Поладкстомо (2016)/Поладкстомо/4
[48]
IV
Прядовсь важодема шкась. Телевизоронь заводонь «ванныця» кенкшенть ютазь, Кузоваткин Видяй лиссь ушов.
Телень чокшне. Чопоти курок. Якшамонть ды ловонь валдонть марто вейсэ цёранть сеске куродызь прязонзо сеедьстэ совсиця седеень човсиця арсематне.
«Те мезень эрямо — а кие марто кортнемс, шканть ютавтомс, а кинь кедьстэ превть кевкстемс... Весе эрить кода ломанть: улить нист, эйкакшост, кудочист, икелень шкаст... А монь? Чаводо пешксе пакся. Цёратне яла пеняцить нист лангс: келест лаужашкат, сёвныть ламо, келя, куш кудоткак кадык, вечкить, пештявома а содыть, покш ярмакт... Варчавлизь Пеняцицятне эрямс музгордицявтомо, Варчавлизь кода мон... Сестэ верьгизэнь морост кершавлизь, лия, седе эрьвела моро серьгедевельть, лия вайгельсэ!»
«Валдо кужо» лотксема таркадонть аволь васоло аумок панжсть ресторанонь кондямо. Веенсттнэ лемдизь «здравпунктокс», лиятне — «чайханакс»... Валгсь Видяй троллейбуссто ды сайсь ёнкс аволь кудов — те «совсема таркантень». Совась, кайсесь, ютась икелев. Кочкась стуворнэ. Ломантнеде аламоль, секс каваницясь-официанткась стясь икелензэ теке мерят модапотсто, теке самодонзо ёвтазель тензэ икеле.
— Мезде ярсамо-симеме карматадо? — гайгиця вайгельсэ пшкадсь аволь сэрей, иензэ коряс эчкела тейтересь икелензэ стувор экшсэ аштицянтень.
— Монень котлета марто томбазь модарькат, ниле печтть розень кши, сядо граммат «палыведь», ну... ды чай.
[49] Каваницясь велявтсь, тусь. Мельганзо сеске вельмесь мель: «Паряк, сеске кавтосядт вешемаль, мезе сядось? Ужо, иля капша, шкань ютазь вансак. Ушосонть оно кода цяторды якшамось. Эряви аламнеде эждемс потмонть». Шаштызе, аравтызе сельмензэ икелев менюнть, кармась ванномо, мейсэ каванить сакшныцятнень, кодат питнест ярсамопельтнень.
Вальмасуликатнень тона ёно сыре теле, градусникесь зяроце чи невти комсьветеетнень малава.
Яла мерить, «палыведесь» — лембень ванстыця: эжди, лезды кельмемадо. Бабань пеште! Улить лия мельтькак тень коряс — мекевлангт, лезды кельмевтемс рунгонть. Истя-аволь, стувортнэнь юткова эвтиця аволь шожда рунго тейтеренть прянзо те эзь сэредсте. Сонзэ эсензэ мелявксонзо. Пачкодсь Видяень стуворонзо ваксс. Путызе икелензэ весементь, мезе вешсь. Паро, кувать учомс эзь саво,
Каизе Видяй ков эряви рюмканть, сайсь сянгине, комавтызе прянзо ваканнэть вельксэс ды апак капша кармась ярсамо. Сэвинзе, паморькс эзь кадо, котлетанть ды модарькатнень. «Грамматне», кода арсекшнеськак, марявсть тензэ аламо. Серьгедизе «андицянть-симдицянть», мерсь кандомс невак зняро. Учомс эзь саво — энялдоманть топавтызе сеске. Теньгак гилк-гилк нилизе весть лекстязь.
«Ней, — мерсь эськанзо, — туи!» Ёжозо-кайксэзэ, марявсь, седеяк вадрялгадсь. Пандызе питненть, стясь стуворонть экшстэ ды лиссь оршнеме.
«Аламнеде — теяк паро! Потась седейстэнь суксось, а истя поти-сускони. Паро, паро, А мезе? Тетям аволь чуросто сакшны чине марто, лиясто мик пупорькшнезь, а лови тень аловпандт кеверемакс. Мезе мон? Аволь цёра? Теде кадык эно... Седе шожда тень кармась, вана мейсэ парось. Шожда, шожда, Видяй! Алкукс. Кевесь куш аламошкас прась лангстон. Секскак..,»
Пачкодсь кудов. Сон «Валдо кужодо» аволь васоло, ялго молемань ютко. Совась, комась, носкозь юксинзе котанзо, кайсесь ды капшазь, илязо нее авазо, совась эсензэ [50] нупальс. Саизе стуворонть лангс путозь течинь газетанть, озась креслас. Эзь кенере кедезэнзэ саевть газетанть панжомо, чикорк мерсь кенкшесь.
— Тон мезе, ярсамо а кармат? — кевкстизе авазо, пельспанжадо кенкшенть вакссо аштезь.
— Арась, пекем пешксе, ютамсто совсинь ве таркас, — яволявтсь, пря идесь Видяй газетастонть вановтонзо апак сае. Арсесь, авазо кадсы ськамонзо. Эзь лисе.
— Мезе. мон беряньстэ анокстан? — марявсь Юлия Григорьевнань сэтьме чевте вайгельсэ покордавома.
— Аволь.
— Эно мекс лия таркас совсить? Тосо седе тантейстэ андыдизь, седе парсте пидить-панить? — вансь авазо газетань ловныцянть лангс, исковась, мелезэль содамс, мекс совсесь, истямо зярдояк арасель, та-ков ярсамо.
— Истяк.
— Ды мезде каванидизь?
— Котлета, чай...
«Вана-а-а, педясь — а лутави!» — кирдсь мельсэнзэ кежиявтнезь «ловныцясь».
Юлия Григорьевнань судос каятотсь истя тензэ содавикс, уксномань савтыця чинесь. Чувтомсь. Кундатотсь келезэ, эзь сода мезе меремс. «Каня те алкукс?» — арасель мелезэ кемемс. Пряпотсонзо вельместь валтнэ: «Инешки, мезе истя теят мартон? Вейкесь пинге пиди оймем, ней...».
— Цёрам, симезят... Мезень кувалма, а ёвтасак? — ризнэзь-сюмордозь, кодамо-бути чоподачинь марязь, Юлия Григорьевна пурнынзе виензэ пшкадемс цёранстэнь, пшкадемс сэтьместэ, апак пижне-сеере.
— Авай, мон ансяк аламошка, — пря идесь Видяй, кекшизе «аламошканть».
— Кие марто? — Видяень авазо содась: кевкстнемс истя назойстэ — амазы. Ялатеке тень, кадык мелензэ каршо, тейсь.
— Ськамон...
— Ськамот? Тувталось кодамоль?
— Вант, цёрам, вант... Те кись нолажа. Нолажтат — а стяват. Тетят, ней тон... Пазось ванозо, — кардызе цёранзо Юлия Григорьевна ды потазь лиссь, стамбарнэ пекстызе кенкшенть.
Теке мельга калдорк совась, сась важодемстэ, Андю, Андрей Петрович. Сась, кода шкань-шкань эрси, копордазь. Ды копордазь эйпаросто. Болдордсь велькска. Ялатеке мель путсь кекшемс Юлия Григорьевнадо «пежетензэ». Кодат кекшемат... Чинесь эйстэнзэ — прок ченькс боцькасто, келеськак. .. Куш чатьмоневель, сон лаборды — сизема а соды.
Юлия Григорьевна аноколь сюлмсемс сельмензэ ды ношкстамс куш ков, ансяк а неемс, а марямс, мезе моли кудосонзо. Васня цёранзо самось сювордызе истякак сювордазь, верьсэ пургсиця седеензэ, ней те...
Чокшнень стувор экшс эзть пурнавкшно. Кудазоравась ярсамс мезеяк эзь анокста. Седеезэ кельмесь. Налкставсь. Кувать аштесь дивансо, майсесь, яла арсесь стака арсемасо...
Теле. Ашолгады мельтеме, апак эрязкале. Савсь вельмевтемс тол. Ярсасть чатьмонезь. Марявсь ансяк пенчтнень шалтаемаст. Цёратне чамдызь икелест путозтнень, стясть, мельга-мельцек ёвтасть сюкпря ды чатьмонезь кармасть оршнеме-карсеме. Курок кавонест «оргодсть» эсь таркаваст — важодеме.
Юлия Григорьевна каясь кургозонзо зяро-бути пенчть ямне, сэвсь кшипечтьке, урядызе стуворонть, шлинзе пенчтнень-вакантнэнь ды кундась эсь прянзо пурнамо. Эрязкалемс а мезть. Университетсэ часонзо ушодовить ансяк чикуншка малава.
Видяй, кода свал, сась важодеме шкастонзо. Арасель кавксояк — сон уш тесэль. Совась нупалезэст. Вельмевтсь валдо. Видемтизе чертямонь лазонть. Понгавтсь эйзэнзэ конёвлопа. Лаксинзе-сювинзе карандашонзо. Чись ушодовсь. Шкань-шкань ванкшнось частнэнь лангс. «Мекс [52] тынь истят нузякст? Мекс пельтядо эскелямс седе келейстэ? Теке черепахат...» — апак терде инжекс совсесть превзэнзэ неть валтнэ. Инзась-сёвнось эсь пачканзо частнэнь, прок сынь чумольть. Яла учось Видяй, зярдо прядови важодема шкась ды сон кадсынзе неть лазтнэнь-мезтнень, неть ниле стенатнень. Чикуншкас истя а маряви шканть цёлакчизэ, те шкадонть мейле...
Апак учо, превсэяк арасель, ледсь мелезэнзэ сэрьс аволь покшке, валдо тусто черь Катя-Катрин, аволь умонь низэ. «Паряк, ютамс сынст цехс, варштамс лангозонзо? Нейгак, каня, истят сэняжат ды домкат сельмензэ? И-их, аптюк! Ды тон, аля, допрок веляськадыть. Сон умок, содат, Пензасо, аванзо кедьсэ эри-ашти. Варштамс... Теяк: мезень лезэ варштамодот? Эстеть, Катянень... Сонензэ ломань, алкуксонь цёра эряви, аволь тонь кондямо, ленгень... Весе, прядовсь Катят, тю-тю, а велявтсак».
Учось Видяй чинть пензэ астяко. Течи цехстэст содавикс цёрантень топодить колоньгемень. Покшчи! Каня муеви тувтал а тешкстамс? Пазось покордави. Тердизе цёрась Видяеньгак. А молят? А ялгакс... Ютавтови чачома чись «Валдо кужо» ресторансо, косо Видяй аумок витнесь ёжо. Молема. Кода а молят? Ялга... Покордави.
Чачома чись мейсэяк лиятнеде эзь явово. Кода свал, кода ламонь. Стувортнэ ярсамкайтнеде эль а лондадыть, шнамо валт, казнеть, морот, киштемат, пеедькшнемат... «Толведесь», паряк, чудсь а леекс, чудикерькстэ седе пек. Прядовома малава, зярдо «чудикерькскесь», ловт, коськекшнесь, чапамодонть псилгадозь кавто цёратненень мезе-бути эзь явово, тюрьгадсть, пачкодсть верьс. Савсь тердемс милиция. Видяй эзь човоргале юткозост. Ды эзь маштовояк тенень — эль кирдевсь пильге лангсо. Ве таркасо аштемстэ чирькась тей-тов. Кодат човорявомат истямонть пельде, паро, эстензэ эзть вачка.
Кода а кода кудов пачкодсь. Изнинзе вете этажтнень, панжизе квартирань кенкшенть, толонь апак вельмевте ютась эсь нупалезэнзэ ды апак кайсе, пальтосо-мейсэ сяворсь коникезэнзэ. Курок каятотсь корномань зэрть.
[53] Юлия Григорьевна учось, якась мекев-васов чаво квартираванть час, омбоце, колмоце... Натой гайнев-тиксэль милицияв. Цёразо свал сакшныль шкастонзо, ней... Шкань ютазь маризе, кода тона кузсь этажсто этажс, кода панжизе кенкшенть... Седеезэ аванть эзь кирде, совась нупалезэнзэ, вельмевтизе валдонть ды кезгемсь неезденть: цёразо пальтосо-шапкасо кунст мадезель коникенть кувалт.
«Инешки! — эль а сельведень пачк лиссь кургостонзо. — Мезе теемс? Кода улемс? Ёми, ёми цёрам! Зяро вийть, удомавтомо веть, ней вана вант! Мезе теемс? Меревлитькак весть, омбоцеде сы иредьстэ. Ней уш ие малава. Мезе теемс? Паряк, наркологнень пшкадемс? Кода таргамс те чеядавксстонть? Вейкесь аламоль, омбоцесь педясь. Ламот аватнеде пшкалить партиянь бюротнес. Ков мон? Судс? А кона ёндо. Паряк, заводонь прявтонтень? Вай, а мекс, алкукскак, а пшкадемс? Кодамо тувталось — а молемс? Ки, содамс, весемеде покшось тосо? Директорось? Молемс молема. Ансяк вана лезэсь... Мезе, кодамо лия эскелькс теемс?..
Ужо, ужо, истя кадомс а эряви. Илязо лепия. Вана мезде пелема. Кодаяк кайсевтема...» — сась мельс Юлия Григорьевна.
Саизе цёранзо прясто шапканть. Юксинзе пальто повонзо. Кундась сивезэнзэ, кармась ноцковтнемензэ. «Стяк, стяк, цёрам, саты теть, стяк!». Каршо: «У-у, у-у...». Саизе сивенть кавто педе ды седе виевстэ ноцковтызе эсензэ ёнов. Видяй, кецнезевсь авась, озавтовсь! «Ней пальтонть каик, кедтнень ожатнестэ таргить. Вадря, вадря». Авась котьмась талай. Окойники цёрась сась ёжос ды судонзо алов мотордозь-мокнозь олякстомтынзе кедензэ ожатнестэ.
Арась, эзь кенере Юлия Григорьевна чамдомо потмонзо кажодонть, кона стардызе кудораськензэ, «покштненень». Икельдизь сонзэ сынсь телезаводонь прявттнэ-ветийтне. Сынсткак мелявтовтсь од, ламонь содыця, эпселиця важодицяст «ормазо».
[54] Вейке чистэ, ансяк прядовсь важодема шкась, Видяй пурнакшнось уш лисеме, совась прявтонть секретарезэ. Тейтересь, капшамодонть сеедьстэ лексезь, яволявтсь:
— Виктор Андреевич, директорось мерсь нейке совамс сонензэ, — ёвтынзе валонзо ды вырк лиссь, кочкарясонзо цокаезь, нупальстэнть.
Прявтонть кенкшензэ видьс пачкодезь, Видяень седеезэ китордозевсь. «Те мезекс истя тензэ нейке эрявинь? Кодамояк покш, пек эрявикс тев?» — куйгельдсь прясонзо кевкстемась. Тусть превстэнзэ неть валтнэ-мельтне, зярдо тейтересь мерсь тензэ совамс. Ноцковтызе кенкшкундамонть ды эскельдясь келей, парсте-мазыйстэ теезь кабинетэнтень.
Стенатнень кувалт стулт. Вальматнесэ пачк невтиця валдо-сэнь шаршавт. Покш, эрьва кодамо конёвсо «сюпав» стуворонть удало стенасонть Владимир Ильичень портретэзэ. Заводонь прявтось аволь од ломань. Шержей черензэ кадовсть ансяк човоньсэнзэ ды пилензэ велькска. Чамазо кирьксала. Ваньксстэ наразь. Муюктомо. Сельмензэ эрзянь — сэнть. Васенцеде неезь, арсезеват: ломанесь превей, паронь арсиця, ламонь содыця. Лангсонзо чопода-сэнь костюм, сэняжа панар, чопода тюсонь галстук.
— Шумбрачи, Александр Васильевич! — кенкш вакссо палманекс аштезь, пшкадсь Видяй.
— Шумбрат, шумбрат, Архимед! Ютак, — лиссь келей стуворонзо экшстэ ды максызе тензэ кедензэ прявтось. — Вана тезэнь озак, — невтсь вишка стуворнэнть вакссо озамонть лангс. Сонсь озась каршо. — Вана мезе, цёрам... Иля покордаво истя лемдемат кис, иень коряс самай цёракс тень саваткак. Тердитинь вана мезень кувалма. Пеняцямот лангозот састь. Тонь проектэть коряс деталесь лезэнь таркас кандсь зыян. Ды аволь вишкине. Тувталонтькак ёвтызь: аволь тона ёнов, келя, туить, тонадыть кирьгапарьс кайсеме. Натой важодемеяк шкань-шкань сакшнат копордазь. Истя? — директорось ютавтызе вановтонзо икелензэ аштицянть чамава, кевкстемстэ кепедевсть сельмечирькензэ.
[55] Видяй аштесь прянь нолдазь. Чатьмонсь.
Прявтозо мезде-бути арсезевсь ды поладызе кортамонзо:
— Тон цёрась превеят. Чарькодят: истя прянь ветямонть кис пря ланга а вадяшить, биржав кись панжадо. Тосто а стака нолажтомс кудовтомо эрицятнень юткскак. Марят? Тевесь аволь ансяк заводсто панемасонть. Вант, терниця чеядавксонтень илязат вая. Потятанзат — а редясакак. Вана истя...
Александр Васильевич кортась сэтьме, эчке, теке марто чевте вайгельсэ. Эзь инза икелензэ аштицянть, эзь тандавтне.
Видяй чатьмонсь, кунсолось прянь нолдазь. Мезе мерят марязенть каршо? Кадови вейке — кунсоломс.
— Мон те кажонть парсте содаса, — поладсь азорозо. — Монсь эль эзинь олакшно эйзэнзэ. Монсь, марят? Зярдо судоварянь раздиця чинесь кармакшнось чаракавтомон седе а ков, меринь: саты! Ульнесь шка, тувокс усксевинь рудазов кичирева. Сельгенесть лангозон. Марят? Панимизь важодема таркастон, кадымим ним. Кодамо ава карми эрямо, муськеме чинев понкст, истямонть марто? Вана мезес пачколинь, цёрам!
Видяй вал эзь правто. Кунсолось. Апародонть, юр тувталдонть, кона пачтизе прянь истя ветямонтень, мезеяк эзь ёвта. Мезекс? Маряви, кортыцясь истякак содась. Катя теске важодсь. Секскак...
— Кеман, цёрам, арсезеват, явоват зыянов тевденть. Кеман тененьгак: омбоце истямо кортамо мартот а ули. Кеман лангозот, цёрам, — превс путыцясь стясь.
Стясь Видяйгак. Нупалень прявтось сювордызе кедензэ ды ютась стуворонзо экшс. Видяй ёвтась сюкпря ды паро-нувара ёжосо лиссь. Пилесэнзэ яла гайгсь прявтонть чевте вайгелезэ.
«Вантака, истямо покш ломань кортась мартон састыне, вайгелень апак кепсе, тандавтнемавтомо. Лиясь сонзэ таркасо... Видеть валонзо, — кайсесь тей-тов, яла онкстнесь Александр Васильевичень валонзо питнест Видяй. — Кадызе низэ... Изнизе эсь прянзо, стясь [56] пильге лангс. Прявтонок эрямо кинзэ педе-пес а содаса. Паряк, урьвакстсь омбоцеде, паряк... Содамс, улить-арасть эйкакшонзо? Паро теяк — эзь карма сокарямо, мекс-кода стинь вандора, алов ветиця кинть лангс».
Кудов Видяй пачкодсь чоподава, лепштизе меленть «варштамс» «Валдо кужос». «Чопода...» — мусь тувтал. Ды мезе чоподась телень куншкава? Колмо часонь ютазь уш ушоды чопотеме. Седеяк курок, зярдо менелесь копачазь пельсэ. Чопода-аволь, эзь пурда «кужо» ёнов — вана косо изнявксось.
Авазо тетява самонзо коряс вал эзь правто. Эзь маря а ченькс чине, а иредьстэнь чаво ветердемат. Кецнесь потмова.
Чокшнень ярсамодо мейле стувор экшстэ апак стякшно Видяй ёвтась тетянстэнь-аванстэнь прявтонтень апак учо тердтнемадонзо.
— Превей ломанесь, лия мезеяк а мерят, — ушодсь Юлия Григорьевна. — Лисемс истямо латкосто — эрявить превть ды вийть. Эзь ёма ломанесь. Секскак... — сезизе кортамонзо азоравась. Чарькодевсь, мейсэ прядыксэлинзе валонзо.
Андрей Петрович чатьмонсь. Варштнесь стуворонть тона ёно аштиця цёранзо лангс, шкань-шкань кончтнесь каршонзо. Мезе сон ёвты? Эстензэ эряви Александр Васильевичень кондямо тонавтыця. Секень вант седеяк виев.
Юлия Григорьевна истя домкасто — веньперть вестькак апак стякшно — умок эзь удо.
Омбоце чистэ Видяень превсэ-мештесэ пелькстасть кавто вийть: вейкесь усксь, зяро виезэ, козоньгак чопавтомс кирьгапарень начтомо, омбоцесь кармавтсь кирдемс превсэ Александр Васильевичень валонзо. Стакаль васень читнестэ, идемевстне эзть кадно, ледстнесть, ноцковтнесть ожапеде, ноцорясть прячерде — усксть эсест пелев. Таргонь ютазь истя эзть педсе. Тевтне полавтовсть, кадык аволь пек, паро ёнов. Раужо чачотне лиснесть ней икелензэ аволь истя сеедьстэ. Ламосо лездась тенень Александр Васильевич, те превей ломаненть марто вастовомась, [57] валозонзо кемемась. Кадовсть сынь пряулемезэнзэ анардавикс чапокс. Вастневсь Видяй мартонзо седе икелеяк, ансяк сеть вастовоматне ульнесть заводонь тевтнень кувалма ды вельть нурькинельть. А вана се чокшнестэнть...
Видяй марсесь, телезаводонь прявтось-ветиесь ламонь содыця, книгань вечкиця, эрямонть лангс келейстэ ваныця, домкасто содасы эрзянь историянть, культуранть. «Сон аволь ансяк директор, прявт, сон — Ломань», — кувать кирдевсь се вастовомадонть мейле Видяень пряудемсэ.
Видяй кода а кода конструктор, «кошксе», кода мерить те профессиянь ломантнеде. Те аволь потмаксос виде. «Кошксетнень» ютксо мукшновить, ды аволь чуросто, истят, кодат а муят лиясто ломанень вечкицятнень, гуманитарийтнень юткстояк. Каня Александр Васильевич аволь нетнень эйстэ? Каня сон аволь гуманитарий?
Видяень превпаргозонзо та-косто кирнявтсь мель седе ламо содамс Гумилёвдо. Совась, муссь шка, библиотекас ды саизе «Древняя Русь и Великая степь» книганзо. Стакаль математикань, цифрань-ловомань масторсто ютамс ловномань масторс, ютась, изнизе те стакачинть. Ловныцянть содавтызе лия мель, од мель: седе ламо содамс эседензэ Гумилёвдо, содамс авадонзо, Ахматовадо...
Седеяк ламо вийть эрявсть Видяйнень тонадомс ловномо эрзякс. Сон кассь ошсо. Эрзянь келень тонавтыцякс тензэ ульнесть тетязо ды авазо. Сюкпря сырькаенстэнь. Вете иеть, кадык аволь свал, эрясь сонзэ кедьсэ Чуварлейсэ. Ялатеке маштомс кортамо, теяк келень апак синдтре, ды маштомс шождасто, эрязасто, седеень витезь ловномо — тевтне а вейкеть. Секскак «Лавгинов» романонть лангсо савсь Видяйнень носкомс-псилгалемс аволь аламо.
Путындеряй ломанесь вий, мель, ды бути сон кеме, теке пурьгинекев, а потыця обуця, — изни, тевенть топавтсы. Текекс лиссь Видяеньгак. Иень ютазь «лепштизе» аволь ансяк Коломасовонь «Лавгиновонзо», педясь ды теевсь содавиксэкс Куторкинэнь «Раужо палмань», «Лажныця Сура» сёрмадовксонзо марто. Нувара ёжос совазь [58] ловнось Кузьма Абрамовонь «Велень тейтерь» книганзо. Ловнось рузкс сёрмадыця автортнэньгак: Шукшин Василиень, Лихоносов Викторонь, Белов Василиень. Мелезэнзэ пек тукшнось Астафьев Виктор. Сонзэ «Царь-рыбанзо» аволь ловнось, нилезь нильнесь.
Сы важодемстэ, ярсы-теи, шлясынзе-нардасынзе мельганзо пенчтнень-вакантнэнь ды, шождасто лекстязь, озы эсензэ нупальсэ креслазонзо. Венстьсы кедензэ, сайсы вакссонзо стуворонть лангсто ловновиця книганзо. «Таго, ялгинем, вейсэ? Паро, паро... Зяро мартот, ялгинем, кенярксто пешксе част, чить, таргот ютавтынек! Зяро эрьва кодамо обуцянь ломань марто вастневинек! Ульнесть ризксэнь сельведть, ульнесть кенярксоньгак, ды аволь аламо. Эрямо... Мезть а эрсить...» Книганть панжомадо икеле конясынзе сельмензэ, комавтсы мештезэнзэ прянзо ды ашти истя зярскак, арси.
Ней Видяень кумажанзо лангсто ваны сельмезэнзэ, кончтни тензэ, Сульдина Анянь «Пиземе чирьке» вал-моронь пусмозо. Саизе кедезэнзэ, муизе эрявикс ёвкскенть. Пезнавтынзе сельмензэ мазычинь кандыця вал-рисьметнес, кецнесь домка зэмень кирдий метафоратненень, тарказонзо путозь эрьва эпитетэнтень. «Зяро валдо валморосонзо тундонь гайтть, зяро кеняркс вельмевтить-раштыть ловныцянть седейсэ!» — аволь весть тешкстнесь эсь пачканзо те эли тона валморонть ловномадо мейле.
Шкась ютась — теке ёндол кивчкадсь.
«Вай, шказо уш чувтолангонь!» — мерсь Видяй, кедь-часозонзо варштазь.
Омбоце чистэ, ансяк совась конструкторонь покш-келей нупалезэст, ансяк кенерсь кайсеме, эскельдясь мельганзо мартонзо теске важодиця эрзя ялгазо.
— На, ловнок, — цюх путсь Видяень икелев «Иень гайтть» содавикс журналонь кодамо-бути номер.
— Ну, мезенть ловнома? — Видяй саизе стуворонть лангсто журналонть ды озась эсь тарказонзо. Панжизе «Мезде сёрмадозь» ёнкскенть.
— Муия. Вана сон — Истляев. Невак мезе? — пшкадсь Видяй, мизолдозь варштась ялганзо чамас.
— Ловносак паро мельсэ, вансак ва, — кемевтсь шождасто, аволь телекс оршазь валскень паро кулянь кандтницясь.
— Кунсолан, ялгай-товарищ! Ловноса течи чокшне. Алкукс. Ванды валске вастовтано, ёвтаса мелем, — марясь эрзя ялгазо Видяень пельде.
Журналонь кандыцясь шканть таргсеме эзь карма. Чертёжонь келей лазозо эзь вечке шкань ёмавтницят. Ютась экшезэнзэ. Кундась тевензэ топавтомо. Шка. XXI-це пинге. Капшама. «Вечкан истят, аламо кортыцят, валонь ванстыцят!» — арсезевсь Видяй, ансяк явовсть ялганзо марто.
Вана сон, те ёвтнемась, конань чокшнень перть сэвтнесь Видяй.