Колхозонь эряф/1939/10/М. Ю. Лермонтов/Прозац
ПРОЗАЦ
Лермонтовонь прозаическяй произведениянза можнат явомс романтическяйнди и реалистическяйнди.
Романтизмань духса сьорматф чудеснай восточнай йофксоц „Ашик-Кериб“. Активнай романтизмань элементт улихть рана сьорматф, но апак аделак „Вадим“ повестьсонза (1832).
Тя повестть эса действиясь моли Пугачевть руководстванц ала пяк вии крестьянскяй восстаниять фононц эса. Козя помещиксь Палицын явондсь милостыня нищайхненди, васетькшни горбун Вадимть мархта, конац дивандафнесы баярть эсь уродстванц мархта и аф азомшка оцю физическяй вийнц мархта.
Палицын сявсы Вадимонь эстейнза служама, сянь апак содак, што Вадим розаряф купецть цьорац, конань розарязе сонць жа Палицын. Вадимонь аф кирдемшка сась кяжень пандома мялец од азорти. Обидать инкса кяжень пандоманкса сон шоворькшни восставшай крестьяттнень мархта, хотя эсь потмосонза аф кельксыне сембе ломаттнень. Вадим няфтьф кода демоническяй ломань, конац эсь мяленц касфнесы кяжень пандомать мархта. Кяжень пандоманди мяльсь люпшнесыне сонь эсонза родственнай чувстватнень Ольгати, конац кельксы азоронц цьоранц Юрийнь.
Кодама-бди седи ваксонь пара мяльса Лермонтов азонды ся трепетть и эводемать колга, конань марясазь помещикне грознай стихийнай крестьянскяй восстаниять пингста. Авторсь народть ширеса. Вадим народть мархта марса вешсыне помещикнень расправань тиемс. Повестсь лоткаф ся вастти, мзярда Вадим кизефнесы солдаткать, конац кяшезе Палицынонь.
Лермонтовть повестенц ули кой-кодама общностец Виктор Гюгонь „Бюг-Жаргаль“ романонц мархта. Кафцьке произведениятнень эса событиятне молихть угнетеннайхнень вии восстанияснон фонцнон эса: Гюгонь — негратнень; Лермонтовонь — крепостной крестьяттнень. Лермонтовскяй повестть геройнзон Ольгать, Юрийть и Вадимть лацот примерна Гюгонь геройнза Мария, сонь женихоц и рабсь, конань лемоц Бюг-Жаргаль.
Тя повестть романтизмац ащи Вадимонь няфтемаса, конанди авторсь максси титаническяй, демоническяй качестват.
Лермонтовть реалистическяй произведениянза вов кодапт. „Княгиня Лиговская“ апак аделак повестец (1836) и сембонди содаф романонц „Герой нашего времени“ (1840), конань эса авторсь педа-пес и марнек няфтезе XIX веконь 30-це кизотнень пингонь дворянскяй геройть типичнай характеронц.
„Княгиня Лиговская“ апак аделак повестть центраса ащи козя офицерть Печоринонь образоц. Геройть кельгомань похождениянзон няфтемаснон вельде авторсь няфнесы лувити петербургскяй светскяй обществать, конанц афолезе кельге поэтсь.
Беднай чиновникть Красинскяйнь Печоринонь мархта сялондомасна няфнесы ся социальнай ненавистть, конань мархта ванцть беднай ломатнне празднай барствать лангс.
[ 45 ]„Княгиня Лиговскаясь“ можна фкя ширде лувомс прологокс „Герой нашего времени“ романти.
Штоба сембе ширде и сяда полнайста няфтемс Печоринонь характеронц, Лермонтов колма формаса максси характеристика геройти: колмоцекс ломанть вельде отзыфт, максы характеристика Печоринонди сонць авторсь и, меколи, геройсь сонць эсь колганза корхтай. Тянь коряс и строяви романть композицияц. „Бэлать“ эса Печоринонди характеристика максси Максим Максимыч; „Максим Максимычть“ эса геройть колга корхтай соньць авторсь; „Таманць“, „Княжна Мерись“ и „Фаталистсь“ ащихть главакс „Печоринонь журналонцты“.
Эсь романозонза Лермонтов сувафтсь кой-кодама реальнай фактт: „Бэлать“ и „Фаталистть“ эса сьорматф происшествиятне ульсть поэтть родственниконц Хастатовть мархта, контрабандисткать мархта эпизодсь ульсь Михаил Юрьевичень мархта 1837 киз. Таманьца улемстонза.
Григорий Александрович Печоринонь образоц русскяй критикать эса ванондовсь кафта лаца: Белинскяй Печоринонь лувондозе духонь огромнай вий мархта ломанькс, но губондафокс эряфть условиянзон ширде. Добролюбов Печоринонь лувондозе обломовецнень йоткс, няйсь эздонза лафча воля мархта светскяй ломань, конац эряй сонцьке аф содасы мезенкса. Но критикнень эсь йоткова аш противоречиясна. Кажнайсь синь эздост няфнесы лермонтовскяй геройть фкя ширенц. Арьсематнень эса няеви противоречивостсь азондови сянь мархта, што сонць Печорин двойственнай, противоречивай. Сон героичнай, вии эстонга, мзярда страстна атказакшни сире эряфть эса эрямда, аш мялец эрямс пошлай эряфса. Сон — обломовец, мзярда сон няфнесы афспособнайшинц эрямс одкс, лиякс тиемс действительностть.
Печоринонь образонц противоречивостец няеви нльне сонь лангонзонза ванозьге. Кели лафтувонза, вии ронгоц корхтасть сянь колга, што тя ломанть саты вийц кирдемс сембе стакатнень кочевой эряфть эса. Физическяй вийнзон ашезь машфта аф столичнай эряфонь развратсь, аф душевнай бурятне. Каряй сельмонза, конат мзярдонга ашесть пеетькшне, пиндолдсть кодама-бди фосфорическяй валдса, конац похожайль кельме и вадяв сталень пиндолдомать лангс; сонь небрежнай нола якафоц кядень апак яфчак — сембось тя корхтась сянь колга, што Печоринонь потмос кяшфт огромнай душевнай вийхть и оцю воля.
Но сяка жа пингть Печоринонь эзда няевсь барскяй уряд и нежнайши. Шяяренза акшанатольхть, а усанза и сельме понанза равчтольхть — ломанть эса ся породань признаксь, кода сивай алашать равчт пулоц и гриванза. Сонь бледнай коняц, конац цертнеф сьормофса, шама кедец авань шама кетькс нежнай — корхтасть сянь колга, што тя 23 кизонь цьорась аф кржа няйсь ки тревогада и наслажденияда и пяк ни сизесь.
Печорин старандай путомс тевс эсь вийнзон и сатомс права [ 46 ]эсь пингонь геройнь лемти, но сонь вийнза нолдафтольхть ложнай киге и карьхцяфт тевфтома — сембось тя пачфтсь трагически сянь шарьхкодеманцты, што сонь аш потмонь вийнза, шава потмоц, тиевсь эзонза гнетущай тоска.
Родителензон кядьалда одкс пингста тумда меле Печорин кармась пялязкс наслаждаться сембе удовольствиятнень мархта, конат можнатольхть рамамс ярмак лангс. Сон шоворсь высшай светти, кармась кельгома и сонценге кельксезь. Сембе земной удовольствиятнень варжамда меле сонь сембода мольсь мялец.
Сонь самолюбияц веши сяда лама: слава и величия.
Славань вешезь сон кармась лувондома, тонафнема. Но йот идькс пингстонза тонафтозь гнуснай привычкас — получандакшнемс сембе удовольствиятнень аф эсь вийнзон мархта, а лиятнень эксплоатацияснон вельде. Тянь сюнода сон афоль кондясте настойчивай и кувака пингонь трудти. Наукатнень эзда мольсь Печоринонь мялец. Сон пачкодсь выводс, што аф славась, аф счастьясь наукать эзда аф ащихть, што сембода павазу ломаттне — невеждатне, а славась — удача. Штоба сатомс славать, эряви улемс ловкайкс, эряви молемс рискованнай тевс. Тя кити ряфцыезе Печоринонь скукаське — эряфть благанзон эзда топодемать результатоц. Сон моли Кавказу сянь лангс надиязь, што чеченскяй пулятнень ала юмай скукац, саты слава и величия. Сонь мялецоль рисковандамс эряфонц мархта, штоба лиятненди няфтемс пря геройкс. Ськамонза улемстонза няфнесть пря сонь натуранц сембе лафча ширенза, мянь трусостти молемс. Уленькшнесь пизембачк, якшамста ськамонза моли дикай кабанть лангс, а лияста варманясь яфоди — пели простудиндамда, калтади вальмя кенкшкясь — тркстади.
Печорин шарьхкотькшнезе, што сетьме радостень и ваймонь спокойствиянь обстановкаса слава аф сатат, што сон шачф эряфонь-ащефонь бурянь тиендема. Сяс Лермонтовскяй геройсь кельксезе латцемс эсь прянц матрость ваксс, конац шачсь разбойниконь бригть палубазонза и конань ваймоц тонадозень бурятнень и битватнень. Пустыннай берягс йордафста сонь молендсь мялец и скучендась бездействияса.
Эряфонь бурять эзда сон сявсь аньцек несколька идея и изь сяве фкявок чувства, страстень толть потмоста лиссь кемокстафста и кельмоста, кода кшнись, и прокс юмафтозе благороднай чувственнай стремлениянь псиенц. Кунара ни сон эряй аф седиенц вельде, а прянц вельде: арьсекшнесыне, тиенди анализ сонцень страстензонды и тевонзонды. Эсь свободанц и независимостенц юмафтомдост пелезь сон эвотькшни эсь чувстванзон эзда и сембе пингть подчиняндакшни коське рассудкати.
Печорин шарьхкодьсы, што эряфсь тись сонь эздонза нравственнай калека, ваймонц явфтозе кафтова. Сон корхтай, што сонь эсонза эряйхть кафта ломатть, конатнень эзда фкясь работай, омбоцесь думандай и ваны васеннеть поступканзон мельге.
[ 47 ]Печоринонди эрямась — тя сембе пингть улемс стражаса, шарьхкодемс эрь варьжафксть, эрь валть значениянц, сотцемс кинь мезе мялец тиемс, лихнемс лангу и калафнемс заговорхт, тиендемс пря васькафтфокс — и вдрук весть яфодезь веляфтомс хитрай замыслань огромнай здания. Печорин арси кодама-бди разрушительнай ушетксокс.
Сонь аф мялец эрямс стане, кода эряйхть сонь перьфканза ломаттне. Печоринонь мялец эрямс одкс, но шарьхкодсы, што сон тянди аф кондясти, — меколи арси трагическяй фигуракс.
Сон дружбатинге аф кондясти, сяс мес, сонь лацонза, дружбать пингста фкясь — омбоцети раб. Независимай характеронц коряс Печорин рабокс аф улеви, указовакшнемс — тянь эса тейнза ули мезе-бди родственнай, но властенди кругсь тейнза пяк йомла. Сонь мялец мезень-бди сяда оцювонди. „Подчиняндамс эсь волязон сембонь, мезе перьфкан ащи, — корхтай Печорин, — васень удовольствиясь. Кеподемс эсь ширезон кельгомань, преданностень и страхонь чувства — аф васенце ли признакоц и величайшай торжествац властть? Улемс кинди-кинди страданиянь и радостень причинакс, тянди йофси кодамовок правань апак ульхть, — аф тя ли сембода танцти пищац минь гордостеньконь?“ Тя геройть шарьхкодеманзон коряс, — ломанть павазоц — тя насыщеннай гордостсь. Величияти старандаманц шовор сон шарьхкотькшнесы, што тянь инкса эряви путомс оцю вий. Тяста сонь старандамацка сянди, штоба хоть ланга ванозь улемс величавайкс. Сон сембе пингста старандай внешна тиемс пря спокойнайкс, равнодушнайкс и тянь мархта няфтемс эсь эсонза кяшф волянь вий, характеронц кемешинц. Сон йорай сембе пингть кирдемс эсь мельганза первенствать. Вов мес сон аф кельгсы улемс марса энтузиаст мархта.
Сон признавандасы кельгомать пяк оцю пленяющай вийнц. Зависимай положенияс повомда пелезь сон кельгомать постоянна шарфнесы трагическяй чувстванди. Авать лангс Печорин ваны пошла циничнай ширде, кода панчфонь лангс, конань эряви сяземс и, топодемс никссемдонза меле, йордамс кить лангс сянди надиязь: а пади кие-кие кеподьсы?
Сонь эсонза развитай пяк оцю эгоизмань чувства. Сяс сембе пингть старандай получандамс семботь эстейнза и аф максомс каршезонза мезевок.
„Мон маряса эсь эсон тя аф топафтови жадностть, конац нилезь нилендьсы семботь, мезе васьфневи кизень лангса, мон ванан лиятнень страданияснон и радостьснон лангс аньцек эстейнь отношенияса, кода пища лангс, конанц вельде эряйхть вийне“.
Печорин юмафтозень-арафтозень эсь оцю возможностензон сонцень прихотензон удовлетворяндамс. Меколи сон пачкодсь седиень керы выводс: „Мезенкса мон эрянь? Мезенди мон шачень?“ — Ответть эземс — предположения: „Улема, сон (цельсь [ 48 ]— ред.) ульсь и, улема, монь назначениязе оцювонди ульсь, сяс мес мон ваймосон марян аф азомшка оцю вийхть“.
Сянь шарьхкодемац, што сонь потмоц шава, аф нолдавихть сонь аф азомшка оцю вийнза эрявикс и полезнай тевс — Печоринонди тиенди лама страдания.
Сонь аф мялезонза сиресь, сон афолезе няй сонь. Сон веши од, но тя одть идеалоц тейнза нинге ашезь няев. Станяк и кулось тя вии, демоническяй ломанць, а эсь кинц изезе му.
Кода энергичнай, волевой, протестующай ломань, Печорин прогрессивнай ломанель эсь эпоханц пингста. Кода ломань, аф азомшка оцю вийнзон и возможностензон лангс апак ватт, конанцты эряфть откстоптомс мезевок ашезь тиев, Печорин шоворсь кода мярьгихть „лишнай ломанень“ группати.
Штоба сяда колоритнайста няфтемс Печоринонь натуранц, Лермонтов лихтсь сонь ваксозонза ладямать инкса тага ломань — Грушницкяйнь, конац тожа арьсекшнесь улемс эсь пингонцты геройкс. Грушницкяйнь поведенияса сембось ащи вихца тифокс. Сон пяк кельксыне всякай лаца эффекттнень. Марнек эряфонц эрязе, штоба содамс аньцек эсь прянц, лия ломаттнень сон афолезень сода и содамска ашель мялец. Сонь сембе поступканзон и действиянзон срхкафнекшнезень мелочнай самолюбиясь. Лангань мазишись тейнза сембода питнись. Сонь мялец сембе пингть няфтемс пря мазыста, цебярьста, разочарованнайкс, щамс солдатонь шинель, — лиякс азомс, няфтемс пря геройкс. Сон пяк самоувереннай, самомнительнай, хотя тянди аш сонь аф духовнай, аф физическяй даннайнза. Грушницкяйнь целец — улемс романонь геройкс. Сонь вельденза авторсь няфтезе пустотаснон и бессодержательностьснон светскяй од ломаттнень, конатнень и чувствасна и настроениясна аф искренняйхть, а тиезь тифт вихца, а думсна аф молихть сяда ичкози, кода няфтемс пря оригинальнайкс и шарфтомс эсь ширезост лиятнень мяльснон.
Мери княжнать вельде авторсь няфтезе типичнай светскяй барышнять, конац тонафтф ланга-лунга, аньцек ба маштоль дворянскяй этикетть ванфтома. Виде, откровениянь пингста Мерить ули способностец няфтемс состраданиянь чувстват ломанень несчастьяти, но тяфтама минутада, мзярда героинясь эрьси настоящай, искренняй ломанькс, эрьси пяк кржа. Курортса мезенге апак тиентть эряфонц йотафни дворянскяй обществать йоткса улемстонза Мерись сембе пингть маскировандасыне сонцень потмонь чувстванзон, аф шарьхкодезь моли перьфканза ащи обществать нравонзон и обуцянзон коряс и сьопондсы эсь ваймонц вихца тиф кокетствать эшксс. Сон аф шарьхкодьсыне ломаттнень и эряфть. Сяда меле, кода содазе Печоринонь эзда, што рахсесь сонь лангсонза, Мерись марнек повсь виияф гордостенц и токаф самолюбиянц влияниянц алу. Внешняй позированиять инкса сон азозе геройти эсь аердавоманц колга. Лермонтов аф сьопондсы, што Мерить улихть цебярь задатканза, [ 49 ]но сон, кода реалист, няфнесы, што дворянскяй средась губондасы тя цебярть и тисы Мерить типичнай светскяй бессодержательнай авакс, конац способнай васькафнемати, чувствань продажностти, пошлай закулиснай интригатненди.
Дворянскяй геройхненди противоположностекс романть эса ащихть свободань кельги кавказскяй эряйхне.
Вов минь ингольнок Азаматсь. Тя удалой цьораня, конанди оружиясь и алашась светть эса сембодонга питнихне. Сон отлична арды ластя. Сонь страстнай натурац веши простор и деятельность. Азаматонь пяк оцю вийнь воляц и настойчивостец арьсеф целенц сатоманцты. Казбичень чуднай алашанц няемда меле сон анок ульсь молемс любой тевс, аньцек ба получандамс тя лишмоть: сон эняльди Казбиченди, анок саламс алянц и оцю питнеда рамамс лишмоть, меколи, аф ужяльдсы нльне аканц, макссы пленницанди сонь сянкса, мес Печорин лездсь тейнза алашать саламста.
Казбичень эса эрь аськолмаса няендеви оцю удаль, молодечества. Лишмось тейнза стане жа сембода питнись сембе козяшитнень эзда. Алашанц саламанц кулемда меле сон пяляскодомшка кяжиясь. Сяс мес цельти изь пов пуляц, кяженьбачк кевти срафтсы ружьянц и мастору прафста аварди отчанияса, кода идь. Оскорблениять инкса сон пощадафтома панды кяж Азаматонди — шавсы сонь алянц и Бэлать.
Лермонтовть туфоль мялезонза Кавказть ня цьоранзон вии волясна, страстти беззаветнай увлечениясна, конань инкса синь аф ужяльдсазь эсь эряфснон.
Мэрити противоположностекс ащи Бэла черкешенкась. Авань тя чуднай образть эса сочетанияса ащихть нравственнай и физическяй мазышись. Честностсь, видешись, мезьдонга аф рамавомась, искренностсь, кельгомань страстностсь, конац сяськсыне нльне религиознай обуцятнень и предрассудкатнень — вов тя благороднай авань характерть отличительнай ширенза.
Романть эса башка ащи Максим Максимычень образоц. Тя пожилой, но нинге бодрай офицер. Сонь сембе зрелай эряфоц йотась Кавказса. Сон цебярьста тонадозень природать, Кавказть цьоранзон нравснон, привычкаснон, обуцяснон. Сонь характероц добродушнай, ляпе. Сон виде вайме. Лиянь горясь тейнза бта эсь горяц. Сон пяк ризнай Бэлать куломанц инкса, искренна дасадявсь Печоринонь равнодушиянцты и кельмешинцты. Сонь кельги седиец пяк кольсь сянкса, мес Печорин изь шарфта мяль сонь лангозонза мекольдень васьтемаснон пингста. Максим Максимыч — тя простодушнай русскяй ломань.
Тя произведениять художественнай достоинстванц колга оценкань максомста Белинский мярьгсь: „Повестть слогоц — то йондол кифчади, то меч вачкоди, то жемчуг кецергоды бархатть ланга!“
Н. В. Гоголь сьормадсь Лермонтовть колга: „Кивок нинге миньцонк ашезь сьорматкшне тяшкава правильнай, прекраснай [ 50 ]и благоуханнай прозаса. Тяса няеви сяда лама углубления эряфть действительностьс — аноклакшневсь сай пингонди русскяй бытонь великай живописец“. Лама кизода меле тя мыслять поладозе Чехов: „Мон аф содан сяда цебярь кяль, чем Лермонтовть“.
Лермонтов ульсь ученикокс и достойнай преемникокс Пушкинонди. Эсь генийнц вельде сон арась великай народнай поэтокс, фкя учителькс Некрасовонди, Достоевскяйнди, Толстойнди, Чеховонди, Горькаинди, арась учителькс советскяй писательхненди и поэттненди. Советскяй лувись и писательсь макссихть оцю оценка и кельксазь великай Лермонтовть поэтическяй и прозаическяй произведениянзон синь эсост няфтьф страстностть инкса, синь мазы музыкальнай, живописнай формаснон инкса.
„Лермонтов эряви тейнек, эряви советскяй литературати. Кода и лермонтовскяй стихсь, советскяй литературась пишксе пламеннай страстностьта, конафтома аш великай творчества“ („Правдать“ передовойц 1939 киз. октябрть 14-це шистонза).
(примечание редактора вики-библиотеки) Ссылки на произведения, перечисленные в этой статье:
- Bug-Jargal («Бюг-Жаргаль», фр., автор В. Гюго), роман, 1826
- Вадим, повесть, созд. 1832—1834, опубл. 1873
- Княгиня Лиговская, повесть, созд. 1836—1837, опубл. 1882
- Ашик-Кериб, турецкая сказка, созд. 1837, опубл. 1846
- Герой нашего времени, роман, созд. 1839, опубл. 1840—1841