Колхозонь эряф/1937/01/Кевень инжи/2

←Васеньце сценась

Колхозонь эряф (1937), № 1 (36) Январь-Февраль ков edited by Купряшкин Т., Бебан М. А. Кевень инжи. Омбоце сценась by авторсь: Пушкин, Александр Сергеевич, мокшекс ётафтозе: Аф содаф (аноним)

3-це сценась→

Колхозонь эряф (Колхозная жизнь). Мокшень литературно-художественнай и общественно-политическяй журнал. Мокшэрзянь АССР-нь писателень союзть правлениянц органоц. Лисенди кемоньце кизось, кафта ковти весть. — № 1 (36), Январь-Февраль ков 1937 киза. — с. 33—36

Омбоце сценась

КОМНАТА. УЖИН ЛАУРАНЬ ПЯЛЯ.

Васеньце инжись

Пежеть шкай, Лаура, тяда лац
Мзярдонга тон ненгя ашеть налхконд.
Конашкава шарькодить эсь рольцень!

Омбоцесь.

Кода цебярьгофтыть! Вийда мзяроль!

Колмоцесь.

А искусствась конашкаль!

Лаура.

Да, теень
Тячи сафтовсь эрь движениясь, эрь валсь,
Монь тёждяняста фатнесь вдохновениясь,
Валхне шудесть, шудесть, бта шачфнезень
Аф рабонь ёньць, а седись...

Васеньцесь.

Афкукс ста.
Да и тяниеньгя ненгя сельметне
Ашесть лотка пиндолдомда, крфса
Палыхть щёка прятневек, аф ётни
Эсот тонь восторгсь. Лаура, маряк:
Тяфтак кельмомя сонь тяка када;
Морак теенек, Лаура, мезь-мезь,
Морак мезь-мезь.

Лаура

Венептесть гитарать.

(Морай)

Сембе.

Brava! brava! чудна! Киндигя
Тяфтаня аф сафтови, аф сафтови!

Васеньцесь.

Пасиба теть, волшебница, тон минь
Сединекень фатяйть плени. Музыкать
Эряфть наслаждениянзон эзда
Сяськи аньцек кельгемась; но сонга —
Кельгемаськя — вдь мелодия... вов вант:
Сонць Карлос токаф, ризфу инжице.

Омбоцесь

Кодамт вайгяльксне! Мызяра ваймода
Ляки эсост! Валхне кинь, Лаура.

Лаура.

Дон Гуанть.

Дон Карлос.

Мезе? Дон Гуанть?

Лаура.

Да, сёрмадозень синь
Теень кати-мзярда вернай ялгазе,
Монь кельгиезе.

Дон Карлос.

Дон Гуантце тонь
Шкаеньди аф озонды, мерзавец,
А тонць, тонць дурат!

Лаура.

Али лисеть ёньдя?
Да мярьган мон тянёкигя тонь печкфтемс
Слуганень кядьста, хоть испанскяй грандат.

Дон Карлос. (стяй).

Терьдить эста синь.

Васеньцесь

Лаура, лоткак,
Тят кяжия, Дон Карлос, сон юкстазе...

Лаура.

Мезь? Мес поединкаса сонь брадонц
Дон Гуан шавсь честна? аньцек мес аф сонь?

Дон Карлос

Мон глупаян, мес кяжиянь.

Лаура.

Аха!
Тон тонць ни виденьцят, што глупаят.
Эста мирендатама.

Дон Карлос.

Лаура,
Муворан, простиндамак. Но содцак:
Аф кирьдян фкя вастса, тя лемть марямок.

Лаура.

А муворан ли мон, мес эрь минутаста
Сашенды монь кяль прязон тя лемсь?

Инжись

Ну, сянь инкса, мес ни тон аф кяжият,
Морак тага весть, Лаура.

Лаура.

Мекпяльти,
Тума лангс фкя морня. Пингя, ве ни.
Но мезе мля морамс? Маряда. (морай).

Сембе.

О, конашкава парста! Кода лац!

Лаура.

Прощайте ж, господат.

Инжихне.

Прощай, Лаура.

(Лисихть, Лаура лоткафты Дон Карлость)

Лаура.

Тон, пяляскодф, илядт монь пялон, тон
Туть монь мялезон; тон Дон Гуанть
Лятфтать теень, мзярда сюцеть эсон
И мчкорфтоть мянь пейхнень.

Дон Карлос.

Павазусь!
Тон, маряк, кельгить сонь?

(Лаура люкштяди прянц).

И пяк?

Лаура.

Да, пяк.

Дон Карлос.

И кельксак тяниеньга?

Лаура.

Тя минутать?
Аф, аф келькса. Кельгомс кафтсь аш кода.
Тяни кельган тонь.

Дон Карлос.

А азк, Лаура,
Мзяра ули кизот теть?

Лаура.

Кемгафксува.

Дон Карлос.

Тон одат ненгя и улят та од
Вете, кота кизот. И тонь перьфкат
Кота кизошка синь кармайть шарома,
Тонь кельгеньдезь и казнень казеньдезь;
Вень серенадасонга мяльцень касфтсазь
И ки рашкнень лангса инксот кармайть
Фкя-фкянь шавондома веть. Но мзярда
Етай пингсь, но мзярда ваяйхть лотке
Сельметне, и срмосефста равчкодыхть
Сельме шурькне, да и шаржу шяярсь
Пиндолгоды касацень тонь эса,
И кармайхть мяргемя теть сире баба,
Эста — мезь мля тон азат?

Лаура.

Эста?
Мезенди тянь колга арьсемс? Мезень
Кортама? Иль мяльхне голь тонь тяфтамот?
Сак вов се и панчк балконть. Вант, менельсь
Кода сетьме! Лямбя кожфсь аф шерьки
Лаврань и лимононь шинец веть.
Шобда тустть и сенемть эса пиндолф
Еряй ковсь, и сторожтне ивадьчнихть,
Кувакаста валснон тарксезь: валда!
А север шире ичкозе Парижса —
Пади ваденьдезь дуцятне менельть,
Пади моли кельме пизем и уфай
Айра вармась. — Аньцек минь мезь тевнеськ?
Кулцендт, Карлос, маряк: мон теть мярьган
Мызылгодомс... Мезь мля!

Дон Карлос.

Ах, Демон!

(Калтыихть кенкшть.)

Дон Гуан.

Гей! Лаура!

Лаура.

Кия тоса? Кинь ся
Стама вайгяльсь?

Дон Гуан.

Панчк...

Лаура.

Вай, шкайняй, сон тя,
Маряк сон

(Панжи кенкшнень, сувай Дон Гуан).

Дон Гуан.

Шумбранят...

Лаура.

Дон Гуан!

Дон Карлос.

Кода! Дон Гуан!..

(Лаура ашкордай Дон Гуанонь кргас).

Дон Гуан.

Лаура, ялганяй! (паласы).
Кия пялот тонь, Лауразе?

Дон Карлос.

Тя — мон,
Дон Карлос.

Дон Гуан.

Апак учсек васьфтема!
Ванды анокан мон тонь услугазт.

Дон Карлос.

Аф! Тячекигя — тянек.

Лаура.

Дон Карлос,
Лоткада! Вдь тинь аф ушсотада —
Тинь монь пялон —

Дон Карлос

Мон учан. Ну, мезь мля?
Шпагаце вдь кясксот.

Дон Гуан.

Кда аф кирьдят —
Мон анокан.

(Тюрихть).

Лаура.

Вай, Дон Гуан! Гуан!

Лаура ердай пря вастонц лангс. Дон Карлос
прай).

Дон Гуан.

Стяк, Лаура, сембе ни.

Лаура.

Мезь тоса?
Шавф? Пяк пара! Комнатасон аньцек!
Мезь тиемс теене, повеса, дьявол?
Коза ёрдаса сонь тяни?

Дон Гуан.

Пади
Шиса ненгя сон (Ванонды телать).

Лаура.

Да, шиса. Кадсак
Тон, проклятайсь, живста — сялгить седис,
А аф вакска повоть. Версь аф шуди ни
Колмужеса ранать эзда. Афи
Таргси ваймя — кода, а?

Дон Гуан.

Мезь тиемс
Сон сонць тянь ерась.

Лаура.

Ах ни, Дон Гуан!
Досадна, афкукс. Пефтемя проказат
И голь аф муворат... А коста тон?
Кнара ль тясат?

Дон Гуан.

Аньцек ненгя сань
И тявек салаваня, апак няйхть:
Монь вдь ненгя ашемазь простинда...

Лаура.

Эстакигя лятфтать эсь Лаурацень?
Эрь мезьсь цебярь — цебярь. Аньцек мон
Аф верондан. Тон, улема, случайна
Тияня молеть, да и няить кудть.

Дон Гуан.

Аф, аф, Лауразе: хоть кизефнек
Лепореллоть. Эрян мон ошть фтала,
Проклятай вентаса. Мадриту сань
Лаурань вешеньдемя.

(Паласы).

Лаура.

Ялганяй!..
Норавака!.. Кулоть пингста! Мезь шта
Тиеньдемс миньдеенек сонь мартонза?

Дон Гуан.

Кадык тязк — а валдашкадом шовор
Мон сонь кандса епанчеять алу
И путса ки рашка пряв.

Лаура.

Аньцек
Вант тон лацкас — афоледязь няй.
Конашкава цебярьста тон тиеть,
Мес сать теень фкя минутта позна!
Пялон ужнасть ялгатне — и аньцек
Кенерьсть лисемс. Ва кда тон сатолить!

Дон Гуан.

Лаура, и кнара тон сонь кельксак?

Лаура.

Кинь? Тон ёжефтома кортат, няйса.

Дон Гуан

А виденьцяк: мзярксть монь полафнеть
Ся пингть эзда, кода ашень уленьдь?

Лаура.

А тонць, повеса?

Дон Гуан.

Азк... Аф, сяда меле
Кортатама лучи тянь кувалма!