Колхозонь эряф/1939/01-2/Чеховонь эряфоц и деятельностец
| Чеховонь эряфоц и деятельностец |
| (1860—1904) |
«Сёрмадодова азкс сянь колга, кода од ломанць, крепостнойнь цьорась, ингольдень лавочниксь, певчайсь, гимназистсь и студентсь, конац воспитандаф чинопочитанияса, поповскяй кядень палсемаса, лиянь мяленди поклоненияса, конац благодариндакшнесь кшинь эрь сускомть инкса, конац ламоксть пикссеф, конац урокова якай галошафтома, конац тюренькшнесь и мучендакшнесь животнайхть, конац кельгондезе обедаманц козя родственниконзон ширеса, шкайти и ломаттненди кодамовок надобностьфтема лицемерившайсь — аньцек сонцень ничтожестванц сознаниястонза, сьормадода, кода тя од ломанць эсь эздонза каплянь люпшнесы рабть и кода сон, сргоземок фкя прекраснай шовдаваня, марясы, што сонь санонзон эзга шуди аф рабскяй верни, а настоящай ломанень». Тяфта сьормадсь Чехов эсь колганза, и сембе сонь эряфоц ульсь „рабскяй верть“ каршес тюремакс ломанень красотать и достоинствать инкса.
Антон Павлович Чехов шачсь Таганрогса. Атяц сонь ульсь крепостной крестьянин, но сяда меле рамазе эсь прянц воляс. Аляц писательть цьоранякс служась „мальчикокс“, сяльде «молодецокс» и старшай приказчикокс и, меколи, панчсь эстейнза бакалейнай лавканя.
Провинциальнай ошке, йомла вальманя и апак полафнек ставня мархта куднят, шуроста йотайхть рдазу, немощенай ульцятнень эзга, лень, тишина, неподвижность — вов кодамоль Таганрогсь ся пингть. Чехов сьормадсь меколи: „Мон мог убедиться, конашкава рдазу, шава, нола, безграмотнай и скучнай Таганрогсь. Аш фкявок грамотнай вывеска и ули даже „Трактир Расия“.
Идькс пингонь впечатлениятне ульсть аф радостнайхть: афоцю проступканкса оплеухатне и подзатыльникне, лавкаса мялень мольфти дежурстватне. Но сембода аф цебярсь ульсь церковнай службатненди якамась. Алясна кошарязень иттнень ащекшнемс кувака обеднятнень и морафнемс церковнай хорса, конанди регентокс сон ульсь.
„Минь лангозонк сембе ванцть умиления мархта и завидовандасть монь родительненди, — корхнесь меколи Чехов, — минь жа тя пингть маряськ эсь пряньконь йомла каторжникокс“. И нинге: „идькс пингста монь ашель идькс пингозе“, „идькс пингозе ульсь страданиякс“.
Чеховонди страданиякс ульсь и греческяй школась, коса преподавал невежественнай ломань, конац телеснай наказаниятнень лувондозень единственнай педагогическяй приемкс. Аф сяда цебярь и ульсь гимназияса: «казеннай, тюрьмань кондяма зданиясь, стака экзаменттне, кяжи директорсь, учительхнень распеканиясна и придиркасна».
Единственнай радостекс ульсь природась, театрась и литературась. Конашкава оцю удовольствиясь ардомс вол лангса и ваномс кизонь менельть лангс! Морясь, степсь, прогулкатне, атянц шири [ 83 ]арнемась, калонь кунцемась макссесть воляшинь и павазонь ощущения. А театрась! Конашка павазсь улемс сембода вере, галеркаса, и коста наслаждаться артисттнень налхкомаснонды! Чеховонь—гимназистть — кельговикс драматургоц ульсь Островский. Нинге гимназияса Чеховонь шачендыхть наклонностенза литературнай творчествати. Журналса, конань нолязь ученикне, сон печатлась драма и водевиль. Мзярда Чехов тонафнесь нинге гимназияса, аляц розарявкшнесь и сембе семьясна тусь Москуву. Кемготува кизостонь юношась катфоль эсь волясонза. Бедностсь муцясь, «кода пейнь сярятьф» — лятфни писательсь ся кизотнень колга.
1879 кизонь сьоксенда Чехов тушенды Москуву. Чеховонди эста ульсь 19 киза, но сонь эсонза шачсь ни непримиримость всякай васькафнемати и пошлостти. «Тя аф правда», «Аф эряви васькафнемс» — корхнесь сон эсь братьянзонды, кода меколи корхнесь перань коряс соратниконзонды: «сембода инголи, монь друзьяне, аф эряви васькафнемс... Искусствась сянь мархта асобенно и цебярь, што сонь эсонза аш кода васькафнемс». Видешись и глубочайшай искренностсь ульсть фалу отличительнай чертакс Чеховонь характеронцты и творчестванцты.
Москуву самдонза меле, Чехов поступает университету медицинскяй факультетс и сяка жа пингть вишкста кармась работама литературнай работаса. Аш шись сонь заставлял сядонга лама сьормадомс. Сон сьорматкшнесь 200—300 веща кизоти, пцтай эрь шиня од веща, эряскодомок, «наотмашь» — и сякокс изь машта машфтомс нужать. «Сьормадыть киц валяф аф розаса, а эскса» — корхнесь ся пингста Чехов. Юмористическяй журналга и йомла газетанява кармасть тихтетькшнема Антон Павловичть фельетононза и нюрхкяня рассказонза, конат подписаннайхть обычно Антоша Чехонте псевдонимса. Конашкава стака ульсь работамс обстановкась лац корхтай Чеховонь сьормац писательти-юмористти Н. А. Лейкинти, ся пингонь сембода цебярь юмористическяй «Осколки» журналть редакторонцты. «Сьормадан, — пачфнесь Чехов Лейкинонди, — сембода гнуснай условиянь пингста... Соседнай комнатаса пешкоды шабокшец родиченди инжикс сафть, омбоце комнатаса алязе тядязти кайгиста лувсы «Запечатленнай ангелть»... Кати-кие заводясь шкатулка, и мон кульса Елена Прекраснайть... Сьормады ломанти тя обстановкада гнуснай аш мезе лия думандамска. Монь постелезень занязе саф родственникозе, конац то и дело срхкафты корхтама медицинать колга... Кинь мольсь мялец толкавамс медицинать колга, ся ушеды корхтама литературать колга».
1884 кизоня Чехов аделазе университетть. Инголи сон арьсесь заняться медицинаса, но литературнай работась ашкодозе сонь марнек и врачебнай практикати сон шарфнесь прокс кржа пинге. Курок Чехов сьормады повесть «Степь», конань колга писательсь Всеволод Гаршин корхтась: «Россияв эвондась первокласснай писатель!»
«Степть» меле эвондакшни «Иванов» драмась, «Скучная история» повестсь и нинге лама расскаст. Чеховонь лемоц кармась ламонди содавома.
В. Г. Короленко эсь воспоминаниянзон эса макссесы ся пингонь Чеховть портретонц:
«Монь инголен ульсь од и сядонга пяк одкстомф няймс коря ломань, аф ламода сяда оцю средняй ростть коряс, куваказа, правильнай и чистай шама мархта... Сембе движениятнень, приемтнень и корхтаматнень простотасна ульсь господствующай чертакс сонь сембе фигуранц лангса, кода и сонь писаниянзон эса... Казалось, [ 84 ]сонь сельмонзон эзда шудесь остроумиянь и непосредственнай весельянь неисчерпаемай источник, конаса и вельф пяшкотьфт сонь рассказонза. И марса шарьхкочневсь кати-мезе сяда крхка, мезьти сави нинге развернуться... Общай впечатлениясь ульсь цельнай и обаятельнай...»
80-це кизотнень, кяжидонга кяжи реакциять пингста, Чехов заражается уныниянь, разочарованностень, растерянностень настроенияса, конат ульсть интеллигенциять йоткса. Аф машфтови — стака впечатления тиенди писательть лангс Гаршинонь эсь прянь шавомац: «Интересно, што куломдонза неделяда инголе сьормадсь, — Чехов Гаршинонь эсь прянь шавоманц коряс, — сон содазе, што йордай пря куцемань варява, и аноклась тя пети. Аф кирдемшка стака эряфсь! А куцемась ужаснай. Мон сонь няине: шовда, рдазу...»
Тяфтама положенияста лисемань вешендемста Чехов временна шарфни Л. Толстойнь реакционнай учениянцты — кяжти насилияса непротивлениять колга. Но активнай эряфть жаждац ванцы Чеховонь унынияда и толстовствада. 1888 кизоня кулось знаменитай русскяй путешественниксь Пржевальскяй, кулось путешествиянь пингста ичкозе родинанц эзда, пустыняса. Сонь куломац Чеховонь лангс тись оцю впечатления. Зверькс араф, «Хмурай» интеллигенттненди сон противопоставляет ломаттнень, конат макссесазь эряфснон наукать инкса, ломаттнень, конат эрявихть человечествати, кода шись. Чехов сьормады: «Аф стак, Пржевальскяйнь, Миклуха-Маклайнь и Ливингстононь содасазь эрь школьниксь и аф стак ся китнень эзга, куваня йотнесть синь, нароттне латцихть синь колгаст легендат».
1890 кизоня Чехов моли Сахалин острову, штоба обследовандамс тя ичкоздень крайть, коза царскяй правительствась кучсезень ссылкас преступникнень. Кемонь тьожятть каторжникт эрясть тоса стама условияса, конатнень пяк стака представить: якшама, вачаши, изнурительнай работа, начальствать побоенза, издевательстванза. Шурот кие меки сашенць Сахалинцта. Ломаттне юмсесть, наксадкшнесть тюрьматнень эзга, куломс пикссевсть плеткаса. Сахалинть колга корхневсь: „Перьф пяльге моря, а кучкаса горя“. Чехов тусь Сахалину, штоба азондомс обществати каторжникнень эряфснон колга правдать, аф ваномок сянь лангс, што ульсь ни сяряди, и тумась мог йофси аделамс сонь шумбрашинц. Сахалинца Чехов работай шовдаваста ушедомок вети молемс, занимандай населениянь переписьса. „Сахалинскяй адть“ няфтезе Чехов „Остров Сахалин“ оцю книгаса. Тя книгась царскяй Россиять суровай приговороц.
Сахалинцта самдонза меле Чехов рамсесы Мелихово аф оцю имениять и эряй тоса, станя кода сядонга вишкомф урмась (туберкулезсь) аф максси тейнза возможность эрямс ошса. Но эряфсь Мелиховаса, аф ваномок урмать лангс, ульсь напряженнайкс, деятельнайкс, кипучайкс. Чехов сьормады тоса лама пяк цебярь произведеният. „Палата № 6“, „Моя жизнь“, „Дом с мезонином“. „Палата № 6“ произведенияса сон няфнесы Рагин провинциальнай докторть, честнай и йоню ломанть, конань пякснесазь сумашедшай кудс аньцек сянкса, што сон йоню и честнай.
В. И. Ленинонь лангс „Палата № 6“ произведениясь тись оцю впечатления:
„Мзярда мон исяк илять аделайне лувомда тя рассказть, — азозе В. И. Ленин эсь сестранцты, — тейнь арась прямо-таки жуткайкс, мон ашень ащев эсь комнатасон, стянь и лисень. Монь ульсь тяфтама ощущениязе, бта и мон пякстафан 6-це № палатава“. (А. И. Ульяновать—Елизаровать лятфнеманзон эзда).
[ 85 ]Мзярда Чеховонь семьяц кармась эряма Мелиховаса, тя имениясь ульсь вельф запущеннай, садсь юмама ланксоль. Чехов брадонзон и сестранц мархта шарфтозь тя садть пяк цебярь, панжи уженянди. Садса работась ульсь инь цебярь ваймамакс Чеховонди. Чехов кельгозе эсь садонц, содальхце тоса эрь уженять, эрь шуфтонять. Сон корхнель ялганзонды: „Вов нят пичетне сядонга цебярьхть ши валгомста, а тя тумоть эряви ваномс шобдаста“. „Сембе чехофнень, — азонкшнесы чеховскяй семьять фкя приятельницац, — ули фкя пяк цебярь свойствасна: синь кулхцондсазь растениятне и панчфне, и сембось, мезе ба синь афольхть озафта, туй цебярьста“.
Нинге Мелиховав йотамдонза инголе, 1891 к., вачашить пингста, конац ульсь Поволжьяса, Чехов работай голодающайхненди общественнай лезксонь организовандамаса. Велетнень ланга фкя якамстонза сон цють изь юма, эрьфтемок кить метелень пингста. 1892—1893 к. к. Мелиховаса Чехов кармась ни заведывать халерать каршес тюремать коряс медицинскяй пунктса, сон лувонды крестьяттненди лекцият эпидемиять каршес тюремать колга, тиенди баракт сярядихненди. Мелиховаса сембе эряфонц пингста Чехов усиленна занимандай общественнай и врачебнай деятелностьса, пчкафни аф аньцек Мелихова велень крестьяттнень, но и перьф ащи велетнень эздонга (тейнза сашендыхть 20—30 вайгяльпе вастста), заботендай китнень цебярьгофтомаснон колга, школань строямать колга. Чехов апак сизьсек ваны царскяй Россияста русскяй крестьянствать эряфонц мельге. Нят ванондоматне арасть материалкс „Мужики“ повестти, конань эса максф нищайгодомань картинац велеть, конань грабсесазь правящай классне. „Чеховда инголе“, — сьормадсь Горькай, — „дворянскяй минь литератураньке кельгозе и лац маштсь няфтемс крестьянть кроткай, терпеливай ломанькс, кати-кодама надземнай „христовай правдати“ келькфокс, конанди аш васта действительностьса. Лия картина максси Чехов. „Мужикнень“ эса и лия эсь рассказонзон эса Чехов няфтезень крестьянинть и велеть эряфонц мезенге апак мазепнек — станя, кода сон ули афкукс... Благодушнай мечтательсь и лириксь юмась, састь Чеховонь дикай, иредста и страшнай „Мужиконза“.
Москуву фкя якаманц пингста Чеховонь кргастонза тусь вер. Кунардонь урмась макссь пря содамс од вийса. Чеховонь пчкафтомс прважазь Франциять югозонза, Ниццав. „Ласковай, трогательнай морясь“, лямбось аф ванцазь сонь родинанц колга тоскавамать эзда, одиночествань чувстватнень эзда. Аф ваномок урмать лангс, Чехов мольфтсы упорнайста работамс од произведениянь лангса. Фкя писателенди, кона якась тейнза Ниццав, сон мярьгсь: „Тячи стакаста сьорматкшневи... Пяк тьождя думандамс, мезе именно сьормадат. Тейнь арам, ляткшни аньцек и переписать. А тяса ни и туй московскяй мостовойсь. Эрь булыжникть ланга тятерьгадат. А кой-коста вдруг, кода рельса ланга, целай страницат!“
Францияса эсь эряфонц пингста Чехов марса знаменитай французскяй писательть Эмиль Золять мархта арси французскяй офицерть (национальностьс коря — еврейть), Дрейфусть аралама, конань лангс васькафнесть монархисттне и контрреволюционерхне. Чехов резко порывает «Од пингть» мархта, Суворинонь «зверинцанц» мархта, станя кода Суворин станяжа ульсь клеветникнень станца.
Францияста самдонза меле врачнень советснон коряс тусь эряма Крыму, Ялтав, коза сон эстейнза тись аф оцю дача, а сонь перьфканза, галош вастс, эсь кядьсонза касфтсь туста, пяк цебярь сад. [ 86 ]«Кулхцондода, — мярьксь Чехов фкя писателенди, — монь пингстон тяса озафтф эрь шуфтонясь и, конешна, мондине тя питни. Но и тявок аф важнай. Вдь тяса жа мондедон инголе ульсь эхень шава васта и нелепай лоткт, сембось кевсоль и чертополохаса. А мон вов сань и тиень тя дачать эзда культурнай, мазы васта...» И коль Чехов тоскавась эсь родинанц колга, мярьгомок Ялтать эзда «ош парикмахер», а Крымть — «чортонь остров». Урмась, одиночествась, маластоннетнень колга тосказь шовсезь эряфонц. Шумбрашиц арсесь кальдявкс и кальдявкс. Но и совсем сяряди Чеховсь мольфтезе работанц. „Художниксь должен, — корхтай сон, — коль работамс, коль думандакшнемс, сяс мес илякс сон не может эрямс“.
Ялтаса Чеховонь эряфонц сембода цебярь вастоц — ялганзонды якамась, синь мархтост васетькшнемась. Сон васетькшнель эсь кельгома писателенц, Лев Толстойть мархта, конац фкя пингоня эрясь Гаспрса. Лама кенердема каннесь тейнза Максим Горькайнди якамац. Мзярда 1902 кизоня Академиясь Максим Горькайнь кочказе эстейнза почетнай членкс, а правительствась Николай II волянц коряс азозень нят кочкаматнень аф действительнайкс, Чехов Короленконь мархта марса демонстративна атказась академиконь званиять эзда. Ялтаса Чехов сьормадсыне эсь мекольдень произведениянзон: «Невеста» рассказть и «Вишневый сад» пьесать. 1904 к. январть 7-це шистонза сон совсем сярядезь присутствует «Вишневый садть» васенце представлениясонза Московскяй художественнай театраса. Пьесась йотась оцю успех мархта. Тя ульсь Чеховти Москуву мекольдень самакс. Врачнень советснон коряс кулсы Чеховть усксазь Германияв Баденвейлер курорту.
— Кулома молян — мярьксь сон прощандамстонза фкя писателенди.
Чехов кулось Баденвейлерса июльть 2-це шинц карша веть. Калмаф Чехов Москуву Новодевичьей монастырень кладбищав.
Чеховонь колга эсь лятфнемасонза Горькай азозе: «Бессильнай ломанень тя скучнай, серай толпать вакска йотась оцю, йоню, семботи внимательнай ломань, варжакстсь сон эсь родинанц нят скучнай эряйнзон лангс и грустнайста пейдезь, ляпе тононь, но крхка упрекса, шамасонза и мяштьсонза безнадежнай тоскаса, красивай, искренняй вайгяльса мярьксь:
«Сквернайста тинь эрятада, господат!»
(примечание редактора вики-библиотеки) Ссылки на произведения, перечисленные в этой статье:
- Запечатленный ангел (Лесков, 1873)
- Степь, повесть, 1888
- Иванов, драма, 1888
- Скучная история, повесть, 1889
- Остров Сахалин, книга, 1891—1894
- Палата № 6, повесть, 1892
- Дом с мезонином, повесть, 1896
- Моя жизнь, повесть, 1896
- Мужики, повесть, 1897
- Невеста, рассказ, 1903
- Вишнёвый сад, пьеса, 1903