Колхозонь эряф/1936/01/Ашесть сяськя/9

From Wikisource
Jump to navigation Jump to search
Колхозонь эряф (1936), № 1 (31) Январь-Февраль ков edited by Купряшкин Т., Бебан М. А.
Ашесть сяськя. IX-це главась by Чекашкин, Андрей Яковлевич
Колхозонь эряф (Колхозная жизнь). Мокшень литературно-художественнай и общественно-политическай журнал. Мокшэрзянь АССР-нь писателень союзть правлениянц органоц. Лисеньди вейхксоце кизось, кафта ковти весть. — № 1 (31) Январь-Февраль ков, 1936 киза. — с. 97—98
 
[97]

IX.

Видеста ванць тундань шись паксяса абедай колхозникнень ланкс. Пркснесть крандаснень эзга сотнекшнеф тишеда рямштии алашатьне. Синь цингорфтсть овозснон ярхцама йоткова и яфиесть кафцьке шири пулоснон эса, хуть и паксяса ниньге пуроптка ашельхть.

Ваномакс пиндолтсть шить каршеса плукнень польцясна. Ширеста ванозь инжань котфокс ащесть сокафть ланкса кшнинь инзаматне, аф ичкозе няевсь сенем лопав вирьсь. Колхозникне, конац озада, конац плманжа ланкса кядьгаст куцювонь кирьнезь, учсть ям. Вдруг марявсь ружьяа ляцема вайгяль. Крандазть ваксста фкя алашась прась мастору и шавсь модати прянц и пильгонзон эса.

Ляцендема вайгяльхне ушедсть кайгома сяда сидеста. Колхозникне эрязста ласнезь алашатнень и тусть шанчк ардозь веле шири. Вяшксть синь йотковаст пулятьне конатьнень кучсезь мельгаст кафта ломатть, нят ульсть Вирьгинтть мархта Розгинць Синь пяк оцю кяж кирьдевсть „Энгельс“ колхозт лангс и сембе виеньлихтезь шорьсеть теенза.

Лама колхозникт и милициянь сотрудникт шинек-венек учсеть Розгинтть и Вирьгинтть эса тинкнень, вирьхнень и лотка прятьнень эзга, но синь ашесть кундсев.

Весть, ветешка милиционер ардсть ластя паксява оцю вирьшири Розгинтть и Вирьгинтть мельгя. Ушедсть сатнемост... йоткозост илядсть аньцек кафта сятт метрашка. Розгинтть мархта Вирьгинць велясть пекекедь ланкс и ушедсть винтовкаснон эзда ляцендема. Нонат курок комотьнесть алашатнень ланкста мастору и только мадонцть, эстакиге алашатьневок вельсесть азорснон ваксс.

Лоткась ляценьдема вайгялсь, бандиттне стясть вастстост и тусть танга ласькозь, гайнязевсь танга мельгаст милиционерхнень ружьясна, а синь ласьксть комотьнезь кафта шири, штоба афольхть пов ляценьдихненьди. Милиционерхне танга тусть ардозь мельгаст. Нонат лоткасть и стяда ушедсть ляцендема ластятьнень ланкс. Ардома йоткова фкя милиционерть алашац пульзясь мастору бандиттнень пуляснон эзда и эстакиге ушедсь бокстонза бульняма якстере вярсь. Илядыхне курок матнезь алашаснон сокафть ланкс и ушедсть танга мельгаст ляценьдема, но синь ласькома ёткова ашесть сав и курок сувасть вири, конац арсесь теест ваймонь идикс. Уйсть менельса серай дуцятьне. Синь кяшендезь эшксозост тундань шинять и лиенцть сильфсна „Энгельс“ колхозть правлениянц ингольде пиже нарнять ланга. Панжада вальмава уфась правленияв сетьме варманясь, сюдерясь шрать ваксста ащи Василенкать круглай шаманц и акша вельде аши пиндолды шяярензон. Тя ульсь районнай Уголрозыскть начальникоц. Сонь кядец эрекста якафтозе ручкать каготть ланга: тяштсь калонь кундайхнень азондомаснон Розгинтть и Вирьгинтть колга.

Цяподсь кенкшсь — правленияв сувасть Зойновсь, Микитась и милиционер, Коробкинць.

— Василенко ялгась! — эрязста пшкядс Коробкинць, — корхтайхть, што синь кудсот. Вирьгинтт кудботмарсонза марявсть морама вайгяльхть, наверна иредстот. —

— Куроконя! падельхнень пегя! — макссь-команда Василенкась и эрязста нилицькеь лиссть правленияста.

— Коробкинць сувай пирьфи, — корхтась молема ёткова началниксь, — Микитась мархтон сувай куду, а Зойновсь иляды кудынгели.

Пачкодсть Вирьгинтть кудонц малас. Кудбокса ащесь озада Вирьгинтть сестрац и кодак няезень сайхнень, эстакиге сувась куду.

Сембе ульсть вастоваст.

— Коса патяце? — кизефтезе Микитась стирьть, конац ащесь стяда лавцяти [98]кярьмотьфста. Тона отвечась, што аф содасы и сон кудуга йофси аф сашенды.

— А кудботмара кие? — кизефтезе Василенкась.

Стирьсь эсткиге лиссь кудынгели и оцю вайгяльса аварьгадсь, Василенкось шарьхкодьсь. Василенко лиссь кудинголи, варжакстсь кудботмару, кода вдруг марявсь ляцема вайгяль. Василенкась лиссь тятярьдезь кудынгельде ульця шири, прась мастору.

Вирьгинтть мархта Розгинць комотьсь кудботмарста кяпя, картузфтома и тусть пирьфть пачк ласькозь. Коробкинць ляцсь лангозост — конацка ашезь сав. Лиссь мельгаст падели, нонат ласьксть модамарь нетькснень потмова. Зойновсь банять ваксса ляцсь кафксть наганца лангозост, но танга конацка ашезь пов Бандиттне ласьксть и ласьксть, Коробкинць целясь лангозост. — Розгинць фатясь кяржи бокозонза и прафтозе обрезонц. Вирьгусь ласьксь вете саженьшка инголи. Мрдась, фатязе Розгинтть обрезонц и кода борзай пине тусь меки ласькозь эрьхке берягова вирьть шири. Коробкинць ласьксь мельганза эрькть тона пес, лоткась фкя вастс — ляцьсь ветешкаксть мельганза. Вирьгусь кяшевсь вири.

Розгинць, кода илиса эрьхтьф ватракш, венепнезень пильгензон-кядензон. Мекпяли шарсь пеконц ланкс, тонгозе няренц модати. Вельксозонза пуромсь народ и сюцесть ловажанц вельксса киньди кода сафтовсь и кие кода маштсь

Кафтошка недьляда меле вели пачфтьсть куля Вирьгинтть кундаманц квалмова.

1935 к.