Колхозонь эряф/1940/04/Курок сргози Ильичсь

←Валпрякс

Колхозонь эряф (1940), № 4 Апрель edited by Игнатьев Г. А., Чумаков И. Ф. Курок съргози Ильичсь

Кафта частста веть (азондома)→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 4 Апрель 1940. — с. 5—7

 

КУРОК СРГОЗИ ИЛЬИЧСЬ

РУССКЯЙ ЙОФКС

Обедта меле весть Ленинць ащи озада эсь комнатанянц эса и лувонды разнай книжкат и газетат. Аньцек кодама газетас аф варжаксты, кодама книжка аф панжи, везде мушенды лувома эсь колганза: „Кля, месть тейнек пелемс Антантать эзда, кда миньцонк ули Владимир Ильич Ленин“.

Ленинть мяльс пара. Сон стясь венскяй стулть лангста, якась комнатава и корхтай эсъ пачканза:

„Ладна, стане и тиса“.

А сяда меле кучезе эсь посыльнайнц главнай советскяй докторти. Сась докторсь, а Ленин тейнза и корхтай:

— Маштат стане тиемс, штоба мон кулолень, аньцек аф ёфсикс, а тяфтак, нарошна.

— Маштан, Владимир Ильич, аньцек мезенди тя эряви?

— Аш мезендиге, — корхтай, — ёраса варжамс, кодане кармайхть молема тефне моньфтемон. Мес бди сембе тефнень путьнесазь монь лангозон, всякай тевса кяшендихть монь фталон.

— Мес мля, — корхтай докторсь, — тянь тисаськ. Путтядязь тонь аф калму, а просторнай стама комнатас, а приличиянди — вельхтятядязь глянцекса.

— Аньцек вов мезе, доктор, штоба тяминь ётксонк улель оцю секретса. Тон кармат тянь содамонза, мон, да нинге Надежда Константиновна.

И курок сембе народти азозь, што Ленин кулось.

Народсь кармась ризнама, канзедема, коммунисттневок ашесть кирде — кармасть авардема. Сембе арьсихть, мезе тяни карматама тиендема? Сяконь и ватт, англичаттне француснень мархта лангозонк врьгятихть.

А сембода старшайсь — Калинин и корхни эсост:

— Мезе мля тият! Тя тяфта лиссь аф минь сюнедонк... Авардезь тевти аф лездат. Ну, авардеме, — и саты, эряви тевс кундамс.

Ленинонь путозь комнатав, конанди мярьгихть Мавзолей, и кенкшнень тейс путсть стража. Йотась ши, кафта... недяля, ков — мольсь Ленинонь мялец глянцек ала ащемать эзда.

Вов весть сон салаване лиссь Мавзолейста фталдонь кенкшка и тусь видеста Кремляв, главнай дворецу, коса эрсихть комиссарскяй всякай заседаният.

Кенкшнень тейса сонь нолдазь, сяс мес зепсонза ульсь бессрочнай пропуск, а вазенц сон шашфтозе сяда алу, штоба афолезь сода.

Мольсь тоза Ленин, а сембе заседаниятне аделавсть ни, и служительхне киякснень эса тяихть.

Ленин кизефнесыне:

— Аделавсь?

— Аделавсь.

— Аф содасасть, мезень колга корхтасть?

— Да разнайнь колга... марясак, англичаттне ёрайхть дружба ладямс мархтонк, а тоса нинге кода-бди державатневок. Минь вдь варянява кулхцондоме, пиле крайняса... ашеме шарьхкоде.

— Так, так, а Ленинонь колга мезевок ашесть лятфне?

— Кода ина! Лятфнесть... Вов, корхтайхть. Ленин кулось сяс коммунистта тяни пцтай кафтонь крда сяда лама. Тяни Антантать эзда аф эвоттяма!

— А сон аф эвфни?

— Да мзярс аф, аф маряви.

— Так, так, — дакстсь Ленини прощандась служительхнень мархта.

Мольсь сон мавзолею, мадсь глянцекть алу, думандай: „А вдь лац тефне молихть, работайхть и моньфтемонга. Ладна. Нинге кой-коза молян и ванца. Ванды рабочайхненди заводу молян“.

Омбоце веня Ленин тусь заводу. Тосовок сонь ашезь лоткафта, видеста машиннай части вятезь. Веть заводса наротта кржа, аньцек аф ламня лядонды, штоба пархнень аф лоткафтомс, лядондыхть машинистсь, машинань вадендись да кочегарсь, нинге сторожсь, штоба мезевок афольхть кола шпиоттне.

„Нятка сатыхть, — арьси Ленин, — тейне вдь аф митинкт ётафнемс, аньцек кой-мезень колга кизефнемс“.

— Шумбратада, ялгат!

— Шумбрат!

— Ну, кода тевсь моли?

— Да лац... Моли...

— Аф партийнайхтяда?

— Ленинонь куломда инголе улеме аф партийнайхть, а тяни коммунисттама. Ленинецтама.

Тя пяк пароль Ленинонь седис.

— А работанте лац моли?

— А товарда лама нолятада?

И ушедсь и ушедсь кизефнема.

— Да курок мирнай пингть мархта ровнайготтама.

— Ну, работада, работада, арьсян тейнть пара, а мзярс прощайте.

„Тяса тевсь моли лац, — думандай Ленин мавзолею молемста, — тяни аньцек ваномс мужикнень, куляксамс синь эрямаснон-ащемаснон колга!“

Колмоце веня Ленин стясь сядонга рана: вдь эряви пачкодемс станцияв, да ардомс машина кить ланга, да нинге, сяконь учт, аф оцю станциянять эзда вели ялга молемс сави.

Сон тусь стама велес, конац сяда хужа, штоба улель сяда нагляднай.

Фкя кудняса толня палы. Ленин сувась.

— Можна тинь ширесонт ваймамс?

— Сувак.

Сувась Ленин и дивандай. Шкайсна аш. Везде якстерь плакатт. Портретт. Ленин нарошна кизефнесыне:

— Тинь дряй аф крещенайхтяда?

— Минь, ялгай, гражданскяйста эрятама, а минь кудсонк читальня, а вов тя — Ленинонь уженяц.

„И тясонга монь лятфнесамазь“, — арьси Ленин.

— Ну, а кода эрьсетяда тинь, мужикне?

— Да аф стане, што пяк лац, а сякокс жа вроде эряфоньке латцеви.

Ленин кудняста лиссь кеняньфста, мавзолеи мадсь озадонь седихть, эсь яксемдонза меле уды ни вов лама ши.

Тяни сон наверна курок ни сргози.

Вов ули оцю радость!

Валсонга сон аф азондови, черниласонга сон аф сёрмадови

Йофкссь сёрматф Кировскяй (б. Вятскяй) областьса. Ладяф аф 1925 кизода рана.