Колхозонь эряф/1933/02/Кафта ширет

From Wikisource
Jump to navigation Jump to search
Колхозонь эряф (1933), 2 (46) № январь edited by Шестов Н. С., Порватов Т. М.
Кафта ширет by Безбородов, Михаил Ильич
Колхозонь эряф (Колхозная жизнь). Мокшонь литературно-художественнай журнал. Нолдаец ВКП(б)-нь обкомсь, облисполкомсь и облпрофсовець. Лисенди ковти кафксть. — 2 (46) № январь, 1933 к. — с. 23—28

[23]

  М.   Безбородов.   

 
КАФТА  ШИРЕТ
 
НАЛХКИХНЕ, 1 це НАЛХКОМАСА;
1, Том Петрович — велень совеца председатель, зерьс аф оцю, кели курга, 30 кизоса.

2, Матя — сонь авац, 23 кизоса

3, Мишань Ванясь — курсант, ингольдень Матянь кельгиец, кельксы и тянингя, 25 кизоса

4, Нувай Зафусь — 50 кизоса, колхозса председатель аф кунара примаф партияв, кржа сьормаса содай

5, Кавор — козянь цьора, 29 кизоса, МТФ са заведующай

6, Седой Ягорсь — бригадир, 39 кизоса, спекулянт

7, Арефи Пропка — колхозса счетовод, рыжай шяярь. Саф лия велеста, кизонза 28-30.

8. Суксунь Келюсь — 40 кизоса работай завхозкс, пяк йонюкс лувонцы велесь, кулаконь ов и сонцкя кулаконь цьора.

1 це НАЛХКОМАСЬ
(Том Петровичень куца, илядь. Лампаса палы аф оцю толня. Пенакуд инголя ацаф васта. Тевсь шовда мокшонь веленяса; март ковста. 1931-це кизоня).

1-це ЛИСЕМАСЬ

(Сувай Томсь)

Том
Ух, и сизень, кода сизеф пиня,
Нылхтай сталгоцть пряуеня прястон.
Вов и тяфта йотнихть сембе шитне...
(Няйсы куца кивок аш)
Тьфу! течи танга сякокс васфтень
Шава куд и цють палы толня.
Уй, тя авать! лазфцы прянцты скомнять...
(Касфцы толть, йорцы портфеленц)
Саят куду — кафту сястянь,
Курок срадыхть юргинь мяльхне.
Мон аф стаман, кода Мишань Ванясь,
Авань мельга гуленякс аф якан.
Кода шадось, течи кяжса лакан.
Саят, суски копозт вяшки кальнясь
Тя ли тев? Мархтот эряй ава,
„Седи ваксстонь“, конат нингя мярьгихть.
Но, а кутце сембе сякокс шава,
Тяфта штоли эсонок синь кельгихть?
Кда авась седицень, аф пети,
Кда эряфсь йотни юрги пинекс
Коза аньцек мельхне тонь аф вятихть?
Мзяра кирдемс сави шинек—венек,
Тяфта куца. Сянкса ни совеца
Мяндихть пряснон инголень фкя лаца.
Курок сембонь колхозу мон вецайнь,
Эста кизя ошу панчфса ацаф.
(Валхты лавця ланкста газета)
— Газетась од!
(Озай, морафты)
„Тюремс ворхнень каршес..„
(Эводезь)
— Тяфта монь?! Кия, кия арьсесь...
(Морафты)
„Том, меки лувозь — мот.
Моць работай вельсовеца.
Тефнень эса сюрекс кецай.
Кулакнень мархта кирди соткс...
Калхозть ширес ваны пинекс,
Корхни: „марян стака шиненц„,
Вельсовеца оцю синтькст,
Сембе платтне мянь тя пинкс
Апак пяшкотть.
Яцефт ящекс
Ашусь, середняксь...
Арелаф Сема кулаксь.
Вельсовець шарфтф винань эрьхкокс,
Пингя Мотть ланга ни эрьхтемс...
Карьхцеф ярмакть...!;
(Йорцы газетать, кяжда якай)
Тьфу! шинь-шишка работань вельсовеца,
Пялес вача пингоня монь йотнихть.
Мзяра ярмакт норгонь велеть кяцта,
Сякокс сюцихть:. мезгя аф работай?!!.
Сяконь ланкс газетав ланган тяшнихть,
„Подкулачник“ — ноляхть кулят колган.
Кати мезень карьхцяф ярмакт лятьфнихть.
Содан Сембонь сьормадозень Ванясь!
Коза карьхцянь? Кинди лишнай нолдань?
Кона велеть каршозон мутясы!,..
Катк сон тячи повозон сал каясь,
Ванцаськ ванды кия—кинь утясы.
Мон пурдасан ламонь никсси шалхконц,
Пильгя алон пови аньцек тяни.
Саты ланксон кода мялец налхконць
Сембонь колга... Вов появась генийсь.
„Активистан“, — фалендакшни тячимс,
Видекс валонц лувонцы эрь пуромкссь.
Сембе сякокс яцетядезь эшис.
Листя тоста, штоба мархтон тюремс.
Йорат таргамс эсон ульмоняти.
Эльбядеть, Мон вдь сире калан!
Панчсан кицень тейняня кудняти,
Тоса тяшнек, кода ярмакт салан.
Гм... савихть тердемс...
(Сявсы вазенц и лиси)

2-це лисемась

(Сувай Матя, кяцонза ведорка).
Матя
Эх, жуватат марстонь сюдуфт.
Ащихть вача. Ламосна уратфт ни,
Сявомс тракскять, сявомс меки куду.
Кода пачфцак? Пильгя ланкста праф ни....
(Кацы ведарканц, каясы оронц)
Танга лофца, азорнекя вешихть.
Кали вестькя сельмосна исть няе
Кода траксне якшамть ала пиштихть?
Потя прясна лазонтфт, эихть, пеярсть...
(Озай)
Ух, тя алять, улель кода пондамс,
Перяф пачк мон таргалине пинекс
Кли мяльсна калхозть анцикс нолдамс,
Али тяфта йорайхть сиреть синнемс?
Аван, но мон няйса Пропкась,
Седойсь, Келю коза калхозть ускихть...
А дураксь минь содай аньцек стопка,
Коза мярьгихть, тоза пинекс суски.
Кода козянь Седойть траксонц сявозь,
Мясготофкав, шяфта никак мярьгихть,
Вов и уромсть, кода сире эвость:
„Марстонь пирьфи сембе траксне тяльгихть„

[24]

Содазь, керсазь пачк тянь мархта ашуть,
Кда лядыкс траксонц перьфи паньцазь.
Содазь, ули тя работать асуц...
Сяс и течимс тя ширеть синь вантфцазь.
Уромсть вихца марстоптозь синь траксень,
Няезь, содазь аф сатфтови кормась.
Тяни корхнихть ашутненди рахсезь:
„Ха ха! Траксне аф тонаткшихть нормас.“
А вов моннесь, тя ширеть изь шарьхкодь,
Сон изь няе, мезя тяста лиси.
Думсесь ошу, няемок изь пачкодь.
Перяф, аля, перяф теет кись ни.

(арьси)

Сяс и марстонь пуромкс курок ашель,
Содазь, кармайхть шарьхкодема ламоц.
Тяфта тиенцть, штоба сякокс ащель
Ашусь бокса, кандоль козять сталмонц.
Саты кирдеме! Ванды авань пуромкс
Серьгядемс и путомс тянди пени.
Вракнень вельдя тейнек штоли куломс,
Кда миньге азорхтама тяни?

3-ЦЕ ЛИСЕМАСЬ

(Сувай Нувай Зафурсь и Мишань Ванясь, корхтайхть
кайгиста, спорязь)

Ванясь

Тееть корхнеф, лиси оцю эльбятькс.
„Сембонь ма-арса“ — азк киень тя метоць?
Синь тонь эсот мянцесть, кода леньгакс,
штоба касфтомс меки Келюнь пекоц.
Социализьма тиемс тяфта мяльцель.
Кайсонт пиньгя марстоптомс и куттнень?
Кулаконь ширес практикаса кяльце...

Нувайсь

— Лоткак, изень шутця,
А работань, кда мяльце содамс.

Ваня

Максоть воля, унжань котфонь кодамс...

Нувайсь

— Азк тон теень, мезе тени тиемс,
Штоба машфтомс апак учсек сезькснень?

Ваня

— Мзярда шадокс гасьнематне келемсть,
Кармать ваяйкс венепнеме кяттнень
Мезя учсеть улхка, мзярда споряф?
Мзярда азонтф тя работать сталмоц?
Арьсек тяни пяля ковти йордаф.
Комсь жувата пери... афи колмос
Тяни стака машфтомс сязьксть,
Аф монь эздон аньцек лезкс
Сави вешемс, штоба машфтомс.
Но минь машфцаськ... Сай районцта...
Сави тонь „активця“ шаштомс.
Малость шерьфтомат синь понцна.

Матя

— Мезе теент? Мезенькса суваде?
Али тефне шадведь лаца шадыхть?
Тевти, тевти! Саты ни, увадя.
Ату корхтамс валоньтя аф лядыхть,

(Шумбрактни мархтост)

Нувайсь

— Мезя тиемс? Течингя колхозста
Салсихть алашатнень, сбруйхнень?

Ваня

— АФ уфамаль Келюнь кожфса.

(Матянди)

— Кулить вешихть алашаснон туйхне?
Томсь коса?

Матя

Ошса.

Ваня

Васькафнят, саме марса куду.
Содак, сими, кельгиняця, сюдуф.

(Нувайти)

— Келюсь, Зафур, тапаредязь сембонь.
Сембонь, кия йотнесь вакска...

Ваня

— Сюцить Ваня, сюцить лацкас,
Ату прокс синь ваяхть лебонц.

3афу

— Келюсь партияти ащи кандидатокс,
Кода стане каршезонза молемс?

Ваня

— Зафур, йотась пингонь катоть,
Сякокс мялец пакарьхть поремс.
Кда максомс сембе руководствать,
Кода течимс, Келюнди, Седойти.
Сави эрямс ашутненди лоткса.
Кия калма шуви сире койти?
А кода партияв сувась сон,
Сянь колга КК-ти максонь...

Нувайсь

— Васькафнят, коммунисць, тя пинкнень
Аф митянза...

Ванясь

— Келю? Афи фатят!
Но минь оржат сельмонекя минцень.
А нувазня сатфкст аф сатат.

Матя

— Ванцть синь Келюнь, Пропкать ланкс,
Лезкс колхозти учсесть ширдест.
А тевса, ванольхть, мезя канцть?

Ваня

— Кацть жувататненди ирдест.
Штоба сяземс омбоие тундать,
Синь исть каяфт фкавок видьмя.
Зафурсь „кемя“ пиксс кундась —
Фкавок кярядоц аш кильдемс...

Нувайсь

— Сембе сюцихть. Сави кирдемс..,

Ваня

— Ащек лятьфтак мезя корхнесь
Комсомолсь? Кода тюрсь сон?

Нувайсь

А минь?

Ваня

[25]

Тинь? Кочкасть ялгакс ворхнень,
Тевса аралакшнесть унксснон.
Нувайсь
Васькафнят, мон аф стаман,
Штоба мимс кулакти прязень;
Ваня
Факттне корхтайхть...
Нувайсь
Содат лама!
Ваня
Кода Келюсь петь утязе.
Нувайсь
(Матянди)
Коса Томсь?
Матя
Содак тонць.
Нувайсь
Ванды пуромкс... азк...
Ванды ули...
Сай районцта... кулить?
Матя
Кулинь.
Нувайсь
(Ваняти)
Тон?
Ванясь
Мон.
Нувайсь
Кулить?
Ванясь
Тянкса монга Томти сакшнень,
Но аш куца. Пингя тумс ни...
Нувайсь
Видя, монга кувать ащень,
Теень ласькомс нингя кумти.
Шудавас!
(Туй)

4-це лисемась

(Ванясь и Матя, кафонест)

Ваня
Кода эрьсят?

(Моли Матять малас)

Матя
Сякокс, Ваня...
Тундань ловкс седизя солай,
Весть аф пеедихть трване.
Сембе эряфозень колай...
Сими... тюри...
(Комафцы прянц)

Ваня
Кия содась!
Мес тон течимс изеть корхне?

(Кундасы кяденц)

Матя
Менди корхтамс, менди содамс?
Явсть кинекя, кода лофне
Тунда явихть модать эзда.
Ваня
Кода? Синь исть ява...
Кинеськ фкя минь... лездомс...
Минь ульхтяма... Матя, марят?
Кельктя... мес тяфтаня тиеть?
Пинькфтома тон авакс арать.
Матя
(Ваны оржаста)
Мес мон арань?
Ваня
Кали пелеть?
Матя

(Нельксы кяденц)

Саты. Ваня, сире серятьксть...
Токсемс, стадомга сон марей.
Тейть эрявсь ломань эрек...
Ваня
Менди валхнень...

(Кшмордасы Матять, йорай паламе)

Матя

(Ряфцоцы Ванять)

Ваня, шири! калдорфть марейть?!

5-це лисемась

(Сувай Томсь)
Цебярь? цебярь!! цебярь!!!

(Няфци Ваняти кенькшть)

Кицень няйсак!

Ваня

(Лисемста)

Ванды мольихть ячейкав!

6-це лисемась

(Томсь и Матя кафонест)

Том

(Кяжда)

Седи, вакстоце сашонць ширезт?

(Моли Матянди кона потай)

Сонь трванза сяда танцтихть?
Тяни мяльхне топоцть, ирецть?

(Вачкоцы пиля ланга)

Ця воз!.. Куцта панцеф!

7-це лисемась

(Сувай Кавор)

Кавор

Вов и мон!

(Валхцы шапканц)

Том

(Матенди)

Озонтт Каворсь...

Кавор
Мяльцень изень синдя
Мярьготь самода и сань.
(озай)
Йотамста варчсиня Исань.

(Матя туй пенакуд инголи)

Ирецта ни, кода лопафтф леньгя.
Валоц сякось: колхозста лисян,
Антихристти прязень аф мисан„
Ха, ха, ха, ха, — а! Вов чудаксь,
Сонга тоза, ков кулаксь.
Том
Аф кулаксь, Кавор шорси тевса,
Сон кунара ни кемя тярьца тярьдяф,
Аф лихцак ни каршозонок кевса,
Сонь ни аяш улхконь лакай эрьгац.

[26]

(Якай кияксть эзга)

Кда арьсемс лацкас пинкнень,
Мулеськ кия перьси кинькень.
Мулеськ кия тефнень шоряй.
Кия рдазса каршозонок йоряй.
Мишань Ванясь — цьорась „минцень“
Активистокс лувсы велесь.
Сон жа веши сатомс пецень,
Аф и фатят каей пилезт.
Активист, мезень тейнек пароц?
Велень советть каршес тюремац?
Али газет лопань ланкса валоц?
Вов кинь каршес анок улема.
Шарьхкодеть?
Кавор
Том Петрович аф шарьхкодян мезгя:
Молемс савор, али ласькомс резьгя?
Ламоц корхтайхть: „Враксь — кулаксь“.
Том
Дурак
Кизос коря тон аф одат.
Но тя пинкнень кржа сода.
Визькс аф содамс вракне кит?
Вракне нят конат тейнек
шорсихть.
Кавор
Киень шнасак?
Том
Кия мархтонок фкя лаца,
Кода эряви работай,
Алга сокаса аф сокай
Кавор
И лезды тянинь эряфти?
Том
Да.
Кона шорсить веляфты.
Кавор
Тюри воронь штафнигь каршес?
Том
Да. Апак лотксек. Арьсят?
Кавор
Арьсян! Арьсян, Том Петровичь,
Кия батькась киель овоц.
Аньцек тюрема аф карман.
Том
Кармат кда кармай вармась.
Кельмя ширеста уфама
Це газетать!
Кавор

(Морафты)

...Вельсовеца синькста лама...
(Томти)
Тя, Петровичь, тяштьф тонь колгат.
Монь лемозень сон аф токси.

(Венепцы газетать)

Морафтк, кда изеть нолгад.
Улель цебярь, кда йофси...
Том
Йофси?!
Содамс эсь колгат аф йорат?
Визькс эсь равжа тефнень кулемс?
Лофкаят Кавор. Лофкаят, цьорась.
Кульхть, тейнек аноклафста улемс
эрь минутаста и часцта аряви,
Анцек эста минь кинеськ аф перяви
Тяни кулхцонтт.

(Сявсы газетать, морафты)

..Кемя козянь цьора Каворсь,
Алянц ламоль рамаф модац.
Лама няемс тейнек савонць
Ширдест. Пингя содамс
Кия Каворсь? Мес колхозста
Тялонь перьф сон салси тише?
Тялонь перьф сон ошу возса
Марстонь пулфнень усксесь, мишенць.
Каворсь ульсь совецкай властти
Врагокс Врангельть, Махнонь пинкста.
Ломатть тюрьсть сон вирьгя ласьконць,
Вер изь пяердь волять инкса.
Тяни рускай горькайть вельде
МТФ ти яцесь оцюкс.
Но аф ваны тракснень мельгя,
Тиемс синь аф мялец лофцукс.
Траксонь потяхнень аф кельги,
Сяс мес салама аф кацазь,
Сяс, мес вайть кяцтонза нельгихть,
Сяс мес тракснемь парста ванфцазь.
Саты лангозонза ваномс,
Сон вдь йотась пингонь шама.
Тя кулаксь — эряви панемс
МТФ-ста... Минь учтама...
(Каворти)
Тяни кода Кавор ялгась?
Кода газець эсот калгась?
Ха ха ха! Мялезт? Али салу?
Кавор
Ускихть эсон меки фталу.
Мезе тиемс Том Петрович?
Кали тяни кальдяв ули
Том
Эх, тон оцю сакалть овоц!
Месть тиенчнихть мзярда тюрихть?
КАВОР
Куломс тюрихть.
Том
Тяни тейнек тиемс мезя?
Кавор
Куломс тюремс
Сьормадыень пизось сяземс!
Том
Видя, тейнек анокт улемс..,
Кавор
Тюремс, тюремс!
Саты кирдемс мяльснон „нолгуфнень.“
Саты ваномс ширесост эсь ялгакс.
Мон ли мзярдовок мархтост сялгафнень?
Да, тя пинкнень аф ужяльдезь янгак
Сембонь. Сембонь, киень виец лафча..,
Том
Киса шорсить мяньцек, керсек лапшакс,
(Сетьмоста)
Ванды рана пленум мон прдан,
Тоса карман корхтама тянь колга.
(Няфнесы гаэетать)
Мусаськ кия шамазонк рдаст
Газетать вельде рахазь йордась.
Штоба улемс анок кавор
Вандынь шити течи савор
Тейнек корхнемс сави лама,
Штоба аф шарьхкотьфты шамат
Лисемс пленумса вал мархта
И... вятнемс члеттнень шалхкта.
Кавор
Видя видя
Том
Ласьконтть, Кавор, йордак сизефть,
Серьгятьк Келюнь, Седойть, Пропкать.
Кона кельксы васень стопкать.
Кона симсы, кантт хоть торхтат.

[27]

Кавор

(Лисема йоткть)

Том Петрович, ширезт штоли?
Том
Тяза, тяза. Лацкас пекстак ортать.

(Кавор лиси)

8-це лисемась

(Том и Матя кафонест. Матя каязе кафтонькрданц
кармась мадома)

Том
Ха, ха, ха, ха! Ков тя моли?!
Кда Каворсь шрать ваксса, эськя
Йорась улемс ширеса, аф тюремс...
Мзярда сялговсь копоц перань эскса.
Эста сонга: „Сяськомс, али куломс“.
Аньцек ськамон мон инь виюсь,
Ськамон шарфтан сембе велеть,
Тятде мяленя монь ки мусть,
И аш мезда теень пелемс.
Кемоста монь кяцон ащихть
Велень тефня, велеть мялец.
Кинди стака, катк пышаксни,
Сонь аф синди пакарь кялец.
Аньцек Ванясь шорси теень,
Толоц эрявн сонь матомс.
Кочкамс лездыкс тяни киень?
Кинди йонюняста шаштомс?

(Арьси)

Матомс толонц? Тевсь аф йолма.
Петляс мархтонза тонць поват.
Йорат сонь, а лиси: сьолгат
Тонцень, тяйня, кельмя кутти,,.
Корхнихть: „Няренц тапахть колайхть“,
Таргамс эряви сонь сутти.
Мэярс зепсон шары веленъ „пятаксь“.
Мон районттке шалхта вецян...

(Озай, сьормады)

Мерьктям:.. Ванять сюнода
Калхозть кемя ширец сраткшни...
Ялгат, лацкас тя ширети куледа,
Комсь куд лисемс энялькст макссть ни,.,
Лисихть сяс, мес Ванять ширес
Яксихть лама кальдяфт латцихть
Калхозть колга. Сави керемс...
Танга кяшфт кулаконь паршихть
Ширезонза,.. Лацкас варчсесть...

(Стяй)

Тянь милицияти. Моли таргай...

9-це лисемась

(Сувай Пропкась ирецтоня)
Том Петровичти, кода тефня?

(Шумбракшни)

Кода шиця тячи йотась?
Том
Парста,.,
Пропкась
Мярьгят, мзярда шарыхть кефня
Каксыхть темпонза работать?
Том
Тон Арефи, танга малость „нашать“.?
Мяньцять пилькнень, комотнят пружинакс,
Няйса танга васькафтыть Уляшатъ?
Пропкась
Тяфта эряви Петрович! Шинакс,
Кемоста перьфкаст ашкодомс. Кельгозь.
Штоба сяське йотковат аф тяльголь.
Сипть Петрович! Ульхть тя пингонь алякс!
Мзярс велесь пялес йоньтта пяшксе,
Шири сембонь!
(Озай, кувакаста таркси ваймонц)
Ах, Уляшась, палакс...
Том
Мес, Арефи, вяри кепси мяштце?
Пропкась
Пян аф лад, аяш мархтон ава,
(Ваны уды Матять ширес)
Конань мархта явшселия павазть...
Петрович, адя костонга мутама?.
(Лоткай юватькшнемада, тоса морай)
Ават! Ават! Седизя тинь инксонт.
Кафту—колму сязевомс сон йорай.
Мзярс пяльди шяярезя инксокс,
Кельган эсонт, инксонт моран...
Мзярс пяльди шяярезе инксокс,
Кельган эсонт; инксонт моран.
[Стяй)
А тяни туй Арефись танга,
Йотай сембе велеть ланга.
Молян Сьомась вина канды...
Том Петрович, вандыс...
Том
(Кундай эзонза)
Мезя тяфта йорат тиемс?
Пропкась
Симомс.
Али тееть тя аф пара?
Афли кадыть? И Кунара?..
Том
Сяка мяльсот, Тевсь аф тяса:
Кия мзярда, кода сими.
Каворсь шырезот изь яка?
Тон аф содат мезя тиемс
Течи йоратама тяса
Тонь и,.. монь уцяскас?!
Пропкась
(Мрдай меки, озай)
Монь уцяскас. Ха, ха! ава штоли
Теен мудя? ха, ха! Кия моли...

10це лисемась
(Сувайхть Кавор, Келю, Седойсь)
Сембе
(Шорявиста)
Шумбрат Петрович.
Ульхть шумбра
ЦЦумбрат Арефи!
Ошста ни мрдать?
Петровичу!
Кавор
Ареф! Тясат? А мон шаран...
Пропкась
Монь ли кине тееть качкамс...
Кавор
Сембе сяка муйхтень.

(Томти)

Кувать арань,
Петрович, учсемс?
Том
Тянь ланкс сяльде сави лоткамс.
Ялгат, озседа — ульхтяда инжихть
Келю
Кда саме, озатама

[28]

Озсихть

Азк тон менди
Кочкамасть илять минь, ширезт?
Али, Том Петрович, пилезт
Течи повсть йотась иляттне.
Седойсь
Ха, ха, Келюсь аф юкстасы лятьфни,
Кода улхка тюремя минь тяса
Шапамть каршес, кетав шинкса,
А морсесь!..
Келю
Морсеф... Кетав пряса
Аф морат.
Том
Ялгат, тевть малас. Тянинь пинкста,
Мзярда тундась вальмя алу нежець,
Лама тевда сави тиемс
Вов и тейнек савси эжемс...
Алашатне осалхт,.. Кильдемс
Фкавок аф пчкай синь эздост,
Корма аяш, Кода лездомс?..
Минь ульхтяма винаваттне...
Келю
Корма муви. Сарай прятне
Вельхтяфт пулфса,..
Седойсь
Нельгомс башка эряйть кормац,
Тракске путомс кемя нормас.
Пропкась
Лажнамс аш месть. Видеф ули
Паксясь, аньцек тундась саза.
Келю
Ялгат, течи мезя кулень.
Мезя тиенди Од Сазанць...
Том
Мезя?
Келю
Сраць колхозсна
Том
Кали видя?!
Матя

(вельхтяманц алга ваны)

Ускихть коза!
Теест аф колхозса эрямс...
Том
Ляць инь оцюсь. Кода перямс,
Прянеськ Мишань Ванять эзда.
Ваность мезя сьормаць кяжда

(Макссы Келюнди газетать)

Келю

(— морафты аф марявиста)

Гм,.. Суксунь Келюсь...

(Макссы гаэетать Седойти)

Ця!

(бокти)

Эжди стервась псиста.

Седойсь

(Морафты)

Седой Ягорскя тя пизонь...

(газетань фатясы Пропкась)

Пропкась

(морафты, тя йоткть)
весть, весть ватьмять алда лифнесы
прянц Гринясь)

...Срадма ланкса ни колхозсь,
Коза минь кулакне яцефт.
Синь и азорхт... завхозсь
Суксунь Келюсь Лама карьхцеф,
Ширденза, колхозонь ярмакт.
Йоню, сялги, кода сеель.
Ашуфнень люпштама кармась.
Ускси сьоронзон Ляй вели,
Конат нингя сьоксень салафт.
Кархцяфтозя марстонь кормать.
Траксне кулсихть. Лама калмафт.
Келюиь партияв...
Келю (бокти)
Сембе сьорматф...
Пропкась
(луви)
...Келюсь партияв ни яцесь
Нувай Зафурть шовда шида...
.   .   .   .   .   .   .   .   .   .   .   .   .   .   .   .   .   .   .   .   .   .   .   .
...Седой Ягорскя тя пизонь,
Бригадиркс работай, пинесь.
Корхни: „Сезьса пильгонц, кизон
Кия арай“ Сембе пенясь
Пели эздонза.,. Сон таза.
Лама питни парши салась.
Спекулянт сон,.. Тяни азан
Счетовотть...

(Пропкась йорцы газетать, фатясы
Каворсь и морафты
)

Кавор
... пянце Пропкать.
Колга, кафта—колма валня.
Труд шинь ланкс сон рамси стопкат.
Сускомс куя тувонь палня.
Сяс и Келюфнень, Седойхнень
4—5 сятт труд шисна.
Ашуфнень паксянь геройхнень,
Сяда пялень, Сяс и кшисна,
Аньцек тундать малас сатни.
Пизось кемя. РКИ-ти
Шарфтомс мяль
„Мон — лакси“
(сембонди)
Сембе. Кулесть? Кода, пара?
Седойсь
Вов тя, да,
Келю
Тя вов карась.
Том
Арьсесть, мезя тени тиемс?
Пропкась
Улемс анок. Пяк аф пелемс.
Газетась мокшонь тя пек пара.
Районць аф шарьхкоцы. Тоса
Мокшокс лувихть аяш Саламс
Ляди номерхнень. Синь косот?
Том
Сави ласькомс школав
Пропкась
Кулят велева аф нолямс.
Газеттнень машфтомс.
Седойсь
А райкомсь?
Пропкась
Тоза анокламс Нувайть
Том
Тяни айда Келюнь пяли.
Минь тихтяма йомла пленум,
Тяза кивок шетка сай
Кавор
Марса кинеськ, ялгат, кялемс...
Ванясь шорсись. Ванять машфтомс,

 
PD-icon.svg This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
  • its creator didn't fight or work for Soviet Union victory during the Great Patriotic War — so the 70-year protection term is applied;
  • and the creator died before January 1, 1950 (more than 70 years ago), and has been not posthumously rehabilitated since that date;
  • and this work was first published before January 1, 1950 (more than 70 years ago).

This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This work was in the public domain in Russia on the URAA date January 1, 1996, according to the Law 09.07.1993 No 5351-1 which was enacted on that date:

  • its creator didn't fight or work for Soviet Union victory during the Great Patriotic War — so the 50-year protection term was applied;
  • and the creator died before January 1, 1946 (more than 50 years ago from 1/1/1996), and has been not posthumously rehabilitated since that date;
  • and this work was first published before January 1, 1946 (more than 50 years ago from 1/1/1996).

The author died in 1935, so this work is also in the public domain in other countries and areas where the copyright term is the author's life plus 84 years or less (if applicable), or the copyright term is 86 years or less since publication (if applicable).

Flag of Russia.svg