Колхозонь эряф/1940/04/Кафта частста веть

←Курок сргози Ильичсь

Колхозонь эряф (1940), № 4 Апрель edited by Игнатьев Г. А., Чумаков И. Ф. Кафта частста веть

Ульцяса→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 4 Апрель 1940. — с. 8—9

 

КАФТА   ЧАСТСТА  ВЕТЬ

Тя ульсь Октябрьскяй революциять вишкста молеманц пингста, мзярда Ильичсь тиендсь боевой отрятт Керенскяйнди отпоронь максомс.

Ильичень серьгядеманц коряс путиловецне вишкста организовандакшнесть красногвардейскяй отрятт и куду апак сувсек тушендсть фронту, видеста заводть территорияста. Кинь лангса ульсь фронтовой шинель, кинь рабочай пальта, поездса и ялга — Краснай вели, Тайцав, Луга вели — контрреволюционнай бандатнень каршес. Аватне и конат ульсть аф пяк виюфт прважафт окопань шувома Петроградть перьф.

Путиловскяй заводть пушечнай цехса эряскодозь аноклакшнесть пушкат, эсь лангсост синь лифнезь заводста и кучсезь фронту Октябрть араламанц инкса.

Ульсь сёксень питерскяй позна ве. Ушеса кельмоль и начколь.

Заводской комитетса дежурясть кафта рабочайхть. Заводской огородниксь кандсь тейст модамарьхть и синь сонь солдатскяй котелокса путозь плитать лангс пидемс. Лакафтсть чай и корхнесть событиятнень колга.

Сямельде синь эздост фкясь кандозе пидеф модамарь мархта котелокть и синь ушедсть синь ваткамост.

Ве. Сетьме.

Вдрук ваксстонь комнатав, конац вяти ушу, коста бди эвондасть кафта фигурат. Фкясь кедень курткаса и кедень брюкаса и русскяй кямоса, боксонза пистолет, омбоцесь средняй серьса, лангсонза сёксень пальта, воротникоц кепотьф, прясонза кепка. Сувасть сетьмоняста и молихть шрать тейс.

Алятне, мзярда няезь сувайхнень, стясть: мезень ломатть састь тяшкава позна?

Военнайста щаф ломанць алятненди ульсь аф содаф, а пальтаса ломанць... ульсь Ленин.

Алятне и эстейстка аф верондайхть: неужели, афкукс, Владимир Ильичсь сась? Тяшкава позна заводса? Значит, лиссь мезевок аф цебярь.

Владимир Ильичсь шумбракстсь рабочайхнень мархта и озась синь мархтост шрать ваксс, а рабочайхне нльне ашезь сода мезе азомс и кизефнесазь:

— Может быть, ули мяльце, Владимир Ильич, мархтонк модамарьда ярхцамс?

Сон согласиндась, рабочайхне кеняндсть и дивандасть.

— Оцю мяль мархта ярхцан, — корхтай сон.

Эста синь солдатскяй котелокста сатсть несколька модамарь и каясть стакан чай.

Сон вачедоль. Улема, кунара изь ярхца. Ну, и оцю мяль мархта ярхцась модамарьда и симсь чайда.

— Кодама настроениясь тинь заводсонт? — кармась кизефнема Ильичсь. — Уштоманте ули? Мзяра отряд тинь прважаде фронту? Лац ли синь вооружиндафт?

Рабочайхне тейнза азондозь, што настроениясь заводса цебярь, рабочайхнень оцю пялькссна тусь фронту. Васенда вооружениясь изь сатне, но тяни сатни. Организовандакшневихть тага отрятт. Уголень усксема ваготтнень эзда тисть аф кальдяв бронепоезд. Керенскяень рабочайхне паньцазь.

Ленин ашезь эряскода тумс кельгома заводть эзда. Мянь пяле част корхнесь и сембе кизефнесь народть эряфонц колга.

Позналь ни, мзярда Ильичсь, седи вакска прощандамок рабочайхнень мархта, кемоста люпштазень синь кядьснон и азозе тейст эсь полнай верондаманц, што минь безусловна сяськтяма.

Рабочайхне сонь ильхтезь заводста лисемозонза и нолдазь вагоннай отделть калитканц пачк. А синць мрдасть заводской комитетть помещенияс, синь ульсть взволнованнайхть апак учсек васедемать эзда. Варжакстсть шрать лангс — тоса ульсть модамарь кетть и ташта равжа кши сускопт, конатнень аньцек, што кирьдезень эсь кядьсонза Ильичсь.

Сёрматф Ленинградса Путиловскяй заводонь бывшай рабочайхнень эзда.