Колхозонь эряф/1940/01-2/Полю/1

From Wikisource
Jump to navigation Jump to search
Колхозонь эряф (1940), № 1—2 Январь—Февраль edited by Чумаков И. Ф.
Полю, I-це главась by Ельмеев, Григорий Ильич
Колхозонь эряф. Эрь ковонь литературно-художественнай и общественно-политическяй журнал. Мордовскяй писателень союзть органоц. — № 1—2 Январь—Февраль 1940. — с. 67—69

[67]

I

Губорть ширеса
Мокша веленясь,
Сонне песонза
Сяньгяря вирнясь.
Велеть пеняса
Наксада кудня,
Эряй эсонза
Постуф атяня.
Кулось вачеда
Кельгом поланяц,
Тяни сонь илядсь

[68]

Стирьняц Полюняц.
Полють мархта сон
Стадат ванонкшни,
Ефкскат-баснянят
Тейнза азонкшни.
Атять лафту лангс
Каяф сумканяц,
Сумканц потмоса
Салняц да кшиняц.
Паньцазь стойлати
Велень стадаснон,
Синць обедасазь
Кшиснон, салняснон.
Стакаль Полюти
Стадань ваномась,
Стадань ванозь сон
Оцю стирькс арась.
Тяни стиренне
Пукшу пондоняц.
Алянь сельме вийхть
Салси ронгоняц.
Шамац круглайня,
Сенем сельмоня,
Мазы щеканя.
Кодаф кафтува
Равжа касаняц.
Седить токасы
Гайняй вайгяльняц.
Шачеманяда
Сон удалакшнесь,
Касоманяда
Сон угадякшнесь.
Щафке, карксафке
Панксу панарняц,
Сядонга панксу
Сонь рукаваняц.
Кенерсть паксяти.
Козянь сёротне,
Гайняйхть мазиста
Нармонь моротне.
Полюсь ськамонза
Тячи стада ванць,
Стане ваймафтсы
Родной алянянц.
Ляйге, лоткова
Тракснень панезень,
Шинять псилгодомс
Полюсь аннезень.

[69]

Йотась стаданяц
Шуди веднява,
А илядыхне
Йомла седнява.
Эводсь Полю стирсь,
Кундась сединянц:
Траксне тапасазь
Баярть розь уманц.
Келес ласьконди,
Лофтамсь шаманяц,
Аш сонь лездыняц —
Тряйняц аляняц.
Азозь баярти
Работниконза:
Тапазь тонь роснень
Велеть траксонза! —
Баярсь кяжиясь,
Мчкр пеенза,
И аф парста ванцть
Кяжи селмонза.
— Панесть стадать сей,
Постуфть сотнесасть,
Нищайть, ине-куйть,
Тейне сей тусасть!
Тусть работникне
Розень паксяти,
Сембе тракснень синь
Панезь баярти.
Ускозь од стирнять,
Сотнефт кяднянза,
Снавнякс кеворихть
Сельме веднянза.
Пукшу пондонянц
Пиксозь локшеса,
Кирдезь колма шит
Кардса шовдаса.