Колхозонь эряф/1933/02/Тядясь

From Wikisource
Jump to navigation Jump to search
Колхозонь эряф (1933), 2 (46) № январь edited by Шестов Н. С., Порватов Т. М.
Тядясь by
авторсь: Максим Горький, мокшекс ётафтозе: Черапкин, Иосиф Григорьевич
Колхозонь эряф (Колхозная жизнь). Мокшонь литературно-художественнай журнал. Нолдаец ВКП(б)-нь обкомсь, облисполкомсь и облпрофсовець. Лисенди ковти кафксть. — 2 (46) № январь, 1933 к. — с. 9—16
[9]
М.Горький.

Колхозонь эряф 1933-02 11стр изобр1.jpg
„Мать“ романць,
Мокшокс йотафтозе И. Г. Черапкинць.

(Ушотксонц ванк 1 це номерста).

Кафта неделяшкань йотамок алянц куломада меле, недляшиста. Павел Власов сась куду пек ирецта пупорякшнезь, сон яцесь эзембряв ды эрьхтезе, шрать клокса, кода тиеньделезе сень аляц, иваць тядянцты:

— Ужанамс!

Тядяц нажець теенза, озась ваксозонза ды кельгомга кундазе, путолексолезе сияк мяштенц ланкс цьоранц прянц. А цьорась, кяденза мархта тядянц лафтус нажетькшнезь изь макссе пря, соньць иватькшнесь:

— Тядяй, — эрязда!..

— Дурачокат тон! — лажназь ды (весяланяста) мярьксь тядяц, сонь упрямкснеманц сяськомста.

— Таргамонга карман! Тук тейне алязень пипканц!.. — афкулхцонды кялень шарфнезь стакаста моторць Павел. Сон ирець нинге васенда. Винась нулакс тиезе ронгонц, но ашезе машфта прявиенц, и пряпотмосонза вачкась кизефкс:

— Ирецтан? ирецтан?..

Визделгофнезе сонь тядянц кельгозь корхтамац, токсезе седиенц тядянц сельмоста лажнамась. Аварьдемац саль, и, штоба аф аварьгодомс, сон няфтелексоль пря сядонга пек ирецтокс.

А тядяц сюдерязень кяденц мархта сонь ливозю, тапаряф шяерензон ды сетьмоняста корхнесь:

— Афоль эряв те теть...

Сась церать уксондемац. Потмонь сяземшка уксонкшнемада меле тядяц матозе вастти, вельхтязе лофтана конянц начка пряруцяса. Перась сяда кетавгоць, но сембе алдонзотне ды перьфканзотне волна лаца качандасть, сталгоцть селме кунонза ды, куркстонза маряви сяпи, афпара шине, сон ванць сельме понанзон пачк тядянц оцю шаманц ланкс ды афмеляфтомга арьсесь:

— Ванца афоль эряв нинге тейне, — рана нинге. Лиятне симихть и — теест ашмезевок, а мон уксонкшнян...

Коста бди фширеста марявсь тядянц сетьме вайгелец:

— Кодама тряй улят тейне, симоньдеме ушедоньдерят...

Тангоцта сельмонзон кончамок, сон мярьксь:

— Сембе симихть...

Тядяц стакаста куфксць. Цьорать видецоль Сон соньцьке содалезе, што кабакта башка ломатьтненьди аш коста савомс радость. Но сяко жа мярьксь:

— А тон тят симе! Тонь инксот, мзяра эрявсь, аляце симсь Моньге сон сатомшка муцямань, хоть тон ни ужяльделить тядяцень, а?

Лажназь азонтф сетьме валхнень кулхцондомста, Павелонь мяльс ляденьць, што алянц живпинкста тядяц афоль приметнев куца, афоль корхне и прокс эряль пелезь пикссемань учемаса. Алянц мархта васеть-кшнемада ворготькшнемати, мельдень пинкнень сон шуроста ащекшнесь куца, аерць тядядонза и тени, иретьфонь йотамбачк, ванць сельмонь аф чпорязь тядянц ланкс

Тядяц ломанць сериель, афламда сутулай, ронгоц сонь, ламос работакшнемати ды мирьдень пикссемати муцявсь, якаль-шашнель апак маряк, и [10]кода-бди боком-вельде, пта пельсь сон прокс мезевок афоль тока Кели, покаряв шамац, сьормавсь киняса и пта таргозьф, валдопневоль равжа, прокс пели-лажнай сельмоса, кода ламонц куроняса эряй аватьненге. Види сельмеширьхксонц вельхксса няевсь крхка ки, се малость кеподелезе сельмеширьхконц вяри, сяс няевсь, пта види пилецка сонь кяржида вере, те шамаваржафксонц няфтелезе стане бта сон прокс пелембачк кулхцонкшни. Туста, равжа шяернзон йоткса вандолцть шаржу усмот. Марнек сон ляполь, лажназь ащнель, покорнаель...

И щекаванза сонь валомне шудесть сельмоветть.

— Тят аварьде! — сетьменяста эняльгоць цьорац. — Кантт тейне симомс.

— Мон теть эй мархта ведь кандан...

Но коста тядясь мрдась, цьорась матодовсь-ни. Сон афламос ащесь велькссонза, карьхкясь трнаць кяцонза, и эйсь сетьмоста тостиес жестьти. Карьхкять шра ланкс путозе, соньць афкаштордозь пльзясь шкайхнень инголи. Вальме сельмонятненьди шавсть ирецтонь вайгяльхть. Шобдаса ды сьоксень вармань леткса пжьнась гармоциясь, кие бди пяшкодозь морась, кие бди афпара валса сялонць, тревожнайста марявсть аватьнень кяжи ды сизоф вайгяльсна...

Власофнень йолма куднясост эрямась кармась молеме сяда сетьмоста и покойнайста, ингольденьнеть коряс и афламода илякс, марнек куроняса эрямать коряс. Куцна ащесь куронять песа, щяй маласа афсери, но крута беряк трваса. Кутть колмоцекс талеканц зайнесезе кухнясь, ды соньцтонза перяф шуване перяфкаса, йолма комнаткась, конань эса утцекшнель тядясь. Иляды кафта — талекатне — фке кувалмоса, фке келеса комната кафта вальме мархта. Фке ужесонза сонь — Павелонь краватец, ингольденьнеса — шра ды кафта эзепть. Афлама стул, щчамань — акшень прнамс комод, ланксонза афоцю ванома, одежа мархта арьзе, стенаса частт ды кафта шкайнят ужеса, — вов и сембот.

Павел добувазень сембонь, мезе эряви од ломаненьди: рамась гармонье, крахмалендаф меште панар, сельмос пови галстук, галошат, мандоне и арась стамкс, кодапт сембе сонь кизосонза вери касыксне. Яксель вечеринкас, тонаць кадриль ды полька кштиматьненьди, празник шитьнень куду сашенкшнель симфста и прокс арьсекшнель винада симмати. Шобдава сярятькшнель пряц, шапам порезе седиенц, шамац лофтаналь, скучнаель.

Весть тядяц кизефтезе:

— Ну, кодане исяк теть весялаль?

Сон отвечась прянь нолдазь кяжень—бачк:

— Тоска зеленай! Мон лучи ульмоса калонь кундама карман якама, или — раман ружье эсьтине.

Работакшнесь цьорась видемяльс, прогулфтома, штраффтома, афкорхтафкшуволь, и сеньшт моли, оцю, кода тядянц, сонь сельмонза ванольхть аф довольнайста. Эзь рама сон эсьтиенза ружья, ашезь карма ульмоса калонь кунцемонге, но няевсь, што кармась аеркшнеме сембонь тапаф кистост: шуроста кармась вечеринкас якама и, хотя, праздник иоткть, коза—бди тушендоль, но куду меки сашендоль кятавста. Тядяц, пек ванць мельганза, няезе, што тюжелхт-моли шамац цьоранц арси сяда оржаста, сельмонза кармосихть ванома сяда йонюста, трванзовок пурнавсть, пта кяжиста. Фширеста няемс, пта сон кяжи мезь-мезь ланкс или урма седиенц ризнафцы. Васенда нинге сувсельхть теена ялганза, тени, куцта сонь апак сашентт, лоткасть синь пря няфнемда. Тядяти пароль ваномс, што сонь церац аф похожайкс арси фабричнай од ломатьтнень шири, но кодак сон приметазе, што сон коза бди ворготькшни—тушенды эряфть шобда шудерксстонза фшири, те кармась седиезонза афсодама педема кандома.

— Тон пади афшумбрат, Павлуша? — кизефнелезе иляста тядясь.

— Аф, мон шумбран! — отвечакшнель сон.

— Пек—ни осалат! — куфкстозь мярьгоньдель тядясь.

Кармась сон каньнеме куду книгат и лувондолезень стане, штоба афолезь няй, а лувомок, коза бди кяшенькшнезень. Иляста сон книгаста мезе-бди серматкшнель башка каготкас и сяньге кяшелезе...

Фкефкень мархта синь кржа корхнелгхть н шуроста фкефкень [11]няенькшнесть. Шобдава сон апак корхтак симоньдель чайде и тушендоль работама, шинькучкать сашендоль обедама, шрать ваксса фкефкень мархта корхнельхть афпек эряви валса, и тага сон юмсель мек иляц. А илять лац шталезе шаманц, ужаналь и сяда меле ламос морафнелезень эсь книганзон. Праздник шитьнень тушендоль шобдавакиге, сашендоль веть позна. Тядясь содалезе, што сон якай ошу, уленьди тоса театраса, но теенза ошоста кивок афоль сашенкшне. Тядяти арам няевсь, што ков сяда лама эряхть цьорац сяда кржа, кармоси корхтамати, сонь приметнелезе, што иляста иляста азондоль кодама-бди теенза афшарьхкодеви валхт, а тонатф грубай и афпара валхне — юмсихть сонь корхтамастонза. Эрямазонза эвондась лама стама мелочь, конат приметнемс сашендовсть тядяти: кадозе цьорась щогальгофнеманц, кармась сяда пек заботендама ронгонь—телань ды одежань чистотать кувалма, якама, кармась сяда тьожьденяста, ловкайста и, няемге арсель сяда нростойста, лепста, а нень вельде кепеель тядянцты афсодамань седи ризф. Теензонга, тядянц мархта эрямаса эвондась мезе бди од: сон кармась иляст-иляста куд кияксть тееньдеме, праздник шитьнень соньць вастонц урядакшнелезе и прокс сяконь ваноль, кода ба тьождялгофтомс тядянц тевонц. Кивок куроняса стане афоль тиенде

Весть сон канць и стенати повфтась картина — эсонза колма ломатть, фкефкень мархта корхтахть, коза бди молихть тьождяняста ды эрекста.

— Те живолготф Христозсь моли Эммаж ошу! — азондозе Павел. Тядять мяльс тусь картинась, но сияк сон арьсесь:

— Христозть почитаешь, а церькаву аф якат...

Ков ши сяда лама пуромкшнель книгада полкать ланкс, конань цебярьета тиезе Павелоньди столяр ялгац. Комнатась пара ваномс ульсь.

Церась тядяннцты мярьгоме кармась „Вы“ и лемнелезе „мамаша“, но иляста, вдрук, кармосель ладняс теенза корхтама:

— Тон, тядяй, пожалоста тят пичедь, мон поздна куду саян ... — Тядять мяльс те тушенць, сонь валстонза марявсь теенза мезе-бди кеме и серьезнай.

Но седи ризфоц кассь. Эрямок-ащемок се ризфсь афоль ара содавикс, и се кськорязе седиенц сядонга пек мезень-бди афсодафонь учемаса. Иляста тядять седис прашенць цьоранц ланкс кежияма, сон арьсекшнель:

— Сембе ломатьтне, кода ломатть, а сон — кода манах пек—ни строгай. Аф кизос коре те...

Иляста арьсекшноль:

— Можеть, сонь кодамовок стирь мархта бралги.

Но стирь мархта якамась ярмакт анай, а сон максселезе теенза почти марнек работам питненц.

Тяфта йотнесть неделят, кофт, и апак няйхть йотась афкорхтафкшу, аф шарьхкодеви эрямань кафта кизонь эряма, седи ризфу афшарькодеви арьсемада ды пелемада пешксе пинкт. А пелемась ды седи ризфсь таки касолхть.

IV.

Фке пинкть, ужанамда меле, Павел нолдазе вальмять ланкс занавескать, озась уженяс, а вельксозонза повфтась жестень лампа. Тядяц штазень-нардазень посудатнень, лиссь кухняста ды састоне нажець теенза. Павел кеподезе прянц ды, пта кизефтезь варжаксць сон шамазонза.

— Стак мон, Паша, стак цьорай! — эрязда мярьксь сон ды тусь, а соньць пта визьдезь тарфгозень сельме кунонзон. Но, кухняса аф ламос ащесь фке васца, думандазь ды заботендазь, тазаняста штазень кядензон и тага мольсь цьоранцты.

— Мялезе тонь кизефтемс, — сетьмоняста пшкяц сон, — мезе тон прокс луват морафтат?

Сон сьолгозе книганц.

— Тон — озак, тядяй...

Тядяц стакаста озась ваксозонза, видептезе копоренц, аноклазе прянц кулхцондома, кармась учеме мезе-бди эрявикс.

Лангозонза апак ватт, мес-бди пек тангоцта валонь азондозь пцтай салаване Павел корхтазевсь:

— Мон лувондан запрещеннай книгат. Синь лувомдост аф мярьгихть сяс, мес синь ведеть азонцазь минь, робочаень эряманеконь ланга... Не книгатнень вачкотькшнесазь салава, афняемге, а муньдерясазь синь монь кяцтон — пякстасамазь тюрьмав, — тюрьмав [12]сянкса, мес монь мялезе видеть содамс. Шарькодеть?

Тядять аф таргави ваймоц. Сельмонь келептезь кармась сон и цьоранц ланкс ванома, няевсь теенза сон чужойкс. Сонь лияль-вайгелец, сяда эчколь, кемоль и кайгиель. Сон тозерязень суронзон мархта пухокс ащи усанянзон и афшархкодевикс, сельмалга ванц коза-бди ужети. Тядяти ужелькс арась цьорац и страшналь сонь инксонза.

— Мес стане-ина тиеньдят, Паша? — пшкядевсь сон.

Сон кеподезе прянц варжаксць тядянц ланкс ды сетьмоняста, афэрязта мярьксь:

— Содамс мялезе правдать.

Вайгелец марявсь сетьмоняста, но валонза азфтольхть тангоцта, сельмонза нижес пиньделцть. Тядясь седиенц мархта шарьхкодезе, што цьорац путозе эсь прянц кодама-бди страшнай, салавань тевс. Сембе, мезе няенц эрямаста шарьхкотькшневсть теенза стане и эрявикс, сон тонаць апак арьсек кулхцонкшнеме и тенинге аньцек сетьмоняста аварьгоць, сяс мес ашесть мушендов валхт горяса ды таскаса лупштаф седисонза.

— Тят аварьде! — сетьмоняста пара мяльса корхтась теенза Павел, а теенза арам сон пращай мархтонза.

— Арьсеке кодама эряфса минь эрятама? Теть вага нильгемонь киза, — а тон рази эрять? Алязе пиксселензе, — мон тени шарьхкодине мес, — сон тонь бокнень ланкста кяженц—горянц ардоль — эсь эряманц: сон лупшталезе сонь, а алезе афолезе шарьхкодь коста сай се осалсь. Работась сон колмогемонь киза ушоць работа эста, коста марнек фабрикась тельгоньдель кафта корпусс, а тени синь эздост — сисем.

Тядясь кульхцондозе сонь пелезь и жаднайста. Цьоранц сельмонза палсть пинделцть и латтольхть ваномс; нажедезэ мящтенц шрати, стане сон малав шашц теенза ды корхтась видеста сельмоведю шамазонза, корхтазе видеть ланга эсь васень корхтаманц эсь шарьхкотьф правданц колга. Од ломанень пара мяльса ды учениконь содамань няфтема лаца, конац видемяльс верондай не содаматненьди, сон корхтась сень ланга, — мезе пек лац няевсь — содавсь теенз, — корхтась аф сяшкава тядянцти, конашкава сянкса, штоба эсь прянц проверяндамать инкс. Иляст—иляста сон лотксель, валхт афольхть мув, и эста няелезе ингольденза лажнай—палы шамать, конань ланкса вандолцть селмовеца вельтяф, паронь арьси сельмоть. Теенза ужелькс арсель тядяц, сон тага кармосель корхтама но тяни сонь кувалманза, сонь эряманц ланга.

— Мезень пара тон эрямастот няеть? — кизефнесь сон. — Мезень цебярьса тоньдить лятфтама эряфце?

Тядясь кулхцонць и лажназь люкафтозе прянц, шархкотькшнесь мезе—бди од, теенза аф содаф, лажнафты и кенярьфти, — се ляпоняста лястелезе ризнаф—палф седиенц. Тяфтама корхтамат эсь ланганза, эсь эряманц кувалма сон маряй васенда нинге, и нят кепселезь сонь седитстонза кунара люпштафть, афпек шарьхкодеви арьсемат, валомне кепсезь сонь эрямать мархта недовольстванц, — кепсезь кунардонь од пингонь мялензон — арьсеманзон. Эрямать кувалма сон корхнекшнесь стирь—ялганзон мархта ламос ламос корхнекшнесь, сембонь ланга, но сембе ялганза — и сон соньцке — аньцек пеняцяльхть, кивок эзизе азонкшне, — мес тяшкава трудна ды стака эрямась. А тени вага инголенза озада ащи соньцень цьорац, и се, мезень ланга корхтахть сонь сельмонза, шамац, валонза — нят сембе седиге сяфтедезь, а седити пара мяль цьорать инкс, конац шархкодезе видеть эсь тядянц эрямаста, корхтась сонь муцяманц колга, ужяльдезе сонь.

Тядятнень — аф ужялесазь.

Тянь сон содалезе. Сембе, мезе корхтась цьорац авань эрямать кувалма — се ульсь содаф осал ширьде, и мяшценза сонь пуромкшнесть крнякс седи марямат, конат пта эжнезь сонь афсодаф кельгомаса лясьтямаса.

— Мезе, мльни, мяльце тиеньдемс? — кизефтезе цьоранц сонь корхтаманц апак аделак

— Тонефнеме карман, а тоса — лиятненге карман тонафнемост Тейнек, рабочахненьди, эрявя тонафнемс. Тейнек эряви содамс, эряви шарьхкодемс — мес эрямась пек стака тейнек.

Тядяти пароль няемс, меес сонь еньшт моли сельмонза, прокс серьезнахне и строгайхне тяни палозь палсть ляпоняста и лястязьне. Сонь турванзон ланкс эвондась довольнай, сетме мзелдомане, хотя нинге ека мяньтьф йоткованза трнацть сельмоветть. Сонь седисонза кафта [13]шири ащи мяль якась — цьоранц вельде прянь шнама мяль — конац тяшкава лац няйсыне эрямать осалонзон, но теенза эсть юкснев сонь одшиць се, што сон корхтай стане, аф кода сембе, што сон ськамонза врьгяць споряма сембоньди — теензонга — тонатф те эрямать мархта. Сонь мялецель азомс цьоранцты:

— Идьнязят, мезевок теть аф тиеви?

Но сон пельсь сяда, кода ба афоль эвфтев цьоранц мархта кенярькшнемась, конац няевсь теенза тяшкава йонюста... хоть афламда чужойкс ашесь.

Павел няезе мзелдомать тядянц трва ланкста, няезе конашкава сон кульхцонцыне валонзон, сельмостонза няевсь кельгомац, теенза арьсевсь, што сон кошардозе тядянц эсь правданц шарьхкодеме, и од ломанень вал виенц мархта прянь шнамась кепсезе эсь лангозонза надиямать. Седиень кепедем йоткть сон корхтась, то пеетькстазь, то кяжиста сельмокунонь нолдазь, иляста валсонза марявсь кяжь, и коста тядясь марялезе сонь тангоцта кяжиста моли вайгяленц, калгода валонзон, сон пелезь люкафнезе прянц ды сетьмоняста кизефнезе цьоранц:

— Стане-ли тевсь ащи, Паша?

— Тяфта! — кемоста ды калгоцта отвечаль сон. И азонкшнесь теенза не ломатьтнень ланга, конат ломаненьди паронь арьсемать инкс, корхнесть йотксост видеть—правдать ланга, а сянкса, эрямати осал арьсихне кунцесазь синь, кода зверень, тюрьмав озафнесазь, каторгав паньцесазь...

— Мон стама ломатть няенькшнень! — кенярьдемге пяшкоць сон. — Масторланкса нят сембодонга цебярь ломатьтне!

Тядять седиса не ломатнень эзда пелема кепсесь, сонь тага мялецоль кизефтемс цьоранц:

— Стане ли ащи тевсь?

Не ашезь кизефне и, сединь кундафне, кулхцонць азкст не ломатнень ланга, конат теенза афольхть шарьхкодькшнев, конат тонафтозь цьоранц корхтама ды арьсеме стама мяльса-валса, конат теенза осалоньди арсихть. Мекпяли сон мярьксь цьоранцты:

— Курок валдашкодома кармай, мадолеть, ваймялеть аф амос!

— Да, мон тенийок мадан! — согласиндась сон. Ды, комась теенза и кизефтезе:

— Шархкодемайть тон монь?

— Шаркодихтень! — куфкстозь отвечась тяцяц. Сельмостонза тага кевярезь тусть сельмоветть, ды, явсемге, сон лездозе:

— Юмат-арат тон!

Сон стясь, якафць-тись комнатава, тоса мярьксь:

— Ну, вот, тон тени содасак, месть мон тиенькшнян коза якан, сембонь теть мон азыне. Эняльдян теть, тядяй, кельгоньдерясамак монь, — тят шорсе тейне!..

— Идьнязе! — пяшкоць тядясь. — Можи лучи улель тейне, кда мезевок афолень сода!

Сон сявозе тядянц кяденц ды тангоцта шумордазе эсь кяцонза.

Седиенц кенярьфтезе се, мес сон пек пара вайгяльса мярьксь теенза „тядяй“, ды тя кядень люпштамась, од и аф содавись.

— Мезьсонга мон аф карман теть шорсеме! — аварьдембачк пшкяць тядясь. — Аньцек ванфтк тон эсь пряцень, — ванк!

Сень апак содак, мезьде пря ванфтома, сон лажназь лезць:

— Кой эрят, осалгодат...

Лястязь, лямбе сельмеваржафксса фатезе цьоранц вии, виде ды кеме ронгонц, эряскодомбачк сетьмоняста корхтазевсь:

— Шкай ванонзат! Эряк, коца мяльце, аф карман мон теть шорьсеме. Аньцек фкень ланга эняльдян теть — тят! корхне ломань мархта апак пельхть Пелемс эряви ломаньда, неемде аф—вешихть сембе фкефкень! Эряхть жаднай—шиса, сельмонь каязь. Сембе сяконь вешихть, кода ба осал тиемс. Карманьдерят синь осал тевснон азонкшнеме ды судиндамост — кармахть няемда — афвешемот, юмафттядезь!

Цьорац ащесь кенкш ланкса, кульхцондозе тядянц ризназь азф корхтаманц, а коста лоткась тядясь, сон пеетькстась ды мярьксь:

— Ломатьтне кальдяфт, се виде. Но кодак мон кармань содама, што ули св да правда — ломатьневок тейне сяда цебярькс арасть!

Сон тага пеятьксць ды корхтась:

— Моньцьке аф содаса, кода те лиссь! Йолманясна сембода пелелень, — касома кармань—кармань сембода пезярьдеме, конада синь пулокс [14]ащемаснон инкс, а конада — аф и содаса мес, — стак аш мезенксонга! А тени тейне сембе илякс няевихть, ужяльхть штоли? Аф шархкоца, но седизе сяда ляпомсь, кодак кармань содама сень, што аф сембе виноватахть тя рдазса...

Сон лоткась, пта мезевок кулхцонць эсь потмостонза, а сяда меле пта эсьпотмова, пщкяць:

— Ва кода маряви правдать ваймекожфоц!

Тядясь варжаксць лангзонза ды сетьмоняста пщкяць:

— Осалоньди тон полафтовоть, о, шкабавас!

Коста сон маць ды матодовсь, тядьсь афкаштордозь стясь эсь васцтонза ды мольсь теенза. Павел удось кунтф, а акша тодуть ланкса пек лац няевсь сонь шинь пидеф, упрямай ды строгай шамац. Мяштезонза кядень лупштазь, кяпе, аньцек панарняса ащесь тядясь цьоранц вастонц ваксса, афмарямга мштерьцть, трванза, а сельмостонза рядняс, фкефке мяльге шудесть оцю мутнай сельмоветть.

V.

И тага синь кармасть аф корхнезь эряма, фкя куца и фкефкада ичкозе ащезь.

Весть неделякучкать, празник шиста, Павел, куцта тумстонза мярьксь тядянцты:

— Иоткшиста тейзон сахть инжихть ошоста.

— Ошста? — оду азозе тядясь и вдруг аварьгоць.

— Мезенкса тон, тядяй? — аф мяль вельде кизефтезе Павел.

Тядясь кармась фартуконц мархта шаманц нарнеме ды куфкстозь отвечась:

— Афи содасак мес, — стак ванцак...

— Пелят?

— Пелян! — виденцясь тядясь.

Сюкнязевсь сон тядянц шама шири ды кяжиста — кода аляц корхнель — мярьксь:

— Пелемада минь сембе и юмсетяма! А нят, кить ланксонок азорондахть, пелеманькень мархта пользовондахть и сядонга пек эвфнесамазь.

Тядясь пелезь кармась явсеме:

— Тят кяжие! Кода тейне аф пелемс? Марнек эрямазе пелезь йстась, — марнек седизень пелемась вельхтязе!

Аф оцю вайгельхть и сяда ляпста цьорась мярьксь:

— Простиндамак, тядяй, монь, — илякс аш кода!

Ды тусь.

Колма шит пеленць седиец, таромда лотксель прокс, козк лядель мялезонза, што кудозост синь сахть кати кодама аф содама ломатть, пелькс ломатть. Нят самай няфтезь цьорати кить, куване сон тени моли...

Йоткшиста илять, сась Павел фабрикаста, штазе шаманц ды, куцта оду тума йоткть, тядянц ланкс апак ватт, пшкяць:

— Сахть, — азк што мон тенийок мрдан и пожалоста, тят пель...

Тядясь лопакодозь озась эзем ланкс. Цьорац аф мяль вельде варжаксць лангозонза ды мярьксь:

— Можбыть, тон... туят козонга?

Те сон седиенц кярозе. Атказазь прянц шукадезь тядясь мярьксь:

— Мес. Местеме?

Ноябрь ковть пе малацоль. Шить, эю масторть ланкс прась коське, мелкай ловне, и тяни марявсь, кода сон чаторць тушенды цьоранц пильгала. Вальме сельмонеттненьди апак тархт нажець туста шобдась, пта кинь мельганга кяжень ардомга салава ванонць. Тядясь, эзем, ланкс кядензон нажядезень, станяк озада ащесь ды, кенкшть шири ваномок, учсь...

Теенза арам, пта шобдаста сембе ширьде кутть малас коматке и ширьге ванозь молихть аф лац шчаф каряф, кяжи ломатть. Вага кие—бди якай ни кутть вакска, варчсесыне кяца стенатнень.

Марявсь вешкомвайгель. Се вайгельсь якафць шобдаса пта йолма шюдеркске, пара марямс и печальнай, эрьгаскодозь якась шобдать шавоса, мезе-бди вешенць, малав нажетькшнесь. И вдрук юмафць вальмала, пта стенань шуфц эрьхтевсь.

Кудинголе марявсть кинь бди пильгонзон кркштыемасна, тядясь эвоць сельмекунонзон кеподезень, стясь.

Панжевсь кенкшсь. Васенда комнатати сувась пря, оцю понав вазьса, сяда меле, комада вельде, аф эрязда сувась ронга, видемсь, афэрязта кеподезе види кяденц ды, щумназь куфкстомок, мек мяште потмоста лиси эчке вайгельса мярьксь:

[15]— Шумбраста эрятада!

Тядясь афкорхтазь сюкнясь,

— А Павел аш куца?

Ломаньць афэрязта каязе нюрьхкене орнянц, кеподезе фке пильгонц, судордазе фке кемонц ланкста вазенц мархт ловть, тоса сяконь тийсь омбоце пильгонц мархтонга йордазе вазенц ужети, кувака пильгонзон ланкса люказь, сувась комнатати. Нажець стулть ваксс, ванондозе сон, пта варчсезе — кирьди аф, озась лангозонза ды, кядь лапшса кяденц вельхтямок, кургонц келептезе. Пряц, саф ломаньть, покаряволь, гладкаста нараф, сакаланзовок нарафт, а кувака усанза алу нюрьгихть. Оцю плгожендаф, серай сельмонзон мархта сон, ванондозе комнатать, тоса путозе пильгонц омбоцеть ланкс ды, стулть ланкса лукштием йоткть, кизефць:

— Кода, те куднясь тиньцень, или — ломань куца эрятада, сивоткшнесасть?

Тядясь сонь каршесонза ащем йоткть отвечась:

— Сивотькшнесаськ.

— Аф кодама куць! — пшкяць сон.

— Паша курок сай, тон учк! — састоне пщкяць тядясь.

— Да мон ученцан-ни! — покойнайста мярьксь кувака ломаньць.

Сонь покойнашиц, ляпе вайгелец и пара шамац пта макссть эрьгя тядяти. Ломаньць ванць лангозонза панжадонь сельмот, сельмеваржафсонза няевсь весяла шинь цятконе, а марнек понцонза, оржа ды сутулай, кувака пильге мархта понцонза мезе бди ульсь пеедемань сафты, и мяльс туфокс тиеньдезе сонь. Ланксонза щчафоль сенем панар, пильксонза равжа шаровархт, карьсеф кямоса. Тядять мялецоль кизефнемс — кие сон, костонь, кунара ли содасы цьоранц, но вдрук сон марнек люказевсь и соньць кизефтезе:

— Кие тяшкава кярозе тонь коняцень, нянькай?

Кизефць сон ласковайста, сельмонза пеедихть, но — авать кизефкссь седиенц кярозе. Сон кшмордазень трванзон ды, афламос ащемок, пта кяженьбачк кизефтезе:

— А мезень тевце тонь эса, алякай?

Сон эрязта шарфтозе тядять ширес марнек ронгонц:

— Да тон тят кяжие, мес ина! Мон сяс кизефтихтень, моньге одтядязень тожи пряц лазфоль, тяфтак вага, кода тонге. Сонь, ванцак, эряй ялгац, сапожниксь, кярозе колоткаса. Тядясь муськоме яксекшнель, а сон, мирьдец, — сапожниколь. Тядязе, — сяда меле, кодак монь сявомань цьоракс, музе сонь коста-бди ульцяста ирецта, зстиенза ошо горяньди. Конашкава сон пиксселезе, азса мон теть! Мон пряшяярьне тифтенень стяшондольхть...

Тядять пта кельмевеца валозе алясь эсь видеста корхтаманц мархта, а сияк тага сон арьсесь, што, пожалы, Павел кяжияй лангозонза сянкса, мес аф мяльвельде отвечась те чудной ломаньти. Виноватайста пеедезь сон мярьксь:

— Мон эзинь кяжие, а тон пек-ни курок... кизефтемайть. Мирьдезе тяфта каземань, царство небесное теенза! А тон аф татарат?

Ломаньць, пстергофтозень пильгонзон и сяшкава келиста пеедезевсь, што пиленза мек шовонезонза кепоцть. Тоса сон видемяльса мярьксь:

— Аф нинге.

— Корхтат, пта аф рузкс! — лездозе кизефтеманц тядясь пеетькстазь, сонь шутканц шарьхкодемда меле.

— Сон-монь корхтамазе — лучи рузоньнеде! — весяласта яфодезе прянц инжись. — Мон—хохолан, Канева ошоньнян.

— А тяса, кунара эрят?

— Кизошка эрянь ошса, а тени йотань тейзонт фабрикав, ковшка-ни тясан. Тяса мунь пара ломатть, — цьорацень тонь ды лият. Тяса — мзярс эрян! — корхтась сон, а сияк усанзон тозерязень.

Ломаньць тусь тядять мяльс ды, штоба мезьсонга пандомс цьоранц кувалма сонь пара валонзон, сон пщкяць:

— Может, чайняда симат?

— Кода стане мон ськамон карман пиравама? — отвечась сон, лафтувонь кеподезь, — Вага коста сембе пуромихть, тон минь и каванямасть...

Сон лятфтазе тядяти пеленьдеманц.

Кда сембе тяфтапт улельхть: — видя мяльсь эсьпотмова арьсесь тядясь.

Тага марявсть аськолкст кудинголе, эрязта панжевсь кенкшсь тядясь тага стясь. Но теенза диваньди, кухняв сувась серьс афоцю стирьне, велень ломанень простой шамаса, эчке щяярь—пулокс пурнафт акшт—моли шяяренза. Сон сетьмоньста кизефць:

— Ашине познанда?

— Да аш нинге! — отвечась хохолсь [16]кенкшста прянь няфтемок. — Ялга сать?

— Сияк содаф! Тон — Павел Михалочень тядяцат? Шумбрат! Монь лемозе — Наташа...

— А аля лемса кодане? — Кизефтезе тядясь

— Васильевна. А тонь кода?

— Пелагея Ниловна.

— Ванцак, вага минь фкефкень и содатама...

— Да! — пшкяць тядясь, тежденяста куфкстомбачк, а сияк мзелдозь ванондозе стирьнять.

Хохолсь лезнесь теенза адежань каямаса и кизефнезе:

— Якшама?

— Паксяса — пек! Варма...

Вайгялец стирьть пароль марямс, яснаель, кургоц йолмане, парганане, и марнек сон свежайнель, покарявняль, Каряфтомок, сон кемоста шовазень якстерь щоканзон якшамти якстерьготф йолмане кядензон мархта ды эряста йотась комнатав, а ботинка кочкярянза кайгиста тостиесть кияксти.

— Галошафтома якай! — эсьпотмованза арьсесь тядясь.

— Да а! — таргазе трнатомбачк стирнясь. — Палонь мон ... ух конашкава!

— Мон вага теенть тениойк самоварть эжцян. Курок пщкяць ды эрязта тусь тядясь кухняв. — Тениок...

Тядяти арам, пта сон кунара содасы те стирьнять и кельксы сонь тядянь ужельди ды пара кельгомаса. Кургоц пеець, а сияк сон кулхцонць мезе корхтахть комнатаса.

— Мес тон афмяльвельде ащат, Находка? — кизефнезе стирьнясь

— А стак, — авфайгелюста отвечась хохолсь. — Удавой кудазараванекень сельмонза пек пархт, тейне и савсь арьсемс, што, может монь тядязеньге тяфтапт сельмонза. Монь, вага, сиде та тядезинь кувалма арьсекшнян, и тейне арам вага сон, жив нинге.

— Тон азонкшнить, што кулось?

— Кулось се одтядякс арайсь. А мон — роднойть кувалма. Тейне арам, што сон коса—коса Кивиса анцекшни. Винадонга симоньди. А ирецтоньпрят сон полицейскахне щека ланга пиксесазь.

— Ах, сюдаф—ши! — арьсесь тядясь ды куфксць.

Наташа кармась кати мезе ланга афпек марямга сиденяста эрязда корхтама. Тага марявсь хохолть кайги вайгялец:

— Э, тон нинге одат, ялгась, кржа сивоть шурьхкада! Шачфтомась стака а ломанть йонць тонафтомац сядонга стака..,

— Ишь ты! — эсьпотмова мярьксь, тядясь сась мялец азомс хохолти мезевок стама, конац седиенц петелезе; но афэрязта панжевсь кенкшсь, ды сувась Николай Весовщиков, сире вор Данилать цьорац, марнек куроняти содаф афкорхтафкшу ломаньць. Сон прокс ломаньде аеркшнель, а сяс пеетькшнелхть лангозонза. Тядясь дивандазь кизефтезе сонь:

— Тон месть якат, Николай?

Сон нардазе кели кядьлапшенц мархта рябой ды лисьф—пакарь шаманц и, апак шумбракшнек, потмораста кизефць:

— Павел куца?

— Аш.

Варжаксць сон комнатав, йотась тов ды пщкяць:

— Шумбратада, ялгат...

— Тевок? — афмяльвельде эсьпотмованза арьсесь тядясь, и пек дивандась, коста няезе, што Наташа венептезе теенза кенярьдезь кяденц.

Тоса састь кафта цьорат; почти нинге шабат Фкеть эздост тядясь содалезе, — сон фабрикань сире рабочаень — Сизовонь брадонь цьорась — лемоц Федор, шамац оржа, коняц сери, щяяренза кудряфт. Омбоцесь, — ряц гладкаста сееньтьф, соньць визди—пели, аф содафоль тядяти, но тожи аф страшнай. Мекпяли эвондась соньцьке Павел, а мархтонза кафта од цьорат, тядясь содалезень синь, кафцке — фабрикаса работалхть. Цьорац ласковайста пщкяць теенза:

— Самовар путоть? Ва спасиба!

— Можи вина раман? — кизефтезе сон, штоба коданга азомс эсь пара мяленц сянкаса, мезе сонцьке нинге эзь шарьхкотькшне.

— Аф эряви! Се лишнай! — отвечась Павел, а соньць пеедезь ваны лангозонза.

Тядяти вдрук пта няевсь, што цьораць нарошна пек страшнаста те пуромксть азондозе, штоба пеетькшнемс лангозонза.

 
This is a translation and has a separate copyright status from the original text. The license for the translation applies to this edition only.
Original:
PD-icon.svg This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
  • its creator didn't fight or work for Soviet Union victory during the Great Patriotic War — so the 70-year protection term is applied;
  • and the creator died before January 1, 1950 (more than 70 years ago), and has been not posthumously rehabilitated since that date;
  • and this work was first published before January 1, 1950 (more than 70 years ago).

This work is in the public domain in the United States because it was published before January 1, 1925 (more than 95 years ago).


The author died in 1936, so this work is also in the public domain in other countries and areas where the copyright term is the author's life plus 83 years or less (if applicable), or the copyright term is 113 years or less since publication (if applicable).

Flag of Russia.svg
Translation:
PD-icon.svg This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
  • its creator didn't fight or work for Soviet Union victory during the Great Patriotic War — so the 70-year protection term is applied;
  • and the creator died before January 1, 1950 (more than 70 years ago), and has been not posthumously rehabilitated since that date;
  • and this work was first published before January 1, 1950 (more than 70 years ago).

This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This work was in the public domain in Russia on the URAA date January 1, 1996, according to the Law 09.07.1993 No 5351-1 which was enacted on that date:

  • its creator didn't fight or work for Soviet Union victory during the Great Patriotic War — so the 50-year protection term was applied;
  • and the creator died before January 1, 1946 (more than 50 years ago from 1/1/1996), and has been not posthumously rehabilitated since that date;
  • and this work was first published before January 1, 1946 (more than 50 years ago from 1/1/1996).

The author died in 1935, so this work is also in the public domain in other countries and areas where the copyright term is the author's life plus 84 years or less (if applicable), or the copyright term is 86 years or less since publication (if applicable).

Flag of Russia.svg