Егәрле ел

Егәрле ел (Шиғыр)
автор Лилиә Һаҡмар

Ижад итеү ваҡыты: 21.03.1990. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (87-се бит) ISBN 5-295-03798-3

Егәрле ел

Егәрле ел болот-яҫтыҡтарҙы,
Урындыҡтың өйөп ситенә,
Ашъяулыҡтың зәп-зәңгәрен йәйеп,
Ҡунаҡтарға туҫтаҡ килтерә.
Ашъяулыҡҡа теҙмәйенсә бер ни
Болоттарға сума тиҙ генә,
Туҫтағынан көлтә-көлтә булып
Нур һибелә, ялҡын һибелә...

Яҫтыҡ-болоттарҙы күперткеләп,
Егәрле ел йөрөй йүгереп,
Ә тәбиғәт шундай ҡәнәғәт бит,
Йылы Ҡояш нурын һемереп!

Башҡа бер ни кәрәк түгел бөгөн
Ямғырҙарҙан ялҡҡан урманға.
Ниҙәр бирһәгеҙ ҙә тәмен юйыр
Табындарҙа ҡояш булғанда,
Күңелемә йырҙар тулғанда...