Пици-палакст/Кунсолок, эрзя!

From Wikisource
(Redirected from Кунсолок, эрзя!)
Jump to navigation Jump to search
Кунсолок, эрзя!  (1926) 
by Дуняшин, Алексей Васильевич
Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 81—84
[ 81 ]

КУНСОЛОК, ЭРЗЯ!


Т
ЕЧИ МИНЬ празднуватано Октябрянь годовщинанть.

1917-це иестэ, тунда, инязоронть пропкакс ёртынек престолонзо ланксто.

1917-це иестэ, сёксня, Керенскоень правительстванть пувазь пувинек.

Фабрикань ды заводонь азортнэнь рудазов вецэ шлинек лембе таркастост, паро чист весе саинек эстенек.

Пакся кендялтнэнь, помещикнэнь, киска лёмзийкс чавинек и модаст саинек эстенек.

Велень покш пекнень — кулакнэнь отрубост, хуторост нельгинек — и модаст саинек эстенек.

Попнэнь, манахнэнь, манашкатнень наксадо моштяст, конатне эйсэ маньшесть эйсэнек тыща иеть, варма мельга нолдынек. Модаст, вирест, весе манастырьтнень паро-чист саинек эстенек.

Кить — минь?

Минь — трудиця ломать, весе масторонь азортнэ.

Мейсь минь саинек фабрикантнэнь, помещикнэнь, кулакнонь, попнэнь, ды манастырьтнень паро чист?

Не паро-читнень наживизь сынь минек пуворьксэв кетьне эйсэ, сроизь минек стака рабутасо яжась котьмерьтне ланксо, валнызь минек ливейсэ, артызь минек верьсэ. Секс сынст саинек эстенек.

Велень атят!

Эзинк истовт се шканть, кода помещикне ваткасть котьмерьстэнк сисемь кшнат — сисемь питнеть моданть, луганть, виренть кис?

Эзинк истовт се шканть, кода урядникесь парясь эйсэнк ногайкасо подушноень ды помещикнень долконь а каямонь кис?

[ 82 ] Повнясынк ли се шканть, кода попось церькувасо амвон ланксо сеересь:

„Братият! Паздонть пеледе, инязоронть кунсолодо, бояртнэнь каршо кеденк илинк кепеть, эрямонк ланкс илядо пеняця... сень кис куломодо мейле райс мольдядо, сюпавтнэ кармить паломо адонь толсонть!!!“

Попнэ крёст марто эйсэнек баславасть райс, сюпавтнэнь мода марто човорясть — пророчасть тест ад, сынсь сюпавтнэ марто пирувась вейсэ, масторонть ланксо властвувасть, минек ланксо ласте артнесть, минек верде потясть.

Эзинк истовт се шканть, кода цёранк ильтекшнинк служамо „за веру царя и отечество“, кода попось сиянь крёсцо баславась цёранк войнав и кода те „христолюбивой воинствась“ чавсть вейкест-вейкест, и кода мейле, сынь сыльть кудов и наградань таркас тукшность мартост пильгень таркас костыльть, кедень таркас — чаво шинель ожа, радостень таркас семиянень — горя, сельветь ды пищимат.

Эзинк истовт? Так давайте мон тенк пеняцян аламодо истямо покш праздникень чистэ. Пеняцян аволь кежейстэ, седейшкава карман эсь родной народом марто кортамо.

Ламо юткстонк кода вастызь революциянть васень иетне эйстэ? Ки кекшнесь сюронзо мода поц? Ки кекшнесь дезертирт Якстере армиясто? Ки тейнесь востаният комунистэнь каршо?

Ламо тынк эйстэ, велень атят!

Кинь эйстэ кекшниде сюронк, скотинанк, дезертирт?

Революциянть эйстэ.

Кинь каршо тейниде востаният — Революциянть каршо.

Кить не ломатне, комунистнэ, конатнень каршо тынк эйстэ ламо стякшность 1919-це иестэ кшнинь сянго, пешня ды лом марто?

Не ломатне колоньгемень ие боруцясть инязоронь правительстванть каршо, весе мазы од пораст ютавтызь тюрьмава ссылкава и каторгава, сынь эсть жаля эсь пряст, робутасть и штапо и вачо — фабрикасо ды велесэ трудицятнень таргасть паро эрямос.

[ 83 ] Вана кить не ломатне. Вана кить не благой комунистнэ.

Тынь, атят, пек кунсолыде попнэнь ды кулакнэнь.

Попнэ кортасть: „комунистнэ антихристэнь посланникть, комунистнэ грабительть, сынь састь Россияв народонь грабамо, розурямо“.

Истя ли тевесь лиссь? Нищейдяно ли минь?

Минь течи празнуватано Октябрянь вейксэце иензэ.

Варштадо перьканок! Ков сельме виеть саты — аштить паксят, лугат, вирьть, зняро паро-чи! Кельсэ а ёвтавить! Кинь сынь?

Весе тонть, трудиця ломань.

Варштадо ошнэнь ланкс. Тосо фабрикатне ды завотнэ чинек-венек чентить менеленть раужо качамосо, теить машинат, орудият, таварт.

Кинь не паро-читне? Весе тонть, трудиця ломань.

Варштадо чугункань китнень ды парахотнэнь ланкс. Икеле сынь служасть помещикнэнень, капиталистнэнень — кепецть сынст хозяйстваст. А ней? Ней сынь весе тонть кецэть, трудиця ломань.

Варштадо волостень, уездэнь, губернянь исполкомтнэнень. Тосо икеле аштесть старшинат, земской начальникть, губернаторт, эрьва кодат чиновникт, попт. А ней? Ней тосо аштить робочейть ды крестьят. Мекс? Ды секс: ней властесь тонть кецэ, трудиця ломань.

Варштадо минек Центральной правительстванть ланкс. Те властесь икеле ульнесь инязоронь ды сонзэ министертнэнь кецэ. А ней? Ней тосо робутыть робочеень ды крестьянонь представительть. Сех покш начальникесь Тверской губернянь сокиця — Михаил Иванович Калинин ялгась.

... Минь течи празнуватано Октябрянь вейксэце годовщинанть. Течи весе масторось тапарязь якстере материясо.

Велень атят! Кунсолодо! Пштилгавтынк пиленк! Мезе истя урны! Мень истя „чуда“ сы велентень — модась алонзо сорны.

Те урнозь сы велентень трактор. Сон уш пачкоць. Несынк? Пандованть валксь! Паксяванть моли и калми борознанзо алов ташто пингень сюро видимань койтнень.

Чувтонь соканть забор бокас — тикше пулос ёртызе. [ 84 ]А эряви сон. Ламо ловажанк пакаренк яжась чувтонь сокась.

Тракторсь кармась сроямо од веле — од эрямо.

Велень атят! Сакшнось ли зярдояк превезэнк тракторось? Думиде ли тынь зярдояк те „чудань“ машинадонть? Думиде ли лисеме пингезэнк нужастонть? Эзиде думсе, атят! Зярдояк онстонккак эзинк некшне те од эрямонть. Те ли эщо ули? Лоткатано ли минь теке ланкс? Тень ли минь тейсынек Октябрянь комсеце иенстэ?

Варштадо неень од ломатне ланкс. Тынк лацо, нать, сыню ютавцыть од эрямо пораст? Тынк оцто тонавцть пазнэнь озномо, попонь кунсоломо, постувамо ды урядникнеде пелеме. Неень од ломатнень кецэ — покш оля. Сынь тонавтнить школасо, тонавтнить клубсо, тонавтнить комсомолсо — эрьва косо тонавтнить од эрямонть сроямо.

Ванодо! Кунсолодо! Течи сынь якить ульцява. Мещест ланксо якстере лентат, кецэст якстере флакт. Ульцясо, клубсо сынь морыть паро морот сыця од эрямонтень:

... Жизнь мы новую построим —
Владыкой мира будет труд...

Течи минь празднуватано Октябрянь вейксэце иензэ.

Москов. ГИЖ 1926.