайгельсэ — теке бажась, веленек марявлизь — Артёмнень:
— Те монь... мирдем, — невтсь кедьсэнзэ асодавиксэнть лангс.
Артёмнень марявсь, лисьмасто ансяк таргазь ведь ведра жойневтсть ланганзо. Велязевсть превензэ, тармазкадсь, сеске эзь чарькоде, мезде моли кортамось, мезе лиссь. Вансь каршонзо аштиця Светань сельмес ды эськанзо кевкстнесь: «Те мезде истя тон? Мезе моли?».
Окойники Артём вельмесь марязь кулядонть. Сась ёжос. Чожолк шаштынзе икельдензэ частнэнь, кедьёнкстнэнь. Кадызе тевензэ, стясь. Талномань апак невте, пурнась вийть, корсяня вайгельсэ сэтьместэ мерсь:
— Паро. Пурныть-сэрнить нулат-валат ды нейке шлявт кудостонть. Мирдеть кудов. — Мериксэль, саить эйкакшот. Эзь мере. Кургозо эзь панжово. Кода сон сынтемест? Сынь сёрмадозь сонзэ лемс. — Эйкакштне кадовить монь марто. А ёматано.
— Туемс тутано. Эйкакштнень марто!
— А сайсыть, тетякс сёрмадозян мон, — кирдсь эсь ёнксонть Артём. — Сынь монь! Монь! Лемест, кудолемест... [69] Мейле мезе? Мон аваст. Сайсынь. Сынь аволь тонь. Ансяк сёрмадозь лемезэть, — псинзэ пачк видькстась Света сеньсэ, мезде кевкстнесь Артём ды марсесь текень: «Тетяст тон!».
— Мон тринь-кастынь. Кадовить монь марто...
Артём чарькодсь, цёрынетнень коряс видечись ды виесь ёваст ёнот, чарькодизе валонзо лавшочист.
— Те кода суд мери... — Артёмонь сельмес палы вановтсо ванозь, цийниця вайгельсэ мерсь авась.
Апак учонь инжесь чатьмонсь. Аштесь, учось.
— Кудось монь леМс сёрмадозь, — Артём сонськак эзь сода, мезёкс ёвтынзе неть валтнэнь. — «Мирдеть» руз? — мекс-бути кевкстизе каршонзо аштиця Светань.
— Руз...
— Эйкакштне — эрзят. Мезе меремс рузонтень... Мезеяк а мерян. Весе те кулаганть паник тон. Секскак... Чокшнес тесэ чинетькак илязо кадово. Цёран рузонтень а макссынь, сынь эрзят, чоледить эрзякс! Вана истя! — кежень Пачк серьгедсь Артём.
Тень эйсэ чумочинь вешнемаст, вейкень-вейкень чумондомась прядовсть. Артём лиссь. Саизе латалдо стенас понгавтозь пелюманть, човсемканть, одс совась кудос, пештсь кед___-балак___ кельме ведь лиссь сыргась Пандочамав тикшень ледеме.
Прязо увнось. Понгсь, марявсь, чадынь ведьвелявксос, «вийтнень ванстома; ванома, ильведькс илязо тееве. Потятанзат велявксось — «вай» а кенерят пижакадомо... — лия мелетькак эвтсть прясонзо молемань перть: — Цёран... Эряволь «од мирдентень» вачкамс зяро вачкави, нолдамаль кузтемпестэ мукоронзо пангсо. Мхы! Мезень кис? Мезень чумозо? Мекс кавто оно кодат цёрат «тейсь»? Сон цёра... Тень кис? Чумось... Ды кода меремс... Кода иля мере, тевесь Светасо. Сон чумоськак. Мекс сон? Сон ломань, ава... Кодамо ава, а вэрчиндерясы пачтеманть сэредьксэнзэ-танстензэ? Лисни, чумонь ушодксокс мон аштян, мондень, монь лавшочиде пачкодинек тенень. Ялатеке Светанень эряволь теемс Лиякс, аволь истя, визькстэме. Саемаль, зяроксть мернинь, урозэйкакш. Саемаль...
Кода, кода улемс ванды, вандыде мейле? Мезе теемс? Зяро вийть максозь, иеть ютавтозь, ойме путынь трямс-кастомс «монь а монь» тарадкетнень... Весе те шляви-нардави прок чадыведьсэ. Туить, эйкакштнень сайсызь, кадован ськамон...»
[70] Ней уш исень кудазоравась, кодамокс ловсь эсь прянзо Света, ды од мирдезэ Иван сеске эзть туе. Света мадстизе веженсенть, саизе мартонзо паникудос васенценть. Кармась анокстамо мезеяк ярсамс. Ватксесь-керсесь модарькат, каинзе пачалгос, почодынзе салсо, нуртясь кансёрой, путынзе рестамо. Путсь лакамо чаекс ведь. Печксесь кши.
Иван аштесь озадо стуворонть песэ. Чатьмонсь. Вансь, кода теи тевензэ авась. Миколь цёрынезэ чоледсь аванзо марто эрзякс. «Од тетясь» цёранзо ёвтнемасто валгак эзь чарькоде. «Мезде кармат кортамо те ят ломаненть марто? Косто муизе авам истямонть?» — кирдевсь цёрыненть прясо.
— Эта будет наш свадьба! — кулдоркай вайгельсэ рузкс яволявтсь Света. Таргиксэль «пси» симемапель, ды мекс-бути арсезевсь лиякс, путызе суликанть мекев.
Мирденень алкуксонь чиявтомазо, содави, допрок лияль. Ды мезть ней теде... Те ульнесь умок. Стувтомс вана — а стувтови. Панжокшнось умарьчувтось мазыйстэ, неявсь ашо пельнекс, певерсть ашо ловокс бельгинензэ, умарть... эзь максо. Эзть учово. Уцяска...
Иваноньгак текекс. Тетянзо-аванзо ютавтокшнызе урьвань саема коенть келейстэ: пельсть, иляст лисе кортамот. Пелевеле свадьбасост киштсь-морась, ансяк... зяро эзть эря, Иванонь низэ эзь пекия. Зярыяксть аштесь пичксема кудосо. Мезеяк эзь полавтово. Эйкакшонь раштыцякс тосто эзь лисе. Тесэ сон, Света...
— Монь кавто. Кинь? — кончтась ды цельця тейтерекс пейдезевсь Света. — Содат. Коень-закононь коряс тенек эзть муеве. Лездыть тон... Сынь — тонь, Иванонь. Конёвонь коряс — Артёмонь. Келесткак Артёмонь, — ледстнесь «течинь саевть одирьвась».
Модамартне тыжнэсть-пыжнэсть — реставсть. Лакась чайникесь. Света кайсесь кедьгинетнес чай, сахар, нуртясь лакиведь. Серьгедизе ушосто, ков кенерекшнесь ношкстамо, Миколень. Озасть ярсамо...
Артём Пандочамасо яла ахолясь пелюмасонзо. Ледемась, ки соды, ламодояк ламо виень саиця. Седеяк — тесэ. Тикшесь калгодо-сыре, аволь сэрей, тапазь. Секс секе тев савкшны таргсемс зепестэ човсемканть ды човсемс «кичкере пееленть». Чипаеськак псинзэ а вансты, «кавани» эйсэнзэ моданть, ледицянть. Пси. Важоди Артём панартомо. Сонзэ каямоськак а лезды. Ливезесь копорьганзо чудезь чуди.
[71] «Инешкипаз, ёвтык, мезень кис чачтымик пежетев моданть лангс? Майсеме? Кортыть, тон весемеде виеват. Превеяткак, келя. Ловить тонь седеймарицякс. Истят валткак марсинь: тон энялдомань топавтыцят. Макст, явт тень куш зярояк цёравий, чансть-уцяска! Мекс эрямом эрян теке лакиведьсэ?!
Кода ней улемс тень?
Меринь тенст кадомс кудонть. А кадындерясызь? Кудось аволь ансяк монь, Светаньгак. Сестэ кода улемс? Вешнемс лия эрямо тарка? У-у-у... Куш килькшс прят тонгик!.. А мезе? Паряк, истя теемаяк? Килькшесь весементь таркаванзо аравтнесы... Мезекс раздемс седеенть?.. Ужо, ужо, Артём! Тов кенерят. Тов кенкшесь пекстневемат а соды. А чить, а веть, а кизна, а... Кенерят, цёра, кенерят. Неть мельтнень ёртыть прястот».
Артём нерькстызе пелюманерензэ седе калгодо таркинес, човсизе — мекев-васов ютась кериця таркаванть нилексть-ветексть, поладызе тевензэ.
Ахолясь часошка. «Саты», — мерсь марямга, начтызе псиденть коське кургонзо. Ютась, сизезь эскелязь, ледезь тикше лангс каязь панаронзо ваксс. Оршизе, каизе лавтовонзо трокс пелюманзо, варштась меельцекс теезь тевензэ лангс ды апак капша сайсь ёнкс кудов.
Кодамо малавикс Артёмнень кудонзо чачось! Латось, вальмине марто сэньстэ артозь конякась, келей, маряви, кецниця вальматне. Эрьва лазпесь, эскинесь чавозь сонзэ кедтнесэ. А стувтсак, зярдояк а стувтсак чапонть путоманзо.
Панжизе кудокенкшенть — кашт. А кашторкс, а гайть. Совась икеле кудос. Тесэяк теке. Арасель лавсесь — васняяк редизе Артём. Шкапонь кенкшесь келес панжадоль. Тусть.
— Инешкипаз, мезе истя теят мартон?! — превстэ лисезень вайгельсэ пижакадсь, тень неезь, Артём; лепштизе седеензэ истямо ризкс-мелявкс, кодамо зярдояк эзь марсе. Аноколь прамс ды зярдояк а стякшномс.
Эскельдясь диванонть чирес ды празь прась эйзэнзэ комадо.
«Те кудось свал пешксель мелявксто, тевде, вайгельде, эрсесть, ды аволь чуросто, сёвноматкак. Эрьва кодат. Пешксель эрьва мезде. Ней... ней чаво, чаво... Кашт, пилес эциця цийниця кашт... Теке тоначисэ. Ульнесь стака, берянь, ней — кеменксть.
Секс эряви путомс питне сенень, мик вечкемс ды ванстомс сень, мезеть ули ды кодамо илязо уле. Чарькодьсак сонзэ питнензэ, зярдо [72] вана истя апак учо ёмавтсак», — яла арсесь, арсесь чаво кудонь азорось дивансо мадезь аштемстэ.
Артём эрязасто, теке мезеяк пупизе, стясь диванстонть, совась удало кудос, каясь кастрюляс ведь, ушодсь ярсамопелень анокстамо. Кодат пинеть иляст ангоря седееть, пекесь соды эсензэ.
«А ёматано! — аламнеде кежень сазь мерсь эсь пачканзо стуворонть перька чарыцясь. — Света мусь омбоце пола, мекс а муемс омбоце ни монень? Мон мезе, а аштян латякарьгак? Велесэнть мон аволь меельце ломань, а ёман!»
Тень эйсэ прядовсь «Видьмевтеме ёвтнемась. Сёрмадыцязо, Истляев Николай, тейсь тензэ эсензэ пельде истямо поладкс.
«Те тевесь лиссь покш, пиче вирь чиресэ аштиця Пиченькужо кезэрень велесэнть 1957-1966-це иетнестэ. Сестэ мон важодинь тосо сисем классонь школасо. Ветинь-тонавтынь эрзянь келень урокт. Иняйтне эрясть шабрасонок. Секс, парсте-беряньстэ, содылинь Артёмонь ды Светань эрямосо валдо ды потмура читнеде. Совсинь сыненст, сынь — миненек. Эно кода лиякс шабракс эрязь? 1966-це иестэ эрямо тарканок полавтовсь, те велестэнть туинек. Одс вестькак эзинь пачколе. Кода ацавсть эрямо кист, кодатольть уцяскаст неть кавто ломантнень, аздан. Ней сынь, паряк, ютавтыть сыречист, эли умок удыть свалшкань удомасо».
Видяй ловнызе ёвтнеманть весть озазь. Сон аволь покшоль. Ансяк тевесь аволь тень эйсэ — покш эли вишкине. Ловныцянть абунгавтызе Артёмонь уцясказо. Сонзэ ды эсензэ. Эрьва кодат ёжот печтясь, зярс вановтозо чийнесь буквасто керьксазь кикстнэнь ланга. Ацирьгалесь, сялдсь Светань мирдензэ манчеманть кис. «Те кода истя, кода истя? — яла тензэ превс эзь саеве мирдень полавтнемазо. — Каня истямо паро, важодиця ломаннень лиякс аволь «муеве» эйдине? Визьксэнь а содыця, тулонь вечкиця!» — педявтнесь кодат мусь «мазый» лемть-тешкст Светас.
Эзизе шна Артёмоньгак. «Лаксизе-инзэдизе» лавшо, шождасто мендявикс обуцянзо кис. Истямо мазый, сэрей-[73]виев. сырнень кедь, тевтеме а аштиця цёра эрясь, видьстэ меремс, рунгонь микшниця марто. «Цёрань шумбрачизэ Артёмонь аволь пек... И-их! Монень максовольгак Пазось истямо! Эрямс ды эрямс эряволь Светанень истямо орманть марто».
Кецневтизе Видяень ёвтнеманть пезэ. «Кемеви, кадык аволь кевсэ ацазь, ялатеке седе калгодо киява поладсы эрямонзо Артём. Маряви, Иваннэнь Светань вечкемазо курок прядови, ды сон мурды Артёмнень. Эйкакштне вейсэндясызь ... — яла арсесь сон. — Вантака, а Артём иень коряс сави тень тетякс.
Эрьванть эсензэ уцясказо, эсензэ леезэ, кува уи эрямонь венчезэ. Артёмонь истямо, монь-лия. Полавтык азё те леенть чудеманзо! — кодаяк эзь оймаво Видяй, лакась ловнозденть, кресласо аштезь. — Кодамо лажныця илязо уле эрямонь леесь, рунгонть кирдема видестэ, канстонть кандома прянь кепедезь ды пес».
Путызе журналонть вакссонзо стуворонтень. Стакасто-кувакасто лекстязь, стясь. Ахолясь-ливчакавтнесь зярс-бути кедьсэнзэ ды ютась панинупалев. Лакавтсь ведь. Тейсь кофе ды велявтсь мартонзо эсензэ нупальс. Одс саизе кедезэнзэ ансяк путозь журналонть ды новольсь чевте креслантень. Лоткавтызе вановтонзо мазыйстэ ёролдазь вельксэнтень-керентень. «Иень гайтть»... Мазыйстэ, тевень содазь теезь, лия мезеяк а мерят. Панжизе ды муизе ловнозь ёвтнеманть.
— Видьмевтеме... — марямга, теке кияк вакссонзоль, ёвтызе валонть. Эсь пачканзо поладызе: «Те, Артём, кажонть пелезэ, кажось... зярдо, кода монь, мезеяк арась, мезескак а маштоват. Чумось ламонь кувалма, Артём, тонсь, лавшосто ветямо чаронть кирдить. Аватне вечкить кшнинь обуця. Сестэ пеест яжасызь эйзэть. Истяко, кода тон...».
Видяень ловномань вечкемазо таргавкшнось зярыя иес. Те ёвтнемадонть мейле сон мекс-бути кармась энгамомо, кода икеле мель тензэ эзь яво.
Юлия Григорьевна те шканть перть эрясь косо-бути пельтнень маласо. Эзь кемевеяк тензэ: Видяй истя [74] полавтовов. Нардавсь пелемазо: цёразо ваи оймень саиця ченьксэнь сёлтонтень. Ульнесь мезес ды мезде кецнемс. Видяй прянзо судос эциця чине ведентень эзизе ваявто. Кадык кадовськак седейсэнзэ сыре ризксэсь, оймензэ тензэ эзизе максо.