Эрясть-ащесть атят-бабат,
Анасть шкайть кядьста синь шаба.
Нилегемонь кизонц лангс
Бабась эрек цёра кандсь.
Лем путсть идьснонды синь Маза,
Рамасть лемозонза каза.
Лофцта андсазь и симдьсазь,
Пенаклангса удофтсазь.
Йотась колма шит и венят,
Мазать шачсть кургонцты пейнят.
Эрь шиня сон касы вакс,
Ранги, аварди, букакс.
Кассь. Ульцява якай Мазась.
Цёрась эрек, вию, таза.
Оцю мархта клокса тюрсь,
Богаты рень виец ульсь.
Ломатть корхтайхть: „Ули мастор,
Тоса эряй питни азор,
Сон народти пара тись,
Оцю брадоц — валда шись.
Кие сяряди — пчкафтсы,
Одста кулыть живондафтсы.
Марьлюкс панжи ся странась,
Золотаса куттнень штась.
Народсь лиенди ковёрса,
Мельгаст морайхть гуслянь морса.
Модать алга ули ки,
Сон сиянне, цифторды“.
Мазась ёрась мумс тя масторть,
Няемс тоста добрай азорть.
— Тядяй, аляй, мон туян,
Паваз эстине муян . . .
Сотнесь шнаса тёжянь стрелат,
Песна оржат, кода перат.
Мандонц сталмоц кемонь путт, —
Можна яжамс кевонь кутт.
Лама сявсь сон кшида, салда,
[ 40 ]
Сумканц пяшкодезе алда.
Мезе эряви — сянь мусь,
Паваз вешема сон тусь.
Мольсь сон ши и недяля... кафта...
Паксясь кели, кода карта.
Ваны — инголенза ведь,
Аяш лангсонза сонь седь.
Шинясь ёряй пси лучаса,
Мази панчфкат ляй трваса.
Види шире тумонят,
Алост касыхть тишенят.
Шуди веднясь ульсь пяк кели, —
Мазась уеманц аф пели.
Мандонц кемоста люпштась,
Шуди ляйняти сувась.
Уи, уи тона шири,
Тона шири оцю вири.
Мезе пильгонцты кундась?
Мазать ваяфтсы волнась.
Мазась яфодезе кяденц,
Сон кундазе ведьмать кяленц,
Вишкста тона шири уйсь,
Усковсь мельганза сонь куйсь.
Корхтай: — Тямак шава, Маза,
Кулхцонтт мезе мон тейть азан...
Кадмак шиса мон улян,
Мезе мярьгат, сянь тиян.
— Кли стане корхтат тейне...
Монь пяк оржат стрела пене,
Васькафнити пезыхть лац,
Стрелать мельге лии пряц! —
— Маза, кице тонь кувака,
Ялга якамс тейть пяк стака.
Лишме эряви, рысак,
Оцю вирть эзда мусак!..
Павазть перьфке шарыхть мяльхне,
Аньцек содайть зверень кяльхнень.
Яга бабанди стукак,
Тонафттанза... Кизефтьсак.
— Эряк нинге колма кизот,
Кодак ляйти ведьмань пизот,
Мутнай ведьняти сувак,
Серьгядьтя тонь, тейне сак. —
Соньць тусь эряскодозь вири,
Вирьса ванондсь кафта шири.
Гайнясь мази нармонь морсь,
Мазась ичкози ни мольсь.
Марявсь модать эса тапай,
[ 41 ]
Лишме вайгяльса сон цяфай.
Мазась арьсесь: „Тя рысаксь,
Мон кундаса, тянь тиса“.
Цебярь пандос лишмоть пряса,
Стаф сияса и кумбряса.
Вирь полянати сон мольсь,
Сянгярь тишеняда порьсь.
Мазась салазь-колазь шашты,
Тевонц тисы, кода машты.
Пандос вядьмонцты кундась,
Лишмоть лангозонза прась.
Лишмось ардфтсы шуфттнень алга,
Лийфтьсы вярьге, дуцять фталга.
Мазась гриванцты кундась,
Лишмоть прянц сон пувордась.
Эста лишмось фталу потась,
Ломань вайгяльса сон корхтась:
— Маза—Таза, тонь улян,
Яга бабанди лиян!
— Кли стане корхтат тейне...
Монь пяк оржат стрела пене,
Васькафнити пезыхть лац,
Стрелать мельге лии пряц! —
Мазать лийфтезе тайгати,
Валгсть синь сянгяря лугати.
Корянь лангса ульсь кудня,
Инголенза бабаня.
Шалхкоц оцю, пяля вайме,
Кирди кядьсонза сон кайме.
Сявсь сон табакт и никсась,
Шалхкоц табакнень пргась.
— Шумбрат, бабай, кода эрят?
Штоли мезьдонга аф пелят?
Азонтк тейне, коса кись,
Коса эряй паваз шись? —
— Цёрась добраят и тазат,
Сотнек алашацень тяза...
Аде антте и симття,
Карликть эзда идетя... —
Мазать тердезе кудняти,
Озафтозе эзем пряти.
Танцти пища тейнза кандсь,
Маза—Тазать эса андсь.
— Няйса, цёрась паваз вешат,
Карликть эзда тон аф кяшат.
Монь куднязень фтала ки,
Тя кись моли Карликти.
Сакалонза сонь кувакат,
[ 42 ]
Эряфсь ширесонза стака.
Зверьхне тевонц эса тисть,
Ведьма Карликсь морась, кштись.
Тёжянь киза тяса эряй,
Якам китнень эса перяй.
Сонь волшебнай куломац,
Керсак, меки педи пряц.
Максан мархтот ёмла алня,
Лиси эздонза сонь калня,
Нолдак калнять шуди ведьс,
Эста Карликть сави пец. —
Лама корхнесь сире бабась,
Пращась мархтонза сонь Мазась.
Яга Бабань кудста лиссь,
Лишмоц каршезонза кштись.
Мазась арды, арды ластя,
Вирь кучкаса няи пакся.
Сокаф сянгяря лугась,
Офта, келась, нумол сатсь.
Келазсь офтти сотнесь сока,
Сокайхть кафонест синь мода.
Косолапай нумолнясь
Види мельгаст пинемня.
Мазась шарьхкодсь зверень кяльса,
Мазать аердамс синь мяльсна.
Келазсь корхтай: — нумол, ласьк!
Ласьте ломанть колга аст!..
Мишка аде, аде сокак! —
Мазась корхтась: — Келась лоткак!
Теенть пара мон тиян,
Карликть эзда тинь идян! —
Эста офтсь и нумолсь, келазсь,
Шуфтонь сокать боку веляфтсть.
— Маза—Таза, идемасть!
Ластясь лангозонк нужась. —
Тусть синь ардозь Мазать мельге,
Няфтезь Карликть, коса эряй...
Лама ломань карликсь порьсь
Мазась садозонза мольсь.
Шуфтонь стена кудонц перьфке,
Мазать лишмоц лийфтьсы вельфке.
Мазась гриванцты кундась,
Карликть пирьфонцты сувасть.
Лядсь сонь мялезонза алнясь,
Ляйти яфодезе калнять.
Калнясь ведьняти юмась.
Карликть кирни удомась.
Ваны, офттне пенгат керыхть,
[ 43 ]
Кядьсна пуворксуфт и верыхть.
Келазсь сура ямкськат кандсь,
Акша гулянятнень андсь.
Косолапай нумолнятне
Кочкихть, валыхть капста прятнень,
Обезьяттне кштирдихть каньф,
Мешне ару медня кандсть.
Мазась келазть вакска ётась,
Хитрай келазсь меки потась,
Аф эсь вайгяльса ивадсь.
Карликть явась удомац.
Лиссь сон пирьфи, аршин серец,
Пяле аршин мяштенц келец.
Туста сакалонзон усксь,
Модань пульса эсост муськсь.
— Мезень колга, цёра, якат?!
Мес тон ломань мода тапат?!
Эздот цёмарат тиян,
Ванды завтракамс пидян! —
— Кли стане корхтат тейне,
Монь пяк оржат стрела пене.
Вракнень коняс пезыхть лац,
Стрелать мельге лии пряц! —
Мандонц яфодезе Мазась,
Карликть верок алнякс тапась.
Сембе зверьхне сюконясть,
Мазась зверьхненди пшкядсь:
— Арда якада лугава,
Куцендеда шуфттнень прява.
Максонь тейнть воляши,
Сембе шири кели ки... —
Мазась ластясь шнань седланцты,
Корхтась кельгом лишмонянцты:
— Аде вештяма минь ки,
Кона моли павазти. —
Лишмоц ардфтсы шуфттнень алга,
Лийфтьсы вярьге туцять фталга.
Няихть кевонь панда пря,
Тоса ащи од кудня.
Савор валгсть синь панда пряти,
Лишмонц сатнезе кудняти.
Мазась саворне сувась,
Кудса атяня нувась.
— Шумбрат, атяй, ськамот штоли?
Кода мяльце тонь аф моли?
Мезьда порят и симат?
Мезень тевнят тиендят?
— Сань мон ичкоздень странаста,
[ 44 ]
Аф мусамазь панда пряста...
Порян нормарьхть и кстынят,
Коста ламбам тишенят.
Эряфсь стака ся странаса,
Народть понцесазь пикскаса.
Оцязорти пара ши,
Тейнек поремс аяш кши.
Няйса богатырень вийце,
Кона шири моли кице?
Кона ширде тейне сать?
Мезень тевонкса сувать? —
— Молян вешса мон ся масторть,
Коса эряй питни азорсь.
Сон наротти пара тись,
Оцю брадоц — валда шись. —
Монга марьсень ся шить колга.
Корхтайхть: „Тоса ули Волга,
Шуди окань тюсьса ведь,
Валдопнесы шовда веть. —
Мазась пращась, лиссь кудняста,
— Цёрай, пачкотть тон шумбраста!
Меки ётамстот сувак,
Азсак павазу странать. —
Мазась лии дуцять фталу,
Мезе няи, валги алу.
Валгсь. Сонь лишмоц пупордась,
Мазать сельмоста имась.
Мазась ванондсь сембе пяли,
Коза аф ваны — панда няи,
Аяш сянгяря вирня,
Аяш пиже тишеня.
Оцю лоткова сон якась,
Мандонц мархта кефнень тапась.
Ваны — яви панда боксь,
Атямкс гайнясь кели лотксь.
Арась панда бокти варя,
Тоста лиси аеркс аля.
Сон ульсь акша генерал,
Пища пори — ломань пал.
Понав прясонза сонь шляпац,
Шамац тувонне, кувака.
Оржа пеензон сон порьсь,
Мазать шавомонза мольсь.
— Ожу, цёра, ков тон молят?
Тячи мон куядот порян!
Меле вярьге лиендян,
Мирти вред мон тиендян!.. —
— Коли стане корхтат тейне,
[ 45 ]
Монь пяк оржат стрела пене.
Вракнень коняс пезыхть лац,
Стрелать мельге лии пряц! —
Оржа стрела Мазась нолдась,
Стрелась сельмозонза озась.
Меле мандонц мархта тюрсь,
Сяскись Маза—Тазась ульсь.
— Цёра, ёфсикс тямак шава,
Эрям шизе монь аф шава:
Эряй ширесон стирня,
Кштирди парьхцинь сюреня. —
Мазась кяжда яфодсь мандонц,
Мушкокс тапазе сонь кандонц.
Кевонь варяти сувась,
Кенькшне каршезонза прасть.
Фкя подвалста мусь сон пушкат,
Омбоцеста — бронзань чушкат,
Колмоцеса ульсть сият,
Нилецеса — ломань прят,
Ветецеса — кшнинь решетка,
Повфтаф бокозонза плётка.
Кшнинь решеткаса стирня,
Сязендсь мяштенц и урьнясь.
Стирнясь мази кудряв пряня,
Аш сонь шамасонза верня.
Акша паляц ускоряф,
Сонцьке сюдофкясь муцяф.
Мазась синнезе решёткать,
Стирнясь авардемда лоткась.
— Шумбрат ичкоздень, стирня!
Тейне тон улят рьвя.
Вешсаськ кафонек ся масторть,
Коса эряй питни азорсь.
Сон народти пара тись,
Оцю брадоц — валда шись.
Кие сяряди пчкафтсы,
Одста кулыть живондафтсы,
Марьлюкс панжи ся странась,
Золотаса куттнень штась.
Народсь лиендихть кавёрса,
Мельгаст морайхть гуслянь морса.
Модать алга ули ки,
Сон сиянне, цифторды.
— Вай, спасиба, мазы цёра,
Няйсак, шаманязе олась.
Врагсь монь киза кирдемань,
Шини ведьта симнемань.
Аде, сявомак монь тяста,
[ 46 ]
Ванцаськ эряфть ся странаста... —
Мазась кядьнянзон кундась,
Кельгомгане сонь люпштась.
Ваныхть, лишме арды, цяфай,
Гайняй вайгяльняц сонь, лакай.
Мазать инголенза сась,
Кафта пильге лангса прась.
— Ах, тон кельгом лишмонязе!
Вярге, алга лийфтинязе!
Штоли меки тейне сать?
А мон арьсень, што имать! —
Ластясть кафонест седлати,
Лийсть синь павазу странати.
Валгсть и оцю веле мусть.
Лишмось меки лиезь тусь.
Кить кучкаса мазы алня,
Няевсь потмосонза калня.
Калнять кургса сюреня,
Сюреть песонза крьня.
Мазась колазе тя алнять,
Стирти венептезе калнять.
Усковсь алу сюренясь,
Ваныхть кевори крьнясь.
Кеворсь инголест лугава,
Оцю велева, курнява.
Кона шири тя крьнясь, —
Тоза Мазась и стирнясь.
Ульцять квалма марлюфт касыхть,
Нюрги марьхне эсост мазыхть.
Валда кевонь якам кись,
Цифтордсь эсонза сонь шись.
Гайнясь морось столба пряса.
Мазась арьсесь: „Гусля тяса“.
Клянцьса вельхтяф эрь куднясь,
Панчфне вальманцты утясть.
Сембе ломаттне ульсть мазыхть,
Парьхцинь платьят лангсост каннихть.
Мезе кельгихть сянь и порьсть,
Стройса паксяв моразь мольсть.
Велеть песа, садть кучкаса,
Сливат, вишнят кочкайхть тяса
Йомла цёранят, стирнят,
Синь ульсть павазу иднят.
Крьнясь кеворсь пакся пяли,
Панчфнень ёткова сон кяли.
Коза кевори крьнясь,
Тоза Мазась и стирнясь.
Ваныхть чуднай од машинат,
[ 47 ]
Алост шаштыхть кели шинат.
Гайняй боксонза трубась,
Мярьгат, атяма увнась.
Эрек ломатть эсост вятихть,
Кенерьф росьнень эса керыхть.
Мельгаст шары розень пульсь,
Тяляф зернась ару ульсь.
Од рьванцты Мазась корхтась:
— Няйсак, аяш тяса плёткась.
Горбон тарвазське имась.
Вов сон, павазу странась! —
Молихть, молихть крьнять мельге,
Крьнясь — ведти, синьге — ведьге.
Тяфта чуднай ошс сувасть.
Месть нят менельса увнасть?
Лиихть вяри, боку, фталу,
Мельцек, мельцек валгихть алу.
Нянди мярьгихть самолетт,
Эсост бодрай од пилотт.
Стирсь и Мазась мольсть ульцява,
Ардсть машинат кшнинь кинява.
Ацаф бронзаса ульцясь,
Золотаса валф курнясь.
Тёжянь ломатть тяса якайхть.
Корхтайхть... весялат и рахайхть.
Тяса-тоса, кели сатт,
Касыхть эсост виногратт.
Садса сиретне и оттне,
Аньцек аяш зверь паготтне,
Конат мирти вредат тисть,
Сянкса пидезень синь шись.
Нинге молихть крьнять мельге,
Крьнясь — ведьти, синьге — ведьге.
Кеворсь башняти крьнясь —
Тоза Мазась и стирнясь.
Башнять потмоц валф сияса.
Ломатть мезе учихть тяса?
Валги савор куцемась,
Модать алу синь сувасть.
Цифтор валдомсть заря тяшттне,
Нюрьгихть эсост золтань пяшттне.
Ацаф мраморса киякссь,
Тяште цильфнень няфтсть сиякс.
Валда стенась, мярьгат, клянцень,
Няйсак пачканза эсь пряцень.
Модать алда сай трамвай,
Меки модати сувай.
Крьнясь куци куцемава,
[ 48 ]
Меки кеворсь сон ульцява.
Коза кевори крьнясь,
Тоза Мазась и стирнясь.
Рахсихть, пейдихть, коста палсихть,
Цебярь эряфть колга арьсихть.
Ваныхть инголест дворец,
Токаф дуцяти сонь пец.
Лама ломатть ванондсть тяса.
Корхтайхть: „Чуда дворецть пряса“.
Тя ульсь бронзань богатырь,
Лемонц содасы сонь мирсь.
Види кядец кеподьф вяри,
Дуцясь алганза сонь кяли.
Кяденц лангса валда шись,
Сон лучанзон мархта кштись.
Тя дворецса питни азорсь.
Панчфса кодавсь вольнай масторсь.
Сон наротти павас тись,
Оцю брадоц — валда шись.
Явсть дворецонь кенкшне келес,
Тяльги потмозонза велесь.
Кенкшка лиси великан,
Мазать лангозонза ванць.
— Шумбрат, цёра! Лама якать.
Аф стак пилькнень эса тапать.
Няйть павазу странать,
А тинь ширесонтт нужась.
Кочкайть сиретнень и оттнень,
Машфтость плеткатнень, паготтнень.
Сялгость штыкса оцю пекть,
Эста сай нужати пе. —
Нинге лама, лама корхтась,
Мазать ваксканза сон ётась.
Ваныхть кевори крьнясь,
Тоза Мазась и стирнясь.
Кеворьсь пандова, лугава,
Меки велева, курнява.
Тяфта пиче вири састь,
Крьнясь сельмоста имась.
Марясть лишме арды, цяфай,
Гайняй вайгяльняц сонь, лакай.
Мазать инголенза сась.
Кафта пильге лангса прась.
Ластясть кафонесть седлати,
Лиихть меки ся странати...
Мезе Мазась тоса тись?..
Аньцек содасы сонь шись.
|
