Колхозонь эряф/1939/01-2/Куйбышев Самараса
| Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь правлениять органоц. Лисенди кемгафтувоце кизось, ковти весть. — № 1-2 Январь-Февраль 1939 киза. — с. 28—29 |
| Куйбышев Самараса |
350 киза ошти мярьгондельхть Самара. Ниле кизот сон каннесы коммунизмать тевонц инкса пламеннай борецть, Ленинть и Сталинть вернай соратникснон — Валериан Владимирович Куйбышевть лемонц, конань злодейски кулофтозь изверкне-врачне фашистскяй троцкистско-бухаринскяй бандать прямой заданиянц коряс.
Самарати аф случайна путф Куйбышевть лемоц.
Ошса лама васттне сотнефт Валериан Владимировичть лемонц мархта. Кой-конат синь эздост отмечандафт мемориальнай доскаса. Куйбышев ошень рабочайхне эсь седисост ванфтсазь памятть Валериан Владимировичть колга и революциянь боевой шитнень колга, мзярда сонь мархтонза марса аралакшнезь эсь ошснон, завоевандамок эстейст права свободнай, счастливай эряфонди...
Некрасовть ульцяса кафта этажса аф оцю кудня. Сонь стенанзон эса кодамовок мемориальнай доска аш, но Куйбышев ошень рабочайхне цебярьста содазь тя куднять. Тяса пялес шовда аф оцю комнатаса, 1916 кизонь апрельста ушедсь эряма Иосиф Андреевич Адамчиксь. Тяфтама лемса кяшендсь Валериан Владимирович Куйбышевсь, конац сибирскяй ссылкаста ворьгодсь Петербургу, но застрял Самарав.
Вов кода сьорматкшнесы Адамчикть «квартиранц» очевидесь: «Тя ульсь комната, конань, примерна 5 аськолкст кувалмоц и 2 аськолкст келец, но аф сяда оцю ся тюремнай камерать эзда, конань эса минь эряме сяда меле. Кодамовок мебель ашель — шава комната». Кафта полянат пенге, синь лангсост кенкш, кона вельхтяф шуваня одеяласа, тяфтама ульсь Куйбышев ялгать кроватец.
Самараса тя пингонь эряфонц колга Валериан Владимирович сьормады:
«Аф лама пингта меле мон ушедонь работама Самарскяй трубочнай заводса металлонь резировщикокс. Тя макссь тейнь возможность корхнемс рабочай массать мархта. Самарскяй трубочнай заводсь ульсь Самараса революционнай движениянь цитаделькс. Войнать пингста тоса лувондовсь 21 тьожянь рабочай и ульсь пяк лама высланнай большевик рабочай».
Но Куйбышевсь ашезь лотксе фкя заводса революционнай работать лангс. Сон ульсь Самараса поволжскяй партийнай конференциянь инициаторкс, конанди должетт ульсть самс делегатт марнек Поволжьять эзда Нижняй Новгородть эзда сявомок Саратову молемс.
1916 кизоня сентябрьста рабочайсь Адамчиксь ульсь пякстаф одиночкас. Эсь фамилиянц Куйбышевсь ашезе азонкшне мянь снярс, мзярс ашезе сода, што тевсь аделави административнай высылкаса. Эста аньцек сон азондозе эсь лемонц. Куйбышевсь ульсь судендаф высылкас Турханскяй краи 5 кизонь пингс.
Елена Владимировнась, Куйбышевть сестрац, тяфта сьормадозе ссылкав Куйбышев ялгать прважама пингонц:
«Мзярда высылаемайхнень лихтезь тюремнай пирьфти, штоба тиемс перекличка и максомс документт, Валерианти ушедсь корхтама тюрьмать начальникоц, конац ульсь удивленнай сянь мархта, што сон дворянин и тонафнесь кадетскяй корпусса:
— Ужялят, ужялят, улелеть ба тяни офицеркс...
Арестованнайхнень эзда фкясь Валерианть инкса отвечась:
— А минцонк сон ули генералкс ...»
Самарскяй тюрьмав илядсь Валериан Владимировичть рьвац. Сонь ашезь пань сяс, што ульсь пеки. Тяса, тюремнай камераса, 1917 кизоня мартста шачсь Валериан Владимировичть цьорац Владимирсь.
[ 29 ]«Кда ба аф революциясь, — сьормады Елена Куйбышевась, — кда ба толпась афоль яце тюрьмав, тядясь и цьорац юмальхть ба рдазу камерати веронь заражениять эзда. Усксть врач, и тядять и цьоранц эряфсна ульсь ванфтф».
Аф лама шида цьоранц шачемда меле Валериан Владимировичсь мрдась Самарав. Народсь праздновандазе самодержавиять йордаманц. Самарскяй пролетариатсь пуромсь вокзалу и привокзальнай площади, штоба васьфтемс эсь кельгома руководителенц и сонь ялганзон.
... Самарав сась радостнай куля, што столицаса большевикне сявозь властть. Ноябрть 8-це шистонза Куйбышевсь организовандазе ни Самарскяй васенце ревкомть.
Сась стака 1918 кизось. Реакциять шовда вийнза аноклакшнесть побеждающай революциять каршес кровавай схваткати. Самараса кеподсь эсеровскяй мятеж. Куйбышевсь арась во главе вооруженнай рабочай отряттненди.
Революциянь площадсь... Тяса рабочайхне тисть решающай сражения эсерхнень каршес. Валериан Владимировичть руководстванц ала Самарскяй пролетариатсь тапазень контрреволюционерхнень.
Но Самарать малас шашнесть бело-чехонь бандатне. Самарскяй пролетариатсь тага кярьмодсь оружияти. Оборонань штабсь ащесь кафта этажса аф оцю зданияса, кона тяни ащи Венцекть лемса клубокс. Тяса руководил Куйбышевсь ошть оборонанц лангса.
Июнть 5-це шистонза сявомок 7-це шинц самс самарскяй пролетариатсь вятсь вишке тюрема эсь родной ошенц инкса. Самарка ляйть берягсонза, коса ащи тяни хлебнай элеваторсь, ульсь оборонань васенце линиясь. Куйбышевсь лична участвовандась Хлебнай площадьса сооружениятнень кемокстамаса, лична вятсь руководства самарскяй рабочайхнень боевой действияснон лангса. Мзярда бело-чехне сявозь Самарать, Валериан Владимировичсь тусь ошста инь меколи.
4 ковда меле Якстерь Армиясь победоносна сувась Самарав. Куйбышев тага мрдась тя ошти, конань мархта ульсь сотнеф сонь — революционерть-трибунть и боецть эряфоц. Самарась навсегда арась советскяй ошекс. Валериан Владимирович тусь фронту, сяс мес ульсь путф IV-це Армиянь реввоенсоветонь членкс. Тяфта аделавсь Куйбышевть эряфонц самарскяй пингоц, конац пяшксе тюремада и победада.
Куйбышев ошсь марса сембе странать мархта высоко чтит пламеннай большевикть Валериан Владимировичть светлай памятенц. Йотай кизоня Куйбышевса эвондасть од «куйбышевскяй вастт», вастт, конатнень ашезень няенде Валериан Владимировичсь. Тиф культурань замечательнай Дворец — ошса инь цебярь зданиясь. Тя зданиять инголи тиф прекраснай памятник сянди, кинь лемонц каннесы ошсь, сянди, кие сембе эсь эряфонц максозе Ленинонь—Сталинонь тевснонды.