Мин Ҡояшҡа китеп барам

From Wikisource
Jump to navigation Jump to search

Мин Ҡояшҡа китеп барам (Шиғыр)
автор Лилиә Һаҡмар
Ижад итеү ваҡыты: 23.12.2004.. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (55-се бит) ISBN 5-295-03798-3


Мин Ҡояшҡа китеп барам

Мин тыуғанда, төндө еңеп,

Балҡып атҡан ине ал таң,

Тәүге шул таң нурын алып,

Мин Ҡояшҡа китеп барам!


Ғүмер юлым әрнеү тулы –

Йылмайырға көс-дәрт табам!

Һынауҙарға рәхмәт әйтеп,

Мин Ҡояшҡа китеп барам!


Теткеләнгән күңелемдән

Йөрәгемә ал ҡан тама –

Ҡан төҫө ул – таң төҫө тип,

Мин Ҡояшҡа китеп барам!


Дуҫтарымдың ҡулдарынан

Уңала бит һәр бер ярам!

Яҡындарым фатихаһы –

Мин Ҡояшҡа китеп барам!


Изгелегем – һеҙгә бүләк –

Биргән һайын күберәк алам…

Иң бәхетле кеше мин ул –

Мин Ҡояшҡа китеп барам!


Йәшәү серен, тормош йәмен

Күңелеңдән эҙләп ҡара!

Теләйһеңме, киттек бергә –

Мин Ҡояшҡа китеп барам!


Иҫкәрмәләр[edit]


CC SomeRightsReserved.png
Cc-by white.svgCc-sa white.svg