Колхозонь эряф/1938/09-10/Захаронь Трофимсь/1

From Wikisource
Jump to navigation Jump to search
Колхозонь эряф (1938), № 9—10 Сентябрь-Октябрь edited by Руськин Ф. С., Пинясов Я. М.
Захаронь Трофимсь, 1-це главась by Чекашкин, Андрей Яковлевич
Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь оргкомитетть органоц. Лисенди кефкиице кизось, ковти весть. — № 9—10 Сентябрь-Октябрь 1938 киза. — с. 30—31
 
[30]
Андрей  ЧЕКАШКИН
 
Захаронь   Трофимсь
(Азкс)

Апрель ковонь ару илядь. Лямбе. Менельсь аш котф серай паргана дуцяса, кода аф азомшка оцю понацамса. Ловсь юмафтозе тялонь тюсенц, сон шонгаргадсь ксялькс. Тундань веттне горнязь, комболдозь шудихть велень ульцятнень кувалма и увназь пяярихть лоткненди, тушендыхть лугав, а тоста Мокша ляи, штоба шудемс сембонди марса фкя киге-янга и марстонь вийса лездомс ломанти.

Трофимсь, кемсисемге кизоса од цьорась, комсомольскяй ячейкань секретарсь Коршуновсь вальмятнень алга сайхть морафтома кудста. Трофимсь тя илядть эса учсесь, кода пяк кельгови инжиень, конань сон ашезе няй лама кизот. Кафта кофт шинек-венек аноклась, штоба лацкас васьфтемс сонь. И вов сон учевсь. Тя илядне Трофимть примазь комсомолу. Мзярда йотась комсомольскяй пуромкссь, морафтома кудста лисемда меле Трофимсь марязе прянц пяк тьождяста.

— Монь радостезе тяни, Федя, — весяласта корхтась сон Коршуновти — монь павазозе аф азомшка конашка! Арьсемане тяни арасть тевкс. Эряфть эзга мон аськолдань кафта од аськолкст. Тяни мон колхозникан, комсомолецан. Ся шись, мзярда монь примамазь колхозу и тя илядсь, мзярда мон арань комсомолецокс, куломозон тейнь аф юкставихть.

— Тя виде, Трофим. Ня кенярдематнень, тя павазть монга маряйне эсь мяштьсон. Сяда тов минь ульхтяма нинге сяда павазуфт, нияге сяда радостнайхть. Тянкса аньцек эряви работамс виень аф ужяльдезь. Минь задачаньке — синдемс кулакть вийнц прокс, машфтомс сонь, кемокстамс колхозть, конац нинге пяк одт пяк лафча. Ну, няемозонк, — Коршуновсь максозе кяденц Трофимти и синь тусть эсь кигаст.

Трофимсь аердсь ялганц эзда и эстакиге ледьсь мялезонза, што тейнза маластонь пингть эряви тиемс фкя ушетф тевонц — коданга корхтамс алянц, штоба сон суваль колхозу. А тя тевть лангса сон работай кунара ни. Сон кярьмодсь тейнза нинге йотай кизонь васень сьоксеть, мзярда сонь сярядемась аерфтозе школаста. Цьорась тонафнесь Н ошень девятилеткаса. Мзярда сон кармась тонафнема сисемце класса, сярядькстсь маштыксса, ялганзон эзда лядсь и сась родной велезонза. Тяса сьоксенда сон яксесь сидеста ульцяв. Сяда меле арась ялгакс Коршуновти и сембе комсомолецненди. Кармась якама морафтома куду. Лездсь избачти пуроптомс драмкружок, коса сон лувондовсь васенце артистокс. Эсь охотасонза сявсь тонафнемс сьормас аф содай кемонь стирьнят и цьоранят, синь мархтост работати сон путнезе сембе вийнц, макссезе тейст сембе содамашинц. Од ломаттне Трофимти тянкса азонкшнесть седиваксстонь спасибат.

Вели седиста ушедсть сашендома уполномоченнайхть. Велеряйнь марстонь пуромксса синь корхнесть кулакть прокс машфтоманц и колхозть касфтоманц и кемокстаманц колга. Вракне нолязь сембе эсь хитростьснон, сембе куйнь кяжснон, штоба тюремс тянь каршес, синь везде тошксесть народть пилес: и церкавса, и кудга, и банява, и базарга. Кулакне и тейст лездыхне яцекшнесть пуромксненди и корхнееть беднякнень и середнякнень пилезост, што корхтайхне тейст пара аф арьсихть, што синь фкя валсновок аш виде, визьксфтома васькафнихть, што [31]уполномоченнайхне синць сядынгольдень баярхт и лама тяфтама подлай васькафнемат. Кой-конатне кулхцонкшнезь кулаконь ня валхнень, кепсесть шум, и пуромкссь сраткшнесь.

Вракне йоразь срафтомс «Большевик» колхозть, конань пуроптоманцты Шаловсь, сире коммунистсь, комсомолецнень мархта, велень беднякнень мархта путсть оцю вий. Трофимсь пяк лездсь тя тевса комсомолецненди, но сяка пингоня виздсь, сяс мес сон нинге аф колхозниколь.

Тя пингста сявомок сон ушедсь алянц корхнема, штоба сон суваль колхозу. Сонь аляц ульсь середняк, кемоста верондась шкайти. Кода корхнесть велеса, сон ульсь васенце шкайнь кельгись. Васенда Трофимсь корхнесь тейнза, кода кевонди. Сон ашезь кулхцонда. Эста Трофимсь ськамонза сувась колхозу. Но тевонц сембе сяка ашезе кадонда. Кудса алянцты морафнесь книгат, газетат, вихца сявондезе морафтома куду. Но аляц сембе сяка содась сонцень. Трофимть седисонза тя ащесь оцю ризфокс, люпштась мяштенц лангс, кода оцю кев. Трофимсь онцтонзовок тюрсь сембе вийсонза, штоба прафтомс лангстонза тя сталмоть. «Архтака корхтак башка эряйть мархта колхозть колга, кда тонцень аляце нинге ашезь корхтав», — арьсесь Трофимсь. — Васендакиге получат отчет: «Архт, цьорай, тядяцень лямонь пидема тонафтт», али «Шуфта эсь кичкоронц аф няйсы», а кда тя аф саты, нинге прибавасазь: «Пракста, цьорай, шамазт лаподеть. Афи визьдят корхтамаценге. Тонь тонцень нинге аньцек фкя пильгце колхозса». Тяда меле хоть кяшк шамацень и ворьгодть тя маластонга.

Но Трофимсь надиясь эсь вийнзон лангс. «Вдь крышаста путняй ведь каплятне мярьголеть йофси вийфтомнят и то пингонь йотазь синь могут пялемс варя калгода кевть пачк, а мон комсомолецан, вийдон лама и обязательна откстоптса алязень прянц», — арьсекшнесь цьорась.