Пици-палакст/Од кемть

From Wikisource
Jump to navigation Jump to search
[ 49 ]
ОД КЕМТЬ


I
Т
ОН, КОЛЯ, мезеяк а содат?

— Арась, Петя.

— Чаркоть, мейсь сынь?

— Ки содасы... Кодамо тамаша тонть пря потмозот а сови. Содатан тонть — умок.

Петя аламодо „пупавсь“ не валтнэсэ:

— Кирнянь кумуха саинзат истя кортамот кис. Туян... мезеяк теть а ёвтангак.

Коля кармась лацемензэ:

— Тон, Петя, прок циреят: цют токават — апаргадат, мон пеедьмань кис кодамояк вал ёвтан — тон уш ацирьгадат.

Петя ладявсь. Сон а машты кежиявтнеме:

— Вана мейсь сынь, Коля: тонгак монь лацо, уроз[1] ломанят... аштек аламос: таргамс васня теян. Цигарка марто седе ён ёвтнесы.

Коля учи. Сон парсте содасы Петянь: бути местькак ёвтнеме карми, васня весе покштянзо, бабанзо кундасыньзе, мейле тевенть ёвтнесы.

— Коля, тонгак уроз-ломанят... монь авам кулось, кадымем вишкинестэ, тетям тримем-кастымем прякасо ды сюкорсо, конатнень бабинетне кандыть церькував... тетям тосо сторужокс служи...

— Петя, пандя теть лабордомс. Мон тень умок содаса. Кортак тевде...

— Иля пане эйсэнь кополсо, Коля! Пожар прок косояк арась... Тонгак монь лацо: цёрась бедноят, якат пачк карьсэ, кеметь арасть, — рамамс амейсэ, секс...

— Петя, ёвтасак течи, мезе ёвтамот эли арась? Ва пиле-юр сэват!.. Месть прок калсто сарт тарксят...

Кодак Петя лецтинзе кемтнень, Колянь седейс прок сядо сарт сялговсть. Секс сон кежейстэ кармась кортамо Петя марто.

[ 50 ] — Мекс тон, Коля, истямат? — абунгадозь мерсь Петя. — Тон пачк истя пеле-валом ланкс керясамак, прок тарваз дергадят удалкскан... Кунсолок эно: мон маринь, станцас эрявить робутыцят... целковой чинть кис пандыть. Адя тов робутамо? Наживатано пилькс карьсимат...

Колянь ёжозояк майшь Петянь валтнэде мейле. Кодамо превей те Петя-меремась. Кодамо паро ялгась Петя. Истямо ялганть марто — эрявлить ды эрявлить.

— Петя, косто истя марить теде?

— Косто маринь — сестэ маринь. Тон молят эли арась?

— Петя, иля кевксне! Зярдо сырьгамкась?

— Эряви седе курок, Коля — молицятне ламо улить. Поздаят — бабань пеште саят...

— Сырьгатано, Петя, ванды.

II

Валськень зорясь сравтынзе ашо кудрянзо менельганть. Чи лисима ёнксось — сырежди. Велесь эщо уды. Ансяк кона-кона кудосонть аватне стясть скалонь потявтомо. Косо-косо парыть реветь учить стадань панима.

Коля марто Петят умок уш стясть. Кувать эсть пурна: сумкинес — кше, исень пидевть модамарьть (картушкат), карсима карть-ды весе. Седе курок ношкстасть станцав.

Валськесь ульнесь опаня. Кавто ялгатне капшазь мольсть кияванть. Чи валгума ёндо пувась лембе вармине ды палсесь цёратнень чамаст.

Коля каштмольсь.

Петяяк.

Эрьвейкень — эсь арьсиманзо. Петя арьси мекс бути Колядо.

Коля — сонзэ сех вечкима ялгазо. Аволь ансяк сон, весе велень цёратне ды тейтерьтне вечксызь Колянь: пек сон паро цёрась, келезэ пшти: иля пеце сёвномо маронзо: кавто-колмо вал ёвты — прок пешня сялги кирьга-парезэть. Мазыйстэ моры гармунясо. Велень ве пестэ тетьксыньзе гармунязо — омбоце пев марявить. Кодат ансяк морот а моры Коля. Преветькак чаракадыть. Ламо од тейтерень седей салава коскени Колянь кис. Ламо од цёрань [ 51 ]сельме сияды Коля ланкс. Ансяк Петянь сельмензэ а сиядыть. Коля — ялгазо. Паро ялга ланкс сельмень сиядомась — берянь тев. Паро ялгасо эряви пря шнамс.

Колянь лият арьсиманзо. Мельзэнзэ мекс бути лець 1915-це иесь. Тетянзо саизь войнав. Кучсь семиянстэнь вейке сёрма ды лоткась сёрмадомодо. Те шкас а содыть — ков ёмась. Ламо Колянь прява ютасть. Вецэ-толсо ютавтызе эйкакш пингензэ. Лецтямс стака.

Ютась германской войнась. Салдатнэ кармасть кудов пурнавомо. Колянь тетязо эзь са. Авазо чинек-венек рангозь сельме виензэ маштыньзе.

Ламо ведь чудесь. Стувтовомо кармасть войнань шкатне. Пувсевсь авань горяськак. Пачк а рангуват.

Кайсь Коля. Теевсь паро цёракс. Кармась ульцява яксекшнеме. Тетянзо гармунянть марто. Ваны сюпавонь цёратне ланкс — оршазь парсте, прясост мазый, валдо козырька марто, картуст, пильксэст — кемть. Цёратнеяк — берять: конань-конань ланкс сельгетькак аволик кая. Мезеяк а теят: сюпавонь цёрат.

Сияцть Колянь сельтне кемтне ланкс сех пек. Сы празник. Оршасыньзе Коля сёрмав понксонзо, конатнень тензэ тетязо кадыньзе, викшнезь сиве панаронзо, судрясыньзе витев кудряв черензэ, — мелезэнзэ паро. Хоть ков — цёра. Варшты пильгензэ ланкс — тосо амазый карьть. Мельс парозо сеске юты. Таго ледить мелезэнзэ кемтне, седеезэ пси вецэ валови.

Эзизе стувт Коля сеньгак, кода сон весть кевкстизе аванзо, мекс ломатне а вейкецтэ эрить. Авазо кувать арьсесь, месть меремс тень каршо. Мезеяк паро эзь муе. Мерсь ансяк:

— Те тевесь, цёрам, пазонть, сонзэ олясь мекс ломатне аволь вейкецтэ эрить. Сон лома ланксо покшось.

Коля теде мейле лоткась пазонть вечкимадо. Аволь весть чаво кудосо сёлнызе пазонть „апаро валсо“.

Вейке седей оймамо тарказо Колянь — „саратовка“ гармунязо, тетязо кадызе тензэ...

— Коля, идемевсь! — сергець Петя. — Вантая, эль пачкоттяно станцантень!

— Кода курок! Эзинь фатяяк.

Эщо аламос и сынь пачкоцть станцантень.

[ 52 ]
III

Ютась ков. Коля марто Петят састь кудов. Наживасть вейкецтэ: эрьвейкень зепсэ — ниленьгемень целковой.

Коля кижнэзь совась кудов. Мерят, цела ие кудосо арасель. Тошнакаць:

— Авай, варштака, зяро ярмак туинь! Варштака! — каинзе столанкс ярмакнэнь.

Авазо варштась лангозост. Таймаскаць. Кирьга парезэнзэ куйсь ал. Сельведензэ петерьсэ тусть.

Коля варштась аванзо сельветнень ланкс. Чаркаць: авазо аварди покш мельс пародонть. Эсинзэ сельветнеяк кармасть малав само:

— Авай, пурныть ярмакнэнь... Мон лисян кардазов тошнакадынь Гнедоенть мельга...

Авазо варштась мельганзо, нардыньзе сельведензэ ды, прок эсь пачканзо, мерсь:

— Вере пас корминець жалимем: путной эйкакш макссь тень. Те уш трясамам. Тетякс тусь: мезе косто добуви, кудов канцы.

IV

Самар ош. Троицкой базарось бизны нешке пирекс. Валськень ранасто чокшнэ поздас тосо пивти народ: микшнить, рамсить, маньшить вейкест-вейкест. Торгувицятне лавкань кенкшнэнь ланксот — корш лацо ваныть народонть ланкс: мазы валнэсэ манить лавказост рамицят. Мезе ансяк арась лавкатнева: спицькат, сапоть, пацят, кемть...

Кемсэ торгувицятнень вакска яки од цёрыне. Неяви велестэ сась. Самарсо эщо вестькак арасель. Глушизе шумось. Цёранть превензэяк мекейланк велямо кармасть. Яки цёрась лавкатне вакска. Сельмензэ педясть кемтненень. Лия тавар ланкс а варштави. Кемтне — мазыйть голянищаст ды кочкаряст сэрейть. Нерест — курноскат.

— Эка парт штукатне! — думи эсь пачканзо цёрась.

— Зяро эйстэст!

— Цёра, тон месть истя рамсят? — кевстизе торговоесь.

— Монень кемть эрявить...

[ 53 ] — Кемть?.. Тонеть кодат?.. Гамбурскойть, хромовойть эли шавровойть?

Цёрась эзь чаркоть не лемтненень.

— Монень седе парт, ды конат седе дёшоват...

— Ха-ха-ха! Седе парт ды седе... Тон, цёра, лац понгить монень: монь лавкасонть улить истят кемть. Лиясо косояк арасть.

Цёранть мельс пек тусь торговоесь: корты истя чевцтэ ды седейшкава.

— Те уш а манясамам, — думи цёрась.

Кочксек цёра кодат мелезэть туить, — мерсь торговоесь, каясь прилавканть ланкс кемешка пара кемть.

Цёранть мик сельмензэ налказевсть. Зяро иеть онснэнзэяк бредясь од кемь марто, ней — кецэнзэ токши эйсэст: кемтне истят мазыйть, чинть каршо аламодо цитнить, голянищаст каштордыть.

— Месть, цёра — рамат?

— Раман, леляй, вана нетнень... путыньзе ве ёнов сех мазытнень. — Зяро питнест?

— Пштить сельметь, шельма! — пейдезь мери торговоесь, — самай партнэнь кочкить. Ды аваль питнейтькак: ансяк комсь целковой.

— Леляй, манямка, паряк, ули? Мон ломанесь — бедноян...

— Саить, цёра, апак пеле. Мон монськак можна меремс, пролетяриян, бедной ламанень кис — прям пуца...

— Сайсынь эно...

— Саить, саить, иля мелявт. Шождыне кедеть улезэ: монень седе ламо миемс, тонеть — кувать кантлемс. Ащек тапардасынек теть конёв поц — кантлить шумбра-чисэ.

Зярс цёрась ловсь кемтнень кис ярмак, торговоесь конштась сельмсэнзэ ялганстэнь, месть бути тошказевсь пилезэнзэ. Ялгась самай кемтнень конёв поц тапардыль.

Ярмакнэ лововсть. Торговоесь ве кецэнть саинзе ярмакнэнь, омбоцесэнть венстинзе кемтнень. Цёрась кенярдумань пачк эзизе ванояк тапардавксонть, каизе лавтавонзо трокс ды ношкстась кудов.

V

Кемень вайгельбеть чийсь цёрась апак оймсе. Лавтовонзо трокс каязь кемтне састыньке вачколевсть котмерезэнзэ, максть тензэ од вий.

[ 54 ] Цёрась пачкоць тумо-колкинес. Колканть чиресэ, начко таркасо, лисьмине. Те лисьманть ваксс лоткась оймсеме. Таргась мешокстонзо кше-печть, кармась ярсамо. Чоп вачодоль. Тантей марявсь тензэ кшесь. Ярсамодо мейле сеск сырьгиксэль кудов. Уш стякшнось таркастонзояк. Озась мекей. Эзь кирть седеезэ: охоталь кемтнень ванномс, тонгомс пильгезэнзэ — ладить арась... Сорнозь кецэ юксни тапардавксонть. Конёвось кашторды. Ламо тапардась торговоесь эссе жаля конёвонть. Кода жалямс конёв од кемь ланкс?.. Цёранть седеезэ налказь-налки: пря поцонзо ёндолкс яки: велесэ чокшнэ лиси ульцяв... ялганзо сельтне сявадыть... штюпить кемтнень... шныть эйсэст... сонзэ мельс — паро.

Тапардавксось юксевсь. Цёрась каподинзе кемтнень — ды ёжозо майшсь: конёвонть поцо ульнесть ташто каладо кемть.

Мекс истя? Сон прок од кемть рамась? Манизь торговецнэ. Мекс эзизе вано сюлмавксонть базарстонть туимадо икеле?

Цёранть валызе сельведь. Вачкодиньзе чамазонзо кедензэ, ды прась начко моданть ланкс. Чинзэ валгомс эзь сырьксе таркастонзо.

VI

Кудов цёрась мольсь позда. Виськс ульнесь рангозь чаманзо марто совамс велентень.

Кода совась кудов — аванстэнь окойник содавсь:

— Эйднем, мекс истя пек чамат амазый? Некак ормалгадыть? — Цёрась ёртынзе кемтнень эземс. Прась тарканть ланкс комадо.

— Авадо!.. манимизь!.. Од кемень таркас — ташт тонксть тень!..

— Кода истя манявить, левскем? Кодя истя?..

— А содан, авай... эзинь фатяяк...

Авась варштась кемтне ланкс, стакасто укстась. Озась цёранть пря пес. Кармась кавто кецэ прянзо валаськавтнеме. Сельведензэ прок кснавт прасть цёранть черьтне ланкс. Арасельть истят валт, мейсэ витевель цёранть апарозо.

[ 55 ]
VII

Сась сёксень чопуда ве. Цёрась таркасто эзь стякшно. Эйзэнзэ каявсь жар. Авазо вакстонзо эзь тукшно. Весь ютась пек стакасто. Велське ёнов цёранть ёжозо седеяк берякстомсь, жарось виензась. Цёрась эстензэ кортамо кармась. Месть ансяк эзь корта: кода тейтерь марто ульцява якась, кода ялганзо марто куярт салсесь, кода алаша вакссо эрсекшнэсть. Сех пек лецнесь од кемтнень, конатнеде зяро иеть чинек-венек думсекшнэсь.

Завторкто мейле тердизь фершилэнть, ваннызе сэредицянть, штюпизе прясто пилькс, трупкасонть кунсолызе эрьва ёндо ды мерсь прок эсь пачканзо:

— Кодамо бути инфлуэца... мейстэ педясь — содамс стака, простуда ёнов моли.

Сёрмаць месть бути конёвнэ ланкс, мерсь молеме больницяв лекарствань кис — ды тусь.

Авась фершилэнть валтнэстэ вейкеяк эзь чаркоть, ансяк седеезэ марятоць: цёранть тевензэ берять...

Озась авась цёранть пря пес, саизе кедезэнзэ фершилэнть сёрмадовт конёвонть, ванны эйсэнзэ: а чаркодевить месть сёрмадозь. Путызе конёвонть столанкс, озась вальмалов. Аштемс тарка а муи. Ваны вальмаванть.

Ушось вадря. Сёксень чись обед малав кармась пачкодеме. Арась вальматнень каршо, срунанзо прасть сэредицянть чама ланкс. Кардайсэнть котность-керьнесть сараст, навоз-пулотнесэ почаксасть — вешнесть ярсамопель. Ютковаст якась щоголь атякшось, секе тев морсесь. Вальма налешникнэ прясо озяснэ чолецть — эжнесть чинь каршо.

Ушось вадряль. Ансяк кудосонть — калмо ланго: цёрась таркасо пря чавсь, мень бути орма чавсь эйсэнзэ. Кортамодояк лоткась. Оймензэ тарксесь чуросто, стакасто.

Авась тарканть ваксс таймаскаць. Майшь кемимазо пазонть ланкскак, фершилэнть ланкскак.

Пецька ланксо мырнэсь пингень-пингень моронзо сыре псакась (каткась). Каськасо, самай тарканть коряс, цийнесть чеерьть.

Пазава уголсонть валяясть цёранть пеле-оймензэ саицятне — ташто кемтне. Полок ланксто нусманясто вансь цёранть ланкс сех вечкима ялгазо — саратовка гармунясь.

Те цёрась ульнесь Коля.

Самара-ош 1926 ие.

  1. Уроз — сирота.