Поладкстомо (2016)/Поладкстомо/2
| ←I глава | Поладкстомо (2016) by , edited by Ломшина Л. А., Маризь Кемаль, Малахова Е. П. II глава |
III глава→ |
| Нуянь Видяз. Поладкстомо. Без продолжения. — Саранск, 2016. — с. 14—27 |
[14]
II
Ламот яла Паз вешнить. Тёжань-тёжа иеть вешнить-ливезькалить. Ловить: сон истя кекшезь, чить тол мартояк а муеви. Сонзэ вана, абунгадат, вешнемскак а эряви. Сон свал-свал ютксонок. Неемс, те истя, кияк эзизе некшне, содамс — ламот содасть ды содыть. Те — Шкась. Сон седейтеме, сельмевтеме, пилевтеме — мезеяк ды киньгак а мари, а кунсолы, а неи. Мезе мелезэ, сень теи: чачты, касты, яжи, куловты, вачки, калавты... Мезе ёвтазь ды апак ёвта, весе тень теи — чатьмонезь.
Ульнесь потякай, ниле пильге лангсо яксеме тонавтниця Видяйне. Ней — палмань, виде рунго, сэрей, аволь пек келей лавтов цёра. Валдо тюс чамазо, черензэ, сэнь эрьке сельмензэ, тейтерень турванзо — аванзо казевть. Вайгелесткак, бути аволь вейкеть, ламо мейсэ веёнов молить. Теньгак, тонаньгак сон чевте, «а сеериця», морамсто истямодонть мерить васень эли верьга вайгель. Кортамо лувозояк: лодорсо валтнэнь певерди — а мерят, ялатеке ёвты эйсэст, куш чарькодевиксстэяк, аламнеде [15] эрязкалезь ды нильнезь. Витя-Видяень кондятнэнь яла лемдить авань цёракс. Ды сон аволь ансяк лангс ваномс авакс тусь: валонь кирдиця, тевень вечкиця, шкань а ёмавтнить Мик молевксэзэяк аванзо.
Монь койсэ, еврейтне пек превейстэ теить: эйкакшост сёрмадстыть аволь тетянть — аванть лемсэ. Мекс? Васняяк, кие тетясь, аволь свал ды аволь куроксто мукшнови. Ансяк авась соды, кинь пельде сюлмави пазявкскесь, кинь пельде пекии. Куш лиясто сонгак пирявксос эртневи... Ды те уш лия кортамось.
Омбоцекс, эйдиненть вейксэ ковонь перть три-анды авась, вейксэ ковонь перть пеке потсо эрицянть санга чийни аванть верезэ. Генетикась кадови генетикакс, аванть «путовксонзо» веёнов а шаштсак. Секс, койсэнь, седе ламот «тарадкинетнестэ» молить чачтыця «чувтонть» ёнов.
А содан, улить-арасть, еврейтнеде башка, лия раськеть, конат эйкакшост тешкстнить аванть лемсэ. Те еврейтне. Эрзятне...
Иетнеде ютасть байтяк.
Теле, мельганзо омбоце, колмоце... Ашосо копачазь паксятне тунда полавтневсть раужосо. Тундо, мельганзо омбоце, колмоце... Истя мельцек-мельцек ютасть Юлия Григорьевнань «школань» вейксэ — ней уш кеменце — иензэ. Те шкань ютконть перть теке сонсь васенце классто саезь ютызе Видяй марто тонавтнемань кинть. Мель путсь лездамс цёранстэнь, лиясто натой кисэнзэяк уроктнень тейнесь. Тень кис «понгонесь» тензэ Андюнь пельде, сон вейкенть содась: «Сонсь, кадык сонсь вий путы! Иляк касто шожда кинь вешницякс».
Лиссь истя, Видяймезень 10-це «а» классос таштамковонь васень чистэнть састь лия школасто колмо од тонавтницят: кавто цёрат ды тейтерь.
Видяень стувордонзо керш ёно, стенанть ёжосо рядсонть, эсь стуворонзо экшсэ ялганзо марто аштесь самай те «однэсь». Нежедизе, редизе Видяй, улонзо кедькоморозонзо ды кунсолы, теке перьканзо лия мезеяк арась, тонавтыцянть.
[16] Тейтеренть кавто пулос кодазь, човоньс пурназь ашназа черензэ сыреждить вакссост вальмаванть валовиця чипаенть валдодонзо. Сэрьс, тешкстызе Видяй, сондензэ седе алкине. Сельмензэ, теяк цёранть пшти вановтонзо вакска эзь юта, сэнь пря балягадонтькак сэнть.
Урокось рузонь литературань. Тонавтыцясь, аваломань, топавтызе плансонзо тешкстазенть ды уроконь шканть прядовома малава ушодсь превсэ-оймесэ кирдевиця стихтнень ловномо. Васня вейке валморо-стих ловнось — Евгений Баратынскоень, мельганзо — эскельдясь сядо иень трокс — Есенин Сергеень.
Вы помните, |
Классонть весемеде акирдевиксэськак, Додайкин Андрей, эзь маряво, кунсолось. Кунсолозеват... Седейстэ лисиця вайгелень гайттне, прок анеявикс нармунть, ливтнесть стенатнень юткова; марявсь, тенст а ён, эйсэст лепштясть потолокось, вальматне. Ловныцясь валтнэсэ кирдевикс мельтнень пачтясь ёжомарязь, таркань-таркань лотксезь, кой-кона валтнэнь ёвтась эль марявиксстэ, эль а сельведень пачк.
Кунсолость вейкень пес. Кунсолось классось. Марявсь, кунсолость икельце стенас понгавтозь лазось ды велькссэнзэ Есенинэнь портретэзэ. Эзь кадово лиятнеде Виктор-Видяй Кузоваткингак, сорк эзь тее. Вий путсь кундамс эрьва валонть, чарькодемс мазычинзэ, путомс седей малас. Ансяк весть-кавксть, эзь кирдеве, кайсизе вановтонзо, марявсь, эйстэнзэ пек васоло озадо аштиця тейтеренть ёнов.
«Лиятнень коряс кодамо-бути лия, эйсэнзэ мезе-бути аёвтавикс... — уш зяроцеде содавты цёранть теке мелесь. — [17] Та-кодамо вий уски, кармавты пурдтнеме прям керш пелев, се ёнов, косо чипаесь налкси-судри налсонзо пинемень тюс черензэ. Уроконь юткошкасто пек маласонзо ульнинь. Сельмензэ... Покшт, кирьксалат. Мекс, алкукскак, вечкевить тень аволь кодаткак раужот, тюжат — сэнть? Эсень сэнть, авань...»
...Дирнезевсь баягинесь. Ушодовсь од урок. «Тештень ловицясь», астрономиянь тонавтыцясь, ёвтнесь велькссэнек сиземань апак сода цитниця планетатнеде. Башка мель явсь «Ули-арась эрямо Марссо?» темантень. Ёвтась истямо куля: келя, зярдо-бути ломантне эрясть те планетасонть...
Прядовсь тештетнеде урокоськак. Ламот од ломантнестэ кортнезь-пеедькшнезь лиссть тонавтыцянть мельга коридорс. Видяй, сонськак а соды мекс, ютась тонавтыцянть стуворнэнзэ экшс ды эртевсь Лиянас. Чатьмонезь ды виздезь варштась лангозонзо ды сеске саизе вановтонзо. Нолдызе прянзо. Велявтсь, изнизе меленть пшкадемс мезеяк тензэ ды капшазь, прок тандадсь, лиссь лиятнень мельга класстонть.
«Кодат, видеяк, сэнть сельмензэ! — таго ципадизе мелесь Видяень, зярдо велявтсь кувака коридорстонть ды озась стуворонзо экшс. Лемезэяк мельс туиця — Лияна, «лия» валстонть. Лияна алкукскак лия, киньгак ёнов а моли».
Совась Степан Леонтьевич, кокша, цитниця пря тонавтыцясь. Тонавтницятне калдор-калдор стясть, видемтизь рунгост. Ушодовсь меельце урокось — «Ломанень анатомиясь ды физиологиясь». Степан Леонтьевич маштсь ёвтнеме, маштсь манямо эсензэ ёнов кунсолыцятнень. Секс эзь марявояк, кода ютасть ниленьгемень вете минутатне, урокось прядовсь. Видяй нупальстэнть лисеме эзь капша. Учось, зярдо юты кенкшенть ёнов Лияна. Тейтеренть лангсо якстерть-ожо лембе джемпер, чопода тюс юбка, пильгесэнзэ сэрей кочкаря котат. Ютась учовиксэсь, мельганзо лиссь Видяйгак.
Ушосонть раксесь-кенярдсь, ожо морот морась сырнень сёксесь. Школанть икельга-перька килейтне [18] салава-салава каштордсть лопасост, пря шнасть мазычисэст, кецневтсть сельметь ды седейть. Ансяк а неявияк, кода певери мазычист, ацави алгаст тюжа-ожо тавадксокс. Сёксесь теке ледстни ломантненень: весементь ули эсь шказо, весементь ули пезэ.
Ожо лопасо ацазь тротуарганть апак капша эскели школасто Лияна. Лангсонзо якстере куртка. Сёксесь коське, маней, ялатеке экше. Кода лиякс, ушодовсь ожоков. Моли-моли — лотки. Мекс-бути прянзо-вановтонзо кепси кевъянонть кувалт ойсевтезь од килейтнень лангс. Мезе пельдест арсесь марямс, содась ансяк сонсь. Тень кис парсте содасть ожосо копачазь килейтне — тейтерентень кемзисемге.
Эрясь Лияна вете этажонь кудосо. Шабрасонзо текень кондямосо эрясь Видяй. Секс школав ды мекев кист ульнесь вейке. Сынь зярс эзть сода: те кевъянганть, неть килейтнень алга яки мартост сехте мазый шкаст. Ютыть иеть, ютыть ламо иеть, ды ожо лопасо артозь кевень келей те янось карми сакшномо мелезэст кецневтиця онокс.
Виктор-Видяй келейгавтынзе эскельксэнзэ. Шкань пелькст, ды сасызе «якстере куртканть». Зярс-бути мольсь вакссонзо чатьмонезь. Пельсь. Мезде? Марявсь тензэ, валсонзо тандавтсы, теи ачарькодевикс берянь тейтерентень. Пурнынзе потмовиензэ, аламнеде набойгадсь ды...
— То...тон мезть ваннат килейтнень прява? — кокнозь ёвтынзе валтнэнь, марявсь, вайгелезэяк аволь эсензэль, эчкель.
— Истяк, — правтсь тейтересь мельде-валдо, прянь кепедезь икелев ванозь, мерят арасельгак вакссонзо молиця.
— Тынк... тынк кудонк, содан, минек кудонок вакссо. Вете этажонь. Кодамо квартиранк? — Видяень пек эзизе тандавто тейтеренть «экшечизэ». Потамо эзь арсе. Чевте вайгелезэ виевгадсь.
— Мезекс тонеть?
Теевсь кашт.
Пештизе сонзэ пильге алов понгониця лопатнень кашторксост. Зярс-бути мольсть чатьмонезь.
Таго општ. Таго вал лопатненень.
— Тон кинь тонавтыцянок эйстэ весемеде пек вечксак? — бажась ушодомс кечкеремавтомо кортамо Видяй, сонсь теке марто арсезевсь: «Кенкшензэ нардевстэ пекстни, аволь сеске совават...».
— Тонь, — тунь апак пеедькшне цяпадсь тейтересь икеле саезь кортамонзо лувсо.
Витя-Видяй васня талакадсь, кундатотсь келезэ, шкань ютазь мусь мезе меремс каршо:
— Мон аволь тонавтыця: аволь географ, аволь математик... Вечкемс а мезень кисэ.
— Монень тонавтыця а эряви...
Мезде, мезень кувалма мольсь ютксост валсо «леднемась», Видяйнень превс эзь саеве. Те мезе, вечкемадо васень видькстамо?
Ютызь, нурькинестэ эскелязь, Видяймезень кудост. Пачкодсть Лиянамезень кудост видьс.
— Монень тей, — ёртозь ёртынзе валонзо каштан тейтересь ды эскельдясь кевъянстонть витев, эсь кудонзо пелев.
Видяй аламошкас вансь прясто пильгес якстересэ оршазь тейтеренть мельга, ильтизе вановтсонзо.
Кудов кеменце классо тонавтницясь Кузоваткин Видяй аволь мольсь — ливтясь. Кевсэ вельтязь модась пильгензэ ало эзь маряво. Пеень пачк ютксост кортамонть лангс апак вано, кедензэ таркас, марявсь тензэ, кассть сёлмот. «Те мезе истя мартон? Мезе лиссь? Кода чарькодемс «тонь» валонзо? Видькстамо? Арась-арась, те згилямо. Ансяк...» — коткудавкс эвтсть прясонзо Лияна марто явовомадонть ледстнематне.
Килейтнень ожо оршамост неявсть Видяйнень палыця ожокс, марявсь, секень вант гувкадить каштордыця толсо. Келя, вечкицятнень вечкевикс шкаст панжиковось, сеть читне-ветне, зярдо кецневтить моросост цёковтне, зярдо зорясь вастневи зорянть марто. Те «келя». Кирвазиндеряй потсот те ёжось, ковонь-коволонь кочксеме а карми. Сёксеськак карми марявомо тундокс...
[20] Чокшнень перть, зярс Видяй стуворонзо экшсэ котьмась алгебранть-тригонометриянть ды лиятнень велькссэ, Лиянань сэнь сельмензэ, вечкевиксстэ мизолдыця турванзо кирдевсть икелензэ.
«Саты течис, урокон теевсть. Шказо, — варштась часонзо лангс, — велькс алов», — сась мельс, пекстнинзе книганзо-тетрадензэ ды путнинзе лангсек-лангсек ве таркас. Те шкастонть ютась ёнонзо ды комась вельксэзэнзэ авазо.
— Мекс-бути течи кувать аштевить книгатнень велькссэ, — гайгезевсь цёранть пилесэ чольдердиця сэрей вайгелезэ. — Мадть, мадть, саты течис.
— Мадян, авай, мадян, — кургонь автезь мерсь Видяй, човоньсэнзэ аванзо лексеманзо марязь.
— Мезть течи кандыть? Аволь кавташкеть? — пеедькшнезь пшкадсь цёранстэнь Юлия Григорьевна. Содась, ниледе аламо читешксстэнзэ а неят. Седе сеедьстэ вететь эрсить.
— Варштыть тонсь, — сурсо невтсь читешксэнзэ лангс таркастонзо стямсто. — Шказо, авай...
— Сэтьме ве теть. Тетят талай уш онт неи, — неть валтнэнь ёвтазь, Юлия Григорьевна кода састыне совась, текекс лиссь нупальстэнть. Пекстызе мельганзо кенкшенть.
Видяй кайсесь, мадстизе толонть ды апак сэзнэ эцесь лембе-чевте вельксэнть алов.
Истя Кузоваткинтнэнь кудос совась, полавтызе чокшненть, чатьмонемань вечкиця, виень раштыця сёксень весь.
Мельтёкшокс: эрямонь максыцякс Моданть лангсо ловови валдось. Сон ды мартонзо сравтневикс лембесь — чипаенть мейсэяк аонкставиця паронзо. Стувтневи: чоподавтомонть валдось а эряви, эрямось секень вант а поладови. Теке марто пелевеёно зярыя ковонь перть чипаесь а мадни. Те кизна. Тельня мекевлангт: зярыя ковонь перть чипаенть а несак. Аволь сакшнояк кизэнь лембесь, эрямс улевель стакадояк стака.
Шка мадемс — шка сыргоземс, панжомс сельметнень ды вастовомс валскень валдонть марто.
[21] Чипаенть мельга чинть ушодыцязо малав весе кудотнесэ, пувозтнэсэ-семиятнесэ, азоравась. Кузоваткинтнэнь — Юлия Григорьевна. Цёранзо ды Андю поланзо, конанень ней, марсеви, пшкалить Андрей Петрович, оност прядовомс сон кенерсь прянзо пурнамо-сэрнямо, оршизе сэнь, балягань артовкссо мазылгавтозь кудоютконь халатонзо ды кундась валскень ярсамопелень анокстамо.
Мельганзо стямодонзо яволявтсь Андю — кавксть-колмоксть козкстась кудонь келес. Ютась туалетэв. Тосто — кудыкелев таргамо. Ох уш те таргамось! Чинеденть укснозеват! Зяро Юлия Григорьевна эзь «оёва» мартонзо, лезэсь арасель. Таргамодо мейле нарась-шлясь, ютась пидема нупалев. Нолдызе радионть, кецневтизе Московонь кулясо нинзэ. Шкань ютазь тей совась Виктор-Видяйгак.
Астяко морави: «Кшись весементень прявт». Весе вачо пекетнень, кить сынь иляст уле, пурнасынзе ве таркас копшась. Седеяк — зярдо сон паневи розень почтсто ды велень каштомосо.
Окойники стуворонь анокстыцясь мерсь озамс. Цёратне малацек, сонсь — каршост.
Юлия Григорьевна маштсь пидеме-панеме, теке мерят тонавтнесь теньс. Тевенть тейсь мелень путозь. Маштомась, содави, менельстэ тензэ эзь пра. Свал ловсь: стуворонть лангсо улезэ васняяк салат — керсезь-човорязь эрьва кодат эмежть. Те сонензэ — кой. Вельть тантеекс тензэ марявсь помидоронсесь: покшсто керсезь помидорт, парсте кенерезь, ды вишкинестэ керсезь чурька. Паро, бути сэныпть-якстере тюс. Теде мейле ваканонтень каяви сал ды зярыя пенчть чиньжарамонь ой. Теемганзо ламо шка а эряви, танстезэ — келеть нильсак.
Видяй од, самай панжовома шказо. Тетязояк вийсэ, аволь кодамояк какаря атя. Икелест путозенть урядызь увк меремс.
Курок кудось општ мерсь. Андрей Петрович путсь кой-мезе юдмазонзо чикуншканень сускомс ды чатьмонезь тусь мастерскоев — талай ушодозь пейзажонзо прядомо ды лия тевень яксевтемеяк.
[22] Витя-Видяй валгсь ветеце этажсто, панжизе ушов лисема кенкшенть, ды вановтозо сеске прась икельгаст таргавозь кевъяннэванть молицянть лангс. Лияна эзизе редя кудосто лисицянть, кенерекшнесь туеме вепелев. Видяй келейгавтынзе эскельксэнзэ. Лиссь янонтень ды куроксто сасызе сынст классонь «таташкиненть».
Сасызе, ды прок токизе кельме. Эзь сода, мезе меремс, мезестэ ушодомс кортамонть. «Паряк, ушолемскак а мезть, а мезть педсемс, бути арась мелезэ кортамс мартон, седеяк — неемс монь?» — кивчк ютась пряванзо. Окойники пурнась вий, кармавтызе келензэ кортамо, кельпрястонзо менсть а тей а тов аравтовиця, та-кодат човоркай валт:
— Ужо, ужо, ёвтык, тон мекс те янганть якат?
— Сон тонь?
— Аволь тоньгак.
— Я, эно мекс кардат?
— Истяк.
— Те монь янось, — пеедькшнезь видькстась тейтересь.
— Сестэ а мерят тень эзганзо якамс? Эно кува тень якамс?
— Яннэнть вакска...
— Кодамо течи васень уроконок?
— Кевкстик... — вить кедьсэнзэ невтсь верев Лияна.
Истя, чаво валсо брикстяезь, сынськак эзизь редя,
кода пачкодсть школань келей кузтемпентень. Лияна вастовсь эсест классонь тейтерь марто, ды сынь, мезде-бути кортазь-пейдезь, эрязасто кузсть совамо стака кенкшенть икелев, ёмасть Видяень сельме икельде.
Течинь тонавтнема чись ушодовсь «История СССР» урокстонть. Тонавтыцясь, удалов судрязь тусто черь, свал парсте вадяшазь костюмсо ниленьгемень ветешка иесэ цёра, ёвтнесь Сталинэнь куломадо мейле шкастонть масторсонть полавтовкстнэде. Евтнесь войнанть ушодовомадо икеле «якстере тевдензэ». Аламот, пек аламот содасть, зярот тунь чумовтомо маштозельть, пекстнезельть тюрьмава, пансезельть вирень керямо, [23] сырнень шлямо ды кевень седень таргамо пелевеёнов. Ламот пест муизь чилисема ёнксонь чуварсо сюпав коське таркатнесэ. Тень кис миллионт, эйкакшсто саезь сырес, ловсть «Сталин ялганть» ине тетякс, пазокс. Савтницятне рисовасть-артсть чамачачонзо, кода Иисусонь, сияждыця кирькссэ, нимбсэ. Хрущёв Никитань пингстэ неть верев тевтне таргазельть лангс, невтезель кенгелемань отьмась, косо эрясь шназдеяк шназь СССР-сь.
Тонавтыцясь прядызе ёвтнеманзо. Витизе галстуконзо. Ютась вановтсонзо икелензэ аштиця прятнень ланга ды пшкадсь тенст свалшкань валсо:
— Кинень мезе эзь чарькодеве.
Кашт.
Колызе сонзэ, кедь кепедсь, Кузоваткин Витя.
Стясь, видемтизе сэрей рунгонзо. Пшкадсь тонавтыцянтень:
— Истя ульнесь. Кода ней? Тейневить-арась истят апарот? Кенгелить-арась? — талнозь гайгевтизе кевкстеманть, керш кедьсэнзэ стуворчирентень нежедезь. Лоцьк озась.
Теевсь пилень потомдыця кашт.
Тонавтыцясь истямо кевкстема эзь учо. Неявсь, апторгадсь. Ютась мекев-васов классонь лазонть икельга ды озась стуворонзо экшс.
— Лиятнень улить кевкстемаст? Весенень чарькодевсь, мезде ёвтнинь? — пшкадсь, сонсь вешнесь вановтсонзо, паряк, кияк кепеди кедь.
Каршо — кашт.
Чатьмонемась тонавтыцянтень эзь вечкеве, лия ёндо, ульнесь мельспаросо: пельсь, илязо муеве Кузоваткинэнь кондямо.
Апак учо, зярдо уроконь прядовомантень кадовкшнось минуташка, гайгезевсь Лиянань вайгелезэ:
— Мекс Кузоваткинэнь кевкстеманзо каршо валтомо кадынк?
Классонть пештизе лип кашт, мельганзо сеске — шалт. Тонавтыцясь саизе стуворонть лангсто журналонзо ды, валгак эзь ёвта, лиссь.
[24] Те ульнесь меельце урок, шкань меельце пелькске, зярдо лиятнень марто кунсолось тонавтыцянть ёвтнеманзо, юткошкасто кортнесь-пеедькшнесь ялганзо марто Чевтаень Лияна. Меельцеде Витя-Видяй салава велявтнизе прянзо стуворонть ёнов, конань экшсэ озадоль кенярксонь кандыцязо. Ансяк цёрась зярс теде эзь сода.
Сон стясь, кода свал, кенкшенть малас. Учось. Учось, зярдо ютыть удало стувортнэнь экшсэ аштицятне, юты Лияна. Вана сонгак. Эскели лиятнень марто апак капша. Лиссь. Ютась мельганзо Видяйгак.
Кудов мольсть вейсэ.
— Тон содат, течи мон школасолинь меельцеде... — зярс-бути чатьмонезь эскелямодо мейле талныця вайгельсэнзэ абунгавтызе Видяень вакссонзо молиця тейтересь.
— Вай, те кода истя — меельцеде? — эль эзь аймельгадо марязденть Видяй. Эзь кемеве тензэ теяк: корты мартонзо аволь кода валске марто, синдтревезь-менчевезь, — «ломанькс». — Кода истя меельцеде, мекс теде васенцеде марян?
— Истя уш лиссь. Меельцеде мартот вейсэ эскелятано те кевъянганть, неть, килейтнень алга, — нусманясто ёвтынзе валонзо Лияна, путнезь путнинзе, прок килангонь ялгазо камажа пиле.
— Мезе лиссь? — Видяень мелезэль содамс тувталонть. — Мекс истя сеске?
— Тетянень макссть од важодема тарка. Лия васоло ошсо. Туема тов седе курок. Весемесь анок. Ванды, таргочистэ, сыргатано, — Лияна кортась сэтьместэ, аволь икелень лувсо, апак каштангале.
— Паро мельсэ, апак янксе туят? — пильгалов ванозь, арсезевезь, кевкстизе Видяй тонавтниця ялганзо.
— Мезть тон кортат... Кемень иеть те ошсонть. Ялгат-оят, малавикст, школась... Ней монь учи асодавикс ош. Кеменце классом прядомо карман лия школасо. Кода арсезеван теде, маряви, сув сравтови перькан, — чамдсь потмонзо Лияна, сонсь салава кайсесь вановтонзо Видяй ёнов.
— Лисни, Видяй, истя, меельцеде, — валонь-вал ёвтызе мелензэ каштан, кодамокс марявкшнось, тейтересь. «Тонадан, тосояк муевить ялгат. Муевить, ансяк лият, лия эрямонь», — эськанзо поладынзе валонзо Лияна.
— Келей ки теть, Лияна! Илямак стувтне, — мерсь Видяй, зярдо пачкодсть сонзэ кудонть видьс.
Вечкемазо лоткась, чарькодсь, Видяй ялгазо пурды кудост ёнов. Видяй моликсэль седе тов, ильтямо, ды эзь моле, виздсь. Мезде — эзь сода, киде — тедеяк эзь сода.
— Тон куш сёрмине тень тешкстат? Эрямо таркам содасак, — энялдозь пшкадсь каршонзо аштиця ялганстэнь Видяй.
— Кучан, вал максан — кучан, — кецневтизе тейтересь, сонсь мекс-бути вансь алов ды састыне нурсесь книгань кандтнема юдманзо.
Ютасть ковт.
Ожо пуло сёксенть, мельганзо теленть полавтызе шалтто пешксе, оймамонь а содыця тундо. Курок сонзэ псисэнзэ-лембесэнзэ апак мунза шаштызе якстере сёлмо кизэсь.
Школань вальмалксось увны вайгельтнеде, теке покштояк покш мекшвеле: ават, цёрат, атят, эйкакшт... Течи — покшчи. Аламнеде нусманячисэ петезь покшчи. Каня явовомась, кие марто ды кодамо илязо уле, эрси эрьвела? Школань прядыцятне, эйстэст зярыя класст, мейсэ-бути молить сёлмо лангс стиця письмарлевкс ёнов. Пизэстэ ливтизь, ансяк парсте тутмаст пештямо а маштыть. Кадсызь ламот лембе-андыця кудост, мекев кись муеви чуросто кинень.
Гайги ламодояк ламонень содавикс «Школань Вальсэсь». Сон ильтямодо. Секс лувсонзо-мелодиясонзо шождасто марявить лужаня гайтть — минор. Сонзэ кунсолость, танцовасть сетькак, кить састь ней эйкакшост, [26] нуцькаст покшчис. Сынст пилесэ гайгсь, кецневтсь седей, одксшкань зярдояк астувтовиця вальсэст.
Мазыйстэ оршнезь эйкакштнень ды инжетнень кедьсэ балягань пусмот-керьметь, ламонь турвасост, сельмесэст цитнить мизолкст. Тонавтыцятне стявтнизь тонавтницятнень линейкас. Весе аштить, учить покшчинть ушодовоманзо.
А Вальсэсь чудсь... Чудсь тундонь чадылеекс. Ведьке-верьксэнзэ кармавтсть чарамо, кецнеме, ледстнеме...
Окойники сонгак мерсь општ, теке эртевсь нардевдеяк нардев сёлтс. Вельть марявиксстэ дирнезевсь баягинесь. Меельце гайгема. Ушодови колмо ковонь перть олячисэ эрямось.
Мизолкст, мизолкст... Кенярксто цитниця-мизолдыця сельметь... Коштоськак, маряви, эсензэкс кецни-мизолды.
Школань прявтось — эчке, кавто улонь кандтний аваломань — панжизе, микрофоне кортазь, нувара-кенярксов линейканть. Каятотсть цяпамот. Сон кармась ёвтнеме, кода прядызе ошонь 27-це школась 1977-1978-це тонавтнема иенть, зяро эйсэнзэ тонавтыцят ды тонавтницят, зяро ёвтазтнеде прядызь школаст медаль марто... Каштансто, марявсь вайгелень коряс, прянь шназь пачтясь: сырнень медаль марто прядызь тонавтнемаст колмо ломанть: Кузоваткин Витя, Ледяев Олег, Валдаев Сантяй. Таго весе цяпазевсть. Прядомакс школань прявтось арсесь весенень шумбрачи, паро тевть, валдо арсемат... Мельганзо эрьва кодамо классонь тонавтницятне, покшт, вишкинеть, ловность превсэ кирдевикс валморот. Те коенть прядозь, паро мельть-арсемат ёвтасть кой-кить тонавтницятнестэ, тетятне-аватнеяк апакольть стувто.
Вал макссть Юлия Григорьевнанень, Видяень аванстэнь:
— Покшчинь чансть тенк, тонавтыцят! Школань прядыцятненень тынь кемень иень перть максыде оймевий, превть. Тонавтыде эрямо те аволь свал лембе, аволь свал кецневтиця эрямосонть. Путыде мель кастомс эйстэст арсиця, эрямонть лангс келейстэ ваныця, чачома келест, масторост вечкиця ломанть. Сюконян тенк, сюконян [27] лиятнень пельдеяк валдочинь кандоманк кис. Кеман, 10-це «а» классонь прядыцятне, косо авольть важоде, кодамо тёкшс иляст пачкоде, кармить сэрейстэ кандомо минек школанть лемензэ. Кеман, ламот эйстэст кармить минек университетэнь студентэкс. Келей, васов тердиця ки тенк, школань прядыцят!
Линейкась прядовсь. Пурнавозтне срадсть. Кузоваткинтнэ, Юлия Григорьевна цёранзо марто, сыргасть кудов. Васенцеде школань стака кенкшенть Видяй панжокшнызе кемень иеде икеле, те ульнесь 1967-це, а стувтови, иестэ. Ды вана шкань аволь нурькине кемень пелькстнэ нолажтсть, эзть марявояк, модачиренть томбалев. Кемень тундонь чадыведть, кемень лиясто цят якшамо, лиясто лембе телеть теевсть ледстнемакс, ваясть шкань отьмантень.
Видяй кудосо эзь кирдеве. Сусксь аламнеде ды тусь ялганстэнь. Мезе карми тееме чинь-чоп аванзо марто ниле стенатнень ютксо?
Юлия Григорьевна кадовсь ськамонзо. А мезень теемадо озыксэль «превень максыцянть» икелев мезеньгак ваномо. Мейле полавтызе мелензэ — тень тееме эзь карма.
«Кемень класстнэ-мелявкстнэ теевсть исень чикс. Мезе карматано тееме теде мейле, седе тов? Валске? Валскень ютазь? Тень кувалма, видькстан, талномс тенек вельть а мезть. Кизэ Видяень вейке — университет. Кода мерить, сырнень медаль марто куш ков ютат, китне панжадот.
Талновты, кода свал талновтсь, шумбрачизэ. Топодсть тензэ кемзисемге. Цёра. Мари сон цёракс эсь прянзо, арась? Вана мейсэ тевесь... Монень кевкстнемс — визькс, а ён. Аволь потякай эйкакшке. Паряк, тетянстэнь потмонзо панжтнизе? Кортама Андю марто, умок уш арасельть ютксонок теде мельявомат...»
Истя арсезь, Юлия Григорьевна путызе прянзо тодовненть лангс, кепединзе пильгензэ диванс ды сутямсь.