Ваҡыт үлсәме (шиғыр)

← Вокзалда хушлашыу

Ваҡыт үлсәме (шиғыр) автор Лилиә Һаҡмар

Ышанам һөйөүеңә →

Ижад итеү ваҡыты: 1983 йыл. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (25-се бит) ISBN 5-295-03798-3

ВАҠЫТ ҮЛСӘМЕ

Һине көтәм,
        көтәм, көтәм…
Көндәр йомғағын һүтәм –
Беҙҙең күрешмәгәнгә бит
Ай-һай күп ваҡыт үткән.

Һарыларға һабыштырып,
Бер ай үткәнме, тиһәм,
Минең һине күрмәгәнгә
Өс көн дә өс төн икән…
Һин янымда.
       Янда, йәндә…
Телем – һандуғас теле,
Йөрәгем – һөйөү баҡсаһы,
Ә сәскәһе – һин үҙең!

Йәшенләп яуған ямғырҙа
Өс минут үтте, тиһәм,
Һөйөү усағы дөрләгән
Өс көн дә өс төн икән!

Ваҡыт үлсәмен үҙгәртер
Һөйөүгә һыуһаған йән!
Юлдарымдың, йылдарымдың
Һинһеҙ үткәндәре йәл.

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар
• Йыр. "Көтәм". Дилә Мөхәмәтйәрова йырлай [1]