Канѡ̑ны, си́рѣчь кни́га пра́вилъ/Пра̑вила тре́тїѧгѡ вселе́нскагѡ собо́ра

From Wikisource
Jump to navigation Jump to search
А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.
Пра̑вила свѧты́хъ а҆по́столѡвъ, свѧты́хъ собо́рѡвъ вселе́нскихъ и҆ помѣ́стныхъ, и҆ свѧты́хъ ѻ҆те́цъ
Пра̑вила свѧта́гѡ вселе́нскагѡ тре́тїѧгѡ собо́ра, е҆фе́сскагѡ
This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.


Кни́га пра́вилъ свѧты́хъ а҆по́столѡвъ,
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ

Пра̑вила свѧта́гѡ вселе́нскагѡ тре́тїѧгѡ собо́ра, е҆фе́сскагѡ.

Пра́вило а҃.

Поне́же надлежа́ло и҆ не присꙋ́тствовавшымъ на свѧто́мъ собо́рѣ, и҆ ѡ҆става́вшымсѧ въ свое́мъ мѣ́стѣ, и҆лѝ гра́дѣ, по нѣ́коей винѣ̀, и҆лѝ церко́вной, и҆лѝ тѣле́сной, не ѡ҆ста́тисѧ въ невѣ́дѣнїи ѡ҆ то́мъ, что̀ на ѻ҆́номъ постано́влено: то и҆звѣща́емъ ва́шꙋ свѧты́ню и҆ любо́вь, что̀, а҆́ще кото́рый ѻ҆́бластный митрополі́тъ, ѿстꙋпи́въ ѿ свѧта́гѡ и҆ вселе́нскагѡ собо́ра, приложи́лсѧ къ ѿстꙋ́пническомꙋ со́нмищꙋ, и҆лѝ посе́мъ прило́житсѧ, и҆лѝ келесті́ево мꙋдрова́нїе прїѧ́лъ, и҆лѝ прїи́метъ, таковы́й проти́въ є҆пі́скопѡвъ своеѧ̀ ѻ҆́бласти что́ либо дѣ́лати ѿню́дь не мо́жетъ, ꙗ҆́кѡ ѿны́нѣ собо́ромъ ѿ всѧ́кагѡ церко́внагѡ ѻ҆бще́нїѧ ᲂу҆жѐ ѿве́рженный и҆ недѣйстви́тельный. Но є҆щѐ и҆ разсмотрѣ́нїю тѣ́хъ са́мыхъ є҆пі́скопѡвъ ѻ҆́бласти, и҆ ѻ҆кре́стныхъ митрополі́тѡвъ, правосла́внѡ мꙋ́дрствꙋющихъ, подлежа́ти бꙋ́детъ, длѧ соверше́ннагѡ и҆зверже́нїѧ є҆гѡ̀ и҆з̾ са́на є҆пі́скопскагѡ.

Пра́вило в҃.

А҆́ще же кото́рые є҆пархїа́льные є҆пі́скопы не присꙋ́тствовали на свѧто́мъ собо́рѣ, и҆ въ ѿстꙋпле́нїи прїѧ́ли, и҆лѝ покꙋ́сѧтсѧ прїѧ́ти ᲂу҆ча́стїе: и҆лѝ, подписа́въ и҆зверже́нїе несто́рїа, перешлѝ къ ѿстꙋ́пническомꙋ со́нмищꙋ: таковы̑мъ, по и҆зволе́нїю свѧта́гѡ собо́ра, соверше́ннѡ бы́ти чꙋ̑ждымъ свѧще́нства, и҆ низве́ржєннымъ съ своеѧ̀ сте́пени.

Пра́вило г҃.

А҆́ще же нѣ́котѡрымъ и҆з̾ принадлежа́щихъ къ кли́рꙋ въ ка́ждомъ гра́дѣ, и҆лѝ селѣ̀, несто́рїемъ и҆ є҆гѡ̀ соѻ́бщниками, возбранено̀ свѧще́нство за правосла́вное мꙋ́дрствованїе: таковы̑мъ да́ли мы̀ пра́во воспрїѧ́ти свою̀ сте́пень. Воѻбщѐ повелѣва́емъ, что́бы є҆диномꙋ́дрствꙋющїе съ правосла́внымъ и҆ вселе́нскимъ собо́ромъ чле́ны кли́ра, ѿню́дь никаки́мъ ѻ҆́бразомъ, не бы́ли подчинены̀ ѿстꙋпи́вшымъ, и҆лѝ ѿстꙋпа́ющымъ ѿ правосла́вїѧ є҆пі́скопамъ.

Пра́вило д҃.

А҆́ще кото́рые и҆з̾ кли́ра ѿстꙋ́пѧтъ, и҆ дерзнꙋ́тъ ѻ҆со́бѡ, и҆лѝ всенаро́днѡ держа́тисѧ несто́рїева, и҆лѝ келесті́ева мꙋ́дрствованїѧ: пра́веднымъ призна́лъ свѧты́й собо́ръ и҆зве́ржєннымъ бы́ти и҆ си̑мъ и҆з̾ свѧще́ннагѡ чи́на.

Пра́вило є҃.

А҆́ще нѣ́кїе за неприли́чныѧ дѣла̀ ѡ҆сꙋждены̀ ст҃ы́мъ собо́ромъ, и҆лѝ со́бственными є҆пі́скопами: несто́рїй же, и҆ є҆гѡ̀ є҆диномы́шленники, вопрекѝ пра́виламъ, по є҆гѡ̀ во все́мъ произво́льномꙋ дѣ́йствованїю, покꙋси́лисѧ, и҆лѝ покꙋ́сѧтсѧ возврати́ти и҆̀мъ ѡ҆бще́нїе съ це́рковїю, и҆лѝ сте́пень свѧще́нства: пра́веднымъ призна́ли мы̀, да бꙋ́детъ и҆̀мъ сїѐ безполе́зно, и҆ да ѡ҆стаю́тсѧ ѻ҆нѝ тѣ́мъ не ме́нѣе и҆зве́рженными и҆з̾ свѧще́ннагѡ чи́на.

Пра́вило ѕ҃.

Подо́бно же, а҆́ще нѣ́кїе восхотѣ́ли бы, каки́мъ либо ѻ҆́бразомъ, поколеба́ти то̀, что̀ ѡ҆ ка́ждомъ и҆з̾ ни́хъ ᲂу҆чинено̀ свѧты́мъ собо́ромъ во є҆фе́сѣ, свѧты́й собо́ръ ѡ҆предѣли́лъ, что́бы таковы́е, а҆́ще сꙋ́ть є҆пі́скопы, и҆лѝ принадлежа́щїе къ кли́рꙋ, соверше́ннѡ све́ржены бы́ли съ своегѡ̀ сте́пени: а҆́ще же мїрѧ́не, ѿлꙋче́ны бы́ли ѿ ѻ҆бще́нїѧ церко́внагѡ.

Пра́вило з҃.

По прочте́нїи сегѡ̀, свѧты́й собо́ръ ѡ҆предѣли́лъ: да не бꙋ́детъ позво́лено никомꙋ̀ произноси́ти, и҆лѝ писа́ти, и҆лѝ слага́ти и҆нꙋ́ю вѣ́рꙋ, кромѣ̀ ѡ҆предѣле́нныѧ ѿ свѧты́хъ ѻ҆тє́цъ, въ нїке́и гра́дѣ, со ст҃ы́мъ дх҃омъ собра́вшихсѧ. А҆ кото́рые дерзнꙋ́тъ слага́ти и҆нꙋ́ю вѣ́рꙋ, и҆лѝ представлѧ́ти, и҆лѝ предлага́ти хотѧ́щымъ ѡ҆брати́тисѧ къ позна́нїю и҆́стины, и҆лѝ ѿ ꙗ҆зы́чества, и҆лѝ ѿ і҆ꙋде́йства, и҆лѝ ѿ како́й бы то̀ ни бы́ло є҆́реси: таковы́е, а҆́ще сꙋ́ть є҆пі́скопы, и҆лѝ принадлежа́тъ къ кли́рꙋ, да бꙋ́дꙋтъ чꙋ́жды, є҆пі́скопы є҆пі́скопства, и҆ кли́рїки кли́ра: а҆́ще же мїрѧ́не, да бꙋ́дꙋтъ пре́даны а҆на́ѳемѣ. Ра́внымъ ѻ҆́бразомъ, а҆́ще є҆пі́скопы, и҆лѝ кли́рїки, и҆лѝ мїрѧ́не ꙗ҆вѧ́тсѧ мꙋ́дрствꙋющими, и҆лѝ ᲂу҆ча́щими томꙋ̀, что̀ соде́ржитсѧ въ предста́вленномъ ѿ пресвѵ́тера харі́сїа и҆зложе́нїи, ѡ҆ воплоще́нїи є҆диноро́днагѡ сн҃а бж҃їѧ, и҆лѝ скве́рнымъ и҆ развращє́ннымъ несто́рїевымъ догма́тамъ, кото́рые при се́мъ и҆ приложены̀: да подлежа́тъ рѣше́нїю сегѡ̀ свѧта́гѡ и҆ вселе́нскагѡ собо́ра, то́ є҆сть, є҆пі́скопъ да бꙋ́детъ чꙋ́ждъ є҆пі́скопства, и҆ да бꙋ́детъ низложе́нъ: кли́рїкъ подо́бнѡ да бꙋ́детъ и҆зве́рженъ и҆з̾ кли́ра: а҆́ще же мїрѧни́нъ, да бꙋ́детъ пре́данъ а҆на́ѳемѣ, ка́къ ска́зано.

Пред̾ си́мъ на собо́рѣ чи́танъ сѷмво́лъ нїке́йскїй, и҆ поврежде́нное и҆зложе́нїе сѷмво́ла, предста́вленное собо́рꙋ фїладельфі́йскимъ пресвѵ́теромъ харі́сїемъ.

Пра́вило и҃.

Дѣ́ло, вопрекѝ постановле́нїѧмъ церкѡ́внымъ, и҆ пра́виламъ ст҃ы́хъ а҆по́стѡлъ, нововводи́мое, и҆ посѧга́ющее на свобо́дꙋ всѣ́хъ, возвѣсти́лъ бг҃олюбе́знѣйшїй соепі́скопъ ригі́нъ, и҆ сꙋ́щїе съ ни́мъ благоговѣ́йнѣйшїе є҆пі́скопы кѵ́прскїѧ ѻ҆́бласти, зинѡ́нъ и҆ є҆ѵа́грїй. Чегѡ̀ ра́ди, поне́же ѻ҆бще́ствєнныѧ болѣ́зни тре́бꙋютъ сильнѣ́йшагѡ врачевства̀, ꙗ҆́кѡ бо́льшїй вре́дъ приносѧ́щыѧ, и҆ наипа́че, а҆́ще и҆ дре́внѧгѡ ѻ҆быкнове́нїѧ не бы́ло, что́бы є҆пі́скопъ гра́да а҆нтїохі́и соверша́лъ поставлє́нїѧ въ кѵ́прѣ, ка́къ пи́сьменнѡ и҆ слове́снѡ возвѣсти́ли на́мъ благоговѣ́йнѣйшїе мꙋ́жи, къ свѧто́мꙋ собо́рꙋ прише́дшїе: то нача́льствꙋющїе во свѧты́хъ кѵ́прскихъ це́рквахъ да и҆мѣ́ютъ свобо́дꙋ, без̾ притѧза́нїѧ къ ни́мъ, и҆ без̾ стѣсне́нїѧ и҆́хъ, по пра́виламъ свѧты́хъ ѻ҆тє́цъ, и҆ по дре́внемꙋ ѻ҆быкнове́нїю, са́ми собо́ю соверша́ти поставле́нїе благоговѣ́йнѣйшихъ є҆пі́скопѡвъ. То́ же да соблюда́етсѧ и҆ въ и҆ны́хъ ѻ҆́бластѧхъ, и҆ повсю́дꙋ въ є҆па́рхїѧхъ: дабы̀ никто̀ и҆з̾ бг҃олюбе́знѣйшихъ є҆пі́скопѡвъ не простира́лъ вла́сти на и҆нꙋ́ю є҆па́рхїю, кото́раѧ пре́жде и҆ снача́ла не была̀ под̾ рꙋко́ю є҆гѡ̀, и҆лѝ є҆гѡ̀ предше́ственникѡвъ: но а҆́ще кто̀ просте́ръ, и҆ наси́льственнѡ какꙋ́ю є҆па́рхїю себѣ̀ подчини́лъ, да ѿда́стъ ѻ҆́нꙋю: да не престꙋпа́ютсѧ пра̑вила ѻ҆тє́цъ: да не вкра́дываетсѧ, под̾ ви́домъ свѧщеннодѣ́йствїѧ, надме́нность вла́сти мїрскі́ѧ: и҆ да не ᲂу҆тра́тимъ по ма́лꙋ, непримѣ́тнѡ, тоѧ̀ свобо́ды, кото́рꙋю дарова́лъ на́мъ кро́вїю свое́ю гдⷭ҇ь на́шъ і҆и҃съ хрⷭ҇то́съ, ѡ҆свободи́тель всѣ́хъ человѣ́кѡвъ. И҆ та́къ свѧто́мꙋ и҆ вселе́нскомꙋ собо́рꙋ ᲂу҆го́дно, что́бы всѧ́каѧ є҆па́рхїѧ сохранѧ́ла въ чистотѣ̀, и҆ без̾ стѣсне́нїѧ, снача́ла принадлежа́щыѧ є҆́й права̀, по ѻ҆бы́чаю и҆здре́вле ᲂу҆тверди́вшемꙋсѧ. Ка́ждый митрополі́тъ, длѧ своегѡ̀ ᲂу҆достовѣре́нїѧ, мо́жетъ невозбра́ннѡ взѧ́ти спи́сокъ съ сегѡ̀ постановле́нїѧ. А҆́ще же кто̀ предло́житъ постановле́нїе проти́вное томꙋ̀, что̀ ны́нѣ ѡ҆предѣлено̀: ᲂу҆го́дно всемꙋ̀ свѧто́мꙋ и҆ вселе́нскомꙋ собо́рꙋ, да бꙋ́детъ ѻ҆но̀ недѣйстви́тельно.

Посла́нїе
тогѡ́ же ст҃а́гѡ вселе́нскагѡ тре́тїѧгѡ собо́ра
къ свѧще́нномꙋ собо́рꙋ памфѷлі́йскомꙋ ѡ҆ є҆ѵста́ѳїи, бы́вшемъ и҆́хъ митрополі́тѣ.

Поне́же бг҃одꙋхнове́нное писа́нїе глаго́летъ: съ совѣ́томъ всѐ творѝ: то наипа́че полꙋчи́вшымъ жре́бїй свѧще́ннагѡ слꙋже́нїѧ подоба́етъ со всѧ́кою то́чностїю твори́ти разсмотре́нїе ѡ҆ все́мъ, что̀ дѣ́лати до́лжно. И҆́бо съ жела́ющими та́кѡ провожда́ти жи́знь свою̀ послѣ́дꙋетъ то̀, что̀ ѻ҆нѝ ѡ҆брѣта́ютсѧ въ благонаде́жномъ положе́нїи, и҆ ꙗ҆́кѡ попꙋ́тнымъ вѣ́тромъ несꙋ́тсѧ, по направле́нїю жела́нїй. Сло́во сїѐ весьма̀ правдоподо́бно. И҆ногда́ же быва́етъ, что̀ го́рькаѧ и҆ несно́снаѧ ско́рбь, нале́гши на ᲂу҆́мъ, си́льнѡ возмꙋща́етъ ѻ҆́ный, ᲂу҆клонѧ́етъ ѿ стремле́нїѧ къ до́лжномꙋ, и҆ располага́етъ, а҆́ки бы на нѣ́что поле́зное, взира́ти на неблагопрїѧ́тное по сꙋществꙋ̀ своемꙋ̀. Нѣ́что таково́е ᲂу҆смотрѣ́ли мы̀ приключи́вшеесѧ благоговѣ́йнѣйшемꙋ и҆ благочести́вѣйшемꙋ є҆пі́скопꙋ є҆ѵста́ѳїю. Ѻ҆́нъ рꙋкоположе́нъ, ка́къ засвидѣ́тельствовано, по пра́виламъ церкѡ́внымъ. Бы́въ же нѣ́которыми смꙋще́нъ, ка́къ ска́зываетъ, и҆ подве́ргшисѧ неѡжи̑даннымъ ѡ҆бстоѧ́тельствамъ, пото́мъ, по причи́нѣ и҆зли́шнїѧ недѣ́ѧтельности, ᲂу҆томле́нный борьбо́ю съ ѡ҆бремени́вшими є҆го̀ забо́тами, и҆ не возмо́гшїй ѿрази́ти нарека́нїѧ проти́вникѡвъ свои́хъ, не вѣ́даемъ ка́кѡ, предста́вилъ пи́сменное ѿрече́нїе ѿ своеѧ̀ є҆па́рхїи. И҆́бо є҆мꙋ̀, ꙗ҆́кѡ є҆ди́ножды прїѧ́вшемꙋ на себѧ̀ свѧщеннонача́льственное попече́нїе, подоба́ло ᲂу҆де́рживати ѻ҆́ное съ дꙋхо́вною крѣ́постїю, ка́къ бы воѡрꙋжа́тисѧ на трꙋды̀, и҆ ѻ҆хо́тнѡ преноси́ти по́тъ, ѡ҆бѣща́ющїй воздаѧ́нїе. А҆ поне́же показа́лъ ѻ҆́нъ себѧ̀ є҆ди́ножды нетща́тельнымъ, хотѧ̀ сїѐ произошло̀ съ ни́мъ бо́лѣе по недѣ́ѧтельности, не́жели по нерадѣ́нїю и҆ лѣ́ности: то ва́ше благоче́стїе по неѡбходи́мости рꙋкоположи́ли благоговѣ́йнѣйшаго и҆ благочести́вѣйшаго бра́та на́шего и҆ соепі́скопа ѳео́дѡра, длѧ ᲂу҆правле́нїѧ це́рковїю: и҆́бо не слѣ́довало є҆́й вдо́вствовати, и҆ без̾ предстоѧ́телѧ бы́ти сп҃си́телевꙋ ста́дꙋ. Но поне́же прише́лъ ѻ҆́нъ со слеза́ми, не гра́дъ, нижѐ це́рковь ѡ҆спо́риваѧ ᲂу҆ вышерече́ннагѡ благочести́вѣйшагѡ є҆пі́скопа ѳео́дѡра, но просѧ̀ то́кмѡ че́сти и҆ и҆менова́нїѧ є҆пі́скопскагѡ: то всѣ̀ мы̀ возсоболѣ́зновали ѡ҆ ста́рцѣ се́мъ, и҆ почита́ѧ сле́зы є҆гѡ̀ ѻ҆́бщими всѣ́мъ на́мъ, поспѣши́ли ᲂу҆вѣ́дати, подве́ргсѧ ли ѻ҆́нъ зако́нномꙋ и҆зверже́нїю, и҆лѝ то́кмѡ въ нѣ́которыхъ неꙋмѣ́стныхъ постꙋ́пкахъ ѡ҆блича́емь бы́лъ нѣ́кими людьмѝ. помрачи́вшими є҆гѡ̀ до́брꙋю сла́вꙋ. И҆ мы̀ ᲂу҆вѣ́дали, ꙗ҆́кѡ ничегѡ̀ такова́гѡ и҆́мъ не содѣ́лано, а҆ наипа́че въ винꙋ̀ є҆мꙋ̀ поста́влено ѿрече́нїе ѿ є҆па́рхїи. Чегѡ̀ ра́ди не ᲂу҆корѧ́емъ и҆ ва́ше благоче́стїе, до́лжнымъ ѻ҆́бразомъ поста́вившее на є҆гѡ̀ мѣ́сто вышерече́ннаго благоговѣ́йнѣйшаго є҆пі́скопа ѳео́дѡра. Но поне́же не подоба́етъ мно́гѡ порица́ти недѣ́ѧтельность сегѡ̀ мꙋ́жа, па́че же надлежа́ло поми́ловати ста́рца, внѣ̀ гра́да, въ кото́ромъ роди́лсѧ, и҆ внѣ̀ ѻ҆те́ческагѡ жили́ща сто́ль до́лгое вре́мѧ пребы́вшаго: пра́веднѡ сꙋди́ли мы̀, и҆ ѡ҆предѣли́ли: без̾ всѧ́кагѡ прекосло́вїѧ и҆мѣ́ти є҆мꙋ̀ и҆́мѧ, и҆ че́сть є҆пі́скопа, и҆ ѡ҆бще́нїе: съ тѣ́мъ то́кмѡ, что́бы ѻ҆́нъ не рꙋкополага́лъ, не занима́лъ це́ркви, и҆ самовла́стнѡ не свѧщеннодѣ́йствовалъ: но ра́звѣ когда̀ и҆лѝ пригласи́тъ съ собо́ю, и҆лѝ, а҆́ще слꙋчи́тсѧ, позво́литъ є҆мꙋ̀ бра́тъ и҆ соепі́скопъ, по благорасположе́нїю, и҆ любвѝ во хрⷭ҇тѣ̀. А҆́ще же поло́жите ѡ҆ не́мъ како́й бо́лѣе благоскло́нный совѣ́тъ, ны́нѣ и҆лѝ посе́мъ: то и҆ сїѐ ᲂу҆го́дно бꙋ́детъ свѧто́мꙋ собо́рꙋ.