Паджга вӧлӧсьт улын
Кӧйдыс весалӧм.
Эм Паджгаын кӧйдыс весалан машинаяс. Таво тулыс, ВИК шуӧм серти, крестьяна весалӧмаӧсь 500−600 пуд гӧгӧр ид да зӧр кӧйдыс. Кӧзяиналӧ сійӧ машинаяс вылас ВИК; омӧль сӧмын ӧти: кӧйдыс весавлӧмыс некытчӧ абу пасъявлӧма и некутшӧм дон абу босьтлӧма.
Кредитнӧй тӧварищество
уджалӧ омӧлика. Шленӧ гижсьӧмаӧсь морт 200. Шленъяслы тӧварищество сеталӧма куш деньгаӧн кык тысяча саяс. Ӧні тӧварищество аддзӧ, мый куш деньга сеталӧм прӧчент вылӧ уджтӧ оз вермы кыпӧдны. Унаӧн шленӧ пырисны не уджйӧзасьӧм понда, а машинаяс лӧсьӧдӧм кузя. Сэтшӧмыслы т-во кӧсйӧ лӧсьӧдны прокатнӧй пункт. Сыктывкарса земотдел сылы сійӧ уджсӧ вӧчны ёна отсалас. Удж эштӧм бӧрын т-во кӧсйӧ чорыдджыка босьтчыны лӧсьӧдны шленъяслы быдсяма крестьянскӧй коланторсӧ.
Таво тулыс куимӧн ветлісны карӧ, с.-кӧзяйственнӧй курс вылӧ. Найӧ костысь ӧти сӧмын Ӧлексей Ильчуков заводитлӧма крестьянаӧс нуӧдны выль туйӧд, мукӧдыс олӧны шы ни тӧв, мый кывлісны курс вылын — кутӧны аслыныс. Ӧльӧксей Ильчуков ӧні муніс Краснӧй армияӧ.
Анькытш кӧдзӧм
мунӧ важысянь нин. Ёна вӧдитлӧмаӧсь войдӧр анькытш Разгорт деревняын. Война да революция дырйи анькытш кӧдзны дугдылӧмаӧсь дзикӧдз. Вӧлӧсьт кузя таво кӧдзӧмаӧсь 150 пуд гӧгӧр, быдмӧ зэв бура, ӧні самӧй дзордзалӧ (чветитӧ). Вичкодор грездсалӧн ӧтлаалӧм йӧрӧ кӧдзӧма таво анькытшсӧ пудовня 50, а сы бӧрын таво жӧ кӧсйӧны кӧдзны сю. Ме ногӧн кӧ, сэтчӧ, куйӧдыштӧмӧн, колӧ кӧдзны ид. Вичкодор грездса думайтӧны уджавны сійӧ ыджыд йӧрсӧ уна торйӧ юкӧмӧн (многопольеӧн), мед эськӧ няньысь кындзи переменаӧ пырис анькытш и картупель.
Скӧт висьӧм.
Вӧвъяс висялӧны лудӧм висьӧмӧн. Жар пӧраӧ, видзчысьтӧг, тайӧ висьӧмыс ӧдйӧ вермас паськавны. Висьысь вӧвъяс быдлаӧ зыртчӧны и паськӧдӧны висьӧмсӧ. Висьӧмсӧ бырӧдны виччысьӧны вӧв лекарӧс.
Пӧчинокын олӧм.
Гӧлиник олӧм погостын да важ видз-му вылын. Важысянь нин кыскӧ мукӧдӧс выль, паськыдін корсьны. Быд во пӧчинок лыд содӧ. Эмӧсь мукӧдыс мунӧмаӧсь овны верст 60 сайӧ. Овмӧдчӧны, кылӧ, зэв бура, сӧмын «Льӧмпуа» пӧчинокын (25 в. сайын) таво йӧзӧс ёна орӧдіс скӧт кулӧм. Колян во на сэтчӧс олысьяслӧн вӧлӧма душ 50 мӧс, таво став пӧчинок вылӧ кольӧма сӧмын ӧти мӧс.
Турун кӧдзӧмъяс
му вылӧ оз на тыдавны. Нырнуӧдысьыс некод мыйкӧ оз сюр, сӧмын ӧти Гаръяса Конюков И. кӧдзлӧма тыла вылӧ шепта турун (тимофеевка) — ёна ошйысьӧ добра босьтӧмӧн. Войдӧр кодсюрӧ заводитлӧмаӧсь кӧдзны турунтӧ да гӧгӧрвотӧмла скӧтӧн травитлӧмаӧсь.
Агроном ТЕМНОЕВ.
|
This work is in the public domain in the United States but it may not be in other jurisdictions. See Copyright.
|