Пици-палакст/Сём вене

From Wikisource
Jump to navigation Jump to search
[ 56 ]
СЁМ ВЕНЕ


I
У
РАЛОНЬ СТАНЦАСЬ ад: поездэнь зэрнимась, пара возонь вешкимась, ломанень шумось, алашань цяхамось ды крандазонь чикордомось — глушизь ушонть.

Станцань кудонть песэ колмо ават — торгувить ловсосо, кшесэ ды сывельсэ. Пелезь, ве сельме крайсэ, ваныть станцань караулиця милициятне ланкс. Седеест сорныть:

— Кабу «якстере прясь» аволимизь панть тестэ...

Милиционертнэ, прок атякшт, якасть станцанть перьк, каркссост тонгозь револьверт, бокасост карькс вельде кавтонь-кавтонь ата и колмонь-колмонь бомбат. Ульнесь мезде пелемс торговкатненень. Милиционертнэнь се шкастонь властест ульнесь покш.

Станцанть ве ёндо прок локшосо цяраць моро:

„Вы слышали, деды-ыы...
Война на-а-а-чалася-ааа...
Бросай сво-о-ё де-е-ло,
В поход со-о-обирайся-ааа!
Смело мы в бой пойдем
За вла-асть совето-о-в...
И — как один умрем
В борьбе-э за это...

Н-ской коммунистической отрядось пачкоць станцатнень, вельмавтызе тарканть. Косто бути появасть гармунят. Теевсь покш крук, якстерёармеецнэ стувтызь аламос войнанть, кармасть киштеме-морамо, прок шачума велесэст.

Отряцонть кавто эрзят — Беляков Прока ды Иванов Никифор. Кавонест — ве велень ломать.

Иванов токизе бокас Беляковонь.

— Прока, ванта, кода парсте киштить шайтян руснэ... Сельмем сияды... дайка листя круконтень ды ютака [ 57 ]аламодо... Тон — велесэ паро киштиця ульнить... ют нилить макст покорс эрзятнень.

— Каштмольть, Никиша; ков истя эцят эйсэнь? Ара кирьдят руснэнь каршо! — отвечи Беляков.

Руснэ прок чаркодизь Ивановонь валтнэнь. Сеереме кармасть:

— Мордвов давайте в круг! Мордвов!

— Белякова давайте! Ун, бит, бульнэ харушай малай. Плясаит, бит, ай-ай какой. Якши, бит, плясаит! Давайтя ява крукомда! — пижакаць красноармеец-татар.

— Ха-ха-ха-ха-! Белякова! Белякова! — сеерить красноармеецнэ ды таргизь Беляковонь круконтень.

Аздан месть кармаволь тейнеме Беляков киштеманть марто, аволь садеряй куроксто отрядонь камандирэсь Вакулич. Якстереармеецнэ општ мольсть. Гармошкась кавксть-колмксть кернезевсь, прок повань сараз, и — пекстызе кирьга парензэ. Вакулич чуросто ёвтась кавто-колмо вал:

— Ялгат! Получинь приказ: минек отрядонть сайсызь Деникинэнь фронтов. Тосто кулятне аволь пек парт марявить. Эряви посублямс ялгатненень. Течи туйдяно.

— Даёш Деникина! — сергець отрядось.

Вакулич варштась мазыстэ отрядонзо ланкс. Мелезэнзэ паро. Прянзо чаравтызе. Ве курго уголсонть пейдезевсь, и састо, прок эсь пачканзо, мерсь:

— Молодцы, ребята! Не пропадем! Победим!..

Кавто часто мейле отрядось тусь Уралонь станцасто. Якстереармеецнэнь ёжост ульнесь паро. Ве вагонсо, косо арцть эрзятне, весёласто пилясь тальянка гармошка. Татаронь цёрась, коната пек киштевць Беляковонь, морась гармошканть мельга синтрезь рузонь кельсэ эсинзэ складявт частушкат:

Волгам берегам сидал,
Чуркам-палками кидал...
Мине атиц сватал невестам
Настоящум крукодил...
Спать с невестам ни хатил, бит,
Пирвай ночке тягум дал.
Тайкум, тайкум ми бяжал, бит,
Красным армиям удрал...

[ 58 ]

Кемень чиде мейле отрядось пачкоць Деникинэнь фронтов. Поездэсь прок пелезь мольсь. Ускизе отрядонть вишка станцас Н... Сявордынзе якстереармецнэнь станцантень сюро мешок лацо ды оргоць мекев удалов. Чугункань кистэнть отрядось кавто чить ялго мольсь пазицияв. Пачкоць Дегтевка велес; тосто сырьгась эщо аламодо икелев — кавтошка вайгельбе, ды лоткась кишка хуторнэс. Кармась учомо Деникинэнь войскатнень.

Таркась ульнесь пек амазый. Хуторонь кавто кудынетне аштесть пакся куншкасо, прок мелень-манынь тикше стогат. Ломатне, эрицятне, ков бути оргоцть. Сядо-кавто сажеть ве ёнов — вирь-колкине. Экшезэнзэ арась отрядонь обозось. Эйсэнзэ каравли звод.

Шкась пелеведе ламо. Менелесь ацавсь раужо пельсэ. Секень вант — пиземе туи. Чопуда — сельмс нерькстамс а неят. Разведчикне канцть кулят: Деникинэнь кавалериясь карми те вестэнть само наступленияс. Якстереармеецнэ мекс бути кармасть нусмакадомо. Эсть надия пек виест ланкс.

Эрзятне аштесть озадо ряц. Беляков винтовканзо кутмордызе, прянзо нолдызе. Кортамо кармась а мельсэ, валтнэнь пеензэ пачк нолдась.

— Никиша, мекс бути ёжом аэсинь велявць... Прок стака кев кияк каясь седеезэнь — уски ды уски алов... Мекс истя Никиша? Нать, марясы седеесь — живстэ а лисян те бойстэнть?

Ивановонь седеезэ не валтнэде мейле васня свистявсь вейс, мейле кармась скирятомо, прок кияк кечкайсэ кармась петиманзо. Мелезэнзэ лець родной велезэ, шачума кудозо. Беляков укстась стакасто — ды таго корты.

— Тон думик, Никиша: тундонь мазы чить... Самай весёла маень шкат... пиже луга... виресь оршась... Народ весе робуты — паро седейсэ... А тон вана косо аштек... Эрямот! учок ансяк чиде-чис кулома...

Беляков кежейстэ стукадизе винтовкань прикладонть моданте ды кармась позорямо буржуйтнень ды капиталистнэнь, мейсь сынь воювить робочейтнень ды крестьятнэнь каршо.

Иванов мериксэль Беляковнэнь мень бути оймавтомань валт, но, кода эзь старая, ве валгак изь муе, [ 59 ]кармась сонгак позорямо капиталистнэнь. Лиядо амезьде кортамсоль се шкане.

II

Аламос аштезь Деникинэнь кавалериясь кармась эцеме отрядонть ланкс. Покш бой кепетець. Кодамо сон ульнесь — кельсэ а ёвтави. Ушось увнось пургинекс, чады ветькс...

— Та-та-та-та-та-та...

— Бух! Ббух!

— Ой! Ранен! Рааане-ээн...

— Това-ри-щи... спаси-те-эээ

— Трррах!

— Та-та-та-та-тра-та!

— Бух-у-уух! Бууух-ууух!

— Рррота! Частым огнем — начинай!

— Трах! Ра-рах! Рах! Ах!

— Пулеметы! Беглым огнем — начинай!

— Тара-ра-тата-та-та-та-та-та...

Пек дружнасто турсь отрядось. Неприятелень кавалериясь эзь кирть. Ламо чавозь каць пакся куншкас — потась удалов. Ве атакась мацтявсь. Отрядось спокойс прась. Пурнызь чавозь ялгаст. Раняснень — сюлмсизь ранаст. Эзь кенерть отрядось оймензэ таргамо, казакнэ таго кармасть леднеме.

Пушкань урномадонть, винтовкань лакштяимадонть, пулеметонь цярномадонть, ломанень пижнемадонть, алашань цяхамодонть ушось кувсесь ёвксонь чудовищакс. Пулятне ливтясть виев нешке ройкс. Снарятнэ сезевсть секе-секе ланкс.

Хуторонть таркас теевсь щепка куця. Косояк арасель аштима тарка. Якстереармеецнэ ёмавтызь лома ёжост. Теевсть зверькс. Эрьва кинь пря поцо сялгозь ульнесь ансяк ве дум:

— Кирьдемс пазициянть... а нолдамс казакнэнь, а понгомс пленс...

Куломодо кияк эзь дума. Аютко ульнесь.

Валськенть самс казакнэ тейнесть кавксо атакат. Акинень ульнесь ваномс ранясьне мельга.

Обозонть ёндо арць красноармеец — шапкавтомо, панарнэсэ. Керш кедезэ верь поцо — шашкасо керязь. Пижакаць прок аволь эсинзэ вайгельсэ:

[ 60 ] — Ялгат! обозонть тапизь весе... Винтовканок лоткасть леднемадо. Пулеметонок нельгизь... Зводонть капстакс керьсизь...

Отряцтонть явсть сядо ломань обозонть нельгеме. Те сядонтень понксть Беляков марто Ивановт. Мезе вий чийсть якстереармеецнэ обозонтень. Азаргадонь кискакс каявсть лангозост казакнэ.

Кармасть туреме прянь апак жаля. Ки изни?

Самай виев боень шкастонть Беляков кундызе грудензэ, шатазевсь — ды новольсь масторов. Пулясь ливтясь пачканзо. Иванов комась эйзэнзэ.

— Прока, кода — пек ранявить?

— Да... пек... берять тевтне... А неса, нать, больше лиси мазы чинть... Никиша, комака вельксэзэнь... Кортамс тень стака...

Иванов пульзясь, ладизе пилензэ Прокань курго малав.

— Куломс тень аохота, Никиша... а несаяк сыця паро эрямонть... Никиша... кудосо... тетям, авам... семиям сыреть весе... Ки ланкс кадовить? Мон ансяк надёшкаст ульнинь... А ней... ней вана... куломс сави монень чаво паксяс... Никиша, оно мезе... тон иля аште монь вакссо... мон курок... кулан... Азё ялгатненень... посуббляк... Илядо... м... а... кст пря казакнэ... не...нь... Никиша, м... м...

Эзь ёвтавт тензэ остатка валось. Рунгозо пек сорновтовсь, вить кедезэ ёртовсь ве бокав, — Беляков чувтомсь.

Иванов сускинзе пеензэ, кшникс свистизе коморозонзо винтовканть ды ёртовсь боенть поц. Каршозонзо — покш казак. Ёртовсть вейке-вейке ланкс. Ивановонь штыкесь совась казаконть бокас шождынестэ, прок пеель пидень дурак куярс. Вересь тильнеме кармась прок боцька тулосто.

Седе тов месть ульнесть — а ёвтневить.

* * *

Якстереармеецнэ — робочейтне ды сокицятне — эсь верьсэст, эсь прясост идизь валдо оля-чинть.

Москов, ГИЖ. 1927 ие