Ванине (2011)/2
[31]
| II |
«Фу! Окойники муевсь песькак, — мерсь эськанзо Куля мельспародонть ярсамонь кедьгетнень таркаваст путнемстэ. — Прядовсть чоподасто чоподас ботамотне!» Нардтнинзе кедензэ, мадстизе толонть, экше кияксканть ютась коникензэ ваксс, ливчанясто каинзе лангстонзо юбканзо-ковтанзо ды юмболк совась кельме велькссэнть алов. Микольтеме таркась келейгадсь, мадть [32] кода мелеть: кирьмицявозь, кунст, вить эли керш бокат лангс. Кияк мезеяк а мери. Миколь арась, пелемс — кодаяк илязо токаво пильгсэть эли кедьсэть, илязо путово кедеть штапо лавтовонзо лангс — а савкшны. Венемтинзе пильгензэ. У-у-у... Якшамо... Копачизе прянзояк. Куля вечксь матедевемадо икеле аштемс зярскак кунст ды сельмень конязь арсемс ютазь чиденть, цётамс, мезе теевсь, мезе арась.
Весе. Прядовсть, прок ведьс ваясть, чинь-вень ацирьгалематне-сёвноматне, кавтолдоматне, оймень сэредькстнэ ды майсематне. Ней сынтемест натой мезе-бути а сатны. Теке ёмась мезе-бути эрявикс, ды аёвтавикс потмовий ледстни-кармавты вешнеме сонзэ. Кодамо стака арасель-тонадовкшнось. Ней тонадома од, сэтьме, аволь эрьва мейсэ шожда ды ськамот эрямонтень.
Шкась, кортыть превейтне, — ойме ёжонь витиця, ормань-тарвонь пансиця. Апаронтькак, вадрянтькак сон тенси стувтомань шукшпряс. Тень каршо пелькстамотне — сувтемесэ ведень амолямот. Те, кода мерсть превей гректне, — аксиома. Кулянь седейстэ аламонь-аламонь кармасть перьгелеме Миколь марто вейсэнь эрямонь сэредькстнэ, куломань-калмамонь макшиявтыця ризкстнэ, мелявкстнэ. Шкась ды тевтне — весемеде кеме ды нардев ормаменсть. Ризнэк, кувсек, ченярдт, черть раздек... тевтне, куш сезевть, теемат. Скалонть потявтома, ловсонть педяма, ракшатне андомат-симдемат, мельгаст урядама, вазонть лугав ветяма, теде башка уштома, пидема-панема ... Эрьгть зняро а эрсить аванть киргасо, зяро тевть сонзэ учить кудосо-кардазсо. А пиренсетне? Лововить мейсэяк, кельгстявить козоньгак? Весе сынст теема шкастост. Ацави модась ашосо — ламо-мезе уш а теят. А вана зярс лембе, сави цидярдомс. Те чарькодеви нурька нерь озязонтеньгак.
«Ужока, юбкань кандтний, арсека! Ну мезекс тонеть, уроз прязот, пельгектар модамартне? — весть та-кода чокшнеланга арсезевсь эсь эрямодонзо Куля. — Мезе, мельган пакша керькс чийни? «Соткатнень», тонсь арсек, путомат, кочкомат, вальсемат, таргамат, каськава-мацтка каямат... А седе икеле, путома шкасто? Вай, таргонь-омбоцень перть чийнек трактор мельга! Сокама кодаяк моданть! Вый, вый! А карман эсь прям истя телькемекшнеме. Зяро шка ютавтан, вийть путан... Ну мезекс те весе? Ськамон, ськамон ней мон... Вай, Верепаз! Кавонек ульнинек, кавонек ускинек. Каня ней тень зняротне изнявить? Скалонть эно кадса, ловсовтомо а кода. Кадык фермасто [33] ловсынеяк кой-зярдо мерить сайнемеде, ялатеке Ашайтеме кардазось а кардаз. Ловсозояк паро, теке велькс. Вадря скалось, сэтьме. Стака карми ськамон, ды уш кодаяк... Микольнень ней тосо мезеяк а эряви: а пенгть, а скал, а тикше, а пирень тевть... Тосо сыненст мезе эряви, весе ули. Модарькаст путозь, ракшаст андозь, пенгест лазнозь-анокстазь... Котянот лисемс ботамс а эряви, аволь кода тесэ. Тосо кияк а ранги, а музгорди, а ирдексты, тосо свал кашт, кияк киньгак а сялды. Тосо эйкакшткак а эрявить, вень куншкава эйзэть эциця полантькак а эрявкшны мелензэ топавтнемс. Эно мекс тов правтыцятнеде аламо? Мекс пеень сускозь бажатано а озамс се пародо пешксе, апак капша ардыця, толдо-валдодо а содыця крандазонтень?»
Неть мельтнень марто авась велявтсь — чикорк мерсь ташто коникесь — вить бока лангс, путызе кедь лапушканзо прянзо алов ды куроксто ваясь удомань отьмантень, тусь ашолгадомс тов, косо Миколенстэнь те ашолгадомась зярдояк а учови.
* * *
Ютась телесь, мельганзо ювкадсь тундось. Ды таго Кузвелес сась кизэ. Миколень куломачидензэ мейле топодсь ие. Лемензэ кундамо чопоньпелев пурнавсть Дораень раськензэ. Валдаень ёндо сакшность Кулянь авазо Клавдя — кода сыредсь кемень малава иетнень перть! — ды веженсь сазорозо Люба. Састь шабратнеяк. Эрьвась кандсь мартонзо почт ваканнэ ды эйзэнзэ «озавтозь» саразонь колмо-ниле алнэть. Чаво кедть лемень кундамо а якить. Эрзянь кезэрень ила. Покштянь покштянок ушодокшнызе Сон корты вейкеде: ломантне свал, пингестэ пингес бажасть лездамо вейкест-вейкест туртов, лездамо эрьва мейсэ. Сонтемензэ авольть изняво эрямонь стакачитне, аволь тееве ломанесь ломанькс. Нейгак. Куш войнась прядовсь талай, ялатеке асатыкстнэ эрьва ужосот. Каня а маштовить почткетне-алнэтне? Теяк: молест-пачкодест ярсамкатне-симемапельтне тоначисэ покштянь покштятненень, иньаватненень. Туезэ мелезэст.
Пазаватнень-«святойтнень» икеле киньгак апак кунсоло пикстерди, теи эсь цислань-эрьганьтевензэ штатолнэ. Эйстэнзэ штань, кизэде ды умоктояк умонь шкатнеде ледстниця чинесь маряви кудонть келес. Толкельнесь липни, эль неявомга менчеви тей-тов ве таркасо а аштиця кошттонть, эль неявикс содозо раужо суринекс кузи потолоконть пелев.
Ловныцясь, прясто пильгс раужосто оршазь сыре сэрей [34] ава-ломанесь, панжизе эчке чопода ланго, таштодояк ташто книганзо, комавтызе велькссэзэнзэ пацясо прянзо ды кундась тевезэнзэ. Ба-ба-ба, ба-ба-ба-а, — каятотсь сэтьме, удомань савтыця вайгелезэ. Весе кунсолыть. Марямс кияк а мари. Каня чарькодьсыть та-кодамо ят кельсэ тапарявиця, мекев-васов нилексть-ветексть ёвтнезь некеть валтнэнь? Мезде кортави? Сеедьстэ марсеви та-кодамо «аминесь». Те мезе, ломанень лем? Пародо? Илязо уле берянде... Ловт, сядонь кирда ёвтави «аллилуйя» валось. Те мезде? Содык азё!
Канонось прядовсь. Удомань савтыця вайгелесь энгамсь. Сыцятне чатьмонезь ойсесть пурназь-анокстазь стуворонть перька. Кие-бути эйстэст ёвтась ниле-вете энялдомань валт Верепазонтень, ды чатьмонезь кундасть коршнеме, коень коряс, ямнеде, теде мейле каясть ловсос пидезь, скал ойсэ таньшкавтозь суронь каша. Танте-ей те кашась! Каня войнань шкасто истят ярсамопельть путневсть калмамсто-лемень кундамсто?! Зяронь калмамс савкшнось сеть иетнестэ!.. Вай, седе ён теде а ледстнемскак! Стамбарнэ, теке тошказь, кортнесть, ледстнесть Микольде, сонзэ паро, седеймариця обуцядонзо, лезэв тевдензэ. «Тов туицятнеде эли чатьмонить, эли кортыть вадрясто» валмеревксэсь кирдевсь тесэяк. Видьстэ меремс, кие пурнавозтнеде, Кулядо башка, содась цёранть аксунгалемадонзо ды берянь ёнкстонзо? Кияк эзь марсе сонзэ оймеёжонь ды рунгонь ормадонзо-тарводонзо. Пинггемадонзояк. Ансяк сон, Куля, «варчнинзе» чопода ветнень седеень пултый апарост, ансяк сон содась тувталдонть, мекс истя прянзо ветясь, мекс истямоль Миколень обуцязо. Уцяска... Эйстэнзэ а оргодят, прялкс алов прят а эвкстасак, пилеть а потомдасыть, каськаскак а валгат.
* * *
Эзь кенере кизэнь ашолгадомась вальматнева педе-пес совамо — Куля уш пильге лангсоль, прясто пильгс тевсэль. Веле. Эно кода лиякс? Мелявкстнэ тесэ сёлтсо а пирявить. Ков эйстэст кекшат? Валскескак а кадсыть — седеяк таштавить. Ёрвалдык седе курокке удомадо мейле чамат, нардак-тейть ды нулк-нулк потявтома ведрат марто кардазов. Симдик скалонть, макст тензэ эчке салсо почодозь кши кочомне, озак алонзо потявтомонзо. Мейле ильтик стадав. Мейле?.. Вай, зяро неть «мейлетнеде»! Мейле совавтык ведра ловсот кудос, педик, кайсик балакирьга-кува. Иляк стувто перькат эвтиця — секень вант правтанзат! — ашо меште раужо [35] Васьканьгак. Кода эно? Сонензэяк мель явома. Чеертне тензэ аволь свал понгонить. Окойники ловсось аравтневсь таркава-эземга. «Вай, допрок стувтокшныя! Течи ой пивтема, вельксэсь таштавсь байтяк», — ледстявсь Кулянень. Ней уштык — пенгтне чокшне совавтозь — каштомот, лакавт ведь, пидек-панть ярсамс, каяк, мезе арсят, апештевиця кургонтень ды — курокке, выр-выр фермав...
Те «ильичтне», «Путь Ильича» шабра колхозонь потявтыцятне ды андыцятне, пачколить «фирмас», мерть, чикуншка малава. Нузякс бадулят, удомаст таргсить! Кузвелень колхозонь прявтось, Чудожовонь Дрига, тень кис качост киртневлинзе. Кото чассо скалтнэ яксест-порнест лёмга-лаймева. Эно кода? Валскесь — самай-самай, сехте паро ловсонь таштамо шка. Сюракштне авторязь авторить, скирязь скирить потьмежа тикшенть. Зярс чипаесь вийс эзь сова, зярс промотне-карвотне истя а сусконить, пештть пекеть! Истя лиясто тороземить одарост, кой-конатнень потестэст молемстэ ловсо цильцькаи. Сон, ловсось, видестэ редязь, скалонть кельсэ. Валскень шкась менстяви — ловсо иля учо. Ведьсэяк планот а топавтсак. Секс Чудож Дрига вадовонь пшти вановтсо ваны фермань тевтнень мельга. Мезе а истя, кежейстэ лыказевить пшти пе раужо муюконзо, седеяк «изазеви» фронтто мейле виде, теке чувтонь, а менчевиця керш пильгезэ. Сон аволь кортакшовтнеде. Вал ёвты — озават. Истямо уш Кузвелень колхозонь прявтось. Чудож...
Кись Кулянень содавикс. Зяроце ие уш онкстни кувалмонзо эрьва чистэ кавксть. Юткоськак эно аволь эль эскелявиця. Фермаст, конанень тонадсть меремс МЫТЫФЫ, веленть песэ. Вайгельпешка эйзэнзэ. Таркаськак мазый. Пиче виресь чирькекс пири эйсэнзэ пелеве ёнксонь казямо варматнеде. Аволь васоло эрьке. Седе товолга, чикуншка ёнга, чуди-менчеви ков-бути свал эрязкалиця — пели а кенери — Инелеесь.
Сась Куля шкастонзо. Ды зярдо сон истя эзь сакшно? Ялганзо — Укштор Таня, Сеськень Таня, Пупор Люба, Шорянь Агай... — весе аволь келей кувака латонть алольть. Каштмолезь саизе потявтома ведранзо, нардамонзо-мезензэ ды лиятнень марто сыргась кардс, «группазонзо». Истя мерить эрьва потявтыцянть мельга сёрмадозь скалтнэде-кеветее-кемгавксово прят. Чизэнзэ потявтомат кавксть эли мик колмоксть; лиси, чамдома колоньгемень-ниленьгемень одарт! Аволь, аволь шождынетнеде, кие соды, те тевесь. Кедть ды кедть эрявить. А стяко ламо иень [36] перть ламо потявтыцятнень кедест какарьгалить.
Важодема-нежедема чись совась виезэнзэ.
Валскень потявтома. Те весемеде покш мелявкс. Куля потявтозь ловсонзо кайсизе флягатнева, ды уш мелензэ чарасть кудов сыргамодо. Тесэ ваксозонзо сась фермань прявтось. Весе, вейкень пес эрзят, а вана «прявт» валонть кияк превсэнзэ а кирди, весе — заведующий эли завфермой. Весть «зав», омбоцеде. .. тонадови. Кода иляк «сёвно», истямось — Пошань Оло. Самай се Олось, конанень Кулянь кулелякшнызе Миколь полазо меельце орманзо шкасто, конань кувалма аволь весть ютксост кивчкаесь ёндол эли пракшнось талайс кирдевиця оймень соракавтыця кельме. «Завось» иеде-кавтодо Микольде сыре. Сон фронтсто мурдакшнось, ледстяса, войнанть прядовомадо икеле. Ве недявкссонть-тюремасонть пек томбазель, вить пильгезэ кумажадо алга тапазель. Савсь керямс. Кувать «кеверькшнесь» госпиталень кониксэ. Ней култык-култык яки мандоне лангс нежедезь.
Оло цёрась неявикс, мезеяк а мерят, мазычизэ иетнененьгак эзь олавтово. Сонсь сэрей, лавтовонзояк аволь теинеть. Виесь эйсэнзэ... «Одёр», мерить истятнэнень. Сисем цёранень а изняви.
Фермасо — а мезть кавтолдомс — Оло тензэ кияк а мери. Сон «начальник» ды лиякс, кода Владимир Петрович, пшкадеме иля арсеяк. А вечкеви тензэ, зярдо кияк, седе сыретнеде, маняви ды пшкади Оло. Мик тарск теи марязденть. Эрзятнень аволь ве пингень перть тонавтсть ды тонавтызь сюконякшномо-савтнеме эрьва сильдеентень. Ловомс сонзэ пандокс. А седе алкинекс. Каня а истя? Каня «рузокс» пшкалемась теде а ледстни? Мекс а ёвтамс эсенекс? Кирдажтненень сон кадоволь Олокс, седе одтнэнень — лелякс. Сыретненень — ялаксокс, ялгакс. «Оло леляй, од ведра тень эряви!» «Оло леляй, мон течи весемеде ламо потявтынь!» Мезень берянесь те пшкадемасонть? Эли аволь ваньксстэ гайги? Арась, свал маряк потсот кекшезь аштиця урексчи ды ловт эрьва «иваныченть», «петровиченть», «григориченть» верде кучозекс, вант кургозонзо, ловт эсь прят сёлмовтомо унжинекс.
— Зяро течи? Нилешка флягат а пештевить? — пшкадсь Оло цёкордозь, мизолкстонть чамаумарьсэнзэ кивчкадсть «варинетне». Сынь, мазый турванзо, «налксиця» сельмензэ, кодамо авань седей а полонить? Ломанесь эрьва мезес тонады. Тонадсть тесэнь важодицятне Олонь мазычинтеньгак: ули сон, арась... Паряк, кияк арсекшнияк эйстэнзэ, сельмтькак кайси, [37] ансяк теде соды сонсь «кайсицясь».
— Ну кода теть меремс... Кадовсь потявтомс вейке, маряви, нилецесь пешкеди, — мерсь Куля прянь апак кепеде, ведрастонть ловсонзо торсо каямсто. Саизе педямо марля панксонть, каизе чаво ведрантень ды клянць пекстызе фляганть.
— Те паро. Пиземетнеде мейле тикшесь уцорсо касы. Скалтнэ стяко пилыть а чавить лаймеванть яказь. Лиятнеяк седе ламо потявтсть, планонок топавтсынек, — чулгсесь валонзо Оло, сонсь эскельдясь допрок малав, эль эзь кома пилезэнзэ. — Теня, тон чокшне кудосо улят?
Куля лип меремс арсезевсь ды кепедизе вановтонзо Олонь чамас.
— Кудосо. Ну мезе мейле?
— Илязат лисе, мерян, ковгак. Мон теть сован.
— Мезекс?
— Кортамом ули.
— Кортак. Ки теть а мери.
— Ды теня...
— Мезе «теня», мезде кортамось?
— Кудосо, чокшне ёвтаса.
— Ёвтык тесэ. Мезекс кудось?
— Истя эряви.
— Вана мезе, Владимир Петрович, чаво валт иля ёмавтне. Чарькодинь, ков мендят. Оргодть эйстэнь. Аватне оно ваныть.
— Мон сан, — иерасто-калгодосто, валтнэнь лангс нежедезь, прядызе Оло кортамонзо ды, мандонензэ лангс нежелезь, чирелт-чирелт сыргась лагерень кудыненть пелев.
«Кода сат, истя туят», — мерсь эськанзо ды варштавкссо ильтизе авась «кортамо снартыцянть».
...Марязденть Кулянь содавтызе ачарькодевикс ёжо. Мельтне чаразевсть превсэнзэ. Сынст панемга седе капшазь, ёлдор-ёлдор прядынзе кедьгень шлямонь-нардамонь тевензэ ды ялганзо апак учо — эзизе кая лангстонзо фермань халатонзояк — сыргась кудов. Кодамо-бути аёвтавикс мель кирдевсь пряудемсэнзэ ды пансь кудов. Мекс — эзь чарькодеве.
Молемань перть эвтсть-чийнесть удемень менчевксканзо некеть арсематне: «Ну, сы. Сы инже. Мейле мезе? Мезень кажось? Ней мезе, кенкшенть чинек-венек тулодозь кирдемс? Сы — туи. Ну кода истя, чокшне сови тень? Шабратне, ды аволь ансяк сынь, редясызь. Лавгиця кельтне кецнить. Кургост а потомдасыть.
[38] Кулятне срадыть тундонь чадыведекс. Шожда меремс: сы — туи. Сы весть, омбоцеде. Велесь, лисьмаланготне шалнозевить верьга вайгельть. А низэ мариндеряй? Мари, кавтолдомс а мезть. Те, ловт, вальмат улить поркснезь штельксэнь пес». — авась талакадсь ды мик аламнеде тандадсь эсь мельдензэ. Теке басом, Олонь сялдомадо, кудос а нолдамодо башка арсезевсь сонзэ вастомадонзояк. «Лавшагаят, ава! — мерсь беряньстэ эседензэ эсензэ пачка. Ялатеке арсематне эзть кунсоло, ардтнесть эсь яннэваст. — Ну сы, мерян. Мезе карман тееме? — шоркадизе седеензэ апак учо кевкстемась. — Стуворнэ, лиси, пурнама? Инже, кода эно? Палыцядонтькак таргама. Ну кода сонтемензэ? Каваняса... Мезе седе тов? Меельце кевкстемадонть теевсь тензэ визькс, теке марто ютась пачканзо вечкевикс, седеень эждиця лембе коволнэ. — Эх, Миколь, Миколь, хоть Тосо улезэ теть модась чевте алксокс-вельксэкс. Кулелямосот прок ведьс ваныть — сы шка ды ёкол Оло, те апештевиця шанжавось, карми перькан чарамо, сельмензэ лангозон полашкавтнеме. Эх, Миколь, Миколь.... Сестэ сон, мерема, «фермань атяка каткась», вановткак лангозон эзь кепсе... Те сестэ, зярдо ульнесь берянь-паро мирдем, ульнить тень, Миколь, пирявксокс. Ней вана... Панжозян весе варматненень. Ней, теке келей луга куншкасо апак пиря тикше капа, эрьва азгондяй ракшась эци, эрьвась прянзо венстьсы — норови автордамс куш пакшке. Эх, Миколь, Миколь, кодамолить мазый, превей ды... пайстомо! Истямокс теимик моньгак. Арась-арась, тонь а чумондан. Мельсэньгак арась. Истя уш лиссь. Уцяска. Сонзэ эйстэ тусто чопода вирьс а кекшат. Аволь эряво, паряк, урьвакстомс теть? Ды мекс а урьвакстомс? Тон, а мезть кавтолдомс, пелевидьга цёралить! Улема, кемить, юты, кадтанзат тосо, «вардонь паксятнесэ» кундазь ормась, мурды, сы теть цёраломанень шумбрачись. Тень таркас на вана, седеяк сон азаргадсь ды панинзить тоначив.
Иень ютазь, калмамодот мейле, ялатеке Пошань чирьк-чирьк якицясь, прянзо галакс кандыцясь, муимим. Истяяк мереват: мон, видькстама, аволь сыре панго, одан, аволь кшнинь. Мекс а варчамс цёрань ёжо? Мезень тесэ пежетесь? Кулятне вана... Веленек кармить содамо! Секскак, Куля, мендик пулот пелягай пинекс ды чатьмонть. «Мон сан!» — та-кода кежейстэ ледстинзе Куля Олонь валонзо. — Ну сак, сак, коцькерьганось учи! Мезть сакшномс? Ушосонть кизэ, лембе, каня, чаула, а муеви теть, кудодо башка лия таркине? Яла превеекс ловтадо эсь прянк, кодат [39] тосо превть, а чарькодевиндеряй тенк теяк?»
...Уш сундерьгадозь Куля мотыгинесэ ютнинзе-кочкинзе чуросто путозь эмежень кой-кона пандятнень. Кудос совась уш чоподава. Тол вельмевтеме эзь карма. А мезекс. Сизесь, седе курок мадемс, оймамс. Шлинзе, таргась каштомсто ведь, пильгензэ, кайсесь, путнинзе оршамопелензэ пряпесэнзэ стулонть лангс ды венемсь. «Инешкипаз, — мерсь марямга, — течис, окойники, весе!» Матедевемадо икеле таго ледсь мелезэнзэ Оло, фермань покшост, сонзэ валонзо-мелензэ, сельмсэнзэ кивчкаиця, теке чеерень кундсий псакань, сяткинетне, мизолдомазо ды салавань, соланя вайгельсэ кортамозо.
«Арась, тенень а улема! Салавань тевтне зярдояк ды лисить лангс. Арсек, арсек теде, Кулякай. Седеяк стакалгавтсак эрямот. Кодаяк уш... Каня ансяк тон вастовить те «кодакаенть» марто? Кирдть, оно зяро цёравтомо эрицятнеде, кияк эзь куло. Вант, онкстеть илить кая... Авамгак ськамонзо кадовкшнось. Тетям маштовсь войнань васень читнестэ. Колоньгемень вете ансяк топодекшнесть тензэ, кадовсь вете марто. Эрясь цёравтомо. Вадрясто-беряньстэ — эрясь. Мекс монень тень кувалма прянть нерьгстамс анксемас? Стака? Кие мерсь: ваньксчинь, рунгонь, оймень, ванстомась шождыне? Иля арсеяк, фермань прявт, тонекс а ули. Прям пеедькшнемакс а тейса...»
Истя арсезь, велявтсь-арась вить ёнксонзо лангс, венстизе вить кедензэ рунгонзо кувалт, кувакасто лекстясь ды велькссэ апак вельтя ваязь ваясь аволь свалшкань, вензэ перть тоначинтень, масторонтень, козонь а сакшны тундо, а пешкелить вирь чиретне цёковонь вайгельсэ, косо арась чипаень лисема.
Валске Куля сась лагерев потявтыцятнестэ васенцекс. Кувака теине латалксонть видьс пачкодезь, косо ванстовсть ведратне-флягатне, лиссь каршонзо «боярост». «Мерят теске удоськак»... — кивчк ютась пряванзо.
— Шумбрат, Владимир Петрович!
— Шумбрат, шумбрат, Куля! Кодамо ёжот, кода венть ютавтык?
— Ну, кода меремс... А пеняцян, — кевкстицянть лангс вановтонзо апак кепеде, сэтьместэ мерсь авась.
— Тон, теня, исень меревкстэнь кода арсят? Зярдо вастовтано?
— Вана, вастовинек, — мизолк тейсть Кулянь турванзо.
— Мон, теня, лиядо... — пачкодсть Кулянь пилес «танстень» [40] вечкицянть валонзо.
— «Лиянть» превстэть ёртык. Иля арсеяк, — мерсь Куля ды теньсэ прядызе «вастовоманть», ведранзо-мезензэ марто эрязкалезь тусь скалонь потявтомо... Оло саекшнесь мель молемс мельганзо. Шкастонзо лоткась. Каня кенерят истя эрязасто, выр-выр молицянть мельга? Цюх сельгсь пильгензэ алов ды «кирнявтнезь» молевкссэнзэ тусь лия ёнов.
* * *
...Кузвелень Калинин лемсэ колхозонь скалонь стаданть ламо иеть вансь Аржаень Петряй. Войнасто сон сась 1944-це иестэ, керш кедтеме. Керязель малав юрга. Се иестэнть саезь яксеськак скалонь жабарданть мельга. Те «яксемась», кие соды, аволь толгань сталмотнестэ. Вармат, ловт, пиземеть, тарькс якшамот, псить... — весементь «танстензэ» савсь тензэ варчтнемс. Мезе ашти ансяк валскень зорява стякшномась! Чоп, чоподасто чоподас пильге лангсат. Якат, якат локшот марто... А тундонь, мельганзо кизэнь читне кувакат, пикссэ а онкставить.Тень лангс апак вано, цёрась топавтсь тевензэ мелень путозь, мик вечксь эйсэнзэ. Пеняцямот лангозонзо сюракшонь кирдицятнень пельде арасельть. Васня вансь велень скалт, мейле, зярыя иень ютазь — вейсхозонь.
Эрямонть эсензэ кинзэ-янонзо. Эйстэст а оргодят. Кода-бути апак учо, телень куншкат, даволсо ордакшкалиця, вешкемасонзо тандавтниця ковонь вейке чистэ Аржай Петрянь модалангонь эрямо чинзэ, ланганзо певердезь мелявксонзо, луга ланга якамонзо прядовсть. Пазось саизе тов, косо локшось тензэ а эряви ды ракша мельга якамс а сави. Одоль, кенерькшнесь эскельдямо ансяк ведьгементнень трокс, ды мезеяк а теят... Нурькинестэ, колхозось кадовсь стадань ваныцявтомо. Кодамо, кортыть, ваныця — истямо ловсо. Калинин лемсэ вейсхозонь скалонь фермась пелькстамотнесэ ламоксть сайнесь васень тарка. Лездась тенень, апак кавтолдо, Аржаень Петряй. Содась кува ды зярдо яксевтемс скалонь жабарданть. Ды вана эрявсь вешнемс тарказонзо лия ломань. Паряк, теке веленьгак муевель цёраломань, ансяк вейсхозонь прявтось усксь од ваныця Эрьмезьвелестэ. Марсевсть кортамот: сави тензэ та-кона ёндо эсь буень ломанекс. Каня тевесь теньсэ? Костонь, кие илязо уле, ансяк улезэ тевень вечкиця, седе дошуз, илязо уле, васняяк, стопкас ваныця.
Прявтось ускизе Иван Васильевичень, од важонть, мик эсензэ [41] айгорсо эйзюрковонть прядомсто. Лиясто те шкастонть ушосонть пандокс кирдеви «кечкериця теле»: карксамга лов, веть, седеяк ашолгадома ёнов, пукштяить, мокшнат невтнить валскень якшамотне. Тедедень тундонть те шкань кайксэзэ-ёжозо лия: якстере-ожо чама чипаесь «ресты» виень апак вансто, эзь неявояк, кода ловонть уевтизе-айгизе паксятнестэ лейтнес-латкотнес. Китне каладсть, а лисеват а нурдосо, а крандазсо. Эрявсь арсемс ракшатнень кардтнэстэ ливтемадонть.
Фермань кудынесь пешксе.
— Вай, кодамо вадря цёрась — кие-бути аватнеде эзь кирдеве, вайкстась марямга, зярдо ютасть, уцор-уцор эцесь ды озась колмо пилысэ стуворонть экшс колхозонь прявтось ды ваксозонзо вить ёнов стясь од ваныцясь.
Теке мездеяк апак маря, азорось варштась пурнавозтнень лангс, вадяшинзе керш кедьсэнзэ раужо, пшти нерь муюконзо ды ёвтызе кие вакссонзо стядо аштицясь ды костонь сон.
Пурнавозетнень икеле аштесь сэрей, виде рунго, иензэ коряс аволь сыре цёра. Тусто, аламнеде менчевезь черензэ аволь чоподат, аволь ашот. Судрязь удалов. Сельмензэ пижеласэнть, латокс тенст, овсе судо юрсто таргавозь, валдо тюс сельмечирькензэ. Судозо виде. Верце турвазо аламнеде эчкела ды лисезь икелев. Аволь келей, аволь човине чама. Лангсонзо фуфайка. Шапканзо кирдсь сэрьганзо нолдазь кедьсэнзэ. Талномадонть мерькась эйсэнзэ.
— Мон Иван Васильевич Каргинэнь, товарищти, э-э-э, истя лемдевлия, — невтсь сурсонзо промкскень ветицясь вакссонзо палманькс аштицянть лангс. — «ловсонь парь», Пешксе-аволь те паресь ули — ламось карми аштеме сондензэ. Кеман, товарищти, карми улеме пешксе. Иван Васильевич, э-э-э, луганок-паксянок, кадык сон Эрьмезьвеленьгак, содасынзе, содасы кува ветсемс скалтнэнь. Сон уш, э-э-э, несынк, аволь одтнэде...
— Аволь сыреяк, — гайгезевсь, пештизе нупальненть таго теке пшти вайгелесь, сезизе-сертизе кортыцянть кортамонь сурензэ.
— ...Соды — скалонть ловсозо кельпрясонзо. Кеман, товарищти, Аржай Петрядо берянь, шабра велень Ванянок, э-э-э, а ули.
— Вансынек, — путозь путызе валонзо овсе прявтонть каршо аштицясь, потявтыцятнеде весемеде сыресь, Укштор Таня.
— Зяро стопкат тензэ увтявить? — каятотсь удалдо раксезь-[42]згилязь.
Промксонь ветицясь сялгинзе сельмензэ кувака келенть сельмс. Тона чатьмонезевсь. Теевсь општ.
— Иван Васильевич, э-э-э, минек велень, — поладызе ёвтнеманзо Григорий Павлович, конанень сельме удалга мерить Чудожов Дрига. — Содаса, э-э-э, эйкакшпингстэ саезь. Кемевикс, товарищти, ломанесь, вансынк ва! Стакачись вана мейсэ. Кадык Эрьмезьвелесь, э-э-э, маласо, эрьва чистэ онкстнемс тов ды мекев колмо вайгельпетнень — э-э-э, а ён. Шка ютавтови, товарищти. Сиземантькак а стувтома. Чинь-чоп ломанесь пильге лангсо! Невак неть вайгельпетне! Ваныцянь тевесь, э-э-э, парсте содатадо, аволь шождатнеде. Те ошсо: прядовить сисем-кавксо часот ды кыш кудов. Эрямо тарка, товарищти, тензэ эряви. Зярс, э-э-э, муинек. Кортынь Чалдань Окся баба марто. Мерсь, зярс сайсы. Кизэнть ютавтсы сонзэ кедьсэ. Седе тов, э-э-э, лия мезеяк арсетяно...
— Сон мезе, нивтеме, ськамонзо? — эзь кирдеве, таго серьгедсь кие-бути удало эземсэ аштиця аватнестэ.
Григорий Павлович муст-муст пейдезевсь, натой лыказевсть муюкпензэяк, ды, прясонзо тей-тов чиремкшнезь, мерсь:
— Те уш, э-э-э, сонсензэ кевкстинк! Паряк, кавтошка, аволь вейкеяк?
— Мон тензэ колмоцекс молян! — эзь сода энгамо, кирдсь эсензэ ёнкс, згилямонь вечкицясь.
— Мольть, саиндерятанзат... — текекс пеедькшнезь «превть макссь», топавтызе кевкстницянть мелензэ вейсхозонь покшось.
Весе раказевсть.
Ракшань од ваныцясь эскельдясь ойсезь аштицятнень ёнов ды озась икельце эзементень, Укштор Таня ваксс. Промкскесь поладовсь седе тов.
«Редявикс цёрась, — цётызе Куля. — Сэрей, виде рунго, келей лавтов, аволь цёра — сырне. Виесь, неяви, эйсэнзэ... Сестэ эно мекс ськамонзо эри? Мезть а эрсить эрямосонть?! Оно мезе лиссь эсень марто — Миколем солазь солась. Паряк, сонзэяк... Улевельгак «пулозо», Чалданень предэсь аволизе тонго. Арась, бешоконь, арась... Симиця ансяк илязо уле. Ну, сестэ уш парт иля учне, стувтык «ловсонь пареть», неезь кольгеме карми. Койсэнь, прявтонок аволь мазя прев, истямо а уски. Пря а мезть яжамс. Эряви тензэ паро ломань... Мекс тензэ? А миненек? [43] Весеменень? Весенень эрявить важодицят-ускицят, аволь велеванть чийницят. Охо-хо, Куля, Кулине! Ну, каня те тонь тевесь? Каня а яксевтьсызь тонтеметь? Аштека-аштека... Ну, мекс аволь монь? Мезе карман потявтомо чаво одартнэстэ?.. Шкась невтьсы кие ки...»
Промкскесь прядовсь. Калдор-калдор стякшность таркастост ды, кортазь-пеедькшнезь, келес панжовозь аволь сэрей-келей кенкшканть гамозом лиссть ушов. Мезде лиятне кортасть, Куля эзь маряяк,сон арсесь.
«Ловсонь министрась», кода лиясто раксить Оло лангсо, озась хозяйствань азоронть ваксс, ды крандазкес кильдезь айгорось ноцковтовсь таркастонзо. Ков сыргасть истямо рудазов киванть? Кода ков? Каня аламо Григорий Павловичень эрьва кодат тевензэ истямо покш хозяйствасо? Кардазсо, пелькапряшка кудоюртсо пе тенст аволь свал мукшнови, а тесэ — веле, ансяк соксевиця модатнеде кавто тёжадо ламо! Кенерть азё... Сокамот, видемат, сюронь урядамот, фермат, тингелангт... Буень прявттнэ алтасть тензэ паро машина, «шождынькай» явомс. Саты, келя, теть, Палыч, Тюштянь пингень крандазкесэ цюхаемс. Умок, умок уш эряволь! Сестэ, содави, лиякс чаразевить вайгельпетне, киртявить, чиезь туить.
...Куля теевсь седе содавиксэкс сиведезь ваныцянть марто апак учо. Таргошкань ютазь стаданть ливтемадо мейле сон аламос кирдевкшнесь фермасо, шлясь-нардась кедьгензэ-мезензэ, муськсь-човась педямонзо. Ялганзо учомонзо эзть карма. Молемась аволь кемень вайгельпеть. Тестэ велепес ютконть ськамоткак ютасак, а марявияк. Молят кияванть, ваннат перькат, кортнят эськат эсеть марто. Каня те а пургондавты валдо ёжот, каня а рашты кецневтиця мельть?!
Кирдевсь од важодицяськак. Сон витнесь кой-кува чиремезь пирень палмантнень, чавнось, сюлмсесь эйзэст тесэ-тосо лутавозь-празь пайметнень. Ансяк панинзе ваномадо мейле скалтнэнь калдас, сайсь мушкор, узере ды кундась те, а эсензэ, кода марявсь, тевентень.
«Сонсь, эсь олясонзо ушодсь витнеме-петнеме? Аволь «лытагай псака» покшонок кармавтызе?» — арсезевсь Куля, сонсь шкань-шкань кепсесь вановтонзо авасоло, зярс телень оршамопельсэ, котьмицянть ёнов.
Кудов сыргасть вейсэ. Чалдатне эрясть Вере куринкань куншка видьсэ, Дораенсетне — Алопесэ. Кулянень эрявсь явомс [44] мартонзо молицядонть велентень пачкодезь, сон сайсь мель ильтемс Иван Васильевичень. Сынь пурдасть витев, ютызь пандочаманть ды совасть Верепес. Кузвелесэ аволь кода лия велетнесэ, Верепе ды Алопе — те вейке, лиясто зярыя вайгельпень кувалма таргавозь, кувака куринка. Тесэ Верепесь — аволь сэрей пандочирева, седе верьга, лаймень кувалт чииця куринка. Алопенть тарказо пандонть ало, мерть, лаймесэнть. Секскак тесэ модапотмонь ведесь маласо. Сокардат койме нерьсэ весть-кавксть, тосо уш ведь. Чадыведьсэ кандовт модась чуваров, сюпав, летькень кирдий, секскак касы лангсонзо эрьва мезе. Ансяк иля нузялдт, трятанзат.
— Кода Окся бабань кедьсэ эрят? — теде-тонадо кортамодо мейле кевкстизе Куля. — Кудынесь уш сонзэ вельть вишкине. Аволь кудо — сезьганонь пизэ. А велявтоват.
— Ы-ы-ы, кода теть меремс... Леметь кода, ёвтасак?
— Куля.
— Мон — Иван. Содат. Истя теть, Куля, мерян: мон, ловт, а эрянгак «пизэсэнть». Чоподасто чоподас скалтнэнь марто... Тонсь содат. Монь кудом — лугатне-паксятне...
— Ялатеке стувор экшс озама, кой-мезе сускома. Мартоткак, пешторозот путома мезеяк, — чольдердсь Кулянь вайгелезэ.
— Пеняцямс а савкшны, сырькаесь дошуз, весе, мезе тень эряви, теи, — вайгелензэ матразь, валтнэнь путнезь, ёвтызе мелензэ Окся бабадо, эрямодонзо аванть вакссо састо эскелицясь.
— Ну те паро. Ялатеке а эсь велесэ, ломань кедьсэ эрямось аволь свал мель вити. Паряк, колмо вайгельпетне Эрьмезьвелев кодаяк уш яксевельть, а? Мекс кудов а якат... — апак кармавто, сонсь лиссь Кулянь кургсто кевкстемась.
— Кудов?.. Ы-ы-ы, чаво сон.
— Вай, ну кода истя? — абунгадсь, мик тарск тейсь, Куля. Эль эзь пупордя марязденть. — Мекс? Мекс чаво?
— Ы-ы-ы, теде кувать ёвтнемс, — неть валтнэнь ёвтамсто цёранть вайгелезэ аламнеде лиякстомсь, марявсь, лавшомгадсь.
— Оно кода, Ваня леляй, кувать... Эзить покордаво, мекс теть истя меринь? Монень маряви, кеменьшка иеде мондень сырят... — мелензэ ёвтамсто авась варштась вакссонзо эскелицянть чамас.
— Покордавомс... Мезень кис? Те, содат, ы-ы-ы, начальниктне Иванычт ды Петровичть, минь тонадынек истя... Мерть кода мелеть. — Иван пейдезевсь, витизе вить кедьсэнзэ прясонзо [45] нумолонь кедень шапканзо, чатьмонезевсь.
— Ну, ней уш адя ильтятан Чалдань видьс. Тосто пиретнень юткова валган Алопев ды кудов, — ёвтызе мелензэ Куля. Варштась икелев, куринканть кувалт, таркань-таркань шиферсэ вельтязь кудотнень, чопода вальматнень лангс.
— Ы-ы-ы, вант, тонь тевесь, — аламнеде келемтинзе кедензэ цёрась мелензэ ёвтамсто.
— Ну, мон таго текеде—чаво кудодот.., — ледстизе Куля пенть кувалт ванозь.
— Чаво кудодонть, мерят? Ы-ы-ы, ледстнемскак мелем арась. Алкукс. Стака. Нурькинестэ... Видькстан, монсь ченьксэнть чинензэяк а вечкса. Марсинь, а симицятнеде маласо велетнесэ кавто, мондень башка истямо, келя, ули Маризьвелесэ. Ансяк. А вана, ы-ы-ы, ни тень понгонесь... А ён, ы-ы-ы, ледстнемскак! Алкукс... Эсенек велень, паро юрсто-буестэ. А вана... Важодсь эсенек велесэ бухгалтерэкс. Покш ломань! Кода эно... Веенст, ы-ы-ы, тердьсамизь инжекс, омбонст свадьбас, лиятне чачома чинь тешкстамо... Эрявикс ломань! Покш велень бухгалтер... Чарькодеви: зярдо кедьстэть мезеяк саеви — ы-ы-ы, весе ялгат, весе вечктядызь, теке сёксь малава укскат перькат чарыть. Истя яксезь, эзинек редяяк, кода ним-ялгам сюлмавсь гуйведенть марто. Превс а саеви, кода тонадсь! Ды истя куроксто-о! Ы-ы-ы, ведьмесэ а кирдеви! Ы-ы-ы, мезть ансяк эзинь тейне. Стяко. Истя вана эринек. Ы-ы-ы, лемезэ — эринек. Весть косто-бути «верде» сась велезэнек ревизор, монсенть кондямо мампггыця. Чи иредьстэ ванкшныцясь кашторды конёвтнесэ, омбоце, колмоце... Сокарясь-сокарясь ды, ы-ы-ы, ёмась. Кемат? Кавонест... Алкукс.
— Те кода истя? — Кулянь вайгелезэяк сюморасто гайгезевсь, марявсь казякадсь. — Ды, чей, тон кодаяк кардавлик те апародонть! Теевлить мезеяк!
— Мерят, мезеяк эзинь тейне? Ы-ы-ы... Ламо-мезе варчнинь — таргамс чеядавкстонть! Снартния превс путомс валсо, кедьсэ-мокшнасо, пикссэ, натой, каськаскак пекстния. Мезеяк очобамс те зыянонть эзь лезда. Монськак, мерема, чуман. Алкукс. Аволь эряво тень якамс мартонзо, ы-ы-ы, неть певтеме, лецькай трескавлинзе, «гулянкатнева», а нолдтнемаль. Ведьметнень, ы-ы-ы, седе кеместэ кирдемальть! А мон...
— Ней сон косо? Марсеви мезеяк пельдензэ? — пильгензэ алов ванозь, кинть седе коське таркава эскелязь, теке виздезь, мерсь Куля састыне.
— Тень кода чарькодемс? — токизе кенерепакарьс Иванонь, яла исковась Куля.
— Ы-ы-ы, вана кода. Лиссь омбо масторонь цёра экшс. Вейсэ тонавтнесть. Университетэнь прядомадо мейле тусть мирденть масторов, Ливияв. Ней арсек... Кияк монь арась. Ы-ы-ы, ськамон. Алкукс...
— Ну а эйкакшось кинь марто кадовкшнось? — эзь ойма, яла кевкстнесь Иванонь ильтицязо. Сон бажась содамс ломаненть уцяскадонзо седе ламо.
— Монь. Ы-ы-ы, кинь эно. Вете иесэ кадовсь ававтомо. Мон трия-кастыя, пильге лангс стявтыя. Алкукс. А янксян. Тейтерем превей, аволь авакс тусь. Васоло эри ансяк... Ну, тесэ уш чумом арась. Нармуненть левксэнзэяк пизэзэст а кадновить... Алкукс... Ы-ы-ы, вана колмо-ниле валсо эседень. Кода тонсь эрят-аштят? — кортась цёрась апак эрязкале, валтнэнь путнесь мельга-мельцек.
— Марясь седеем — кевкстьсамак. Ну, кеман, аволь ве чи эрятано. Вастовтано кодаяк — ёвтнеса. Ней оно, — Куля невтсь вить кедьсэнзэ Чалдань кавто вальминесэ кудынест ёнов, — пачкодинек. Тонеть витев, монень — кершев, кудов. Шумбрачи теть, Иван Васильевич!
— Ы-ы-ы, тонетькак, — арсесь Кулянень цёрась ды пурдась пиже, од лугинесэ копачавиця, эль неявикс яннэванть витев, Чалданень.
«Эри, лемезэ, ломанесь, — ансяк явовсть, кашказевсть марязденть арсематне Кулянь превсэ, — пиштемс зняро иеть симагай марто... Кшнинь цидярдома эряви! Кодат стакачить эзинь пачтя, мон ве чи аволинь эряво, сон — иеть. Иредьстэ ава... Чинедензэ укснозеват! Судос эци... Ансяк ланга нолдазь лыйниця черензэ мезе аштить, лия «мазычидензэ» ледстнемскак а мезть. Повавлинь!
...Повавлить? Ужо, ужо, ава, кенгелят! Мекс-бути эзить эцекшне килькшс... Стувтык? Каня эсеть эрямот седе пароль? Стувтыть певтеме майсематнень? Меельце иетне алкуксонь адокс теть ульнесть. Чумочинь кис яла тюрьмасо тандавтнить, тозонь пекстнить. Тосо, [47] кортыть, пек берянь. А содан. Араселинь тосо, сюкпря Верепазонтень. Сень кис парсте содаса эрямонть... кудонь тюрьмасо. Сон, монень маряви, ашождыне алкуксонсенгь коряс. Панжомаэкшсэтне содыть, зярдо лисить оляс. Кудосо вана ламот «шкавтомо» аштить куломазост... Эрси, эрси истяяк! Ну, тон уш, ава, ланга-верьга туить. Кода илязо уле эрямот, Иванонь коряс, седе вадряль. Каня арасельть валдо тюст эрямосот? Кадык лажнось седееть эйкакшонь аразденть, сень кис зяро паро чить-веть казнесь теть Миколь меельце ормадонзо икеле. Стувтык? То-то... Иля совсе пежетьс. Иля нолдтне чанстте пешксе шкатнень варма мельга.
Ну, мезекс, видеяк, мезень кис ломанесь сакшны моданть лангс? Эряволь эрямс кецнезь, мелень витезь, паро ёжонь марязь... Тень таркас — певтеме покордамот, нарьгамот, эрдекстамот, сельведть, сюдомат, верь... Вай, авакай... Ну, мекс Инешкипазось эзь максо эрямонь лия, седе маней, седе эрьгела, седе оймень витиця эрямонь ки? Мекс? Каня а неи, мезе моли ютксонок? Кинь Сондензэ башка кевкстемс? Киньгак иля кевкстне! Кияк а ёвтасы.
Монь кудонь тевень чикор-лакор мольсть, Пошань Олонь-гак, эйзэнь пециця велень злыдаренть, марсеви, а «киштить». Нуянь Налянь... Ды вана таго, те ломаненть, кие марто ансяк явовинек, уцясказо. Мезе пародонть несь? Эли шабран сайсынь. Сы азорось иредьстэ — пильге лангсо а аштеви, — эйкакшонзо кепе-штапо ушов, лов лангс паньсынзе. Кинь а саят — майсемат, тюремат-сёвномат. Эрси, ды сеедьстэ, вайсить толведентень. Ну, эрямо!.. Чарькодик азё сонзэ?!»
Аванть прясо кашкасть, чарасть-велясть мельтне вейкень перька: эрямосонть покш, эрьва кува сравтневезь, мездеяк а пелиця авидечиденть. Истя арсезь, сон эзизе редяяк, кода ютась пандочаманть трокс алов ды куроксто лиссь Алопень кудотнень икельга сравтовозь келей калгодо кинтень. Эзганзо эскелямс шожда. Секскак куроксто пачкодсь сэнь «сельме», лазсо «оршазь», сэрей конякс кудонзо видьс.
«Ильтнек, ильтнек цёратнень, превтеме ава! — содавтызе Кулянь од, пеедькшнемань мель эсензэ лангсо, ансяк кенерсь совамо кудос ды мельганзо пекстамо кенкшенть. — Лытат, а уштомо, муськеме кие карми? Миколь, икелекс, а учови. Тонсь, тонсь... Шкань апак таргсе илештить ожат ды кундак чокшнень мелявксозот. Юртавась, мерить, авась вадря, дошуз, мелень топавтыця, ансяк ваньксчи кудосот кирдеме а карми. Иля учо.
[48] Тонсь лияк-веляк, лангозонзо пек иля кеме...Эли, арсят... Иван сы варштамот?» — апак учо превс сазь меельце валтнэ истя тусть мелезэнзэ, мик марямга ёвтамстост цихельдезевсь.
... Кизэсь совась вийс. Маряви, ансяк исяк сырнень тештинекс цивтёрдсть китнень кувалт, пирявкстнэнь ёжова, лугатнень ланга таташкатне, течи уш сынь велявтсть сиянь тюс, пачк невтиця оскинекс. Сезят истятнэде вейкешка, аравтсак кургот каршо, пуват седе виевстэ лангозонзо ды «оскинестэнть» кадови ансяк кснавшка пиже-ожо повне. Эйзэнзэ педявтнезь видьметнень-паранпоткетнень коштось сайсынзе ков мелезэ. Оршавить таташкатне ожонть таркас ашназасо — мерть, тундось кадовсь удалов, кундась, илештинзе ожанзо, эсь тевезэнзэ кизэсь.
Тундонть кизэс ютамсто прядови, ловт, нармунень морамонь коволоськак. Сонзэ полавтсы лия, мелявксонь ковол: андомат-кастомат левкстнэ, тонавтомат ливтнеме ды эсь прянь трямо-ванстомо. Ансяк злыдарь кукотне кодаяк а оймить, рангить натой медьковонь самс. «Ку-ку! Ку-ку!» — кайсетить тестэ-тосто тердиця лужаня вайгелест. А кенеряткак лиясто мельгаст ловомо, зяро иеть алтнить теть эрямс. Кукорды, савкшны марямс-неемс, ливтямстояк! Цёковось, кортыть, тундо пряды, кочкодыкесь — кизэ ушоды. Сы шка, ды сон, саразонь куростонть весемеде вишкинесь, ушоды тердеме васня кочкомо, мейле — нуеме.
Скалтнэнь кизэнь калдась ашти эрьке чиресэ. Кузвеледе вайгельпень ютко чилисема пелев. Аволь васоло пиче вирь. Сон вансты пелеве ёнксонь якшамосо пиций варматнеде. Палманьстэ-ологасто теезь калданть куншкасо кувака латонь кондямо. Алонзо кирдевить флягат, палмантнес чавозь тулотнес понгавтневить ведрат ды лия кедьгеть. Теде башка пирявксонть ве песэ «тарны» кудыне — пиземеде-мезде кекшема тарка. Вень ванстыцяськак тосо аштекшни. Кузвелень эрицятне те таркадонть мерить Каргоньжей. Зярдо-бути умок, Инелеень лаймева-лёмга, эрьктнень перька ульнесть чеядавкст, начко, терниця, а ютавиця таркат. Кассь-увнось вирь. Пелевеёнксов тунда ливтямсто ярсамо-оймсеме тезэнь валгонесть каргонь ды лия нармунень полкт. Ламо-ламо... Умок те ульнесь. Ней... Мезе ней? Паро куш лемесь кадовсь! Виртнень, ванстовозденть башка, керизь, чеядавкстнэ коськсть. Ков а варштат, соказь-видезь модат. Ульнесь авасоло лисьмапря, сонензэяк мерильть — Каргоньжей. Ней сонгак арась, коськсь. Косто ней улемс карготненень? Козонь тенст валгомс оймсеме ды тутмаст пештеме?
[49] Скалонь стаданть мельга якицятнень, потявтыцятнень кист аламнеде полавтовсь. Фермантень апак пачкоде эрявсь пурдамс вить ёнов. Аламнеде кувалгадськак. Секскак лисема кудосто, икелень коряс, зярыя минутадо седе икеле.
Фермав Куля якась аволь Алопенть кувалт, лангозонзо кавто ёндо ваныця кудотнень юткова. Мекс-бути мелезэнзэ седе тукшнось паксянь кись. Вана нейгак пиретнень юткова янганть сон лиссь эйзэнзэ ды апак капша, валскень кошттонть мельспаросо лексезь, сыргась калдатнень ёнов. Кинть вить ды керш чиреванзо, лайменть келес, сравтовозь омбоце бригаданть луганзо. Пеледе ламотне кадновить ледемс, лиятнень лангсо вановить скалт-реветь.
Валскень экше. Палыця кочомокс невтизе прянзо якстере-ожо чама чипаесь. Цильцядсь эрьва ёнов сырнень налсонзо. Истя лембень-псинь явшицясь яволявтсь важодемань од чидензэ. Молицянть икелев, эйстэнзэ кеменьшка эскельксэнь туро, апак пеле валгсь пиже панзейне. Тейсь зярыяксть кувака пулынесэнзэ нулк-нулк, мерсь эстензэ чарькодевикс кельсэ «циви-ик» ды лымбакстсь кинть лия таркас, седе васов. «Сонгак а уды, сонзэяк мелявксонзо: пеке пешти, пря три. Ве лувсо, эряви меремс, эрятано, — арсезевсь Куля озязошка паксянь нармунненть мельга ванозь. — Весе арсетяно текеде, карвосто саезь ломаньс — пештемс, васняяк, тутманть. Тень кис, тень топавтомга эрьвась киньгак ды сэви. Эно кода лиякс? Апак ярса мезес пачкодят?»
Апак учо, теке менельстэ нармунть, совасть превзэнзэ ледстнематне Миколень калмамодонзо; кандолазтнэнь мельга молицятнень эсь ютковаст тошказь кортамост, нолдазь пряст, икелест лавтов лангсо кандовиця, ве ёндо неявиця, эскелькстнэде лыкиця кандолазтнэ. Те арсеманть полавтызе лия: «начальникест» аволь умонь кежей, сардокс пупиця варштавксозо. «Апаро Оло ломанесь. Ну, мезень чумом? Мезень кис, кодат кежть панды? Теке кендял педясь... Потявтан, педян, кайсян, шлян-нардан... весе шкастонзо. Ну, мезень кис? Мекс эльнеме мартонзо эзинь карма, мекс ваксозон эзия нолда? Аволь ломань — вардо».
Панжизе калдань, ологинестэ «стазь» кенкшкенть. Латонть алдо сельмс каятотсь Оло, беш, Владимир Петрович, МТФ-нь прявтось. Сон ваннось, велявтнесь тей-тов тулова коськеме понгавтнезь кедьгетнень ваньксчист. Кой-конатнень аравтнесь судонзо алов ды никсесь эйсэст. Неявсь, мезе-бути мучкась.
— Шумбрат! — мерсь Куля сэтьме вайгельсэ вановтонь апак кепеде.
— Конатнень? — эзь талакадо, эзизе максо прянзо, пандызе кевкстеманть кевкстемасо авась. Валтнэнь ёвтамсто невтсь сурсонзо кедьгетнень ланга. — Невтить эрь...
Азорось жуй-буй ноцковтсь таркастост мельцек-мельцек кавто флягат ды гамадинзе моданть лангс, сельмс кортыцянть икелев.
— На, вант! Несак оевть! Вадрясто, лембе ведьсэ апак шля, апак нардтне, — ацирьгадозь, полгарьгадсть сельмензэяк, серьгедсь Оло. — «Урядонь вечкицянть» кургсто качадсь, эцесь судо варяс, прок панема чакшсто, толведень чине.
— Ну, тон васня сельметь тетькить! — вайгелень апак кепеде мерсь Куля. — Несыть кинь?
— Кинь? — сёвныцясь апторгадсь, эзь сода мезе меремс.
— Аволь монь. Кинь — содамаль, тон прявтат, — эзь максо пря Куля, ахолясь кедьсэнзэ, лепштясь покордыцянзо лангс.
— Иля тонавто! Муевсь ламонь содыцясь! — ботнозевсь прянь идемга «завось».
— Виде. Содан. Тон вана а содат, а неят. Секс ловсось режнекшнияк, — чамазо якстерьгадсь, лаказевсь Куляяк, ёвтынзе потсонзо кувать кандтневиця валтнэнь..
— Те аволь тонь тевесь! — эзь кирдеве, рангстась кежтнеде кижнэзь фермань прявтось.
— Мекс аволь монь? Мекс? Ёвтык! — эзь пота, кармавтсь каршонзо аштицянть авась.
— Секс, — седеяк машнетезь ёртозь ёртызе валонть Оло ды, мандонензэ лангс нежелезь, эль марямга мотордозь, сайсь ён кудыненть пелев. Эзь арсе истямо рикстедема понги тензэ прянзо ветямо маштыця, аламнеде ацирьгалиця авань пельде. Аволь сень эйс эртевкшнить Пошань Оло!
Ирнэземань тувталонть вешнемс-неемс эзь эряво: эзь топавтово «ваньксчинь ванныцянть» мелезэ, эзь кутмордаво истямо мазый авась. Эли, паряк, кияк уш кенерсь нолдамо кулят Верепева од ваныцянть марто Кулянь ютамодонзо? Эрьванть эсензэ молевксэзэ, эрямо лувозо, ярсамопелензэ, кортамонь келезэ... Кияк, бульчом, истятнэде тошкстась Олонь пилес, ды тонань сыремсть кулелямонь седявксонзо. Шумбра превсэ кежензэ лангс аволинзе ливте, копордазь — панстонзо каизе.
Куля саинзе ведранзо, нардамонзо-мезензэ ды шкань апак [51] таргсе сыргась потявтомань учиця скалонзо ёнов. Вастовсь Шорянь Агай. Авась Кулянь шкава, аволь сэрей, аволь алкинеяк. Турванзо човинеть, удалост-потсост ашот, мик сэньшть мерить, вейкеть пеензэ. Домкасто озавтозь сэря тюс покш сельмензэ. Пейдезеви, мерят чипаесь тусто пель потсто варшты. «Зяро, арсезеват сонзэ неезь, эрямосонть кенярксчи улевель, седе сеедьстэ содавтневлизьгак аватнень кургост мизолкст» — а весть совсесть неть валтнэ Кулянь пряс. Эрить Шорят васоло, Верепесэ.
— Кудов вейсэ сыргатано, паро? — мизолдозь пшкадсь, эзь лоткаяк, ашо черь, эль кельгить паця потс, Агай.
— Мекс а молемс, — кенерсь мереме Куля. Ве мельс прамодо нулновтызе ашо пацясо прянзо. Пиже валскень чипаесь палсесь кедьсэнзэ цивтордыця ведранть.
«Ну, те таго мезень тюниха? Мезекс истя эряван тензэ? Оякс мартонзо эзинек ульне, потмонок вейкенек-вейкенек туртов эзинек чамдтне. Ну, кадык. Кавонек дык кавонек! Мезе берянесь тень эйсэ?»
Прядовсь валскень потявтомась, муевсь пе петнявкскень пес содавикс эрьва чинь тевтненень: потявтомат-педямот, кедьгень шлямот-ёрвалдомат, ловсонь кайсемат-онкстамот... Эрьвань эсензэ мелявксонзо. Ваныцясь, ансяк прядызь неть тевтнень, саизе одаронь кандтний ушмонзо чейга-лугава яксеме, ловсонь пурнамо-таштамо.
Аватне пеедькшнезь-згилязь, прок стакадояк стака, кедень какарьгадомас пачтиця тевгак эзть топавто, кайсизь чоподасэнь, умок аволь од халатост ды сыргасть келей, кудов ветиця кинть ёнов. Эйзэнзэ лисезь серьгедсть моро:
Вай, лугась, лугась, |
Тень прядозь, жойсэ, зярыя вайгельсэ, ушодсть лия:
Козонь чачнесь комолявкась? Козонь каснесь бояравкась?
Летьке таркас — кальпулынес. Начко таркас — чейпулынес... Каленть перька тапардавкшнось, Каленть перька кутмордавкшнось.
[52] Куля ды Агай мольсть башка. Лиятнеде аламнеде кадовозь. Кеветее скал ваксс ланчемадонть, кеветее одаронь ноцковтнемадонть-чамдомадонть мейле мольсть паксянь, кавто ёндо пиже лугасо пирязь кияванть рунгонь витезь, шождасто. Те ульнесь оймсемакс. Таго, кода валске марто, аватнень икелев валгсь ды, «цивик» мерезь, тусь ливтязь лия таркас, мерят кияк тандавтызе, пиже панзейнесь.
— Содат мезе, Агай? — кавтолдомадо, мельтнень тей-тов айгсемадо мейле Куля сайсь мель ёвтамс, мезе кирдевсь мештьсэнзэ.
— Мезе? Мезеяк а содан, — абунгадозь мерсь вельть марямга вакссонзо эскелиця ялгазо.
— Ансяк сынь, эзинь кенере саеме ведрам, тесэ уш Пошань эвсесь, — ушодсь Куля апак эрязкале, икелест эскелиця аватнень ёнов прянзо кепедезь.
— Мейле мезе? — эзь цидярдо, пшкадсь ды келемтизе Кулянь икеле керш кедень коморонзо Агай.
— Ванан, мекс-бути токши-кепси кедьгенек, никси эйсэст. «Мезть вешни?» — арсян. Ансяк пачкодинь эйзэнзэ, кадынзе ведратнень ды вередемсь эйзэнь. Те, келя, тон, тон апак шля, оевстэ каднат ведрат-флягат. Педясь эйзэнь ирныця пинекс. Тон, келя, чумось — ловсось режнеякшни. Тон — ды весе. Ну, качадсь, мерема, эйстэнзэ, теке ченькс лагунсто...
— Мекс, а чарькодян, каявсь тонь лангс? — лазызе Кулянь ёвтнеманзо кортакшов Агай.
— Ну, монь койсэ... Мезть тесэ кортамс! Каня а содасак пуло алга никсницянть? — панжизе, мезе кирдевсь седейсэнзэ Куля ялганстэнь.
— А-а-а, оно мейсэ тевесь! Виде, текеде, — мерсь Агай, икелест молицятнень лангс варштазь. — Оло, видеяк, Пандыекс теевсь — стаданок букакс. Моненьгак педсесь. Весень ютынзе. Истямокс, маряви, икеле арасель. Ней допрок азаргадсь.
— Кода арасель... Свал текель. Кие мельга ансяк эзь пансе. Ней копорямо седе сеедьстэ кармась. Тень кувалма... Виде теяк: кой-кинень алкукскак цёра эряви, оно зяро эзть мурда ойнасто, — менсть Кулянь кургсто валтнэ.
— Те уш аламнеде лия тевесь.., — мизолдозь, мезде-бути арсезь ды пильгензэ алов ванозь, мерсь Агай.
— Ну, саты, маряви, «велень букадонть». Кортамодонок сон лиякс а тееви, — янксезевсь Куля икеле ёвтазь мельдензэ, Оло марто сёвномадонзо. Пельсь берянь кулядо, ней сонсь эйсэст сравтни.
[53] Теевсь нурькине каштмолема.
— Вана мезе мерян, Кулякай. Вельть уш, — варштась перькаст сравтовозь лугатнень ёнов ды полавтызе кортамонь кувтанть, лиядо ушодсь Агай, — ламо паро валт тондеть ёвтась Ваня лелясь, стадань ваныцянок.
— Я, тень косто саик? — кевкстицянть потмова ютась кенярксонь лембе налнэ ялганстэнь пшкадемстэ. Варштась чамазонзо.
— Ды исяк чокшнень потявтомадо мейле вейсэ кудов молинек. Кортазевинек. Сон яла тондеть кевкстнесь: кият, кодамат, зяро иеть... Маряви, мелезэнзэ туить.
— Ну... Тон мезе? — эрязкалезь кевкстизе Куля Агаень ды визделгадсь.
— Мезе мон?.. Мезеяк. Сон совась Чалданень, Окся бабанень, мон — кудов. Эйстэдеть вал эзинь ёвта, — мерсь чова рунго Агай, ды саизе Кулянь кавалдо.
— Ну... видестэ теить! Мон тензэ, Иваннэнь, сестэ мерекшнинь: тондави шка — ёвтнеса эсь эрямом, — поладынзе Агаень валонзо авась.
— Монь койсэ, Куля, ломанесь сон эсь превсэ эриця, аволь кодамояк азгун азгуныч, — шнызе Агай стадань ваныцянть.
— Монгак истямо мельс сынь, — видькстась Куля. — Ломанесь, маряви, а берянь. Ансяк а стяко мерить: ломаненть содамга эряви пондо сал мартонзо сэвемс. Лиясто мик пондоськак а сатны. — Сонськак эзь сода, мезде пейдезевсь кортыцясь...
— Мезе виде, се виде, — укстась Агай. — Монь Витямгак ломань ютксо ломань, сараз а покорды. Истямонть экшс лисекшниньгак. Мейле... Пельпондоськак сатокшнось. Сеске невтинзе обуцянь «паро» ёнксонзо. Монськак — автень курго, теке а содылинь симемас правтомадонзо... Содылинь. Ялатеке лисинь. Мазыель, идемевсесь, мазыель! Те пачтимимгак кажочинтень... А-а... А мезть сокарямс ютазьсэнть. Мезе ульнесь — сень а велявтсак.
— Ну, тон, Агай, куш эйкакшт, кавто цёрат пильге лангс стявтат. Мон вана... теке нуемадо мейле кадовозь марч нетькске. Сан кудов — а кинень вал ёвтамс. Маряви, аволь кудос сован — мацтс. Потолокось лепштязь лепшти. Ну, а мейсэ лексемс, — тошказь вайгельсэ прядызе пеняцямонзо Куля. Таргась зепстэнзэ пацине, нардынзе судалксонзо, турванзо..
— Яла кортыть: вадря тосо, косо минь арастяно. Видестэ ёв-тазь.Тон пеняцят-поладыцят арасть. Мон... Мезе мон? Мезень парось, тетялевкст кастан?..
[54] Пельтеме, гай сэнь менельстэнть кизэнь чипалысь валсь валдо, вечкевикс чевте лембе, кецневтсь эсь тевсэст чинь перть котьмиця ломантнень, нармунтнень, товсюронь паксятнень, кинть чирева сэняждыця балягинетнень, васолдо сэнь пирявксокс неявиця виренть. Кецнек, седей, морак, иля сода тошначи! Икеле молиця аватне моразь, апак капша эскелясть Алопева таргавозь киванть ды кецневтсть леекс чудиця-шольниця моросост кинть кавто ёндо лангозост ваныця, иетнеде ризныця кудотнень, икельгаст рацяня сыре кальтнень, латотнень, псистэ ваныця чипаенть... Мекс а морамс? Тевест прядызь, чись маней, шумбрат, иетнеяк зярс аловпандт эзть туе.
Вай, верьга-верьга ливтить яксяргот, |