Лёша да Медор
| Лёша да Медор (1926) by |
| Гижан кад: 1926, Йӧзӧдан во: 1926. Ӧшмӧс: Школаын лыддянтор. Сыктывдінкар, 1926. |
Ичӧтик Лёшалӧн чой ни вок эз вӧв. Ворсны вӧлі некодкӧд. Ӧтчыд батьыс сылы мичаник понпи ньӧбӧма: «Ворс пӧ такӧд, верд, юктав, оз-ӧ гажаджык ло».
Лёшалы зэв нимкодь лои. Понпилы Медор ним сетісны. Кык ёрт эз кутны торйӧдчывны. Мыйӧн Лёша горӧдас: «Медор!», понпи ӧдйӧнджык уськӧдчас Лёша дінӧ, кутас гӧгравны сы гӧгӧр, бӧжсӧ чикльӧдлігтырйи, кисӧ-коксӧ нювны. Быдмыштіс Медор да вежӧра лои. Лёша кӧ шуас: «Мунам, Медор!» (вӧрӧ ли вадорӧ ли, кӧть кытчӧ). Медор нимкодясьӧмысла ку пиас оз тӧр: увтӧ, вайӧ Лёшалы картузсӧ, водзвыв котӧртас ӧдзӧс дінад. Водігӧн кӧ шуас: «Пӧра нин узьны, Медор!» Медор нюжӧдчас джоджӧ, юрсӧ пуктас водз кокъяс вылас, синъяссӧ куняс. Куйлыштас сідз регыдик, сэсся восьтылас ӧти синсӧ, видзӧдлас Лёша вылӧ. «Узь, узь», — шуас Лёша. Мӧдыс пыдісянь лолыштас да бара синъяссӧ куняс. Мукӧддырйиыс Лёша и шыбитас мыйкӧ ӧшинь саяс. — «Медор, — шуас: — вай мыччы!» Мӧдыс котӧрӧн петалас уськӧдӧмторйыдла.
Коркӧ арын кык ёрт кайлісны вӧрӧ тшак вотны. Лӧсялісны зэр улӧ. Лёша кынмис да висьмис. Сійӧс водтӧдісны горничаӧ, крӧвать вылӧ. Медорӧс сы дінӧ оз сибӧдны: «Няйтсӧ пӧ да кӧдзыдсӧ сӧмын висьысь дінас пыртлан!» Шогӧдіс Медорӧс. Куйлас-куйлас горнича ӧдзӧс дорад, да ывлаӧ котӧртлас. Ывласьыд, никсігтырйи, бӧр ӧдзӧс дорад пырас. Оз сёй ни ю. Быдӧн омӧльтчис. Мыйӧн кокньӧдыштіс, Лёша пыр и юаліс: «Кӧн нӧ пӧ Медорыд? Лэдзлӧй пӧ татчӧ»... Медор, гӧлӧссӧ кылӧма да, сэн нин. Увтчӧ, Лёша вылӧ усьласьӧ, кисӧ сылысь нюлӧ... «Ньӧжйӧнджык, — шуӧ мӧдыс: — эн зэв ме вылӧ усьлась». Пӧслукман ӧд Медорыд: пыр и ланьтіс, пуксис крӧвать бердӧ, кучкалӧ бӧжнас джоджӧ да меліа видзӧдӧ Лёша вылӧ, быттьӧ жалитӧ: «омӧльтчӧмыд пӧ тай коньӧрӧй»... Лун мӧд мысти Лёша бурдіс. Сэні кык ёртлӧн ворсӧмыд!
|
This work is in the public domain in the United States but it may not be in other jurisdictions. See Copyright.
|