Йәшлекте һағыныу

← Тынма, ямғыр!

Йәшлекте һағыныу (Шиғыр) автор Лилиә Һаҡмар

Өмөтөмдө ҡалдыр →

Ижад итеү ваҡыты: 1989. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (67-се бит) ISBN 5-295-03798-3

Йәшлекте һағыныу

Ҡасандыр бит мин дә шулай шат инем,
Бойоғоу һәм бошоноуҙар ят ине,
Һағыштар ҙа ҡара түгел аҡ ине,
Тик бер мәлгә шул саҡтарға ҡайт ине.

Альбомдағы һүрәттәрҙән йылмаям.
Ярай әле улар бөгөн уңмаған,
Күҙҙәремә һары һағыш тулмаған –
Киләсәккә тик шатлығым булмаған.

Әй, йәшлегем, күкрәнең дә ялҡында,
Ҡойоп-ҡойоп ямғыр яуҙы артыңдан.
Юлдарым юҡ һиңә кире ҡайтырға,
Түҙемлек бир йән өшөткөс һалҡында.

Һүрәткә лә төшөрмәгеҙ үҙемде –
Йәшерә алмам һағыш тулы күҙемде,
Ҡасандыр бер балҡып һүнгән шатлығым
Һеҙгә шулай мәңге булып күренһен!

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар