Эрзянь ёвкст (М. Е. Евсевьев, 1928)/37
| ←Ёвкс 36 | Эрзянь ёвкст (1928) , edited by Евсевьев, Макар Евсевьевич Ёвкс 37 |
Ёвкс 38→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ДИГИНЕТЬ.
Эрясть-айшть атят бабат кавонест. Ульнесь сынст тейтерьнест да вишка цёрынест. Авазо мери тейтерьнестень: „Минь, дочам, мольдянок паксяв нуйме. Тон самозонок ванык ялаксот, ков-гак кардайстэ иля листь!”
Тусть атят-бабат паксяв. Тейтерьнесь стувтыньзе аванзо валтнэнь: ливтизе ялаксонзо ульцяв, озавтызе луга ланкс, а сонсь тусь ялганзо марто налксеме.
Ливтясть кавто дигинеть, озавтызь эйкакшонть лангозост и тусть ливтязь.
Сась тейтерьнесь ялаксонзо вачамо — ялаксось арась. Тев берьть чии, тов берьть, — косояк арась. Кармась аварьдеме. Аварьць, аварьць — лись паксяв. Вансы — вирь удалов ливтить дигат. Сон чаркоць — сынь салызь ялаксонзо. Тусь сасамост.
Чийсь, чийсь — ванцы — ки чиресэ ашти каштомо.
— Каштамо, а каштомо! ёвтык, ков дигатьне тусть ливтязь!
— Сэвик раужо кшем — ёвтаса!
— Кудосо монь тетянь товзюронь кшетьне-як а сэвевить! Карман тонть розень кшеде ярцамо.
Каштомось эсьсе ёвта. Тусь тейтерьнесь таго чиеме. Ванцы ашти умарь чувто.
— Чувт-умарь, а чувт-умарь! Ёвтык, ков дигатьне ливтясть?
— Сэвик чувт-умарем — ёвтаса!
— Монь тетянь садумарьтне-як а сэвевить, карман мон чувт-умарьде ярцамо!
Тусь таго чиеме.
Чийсь, чийсь — ванцы — ловцонь лей чуди, берёконзо куслянь.
— Ловцонь лейне, куслянь берёкке! Ёвтадо: ков дигатьне ливтясть?
[ 118 ]— Ярцак ловцо марто монь куслядон — ёвтан!
— Монь тетянь вельксэнь куслятьне-як а сэвевить, карман ловцонь куслядо ярцамо!
Чийсь, чийсь — понксь ки ланксонзо сеель. Кучкордыксэльсе сеельсть ды пельсь пильгензэ пупавмодо и кевстизе сонзэ.
— Сеельне, а сеельне! Эзить ней-ли, ков ливтясть дигатьне?
— Оно тов! — невць сеельсь.
Тейтерьнесь тусь чийме. Ванцы — кудыне. Кудынесэнть уды яга-баба. Ялаксозо ашти эземсэ озадо, — сырьнень ал кецэнзэ.
Тейтерьнесь мольсь салава, саизе эземстэ ялаксонть и чиезь мартонзо. Дигинетьне неизь сонзэ и кармасть мельганзо панеме. Тейтерьсь вансы — икелензэ ловцонь лей чуди, берёконзо куслянь, и мери тензэ: „Лейне, а лейне, кекшимак монь!”
— Ярцак монь куслядон — кекштян!
Теемс а мезе — кармась ярцамо куслядонзо.
Лейсь озавтызе тейтерьненть, береконзо алов — и дигатьне вакска тусьть.
Лись тейтерьнесь берёксть алдо и давай таго чийме ялаксонзо маро. Дигатьне велявцьть мекев и ливтить каршозонзо. Месть теемс тейтерьстень, — козо кекшемс?
Ваны — икелензэ чувт-умарь чувто. Сон мери тензэ: „Чувт-умарь чувто, а чувт-умарь чувто! кекшимак монь, инескеть!”
— Сэвик чувт-умарем — кекштян!
Тейтерьнесь седе курок сэвизе чувт-умарензэ и чувт-умарь чувтось кекшизе тарадонзо поц — лопасонзо вельтизе.
Дигатьне вельксканзо ливтясть — эзизь нейть тейтерьненьть ялаксонзо марто.
Лись тейтерьнесь ялаксонзо марто и давай таго чиеме. А дигатьне неизь и кармасть мельгаст паньме. Вот-вот кундасызь сынст, — лапасост мик чавить. Ваны тейтерьсь — ки ланксо ашти каштомо. Сон мери [ 119 ]тензэ: „Каштомо, а каштомо кекшимак монь, инескеть!”
— Сэвик раужо кшем — кекштян!
Тейтерьнесь седе курок кшенть кургозонзо, соньсь ялаксонзо марто эцесь каштомостень.
Дигатьне ливтнесть, ливтнесть каштомонть перька, пижнесть, пижнесть — тусть мекев кудов.
Тейтерьнесь лись каштомостонть ялаксонзо марто и чиезь кудов.