Поладкстомо (2016)/Поладкстомо/1
[3]
| ПОЛАДКСТОМО |
| Келей ёвтнема |
I
Юлянь допрок каладсь ёжозо вень куншкадо мейле. Апак учо куродызь пштикст, сэредьксэнь авторямот. Аволь пек марявозь сынь ушодовсть чокшне ланга, ды яла кемсь — ютыть: чачтома шказо, кирдевсь превсэнзэ, сы чинь — кавтонь ютазь. Лисни, манявсь, сась седе икеле. Сась — сави топавтомс. Яла мерить: шказо самс, шказо туемс. Козоньгак эйстэнзэ а кекшат.
Андрей Петрович — велесэ ды эсест юткова кудосояк Андю, — важодемстэ сазь, панар видьс кайсемадо, седеяк — аламошкас оймсеме чиремемадо эзь арсеяк, седеезэ марясь, сельмензэ несть: нинзэ сави ускомс чачтомкудов. Ульть анок. Сон ярсась мезе мусь ды озась нинзэ ваксс креслас. Чокшнень перть каштордсь течинь газетатнесэ. Теке басом мейсэ эряви лездась мадезь аштиця, шкань-шкань кувсиця Юлянень. Ведне канды-максы, вельксэнзэ витьсы... Зярдо кувсематне теевсть седе марявиксэкс, пшкадсь тензэ: «Капшакай» а тердема?». Тень каршо низэ мезеяк эзь мере — кончтась сельмесэнзэ.
Андю эрязасто стясь таркастонзо, капшазь ютась совсема таркасо телефон марто стуворнэнть ваксс. Кочкизе эрявикс номерэнть ды ёвтызе, ков сама.
— Теня, алтасть куроксто самс, — оймавтызе нинзэ, велькссэнзэ стядо аштезь; тарказонзо ойсемеяк эзь карма.
— Паро. Эряви тень стямс. Пурнамс-сэрнямс... — эль марямга ётынзе валтнэнь авась, нолдынзе кияксос пильгензэ, тонгсь тапкат.
— Содави, э-э-э, стяма. Лездан эрь, — вейкедест-вейкедест валтнэнь явнозь, мерсь Андю ды кундась топавтомо ёвтазенть.
[4] «Капшакаенть» самс кудазоравась кенерсь пурнамо: оршнесь, путсь юдминезэнзэ нардамо, сапонь, сурсеме, пеень вансь кавтома сэме, лият-мезть. Ней мирдть-нить кавонест аштесть озадо дивансо, учость. Чатьмонсть. Эрьвась арсесь эсь арсеманзо.
Юлянь, чарькодеви, талновтсь учневицясь. «Кеман, весемесь юты парсте, чачтан шождасто, пшти, пижакалемас сэредькст а марян... Вай, арсян, теке чачтнинь, теке Варчния. Кияк а соды. кинь мезе учи. эрьва мезть эрсить. Оно мелят Солаень Олдай тусь тоначив тунь одсто. Васенцеде начтыль... Монь, кеман, юты кода ламонь, покш майсемат а кармить. Лездак, Верепаз-Чипаз...»
Лездыцятне састь аравтозь шкантень. Дирнезевсь кенкш велькссэ баягинесь, совасть ашо халатсо аволь сыре-аволь од ава ды тумошка одёр цёра. Чатьмонезь, каштор-каштор валгсть ветеце этажсто ушов. Кузтемпесэ учось якстере тешкс «капшакай».
Чачтомкудосто Андю келейстэ эскелязь сась ялго. Дюм ве, кодат машинат те шкане! Читькак... «Содамс, кинь тень кази Юля, тейтерне эли цёрыне? — эзизе кадно, эскелясь мартонзо мелесь-кевкстемась. — Пароль, цёрыне, сон тетянтень седе малавикс. Цёрыне. Цёрыне... Те аволь тонь тевесь, аволь Юляньгак. Мхы, эно кинь? Содык, варчик... Яла невтнить пельтнень ёнов, келя, сынст прявтост соды. Соды, учок...»
Ансяк кенерсь варштамо Кузоваткинтнэнь эрямо пизэс гай кизэнь валскесь, эль кенерсь сон аксялкстнэстэ кшувавтомо венть пулонзо, Андю кепе-штапо чийсь телефононтень ды кочкизе превсэ кирдевикс номерэнть. Кашторксто мейле почкостонть марявсь пельсудыця авань вайгель: «Кода фамилиязо?». Андю ёвтызе — Кузоваткина. Аволь ёвтызеяк — серьгедизе: марявлизь удыцятнеяк.
Телефонось зярс-бути чатьмонсь, мельга каятотсь кодамо-бути «бу-бу-бу», ды окойники авань сизезь вайгель пачтясь: «Гайневтеде кавто часонь ютазь». Андюнь почконь кирдиця вить кедезэ новольсь. «Те, э-э-э, мезе-бути [5] а истя... — токизе апаро ёжо, — те шкас уш начтомаль. — Меельце валось полавтызе ёжонзо. — Косто тон содат? Каня тон чачтыцясь? Паро, карман учомо, гайневтян важодема таркастон».
Стакасто лекстясь, арсесь-тейсь ды кундась валскень ярсамонь анокстамо. «Эрямось, сави меремс, учомасто вачкави, ковгак а молят. Педе-пес! Э-э-э, те аволь допрок истя. Куломанть, ёвтыка, кияк учи? Ды таго... Учить сеть, кинь куломась идесынзе кувака, сэредькстэ пешксе майсематнеде.
Учомскак а кувать. Пурнан-сэрнян, зярс ярсан, ардан мастерскоев, ютыть частнэяк, гайневтян. Учомавтомо — эрямось а эрямо. Сёксня учотано теле, сы — кодаяк а учови, зярдо сон кадсы моданть. Сондензэ мейле ушодтано учомо тундонь кецневтиця, паро ёжонь пургондавтыця лембенть. Ды истя эрьва мейсэ, эрьва косо. Кадык апак видькста, салавине, учотано мик... сыречинть. Истя-аволь те? Ловомась, зяро иеть кадовсть пенсияс туемантень, каня теде а ледстни?»
Важодема таркасонзо, мастерскойсэ, Андю таго кочкизе эрявикс номерэнть. Каятотсь — кецневтизе гайневтицянть — тейтерень ванькс, парсте марявикс-чарькодевикс вайгель. Андю ёвтызе Юлянь фамилиянзо. Каршонзо теке вайгелесь эль эзизе кармавто киштеме: «Чачсь цёрыне, колмо килот ветесядт кавксоньгемень граммат». «Цёра, цёра, цёрыне! — чийнесть Андюнь прява некеть валтнэ. — Саты, цёкинентеньгак — оймсема чи, кедь малазонгак а сайса! Кадык чишка оймси. Оймсить сэнь, якстере, пиже... арттнэ-тюстнэяк. Учи кадык аламос вана те пейзажоськак, эйсэнзэ вана веть ведьс ваныця ожо лопа пойтне. Карми улеме чи — тейсынь».
Истя арсезь, пекстызе мастерскоензэ ды сыргась «покшчинь» яксевтеме. Васняяк совась «здравпункте», кода лемдизь артыцятне маласо апокш лавкиненть-буфетэнть. Рамась кавто «ашот», кой-мезе тушань пештямга. Те канстонть марто ютынзе артыцянь кудосонть седе малавикс ялганзо. Терд инзе мастерскоев — цёранзо чачоманть тешкстамо.
[6] Кавто суликатнень алятне «костизь» лип меремс. Кельтне ёртызь тертест, олякстомсть. Ялатеке кирьгапарьга нолдазесь марявсь аламо. Стуворонь прявтось кучизе, макссь ярмакт, ялгатнестэ вейкень асатыцянть мельга. Зярс тона чийнесь, ойсэ сёрмадыцятне кортазевсть италонь куншка шкань ине артыцятнеде, сынст сёрмадомань лувдост-койдест, ардомсто валдонть тевс нолдамодо, цёкинень вадевкстнэде. Ёвтнесть, вейкест-вейкест мельтнень трокс кайсевезь, натой пачколесть пси пелькстамоскак. Окойники учовсь кучозеськак. Андю нуртнизе цяркатнева кандозенть.
Кортамось Италиясто, 15-17-це пингетнестэ, кода-бути сонсь ютась 19-це пингень Францияс.
— Монь койсэ, весе импрессионисттнэстэ весемеде виев ды ёроков Моне, — копордась кедьгинестэнзэ, лекстясь — фу! — ды ёвтызе мелензэ Андюнь пейзажист ялгазо Салдаень Миша.
— Мекс истя ловат? — кевкстизе ине французтнэде кортамонь ушодыцянть этнофутуризмань сехте-сехте покшось Тирянь Юрий. — Тонавтнемстэнь училищасо лия мель кирдевсь. Келя, аволь сон лаврань каштазонть кандтнесь.
— Ужодо, ужодо, ялгат! Тынь истя мезе?! Андю мезень кувалма пурнымизь?! — серьгедсь кие-бути стувор экшсэ аштицятнеде.
— Вай, алкукскак! А минь... Андю тетякс теевсь — вана мезде эряви кортамс! — мерькизе французтнэде-киде лабордоманть Салдаень Миша.
— Истя, — каятотсь вайгель, — а мезть муськемс умок ды пек парсте муськезтнень.
— Кие кода, мон вечкса Дега Эдгаронь, — эсензэ содась вейкесь, теке эзь маряяк, мезде кортасть ансяк. Копордазь грамматнеде мезе ансяк а плестядят...
— Андю, ёвтык, кода арсят лемдемс васенькаеть?
— Ужодо, цёрат, кадык васня кудов пачтяса. Пек илядо эрязкале, — оймавтызе кевкстицянть Андю. Эзь карма сравтнеме седе — те кевкстемась умок а кадны эйсэнзэ.
— Вечкса, вечкса Дега Эдгаронь. Аволь ансяк сэняжа тюсонзо кис. Вечкса коштонь кондямо шождыне балеринанзо кис, — яла эзь оймаво «импрессионистэсь», киньгак эзь кунсоло, эсензэ марто кортась ине француздонть, сэнь тюсонь вечкицядонть.
Чачома чинь тешкстамось мольсь аволь вейке часонь перть. Мазычинь артыцятне аламос стувтызь натюрмортось пейзажост, этюдост, портретэст — цёкост-моль-бертэст аштесть тевтеме...
Кудов Андю пачкодсь зярыя часонь ютазь чикуншкадо мейле редявиксстэ чиремкшнезь. Совась, кайсесь-тейсь ды сеске телефононтень. Гайневтсь чачтомкудов. Мерсть самс нинзэ-цёранзо мельга чинь ютазь, кеменьшка частнэнь малава. «Те мекс истя кувать? Берянь мезеяк эзь лисе? Э-эх, кевкстемс эряволь, цябай пря!» — содавтызе талномань ёжо.
Ёвтазь шкантень Андю тердсь такси. Васня ардсть найманов. Рамась, талай кочксесь, колмо чопода-якстере розат, сюконясь микшницянтень ды ношкстась ушов, машиназонзо. Капшазевсть чачтомкудов, косо учость эйсэнзэ низэ ды цёразо, конань несы васенцеде.
Палатас совамодо кортамскак а мезть — эзть нолда. Учомс эно савсь а кувать. Ялатеке учомань минутатне марявсть седе кувакакс. Окойники панжовсь палатань ашо сэрей кенкшесь ды лиссь Юля, мартонзо ашо халатсо ава. Юля керш кедьсэнзэ, мештезэнзэ седеймарязь лепштязь, кирдсь тапаркске. Эскелясь келей валдо коридорганть чевте эскелькссэ, прок пельсь пупорди. Пешксе турвасонзо кувтолдсь-налксесь мизолкс. Сельмечирькензэ ало цитнесть кенярксонь сяткинеть. Мольсь мирдензэ каршо, прок Рафаэлень куломань а содыця «Мадонна с младенцем» картинастонзо лиссь. «Ванодо, мон сынь, кенярдодо мартон — эрямонтень кандынь эрямо, од ойме!» — сёрмадозель чамасонзо.
[8] Андю эскельдясь нинзэ каршо. Венстизе балягапусмонть ды пелезь — илязо правто — саизе Юлянь кедьстэ питнейдеяк питней ашо тапаркскенть. Сонсь комавтызе прянзо, токавтынзе турванзо нинзэ чамаумарьс.
— Шумбрачи, «авай», шумбрачи, э-э-э, эйдинем! —нинзэ сельмес-чамас ванозь, пшкадсь Андю, пештизе гай вайгельсэнзэ учома нупаленть.
— Сюк-сюк, «тетяй», вастомат кисэ! — седейшкава мизолдозь, текеньсэ пандызе Юля. Сон кепединзе якстере розатнень чаманзо малас ды домкасто лекстясь — марямс розань ламбамо-тантей, салава иредстиця чиненть.
Юля — филолог. Паряк, те ювк шкастонть ледсть мелезэнзэ Тургенев Иванонь ламонень содавикс валтнэ: «Как хороши, как свежи были розы...».
— Мезе, полай, кудов? — саинзе чаманзо маласто розатнень Юля, гайгезевсь Цёковонь вайгелезэ.
— Кудов, кудов, дутай, — кундынзе марязь валтнэнь Андю ды теке басом вить кедьсэнзэ панжизе учомну-палень кенкшенть. Нолдызе сэнь сельме нинзэ, сонсь эскельдясь мельганзо.
Кузтемпесэ учось «Волга». Колмонест озасть эйзэнзэ. Ветицясь содась, ков ардомс. Кемень-кеветее минутань ютазь ульнесть Эрямо пизэсэст.
Зярс ардсть, Андюнь а весть содавтнизе мелесь; «Кода лемдемс, кодамо Лем максомс цёрынентень? Паряк, кочкамс Франциянь эли Италиянь модамасторонь келес содавикс артыцятнень лемстэст? Меремс, Эдгар... Каня берянь, а гайги? Эли Эжен... Каня аволь мазый? Кандтнесь сонзэ Делакруа, «Свобода на баррикадах» артовксонть сёрмадыцязо. Эжен... Арась, арась, ковгак а маштови! Мезекс лытамс ломамасторга? Тон мезе, ормаза тикшеде ярсыть? Превстэтькак ёртык! Сеедьстэ истя эрси: мезесь васня Маряви Шождынекс, Мейле кодаяк а изняви. Лемень максомаськак. Куроксто, Сеске а мбндердяСак. Муема эсь масторонь. Мхы! Каня берянь путомс, мертяно, Видяй?! Гайги? Гайги, ды кода! Рузкс Витя, латыньсэ Виктор — изниця. Истяяк, Истяяк... Весе: карми Видяй, эрзякс. [9] А кода авазо? Юля брикстяеме а карми? Э-э-э, аватне истят, свал каршо. Мерят «ашо», сынь, э-э-э... Арсян, а карми. Лемесь мазый, покш зэме марто. Бути мезе, ледстяса тензэ, литераторонтень, Гюгонь, — сонгак Виктор ульнесь».
Апак учо лиссь од мелявкс. Арасель, эзть анокста «покольнентень» коникке-нурсемине. Андю шкань апак таргсе сыргась микшнема таркатнева вешнеме. Юля кой-мезть лияткак кармавтсь рамамс. Зярс «тякинест» мадстизе эсест коникс.
Андю васняяк сайсь ки ошонь покштояк покш «Мебель» лавканть пелев. Судозо эзизе маня: кармавтоматнень топавтынзе вейкень пес, лиссь куроксто-ёнсто, лиява-кува азгондемс эзь саво.
Чопоньпелев од тетятнень-аватнень ютксо лиссь казямо пелькстамо.
Эрямонтень од сыцясь эль марямга носксь судынесэнзэ. Удось. Рамазь кониккесэнть чевтель, коськель, лембель. Пекинезэ пешксе. Юля ансяк тензэ макснесь поте. Сон зярс эзь нее, эзь маря, мезе мольсь перьканзо. Юля мадстизе цёранзо «од кудозонзо» ды ютась кухняв чокшнень ярсамонь анокстамо. Сась лездамо Андюяк. Сайсь пеель, керсесь кши. Кундась модамарень ватксеме.
— Э-э-э, содат мезе, эряви, кода мерить, стувор пурнамс, — сезизе сон каштонть. — Кода апак озно? Тентеме, кортыть, касомояк а карми.
Юлянь мештева прок эйпоколь ютавтсть.
— Седе чавола мезеяк а ёвтат? — кивчк чатьмонемадо мейле, вайгелень кепедезь, кевкстемасо ёвтызе мелензэ Юля.
— Арась, кода кортыть... — музгордемав ютыксэль азорось.
— Ловт, Андю, «ознома» валонть тон эзик ёвта. Кодаткак стольть-стуворт а улить. Омбоцеде мерян: а улить! Чапик тень эстеть. М-хы! Мелявкс муить... Содав, содан, кодамо «озномадо» арсят! Аламо — копордазь сакшнат... — [10] тттпти вайгельсэ аравтызе тарказонзо мирдензэ. Сон аштесь пидема плитанть вакссо ды човорясь, илязо туе чадозь, кастрюлясо ямонть.
— Э-э-э, весе истя тейнить... «Крестинат» лемест, — зярс-бути чатьмонемадо мейле мокнозевсь, таго текень ледстизе Андю.
— Кадык тейнить. Мезе, «весекс» арсят улемс? — чочизе Юля «крестинань» вечкицянть. Човине чевте вайгелезэ ливтнесь кудованть.
Юля содылизе Андюнь лавшочинзэ — кирьгапарентень кайсеме вечкеманзо, секс истямо пси кортамо верьгедсь ютксост се чокшнестэнть.
Юля эсь пачканзо чумондсь мирдензэ, мекс эйдест чачсь вейкине алнэ марто. Паряк, аволь сондензэяк лиссь те апарось. Ялатеке арсезеват. Андю, кадык аволь свал, сакшнось мастерскойстэ «токазь», лиясто допрок лоподезь. Секс авась чумондськак лавськесэ удыцянть тетянзо.
Эсензэ лангаяк теке марто ютась, чумондсь эсь прянзояк: эзь кардаво, эзь кадставо Андюзо раужо, ризнэмань кандыця обуцядонть — палыця ведентень бажамодонзо. «Чуман каня? — аволь весть, аволь кавкстькак содавтнизе Юлянь те мелесь. — Мезе ансяк эзинь тее, кинень ды ков ансяк эзинь пшкале, кода мартонзо ансяк эзинь кортне — стяко».
— Теня, куш шабратнень, лелянь велестэ серьгедемс, — эзь оймаво, нернемас пачкодсь Андю, — кода-бути, э-э-э, ломанде визькс.
— Визькс... Монень, арсят, а визькс, зярдо сат чиремкшнезь? Паро, саты, а мезть сравтнемс стяконь валт! — эзь пота, кирдсь эсензэ ёнксонть Юля. Сонсь арсезевсь: «Ёвтамс-арась, кодамо орма марто сась цёранок чачтом-кудосто? Ужо эно, а карман капшамо. Аламошкас а ёвтаса. Мезе те максы? Ледстямс вана ялатеке сави...».
Сёвнома ёнов молиця пелькстамонть поладызе пурьгинень зэртте мейлень кашт. Ямось пись, пачкодсть стувор экшс. Ярсасть чатьмонезь. Эрямонь паргосонть свал эрить вадря ды берянь, моро ды лайшема, раужо ды... [11] Сындест чувтопряс а кузят. Текекс лиссь Андю марто Юляньгак: чинь-чоп пеедькшнесть-кецнесть, чопоньпелев пувазевсь ютковаст пелевеёнксонь вармине. Истя ульнесь ды карми улеме пингеде-пингес, свал.
Юля сеске кундась кедьгетнень шлямо. Стясь ваксозонзо мирдезэяк. Саизе Юлянь лавтовонзо трокс каязь нардамонть, кармась пенчтнень-мезтнень нардтнеме.
— Берянь куля теть ёвтан, — ушодокшнось авась, ды эзь кенере валонзо прядомо, шабра нупальстэ каятотсь цирнема-цийнема вайгель.
Юля капшазевсь эйкакшонтень, варштызе алксонзо. «Во-во, кода арсинь, — тешкстызе эськанзо, — начко». Сеске полавтызе коське ацавкскесэ. Эйкакшось оймась. Истяко, тувталтомо, кодамояк эйде лайшеме а карми.
— Эно поладса кортамом, — мерсь, мекев панинупалев велявтозь, Юля. — Вадря, кецневти ламось, ансяк вана шумбрачизэ Цёрыненек...
Ды Юля ёвтнизе, мейсэ тевесь.
— Вай! Ды те кода истя? — абунгадсь нинзэ вакссо аштиця-лездыця Андю. — Э-э-э, лангс ванозь...
— Лангс ванозь... Ормань менстницятне мерсть, келя, эйкакшонзо те ормадонть а улить... Стака, паряк, тензэ карми муемс аваломаньгак.
— М-м-м, содат мезе, седейпелькскем... Арсят, пичкавтницятне — пазт? Э-э-э, пазтнэяк ильвелить, ашо халатсотне — ломанть, — торнось Андюнь казямо вайгелезэ, мель путсь оймавтомс нинзэ, панемс ёжонь колыця арсеманзо.
Юля кунсолось, сонсь арсесь лиякс: «Кодат ильведькст, ормань содыцятневтемеяк, эстетькак маряви, вейке эли кавто алнэть монакескавсонть. Кодат манявомат...». Арась, мирдензэ валтнэ эзть лезда, эрьведема ёжо эзизе сае, нуварась потязь потясь седейсэнзэ.
— Вана мезе, Андю, лемде тон эзить арсе? Кодамо тензэ макстано? — озась стуворпес ды тунь лиядо, седе валдодо кортазевсь Юля. Вайгельсэнзэ марявсть кенярксонь гайтькеть.
[12] Те шкастонть ций вайгельсэ ёвтась эседензэ зярс луш вень удомасо удыця пакшась. «Бешоконь, пекинезэ вачсь эйкакшонть», — ёнонзо ютамсто сась мельс авазо. Саизе нурямостонть, велявтсь мартонзо пани-нупалев. Озась, лепштизе пакшанть мештезэнзэ, юкстизе сивензэ ды макссь тензэ поте. Тона педязь педясь потямо.
— Лемденть арсинь, Юля, кода эзинь. Чачтомкудосто ардомсто мик кирдинь мельсэнь, кочксинь. Теня, мон арсян, лемдема Витякс, Виктор Андреевич. Кода, гайги? Вечкевикс сёрмадеетькак ульнесь, э-э-э, Витя. Виктор Гюго... Ну, мезе мерят?
— Мезекс тесэ Гюго? — кирнявтсть Юлянь сельмечирькензэ.
— Ды истяк. Седеяк мазыйстэ гайги те лемесь эрзякс — Видяй! Пилеть вадяши... Э-э-э, каня а истя? Латинэнь кельсэ смустезэ — изниця. Марясак, кодамо зэмезэ те валонть? Видяй — изниця! Во кода... Туи?
— Туи-туи, — муст-муст пейдезевсь — кувтолк мерсть ашо пеензэ — Юля. Ёжомарязь «нельгизе» матедевиця пакшанть кургосто потепрянть, стясь ды кандызе потякшонть анок ацазь таркинезэнзэ.
Мелявкстнэде — лиясто неявикс, лиясто аволь — эрьва чись пешксе. Вейкесь эйстэст, лемень путомась, прядовсь. Эрясть Андют-Юлят кавто нупалень квартирасонть кавонест, ней — колмонест. Од эрицясь совавтсь кудозост-чизэст мелявкст, конатнеде а авазо, а тетязо икеле эзть арсеяк: дюм вень стякшномат, эрьва чинь муськемат, андомат-симдемат... Сы шка, тонады якамо-чийнеме, лисить од мелявкст — ванома ды ванома мельганзо, ковгак илязо эце, илязо тее кодамояк зыян. Секс кой-кона «превей» авинетне а правтыть нолдамс эйкакшт, вейке — теяк маряви тенст ламо.
Шказо, кадык нузялдозь, чарась кемененть малава. Кода мериль Андюнь покштязо, аволь сэрей, коськана, раужо цёцяня сакало Митя атя, эрявсь арсемс чувтолангодояк. Аволь ансяк саразтнэ сонзэ вечксызь.
[13] Васенцекс варштась стенас понгавтозь тикаицятнень лангс Андю. Сон кайсесь ды венемсь «чувтонть» кувалт, копачизе штапо рунгонзо кизэнь шожда велькссэ. Юля шаштызе эсест коник ваксс эйдиненть нурямонзо, мадстизе толонть ды ёлдорсо венемсь мирдензэ ёжос.
А куш а каш. Нупальсэнть валдо прок чить. Ваны вальмаванть менельсэнть азорокс прянзо мариця пешксе ковось. Ваны вечкицятненень лездыцясь, кевкстни, тукшны-арась а удыцятнень мельс сэнь вановтозо. Вальмась келей, вант, бошан чама, зяро мелеть.
— А удат? — пшкадсь эль марямга, колызе каштонть кунст мадезь аштиця Юля.
— Мезе? — кевкстсь Андю, сыргозтизе удома шканть вайгельсэнзэ, мадсь вить ёнксонзо лангс, керш кедензэ путызе нинзэ мештес.
— Мезеяк, та-кода арсезевинь, кодамокс карми Видяй, меремс, кемзисемге иень ютазь. Лангс ваномс, коронь коряс... — тошказь, теке эстензэ, кортась авась, ялатеке марязо кутмордыцязо. — Кикс карми?
— Теня, профессиятнеде-тевтнеде, Юля, зняро — зяро... зняро череть арасть прясот. Карми, э-э-э, мезекс тонавтсынек. Каня содави...
— Те истя, ды куш арсезь...
— Арсезь... артыцякс, — мерсь Андю апак кавтолдо ды теке марто пеедькшнезь. Маризе, сельмензэ кармасть пекставомо.
Юля кувать эзь матедеве. Путсь мель кершамс, а нолдамс нусманя-ризксэв арсематнень. Эрьва кодат пирявкст стявтнесь икельгаст. Тень лангс апак вано вишка Видяень икелечидензэ мельтне чарасть-велясть удемсэнзэ сиземань апак сода. Топодить тензэ кеветее, кемзисемге, комсь... Кода сравтови эрямо кизэ те аменстявикс орманть марто? Андю эзизе чарькоде, Юля мариксэлизе мелензэ, кодамо ломанекс карми эйдест: чевте, седеймариця эли казямо, кельме седей, видечинь вечкиця эли кенгелиця...
Зярсыя аштесь сельмень конязь. Эзь лезда. Удомась теке тандадсь, кекшсь эйстэнзэ, эзь тердеве. Мель путсь [14] ледстямс штельксэнь пес вейксэ ковдо икелень шканть. Сеть ветнень, зярдо пургондакшнось пазявкскест. «Кодамо ёжосо-превсэ, симезь-аволь ульнесь Видяень тетязо? Илязан маняво, маряви, се чокшнестэнть Андю сакшнось «аволь ськамонзо». Мезть вешнемс-исковамс. Уш сестэ, ансяк теевкшнинек содавиксэкс, вейсэндявомадо кортамояк арасель, редякшныя, мезесь эйсэнзэ салы-уски. Редякшныя, ансяк пек эзинь правто кардамс, меремс тензэ: мон эли стопкась. Арась, обуцям аволь эцицянь...»
Истя Инзась, сялдсь, чумондсь ды идесь эсь прянзо, паряк, чумовтомо чумо авась.
Окойники удомань сайниця ледстнематне-мельтне срадсть ды сон матедевсь од ломанень домка удомасо, эзизе маряяк, кода Андю саизе пси кедензэ мештестэнзэ. Нупальсэнть азорокс кадовсть коввалдось ды частнэнь тикаемаст.