Эрзянь ёвкст (М. Е. Евсевьев, 1928)/38

From Wikisource
Jump to navigation Jump to search
Эрзянь ёвкст  (1928) 
Эрзя ломанть, edited by Евсевьев, Макар Евсевьевич
Ёвкс 38
Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928
[ 119 ]

ЧЕЕРНЕ.

Мольсь чеерне вирев пештеде ярснеме. Пачкоць тумо алов, прась прязонзо сэря, майшть превензэ и тусь киява чиезь.

Чийсь, чийсь — понксь каршозонзо нумолнэ.

— Тон, чеерне, ков истя чият?

— Ох, нумолнэ, менель ластоць, монь пряс прась, превень-гак майшть!

— Саимак монь-гак марот.

— Адя!

Тусть кавнест чиезь.

Чийсть, чийсть — понксь каршозост ривеське.

— Тон, чеерне, ков истя чият?

— Ох, ривеське, менель ластоць, монь пряс прась, превеньгак майшть!

— Саимак моньгак мартот!

— Адя!

Тусь чиеме колмонест. Чийсть, чийсть — понксь каршозост вергис.

— Тон, чеерне, ков чият?

— Ох, вергис, менель ластоць, монь пряс прась, превеньгак майшть!

— Саимак монь-гак марот!

— Адя!

Тусть чиеме ниленест. Чийсть, чийсть — понксь каршозост овтыне.

[ 120 ]— Тон, чеерне, ков истя чият?

— Ох, овтыне, менель ластоць, монь пряс прась, превень-гак майшть!

— Саимак монь-гак марот!

— Адя!

Тусть чийме ветенест. Чийсть, чийсть... бух! весе латкс прасть. Ащить весе латксонть, а лисевить. Аламос ащезь овто мери: „Монь пекем вачсь”. Лиятьне-як мерить: „Минекак вачть”. Овто мери: „давайте серьгеттянок, кинь вайгельзэ весемеде човине, сень сэвсынекь”. Сергецть. Чеернень вайгельзэ весемеде човине. Чеернень сэвизь. Ривеське ве сускомне кекшсь пулонзо алов.

Аламос ащезь таго пекест вачть. Таго сергецть. Нумолнэнь вайгельзэ весемеде човине ульсь. Нумолонь-гак севизь. Ривеське таго ве сускомнэ кекшсь пулонзо алов. Аламос аштезь таго пекест вачть. Таго сергецть. Вергизэнь вайгельзэ весемеде човине ульсь.

Сэвизь вергизэньгак. Ривеське таго пулонзо алов ве сускомне кекшсь. Аламос аштезь таго пекест вачсть. Ривеське салавинька таргась пулонзо алдо кекшезь сускомне ды ярцы. Неизе сонзэ ярцамодо овто ды мери: „Тон мезьде, ривеське, ярцат?”

— Сюлодон-пекедень!

— Таньтейть?

— Вельть таньтейть!

— Тука монень вачамс.

Ривеське максь тензэ аламошка. Овтонь мельс — тусть.

— Кода тон таргить? Тонавтумак монь-гак! — мери овто.

— Вана кода, — мери ривеське, — тонгик лапат удалгат пекезэть, да мезе виеть уск сюлот-пекеть!

Овто тонгизе лапанзо и сётор! таргиньзе сюлонзо-пекензэ, сонсь прась ды кулось.

Ривеське куйсь лангозонзо да лись латкостонть.