Колхозонь эряф/1936/01/Критик-революционер

From Wikisource
Jump to navigation Jump to search
Колхозонь эряф (1936), № 1 (31) Январь-Февраль ков edited by Купряшкин Т., Бебан М. А.
Критик-революционер
Колхозонь эряф (Колхозная жизнь). Мокшень литературно-художественнай и общественно-политическай журнал. Мокшэрзянь АССР-нь писателень союзть правлениянц органоц. Лисеньди вейхксоце кизось, кафта ковти весть. — № 1 (31) Январь-Февраль ков, 1936 киза. — с. (9)11—12
 
[9]
Колхозонь эряф 1936-01 013стр изобр1.jpg
 
Н.   А.   ДОБРОЛЮБОВ.
 
[11]

Критик-революционер

“О, кода сон кельгоньзя тонь, народ! Тоньдеть ашезь пачкодьчня сонь валоц, но мзярда тон улят стамкс, кодамкс тонь йоранзя няемс, тои содасак, кода лама тонь иньсот тись тя гениальнай юно шась, тонь цератнень эзда инь цебярь церась“
Н.   Г.   Чернышевский.

Великай рузонь критиксь Николай Александрович Добролюбов шачсь николаевскай реакциянь инь свирепай кизотьнень, шачсь сон Нижняй—Новгородса, тяниень Горькайса, 1836 кизоня, февральт 5-це шистонза. Васенда тонафнесь кудса, сальдя духовнай училищаса и семинарияса.

1853 кизоня, сексенда, семинариять апак аделак, Добролюбов тусь тядянзон—алянзон кучемаснон коряс Петербургскай духовнай академияв, но тянь вастс кармась тонафнемя Главнай педагогическай институтонь историко-филологическай факультетса.

1857 кизоть кучка пингстонза Добролюбов кармась содама Чернышевскяень мархта. Арась „Современник“ журналса сотрудникокс, а 1857 кизонь сексенда, институтть пяк лац аделамдонза меле, сон арась „Современникса“ редакторкс. Добролюбовсь кассь ся пингоня, мзярда дворянско-крепостническай хозяйствать эса ульсь кризис, мзярда крестьянскай восстаниятьне помещиктнень каршес кассть эрь кизоня, мзярда крепостной правать и сонь лангсонза ащи сембе политическай системать афсправедливостьснон квалмова представлениясь кармосесь ни шачендома и касондома ся пингонь мыслящай ломатьтнень йоткса. Добролюбов од пингстакигя марязе тя афсправедливостть и ашезе кельге перьфканза ащи действительностть.

Статьясонза “Мзярда же сай настоящай шись?“ Добролюбов азонды: „сембе, мезь мон няеньдень, сембесь, мезь мон куленьдень, касфнесь монь эсон недовольствань мяль, монь душасон рана кармась кзмолдома кизефкс: да мес же сембе тяфтаня няихть нужат, тьряй аш средства тя нужати, кона, кода няеви, сембень машфтсь ежеда?“

Добролюбов куломозонза ашезе кадонда надьяманц сянь квалма, што сай же, мекпяли, настоящай шись, ся шись мзярда трудяй ломаттне улихть нолдафт воляв политическай гнетть и экономическай эксплоатациять алда, што сонь мархтонза пяк кельгови родной мастороц шарфтови реакциянь оплотть эзда политическай свободань и социализмань масторкс.

Мзярда Добролюбов арьсесь оцязоронь Россияса угнетеннай и павазфтома катф ломаттнень ингольпяльдень валда эряфснон кслга, сон арьсесь аф аньцек политическай воля шис нолдамать квалмова, но и обществать социалистическай тиеманц квалмова.

“Тяни пиндолдчни од ши. Грядущай поколениясь учи аф казьнефтемя принужденнай труд, а свободнай жив деятельность“.

Добролюбов, кода критик-революционер, зсь прянь афужяльди борец, тюрьсь сянь инкса, штоба шарфтомс литературать общественнай освобождениянь [12]вийкс, трудяй ломаттненьди лездыкс синь тюремасост ингольпяльдень валда эряфснон инкса.

Добролюбов марса Чернышевскай мархта ащесь инголя моликс йотай веконь кодгемоньце кизотьнень пинкста „йофси афлама революционерхнень-йоткса“ (Ленин). Сон ульсь борецокс, „будущай бурянь од штурманкс,“ кона маштсь ся пингонь российскай действительностень аф кенерьф условиятьнень пингста сатомс последовательнай революционнай демократонь позиция

Добролюбов, Ленинонь валонц коряс, „питни сембе образованнай и мыслящай Россияти“, питни кода „писатель, кона страстнайста ашезе кельгя произволть и страстнайста учсь народнай восстаният „потмаширень туркатьнень“ каршес — самодержавнай правительствать каршес“ (т. IV, стр. 346).

Кодкеменьце кизотьне — фкя инь примечательнай десятилетия Россиять йотай пингонь историясонза. Крымскай войнаса фталу илядф Росиять поражениянц, сембе сяда вишкста касы крестьянскай бунттне тиезь няевиксоньди крепостной порядкать кальдяв шинц. Машфтомс крепостной порядкась можналь кафта кигя. Либералхне ащесть монархиять и дворянствать мархта согласиндамать инкса, касы капитализмать нужданзонды крепостной манархиять валомня приспособлениянц инкса, мезьсь ульсь помещикнень и капиталисттнень мялезост. Добролюбов и Чернышевский, кода ся пингонь оцю деятельхть, ащесть крестьяттнень интересса крепостной стройть и монархиять революционнайста машфтомаснон инкса.

Тя кить лангса синь ёрасть тиемс Россиять свободнай и благоденствующай масторкс, тя кить лангса синь тюрьсть достойнай условиятьнень инкса сембе народтнень эряфса, конат эрясть империяса, кона ульсь „народонь тюрьмакс“.

Добролюбов ульсь социалист—утопист. Сон ашезь няй, ды и ашезь машта няемс ся пингонь историческай условиятнень пингста, „што анцьек капитализмать и пролетариатть касомасна машты тиемя материальнай условият и общественнай вий социализмать осуществлениянц инкса“ (Ленин). Сон ашезь машта кеподемя деалектическай материализмать теоретическай серезонза.

Но Добролюбов сатозень Россияса эсь пингонь политическай, философскай и литературнай мыслянь теганятьнень. [1]

Демократсь и социалистсь, Добролюбов формулировал эсь идеалонц, эсь мяленц простой валса: „штоба сембеньди улель цебярь“. Но Добролюбовть сембеньди цебярь эряфонь арсемац ниньге кирьдсь утопическай характер. А пролетариатть революционнай тюремац угнетеннай человечествать воляс нолдаманц инкса нежедьчни закономерносттнень лангс, конат няфтьфт марксизмать—ленинизмать мархта. Рабочай классь, эсь прянц воляс нолдамста, вийхцок эсь мархтонза нолдай воляс и сембе угнетеннайхнень и эксплоатируемайхнень. Тянь ниньге Добролюбов ашезе содце.

Добролюбов ашезень сода историческай развитиянь законттнень, ашезе сода, кодама кигя сатневи человечествать воляс нолдама шиц. Великай рузонь критиксь—революционерсь, Добролюбов кулось рана, 1861 кизоне. Сон эрясь аньцек 25 кизот. Ся пингоня Петербургса якай кулятьнень коряс аньцек кальдяв шумбра шиц Добролюбовть аралазе Петропавловскай крепости озафтомда. Сонь куломасонза муворкс ащесть оцязоронь Россияса революционнай писательть работань пяк кальдяв и стака условиянза.

Сянь, мезть инкса тюрьсь Добролюбов, тиезе рабочай классь эсь гениальнай вождензон руководстваснон велде. Пролетарскай революциять виенц мархта, Ленинонь и Сталинонь руководстваснон вельде, мядондаф самодержавнай монархиясь и капиталистическай порядоксь минь странасонок.

Советскай народсь мяляфтсыня и лятфнесыня борецнень, конат имасть человечествать цебярь будущаенц инкса тюремста. Сон мяляфтсы Добролюбовть, крепосничествать и самодержавиять каршес тюри борецть.


  1. Теганятьнень — вершинатнень.