Ванине (2011)/1
| ←Ванине (оглавления) | Ванине (2011) by , edited by Разгуляева Т. В. I пелькс |
II пелькс→ |
| Нуянь Видяз. Ванине: роман. — Саранск, 2011. — с. 5—31 |
[5]
| Ванине
I |
Кизэнть ушодовомсто велесь гайгезевсь редявиксстэ лиякс — икелень иетнень коряс кармасть марявомо седе ламо цёрань вайгельть. Тесэ го-го-го кортамот, тосо... Мезень дюния? Косто истя сынь? Кона ёндо? Аволь кудотнень-мезтнень велькска уиця каштан пельтне ускизь? Сеске та-кода те весе превс эзь саеве, пилетнеяк эзть тонадо. Ютазь ниле иетнень перть авань, эйкакшонь цийниця вайгельтнеде башка цёрансетне марсевсть ансяк тия-тува. Ловт, весе сынь чачома-эрямо таркадост вельть васолольть — пурьгинекс зэрниця, гувныця, верень саиця ёнкстнэсэльть. Тосо сынст вайгелест човорявкшность пушкань-ружиянь куломань явшиця «онгоматнень» марто.
Ней вана...
Учовсь, окойники учовсь верень валоманть пезэ. Изнямо! Ниле иеть вишкинестэ сырес, кажочисэ пиштезь, учость сонзэ. Панжиковонь меельце читнестэ саезь, васня аламонь-аламонь, шкань ютазь седе сеедьстэ, кармасть марсевеме Кузвелесэ изницятнень торномкакс гайгиця кортамост, кармасть некшневеме солдатонь пиже-ожо тюс понкссо-панарсо якицят. Велесь ушодсь теевеме апак пупорькшне, рунгонь витезь якицякс. Седе икеле, авань ды эйкакшонь кургсо-кельсэ кортамо шкатнестэ, а кодаль сонензэ улемс истямокс.
Васенцекс пултазь-чентязь, оймень сайниця чивалгома ёнкстонть, малав ниле иень ютазь, мурдась чачома велезэнзэ Дораень Миколь. Сонськак эзь сода кода сеедьстэ токнозеви седеезэ, кодат ёжот пештясызь мештензэ кудос совамсто, зярошка кеняркс самосонзо кази тетянзо-аванзо, малавиксэнзэ туртов. Кода эно?! Цёрась велявтсь тосто, косто ламот мекев кинть эзизь муе.
Од, аволь сэрейтнеде, келей лавтов, эцезь рунго цёра. Нурькинестэ, солдатокс наразь черензэ валдот, судрязь кершев. Оршазь кода весе чивалгома ёндо пачкодицятне — олазь гимнастёрка, ташто понкст-галифеть, прянзо ве пеле, эль а нолажты, каштанга-лемань кис путозь пилотка. Мештьсэнзэ якстере коцт панкскень тешкст томбавомадонзо. Абунгавтынзе алясь васня эсь юртонь ломанензэ, мейле куринкань эйкакштнень-покштнень, клубов якиця од ломантнень аккордеонсонть, конанть ускизе мартонзо.
[6] Истят «налкшкеть» Кузвелесэ кияк эзь некшне. «Немецень»... Те валось ансяк мезе ашти! Керш-вить валаня ёнксонзо-кундонзо инжеть, цивтёрдыть, теке чавачамонь суликат. А вановат! Мехензэ — ашот. Повтнень таркас, вить ёно, клавишат, — ашо-раужо лс-хапенеть, керш ёно — ашо повнеть. «Трофейной!», — ледстнесь, аламнеде прянь шназь, Миколь. Нолгарь цёрынетне бажасть куш сурсо токамс цивтёрдыця пиже «налкшкенть». Мелезэст тукшнось икеле а марсевиця, од, «трофейной», валоськак. «Трофейной...» — сеедьстэ марсевсь ютксост.
«Ойнань» кувака, свал пелевтиця китнеде мейле Миколь мельга пачкодсь чачома велезэнзэ Укштор Аркай — сэрей, теке рицяга, натой аламнеде мендявозь рунго. Молемстэ кувака пильгензэ путни теке сенксь, сонсь свал ваны модас, мерят пели — илязо чалгаво а тозонь, илязо пупордя. Кой-кить мерить тензэ — кенерсть уш лсмдемензэяк! — Лакшторкай. Келензэ кис. Вечки цёрась валсо валт чулгсеме, сынь певерить турвастонзо теке чиньжарамо лукшт. Паряк, «нсмчурань» пулятнеяк кирнявтнесть эйстэнзэ мекев лодорсо кортамодонзо, ды сась шумбрасто-парсте. Эряви меремс, лемдезель истя а стяко — мезе-мезе ёвтнеме маштсь, кунсолозеват, а редясакак, кургот автьсак. Ёвтнеманзо свал домка смусть мартот, аволь ансяк валанят, превейтькак. Кинень мезе максы Пазось! Секскак Лакшторкай лемесь пек эзь ладя цёрантень, седе мольсь тензэ ды педясь Сэрей Аркай продештясо
Аволь ламо шкань ютазь, войнав саезетнестэ пелест велявтсть кудов. Лиятнень ловажаст кадовсть наксадомо ламодояк ламо ёнкска ды мик омбо масторга. Вирьга, пандочамава, чеядавкска, иневедь, эрьке, лей потмакска... Ламот кадовсть апак калма, кода кортыть, модантень апак максо. Ды кода тень теемс, кода улемс ведьс ваязетнеиь марто?
Меремс, ниле иень перть Кузвелень эрицятнень ютксо допрок эзть марсеве цёрань эчке вайгельть — а виде. Чуросто ды човорявкшность. Войнась явокшнынзе ломантнень колмов: эрийть-эрицят — ават, сыреть, эйкакшт, одт, конат эзть понгоне кирвитолонтень; томбсевезь-мерьказь тосто сыцятне ды ёмазтне-маштовозтне. Томбавозтне кой-зярдо пачколесть кудов войнанть молеманзо пертькак — кие ловтаня чама, кие пельтсвеляв марто, кой-кить пильгевтеме, кие... Аржаень Петряй оно ды Теряень Филя — кедтеме. Петряень керш кедень таркас чаво ожа тей-тов лыхап. Те зярдо стувтсы пштидеме сонзэ каркс алов. Чаво [7] ожадонть башка, цёрась пилысэнзэ кандтни менельксэнть ёжонзо полавтнемань «мариця» — снарядонь штелькс. Пошань Оло — ёколк-ёколк якиця. Вить пильгезэ керязь-пилязь кумажадо алга. Яки-паки «колмоце пильгензэ» — мандо лангс нежелезь. Те уш, ловт, шумбра ломань! Кецнек. «За Родину, за Сталина!» тюремастонть сакшность кинь а пилыть, а кедть. Вана косо куломас ветиця пайстомочись! Ды ветясь... Кода, алкукскак, эрямонть эрямс истямокс улезь?! «Самовар» — кенерсь лемдеме истятнэнь кие-бути пшти кельтнеде.
Истя Кузвелесь ушодсь аламонь-аламонь, кувсезь-локсезь совамо од, войнадо мейлень эрямонтень.
...Чипалысь чинь-чоп рестась. Лездась псисэнзэ виртненень, видезь паксятненень, ломантненень. Тевтнеде сизесь. Окойники якстере осканть сась шказо, ды састо-састо, чатьмонезь ваясь чувттнэнь, кудотнень, паксятнень томбалев. Оймсеме, вандынень од виень таштамо.
Клуб, ловнома кудо... Колхозтнэнь пурнамодо икеле сон ульнесь чувтонь церьковакс. Мейле, те ульнесь кеветеешка иеде икеле, яжизь ды тейсть эйстэнзэ сэрей-келей вальма марто оймсема кудо. Зярс эзизь панжо. Учома велентень чокшненть совамонзо. Тевтне теемат. Ялатеке аволь сэрей, келей кузтемпезэнзэ пурнавсть зярыя од ломанть. Ютксост допрок одткак, «атяткак». Истя фронтовиктнеде удалга мерить одтнэ, порохонь чиненть а содыцятне. Виде, сынь те чиненть эзизь никсне. Эзть кенерькшне, иест эзть топодекшне. Тень кис колхозонь, велень, пирень-кардазонь стака тевтнень ниле иень перть усксть сынь, сынст сявдикс лангсольть, сынь ульнесть васень нежекс. Сокасть, изасть, видсть... Секень вант, 28-30-це иетнестэ чачозтневтеме «фрицтнэнь-ганстнэнь» лангсо изнямоськак аволь учово. Те сынь, шкадо икеле сёлмиязтне, андсть-оршасть «оёвицятнень».
— Ну, кода, цёрат, серьгедтяно морыне?! — пеедькшнезь, кеняркс вайгельсэ пшкадсь «музыканзо» марто меельцекс сыцясь, Дораень Миколь. Валонзо ёвтамсто комась ды путызе аккордеононзо кузтемань эземпес. Мейле, кедень сювордазь шумбракстнесь озадо аштицятнень марто.
— Эряви истямо серьгедемс, конань весе содасызь, — ёвтызе мелензэ валонь сеедьстэ ды капшазь путниця Пошань Оло. Сон венстизе вить кедензэ, путызе чалгавкс лазонтень поцезь-таргазь «сеянь пильгензэ», сельгсь лангозонзо ды чемердызе пилысэнзэ.
— Монь койсэ, «На позицию...», сонзэ весе содасызь, — мерсь мизолдозь Оло. Валанясто наразь чамаумарьсэнзэ цивторк вельместь, теке тень учостькак, вишка повнешка яндавинетне. Мазый цёрась Оло! Валдо тюс черензэ тустодояк тустот, менчевезь вишка суркскекс. Варштат ве ёндо, мерят, мекшвеле лавтовонзо лангсо кандтни. Сельмензэ сэнть, аволь кувака судо, турванзо эчкинеть. Кивчкаиця яндавинетне ды сельмсэнзэ менель сэньштесь куш кодамо тейтеренть полонс сайсызь, куш кинь седейс вечкемань толнэ кирвазтить. Понги — а мени.
Миколь кепедизе аккордеононть элезэнзэ, ливчанясто каинзе кшнатнень лавтовонзо ланга ды тетькинзе — кувтолк мерсть — ашо мехтнень. Потстост лиссь масторонть келес содавикс, нусманячиде пешксе, седеень сювордыця моронть мелодиязо. Эрявикс таркасонть седицянть суронзо лоткасть чийнемеде повтнень-клавишатнень ланга, сон тейсь пауза, макссь «вал» каршонзо аштиця цёратненень. Сынь аволь сеске ды аволь вейсэ, кода эряволь, серьгедизь моронть:
На позицию девушка |
Валтнэ ды моронь лужаня лувось чудезь чудсть коштканть, Верепень кудотнень, латотнень, кальтнень икельга ды велькска, кунсолость сынст вальматнесэ сокорсто липниця толнэтне.
Чоподась каштмолезь валгсь ванькс, келейдеяк келей менеленть потсто. Апак капша, тевень содазь кирвазстинзе, кияк а соды зяро, цивтёрдыця штатолнэнзэ. Тешттне ушодсть, вейкест-вейкест туртов кончтнезь, кортнеме ансяк эстест марявикс-содавикс кельсэ эсь мелявкстост, эсь валскень чидест, эсь эрямодост. Тердсть эстест. Шкань ютазь сыньгак, мерят, энгамсть, кармасть кунсоломо васоло модамасторстонть ливтиця, верев кузиця сюмора моронть.
[9] «Огонёконь» «лаксицятнень» икельга бырсэ ютась — пельсь, сёвносызь кирдевеманзо кис — Коконь Нюра, клубонь прявтось, сэрьс алкине, верка тейтересь. «Шумбрачияк» эзь мере, стувтызе. Стяко талнось. Цёратне прок эзизь нееяк. Морасть. Валтнэнь таргсесть мелень путозь, морасть вейкест-вейкест кунсолозь ды марязь:
Парня встретила славная, |
Кузвелесь кунсолось сынст апак лексе. Кунсолось се мелодиянть, сеть валтнэнь, конатнень чачтынзе-кастынзе, идемевсь поревлизе, войнась, ды морыть ней сынст пильгевтеме, чиремкшнезь якиця, кедтеме, войнасонть эрьва кода яжазь-поркснезь цинсть од цёрат. Кунсолось велесь, чокшнесь, кунсолость типельдиця тешттне. Эзть маряво, каштмольсть натой атякштнеяк. Налкставикс сееремаст пилес эзть эце. Лужаня, оймеёжонь нуваргавтыця лувось, марявсь, ледстнесь, вечкемадо башка, лиядо: зярдояк-зярдояк иляст кирвазе, иляст чачо модамасторонть лангсо истят нусманясто моравикс «Огонёкт», зярдояк-зярдояк иляст пурнавкшно клубонь кузтемпес истят морыцят...
И просторно и радостно |
* * *
Валдаень эрить клубтонть, кона зярдо-бути ульнесь Иисус Христоснэнь ознома таркакс, кавто кудонь трокс. Ловт, шабрасо.
[10] Эрямо «пизэст», кодат велесэнть малав весень. Чапозо пичень. Чочкотне эчкеть. Вельтявксось олгонь. Шкадонть, азоронь аразденть раужолгадсь ды теке озась, лагорнясь. Эйсэнзэ вете вальмат. Колмотне ваныть, бажить седе ламо неемс, ульцяв, чикуншка ёнов, кавтотне — кардазов. Кудыкельксэсь лазонь. Кото ломаньс, содави, сон вишкине. Оймавты вейкесь — лиятненьгак веленть келес текеть. Лиятнеяк майсить. Чуросто кие седе «келейстэ» эри. Паро се — лембе, кадык таштояк, лембе кирди! Кецнек. Оно кодат якшамольть войнань ушодкс телестэнть читне-ветне — кудосо ведратнесэ ведесь, кода ламотнень, эекс эзь тейневкшне. Лембесь — кудонть сюпавчизэ. Тень кис, содазь, сон путневияк.
Неть ниле стенатнень ютксо чачсь-кассь Валдаень Куля, аванзо, Клавдянь, вететнестэ васень тейтерезэ. Сонензэ кемгавксово. Кудонь-кардазонь тевтнесэ васень неже. А колхозонь тевтне-мелявкстнэ? Сынст ков шаштсыть? Сонтемензэ ды лия, сазортнэвтеме, стакачитнень, певтеме асатыкстнэнь лепштямост седеяк маряволь. Секскак Клавдя, ниле стенатнень азорост, а пеняци.
Куля аволь сэрейтнеде. Кода мерить, пельтнес прязо а токши. Тень кис рунгозо теке эцезь кескав. Калгодо. Вий неяви эрьва лыкавкссонзо, налксить, теке аволь аваньгак, тулгонзо. Чамаскак пазось эзизе покорда. Валдо черь, кувака пулонзо карксамга. Судозо нурькине, виде. Сельмензэ — сэнь пря баляга тюсонь. Седеяк мельстуицякс тейтеренть теить мизолдомстонзо-пейдемстэнзэ кирьксала чамаумарьсэнзэ тейневиця «варинетне». Вайгелезэ аволь цийницятнеде, та-косто потсто лисиця, чевте. Кортамсто а эрязкали. Валсо а сувтни. Машты мартонзо кортыцянть кунсоломо.
Эх, од шка, од шка! Каня эрсить амазыйть тонь пакшат-чахрат? Кие мерсь — а кувтолдат сырнекс ды а чольдердят горниповокс? Каня а тон, келей сёлмо, верьга ливтницясь? Истямат тон, кувака ки лангс стиця-ваныця, мезе илязо уле ушосонть, — маней, пиземе, варма, кизэ, теле, война... Сёксеськак теть маряви тундокс!
...Яки-паки Кузвелень кудонь куротнева сёксень покшчи — комськавксово иеде икеле изнясь Октябрянь революциясь. Тедеде ансяк прядовсь, чаразь-велязь туевель, сывельде трескиця войнась. А мезе седе редявиксстэ, «ломанькс» оршамс, лангат каямс, а мезе пекень пештямга путомс пейтнень алов. Арась, [11] оймень костиця асатыксчитне зярс эзть выжновтово. Ледстнить, ледстнить эседест чинек-венек. «Инесь» яжась ламо уцяскат, вельть ламо. Малав эрьва кудос совсесь ёмамодо-маштовомадо конёвось ды кадсь а ютыця, мейсэяк а саевиця аржот, мейсэяк а костявиця сельведть. Тень лангс апак вано, ламодояк ламо кажотнень изнязь, вейсхозонь прявттнэ эрьва куринкас пурнасть кой-кодат ярсамопельть, ютавтсть вейсэнь — куринкань-куринкань, бригадань-бригадань — ярсамот. Куш сывельямнеде коршнесть колхозниктне, пекест пештизь, седе шождасто оймест таргизь эрьва чинь мелявкстнэде. Ярсак, симть, серьгедть гай моро, изниця!
Ушосонть талай сёксь. Уить алга, вейкест-вейкест сасазь, чопода пельть. Поцерди пезеря, тарькс кельме пиземе. Рудаз. Эрьвась норови совамс лембе ды валдо «пизынес».
Революциянь «якстере» чинтень фронтсто шумбрасто-пельсшумбрасто сазтне витнизь-петнизь вейсхозонь, ниле иень перть берякадозь, лишмень кардтнэнь, утомтнень, тингелангонть, ферматнень, аламонь-аламонь велязевсть вармаведьгевтнень келей сёлмост. Мельспаросо, вейсэнь вийсэ одкстомтызь велень клубонть ды эйзэнзэ педявтозь ловнома кудонть. Ружиядонть мейле узересь совавтсь цёратнень седейс кенярксов ёжот, кармавтсь седе псистэ яксевтеме сантнэва веренть. Ламо, ламо тевть сявордсть кизна ды сёксень перть. Колхозонть, ловт, стявтызь пильге лангс.
... Клубов Куля сась аламнеде шкадо мейле. Сон састыне панжизе стака кенкшенть, совась ды каштмолезь озась авасоло, стена ёжос аравтозь эземс. Ламотне, кинь ульнесь мелест, уш тесэльть. Кузвелесь аволь вишкинетнеде. Кудотнеде эйсэнзэ ветесядтнэнь малава. Секскак апак уштне, якшамо клубось пешксель. Сундерьковось, кадык ансяк ушодовськак, — аволь медьков, мик сёксенть аволь васенце пельксэзэяк. Секскак весе оршнезь лембестэ. Виде сеяк: кодат якшамот, зярдо мештсэть налкси-элякали од шкань тол!
Беряньстэ неиця школань прявтось-директорось (мезенть кувалма фронтовгак эзизь сайне) ловнось лекция Октябрянь Ине революциядонть, сонзэ эрявиксчидензэ, ёвтнесь модамасторонь раськетнень ютксо ве мельсэ эрямодонть ды аладямотнеде. Вети школасо эрзянь кель. Тень лангс апак вано, корты рузокс. Кунсолыть паро мельсэ. Кунсолыцякс невтизе прянзо Куляяк. Ансяк тонавтыцянть валонзо мелезэнзэ эзть туе. Кодат-бути [12] ачарькодевикс лемть, ошт, масторт... «Мезекс сынь монень неть весе рузвельттнэ, хауэртнэ, черчильтне, сынь эдь аволь Кузвелень, аволь буеньгак, минек тесэ фамилияткак истят арасть», — чарасть, каштордсть Кулянь прясо арсематне. Сон салава варштась васня вить ёнов, мейле — кершев.
Рединзе лия-лия таркава ды копорьёнт аштиця «оеннойтнень» — Пошань Олонь ды кувака, погонтомо шинельсэнзэ Сэрей Аркаень. Сценанть пеле аштесь, содызе, Дораень Миколь. Кунсолось, неявсь, апак лексе. Олонень, Аркайнень, ды аволь ансяк сыненст, сёксень урьвакстомань коволось эзь учово. Талай уш «тосто» самодост мейле чиявтсть нить. Миколь вана ажиятнень юткс зярс эзь сова. А капши мекс-бути.
«Паро цёрась. Мазыйгак. Обуцязояк, келя, чевте. Мекс «келят»? Монськак содан. Сон аволь костоньгак — Кузвелень, тескень. Содасынь тетянзо-аванзо... Аккордеононзо туизе-арась? Туизе, неяви. Пароль мартонзо седе малавиксэкс теевемс. Вастовомс пароль, кортнемс... — эвтсть-ёзмолдсть Кулянь прясо мельтне икеле чиденть. Сон эзь кунсоло трибуна экшсэ кортыцянть валонзо. — Сынст, Дораень, весе превейть ды колт, а косто берянентень улемс. Ансяк тетяст мезе ашти! Паро, шумбра буесь, лиякс а мереват».
Лекциясь прядовсь. Каятотсь цяпамонь шалт. Теке мерят сядот гулькат апак учо кепететсть тандавтомадо. Кулянь арсеманзо сезевсть. Сыретне ды аволь пек сыретне калдор-калдор стясть таркастост ды уцор-уцор, эсь ютковаст стамбаро кортнезь, сайсть ёнкс келес панжадо кенкшенть пелев.
Кадовсть ансяк од ломанть — цёрат, тейтерть, кить зярс эзть муе эстест эриця ялгат, зярс эзть лисе мирденень. Покштнень юткова эвтить зяро-бути пакшат. Мезе, сыньгак арсить алуждо? Эли уроконь теемадо орголить? Паряк, виде сеяк: косот «левксэст», ламо тетятненень ялатеке.
«Мартонзо, мартонзо аккордеонозо!» — жу-у-йк мерсь тейтеренть седеезэ неезденть. Ансяк прядовсь промксось, сон ялганзо марто стясть стена ёжос, чулгсесть кансёронь видьметь ды учость киштематнень ушодомаст. Цёратне, ансяк мерсь клубонь прявтось, эрязасто, чожолк-чожолк айштизь-аравтнизь стенатнень кувалт эземтнень. Теевсь оля тарка — пельвеле кельги. Киштть-морак топодемазот!
— Ну, тейтерть, кода, ушодтано?! — каятотсь клубонть келес Миколень, велесэнть васень седицянть, гайгиця вайгелезэ, [13] седямопелензэ марто эземс лоцьк озамсто.
— Ушодтано, кишттяно!!! — весень кис кецязь серьгедсть зярыя тейтерть.
— Каня а кенярксчи течи, мекс а киштемс?! — мельгаст сеске каятотсь башка вайгель.
Пурнавсть седицянть икелев. Кадсть чаво тарка. Кирькс. Миколь тонадозь каинзе кшнатнень лавтовонзо трокс, варштась икелензэ тейтертнень лангс ды, прянзо вить ёнов аламнеде чиртезь, ливчанясто ютась повнетнень ды лехапенетнень ланга. Ашо мехтнень потсто кенярдозь либоркстась «Подгорнаянь» элякалиця, киштемань кирьксэс тердиця чольдердемась. Каня кирдевить пильгеть сонзэ марязь?!
«Ужо, Миколь, кирдть — ёвтасынь оймеёжонь валон, кадык аламнеде покшат монь коряс, превстэнь а лиснят, — кирдсь Куля мель ялганзо ютксо аштезь. Апак учо те меленть полавтызе лия: — Я, ды мекс сон те шкас апак урьваксто? Ужо, фронтовик, ужо, кершатан — а менят. Вансак ва!»
Кончтасть вейкест-вейкест туртов ды мельцек-мельцек совасть кирьксэнтень Верепенсетне — Пупор Люба ды Сеськень Таня. Набойть тейтертне. Пштить келест. Эрьбатадызь истя, зярдояк а стувтсак. Карадо-каршо нурькинестэ эскелязь, чатьмонезь тейсть кирькс. Лоткасть. Люба, каршонзо аштиця ялганзо лангс ванозь, казсь тензэ нурька морыне:
Войнасто тетям мурдась — Сеск раминек сея.
Ды эрямонок кармась Седе веселея.
Любань-Танянь морынесэ пелькстамост мольсь аволь кувать. Меельцекс гармонистэнтень морасть кавто вайгельсэ сюкпрянь морыне, сюконясть тензэ ды стясть лиятнень юткс.
— Мезе, Наля, листяно? — кончтась ды пшкадсь Куля вакссонзо чатьмонезь аштиця эсест пень ялганстэнь, Нуянь Налянень. — Невтьсынек морамонь ёрокчинек?
— А-а, — каршо, эстест марямга, мерсь Наля.
Сонзэ кортамосо «а-а»-сь — васень вал, теке, мерят, лият а содыяк. Истя-аволь, прась-эзь вемельс, сонзэ теке — «а-а». Сеске а чарькодьсак. Тейтертнень пряваст ашо чахрасо артозь чопода-якстере шальть, конат нолдазь лавтовост-кутьмерест [14] ланга. Лембе манаркасткак вейкеть. Сынь прок патят-сазорт. Ансяк Надя аламнеде явови сэрьсэнзэ, эль сэрей.
Гармониясь тердсь лия киштицят. Куля саизе кедте Налянь, ды сынь лиссть киштема таркантень. Тейсть лувонь коряс, икеленсетнень кондякс: пильгень чавозь-кайсезь ютасть «киштемань-чатьмонемань кирькс», ды Куля, ансяк лоткась велямодо, васенцекс серьгедсь «сеедькай», кода Кузвелесэ мерить частушкатнеде.
Миколь седясь ды мизолдозь, теке марто, «музыканзо» кунсолозь, вансь ваньксстэ-мазыйстэ оршазь тейтертнень лангс. Киштицятнень чамаст кувтолдыть, сельмсэст цитнить кенярксонь сяткинеть. Кадык ушосонть нусмакали сёксь, иетне сынст — панжиковонь.
Ушодтано, Надя ялгай, |
Куля мельга сеске «вал сайсь» свал капшиця, «лавшо кель» Наля, гайгезевсь сонзэ ванькс, теке чадыковсто чудикерьксэнь, чольдердиця вайгелезэ. Тейтертнень морамсто аккордеонось эль маряви. Седицясь тень теи, цяк тетькси мехтнень, арсезь: чарькодевельть, седейс пачкодевельть киштицятнень валост.
Паряк, вечксамам се цёрась, |
панжизе оймензэ Нуятнень тейтерест.
Налянь одс полавтызе Куля ялгазо. Сон стясь гармонистэнть каршо, варштась сельмезэнзэ ды морынесэнзэ, пеедькшнезь, «скирдызе» ялганзо. Текеньсэ, вановтсо-валсо, «токизе» седицянтькак. Содазо, Валдаень Куля аволь ленгстэ кодазь.
Вармась пуви, чувтт чаравты, |
[15] Миколень турванзо келемсть мизолкстонть. «Пицизь» неть валтнэ эряза Наляньгак. Пеедькшнема — ялатеке псикс маряви.
Сон, Наля, ютавтызе, пилысэнзэ кияксс чавозь, киштемань лувонть, стясь Кулянь каршо, невтсь кедьсэнзэ ялганзо лангс ды пеедькшнезь поладынзе валонзо:
Стяко кортат, ялгам Куля, |
Кулят-Налят «пупсесть» вейкест-вейкест байтяк. Пеедькшнек-иля, «концертэнь» шкаст прядовсь. Максома тарка лиятнененьгак. Сынь кедте-кедьс кундазь стясть Миколень каршо ды вейсэ серьгедизь мельваномань, прядомань-сюконямонь валост:
Эрьга, ялгай, мартот вейсэ |
Шкась мольсь. Киштемань кирьксэсь чаво эзь кадново. Шешксть-чарасть вейкень-вейкень полавтнезь. Ялатеке улиндеряй ушодкс, ули пеяк. Прядызь пеедькшнемань-раксемань морынест меельцетне, ды весе сайсть ёнкс кенкшенть пелев. Клубонь азорось, алкине, уш аволь од тейтересь, ютась, илязо кадово-стувтово мезеяк, тия-тува, мадстизе стенас понгавтозь лампань толонть, ды лиссь весемеде мейле.
Куля ды Наля, кавалалдо кундазь, валгсть састыне келей кузтемаванть, ютасть зяро-бути ды серьгедсть моро:
Эрде, ялгат, паро ялгат, |
Каштмольсь, кунсолось сынст сёксень, шканзо коряс, лембе чопода весь. Мик эзть маряво пинень онгоматкак. Велесь удось. Эзь удо, сравтневсь кудотнень-латотнень, икельгаст чувттнэнь юткова морось ды васень чадыведекс шалныця сонзэ ялгазо [16] — тейтерьксчись. Мольсть сынь састо эскелязь, кавалалдо кундазь.
Каятозо минек морось Вирьга-лаймева.
Лайменть песэ касы-касы Умарень пире...
Аламодо апак прядо морось сезевсь — удалдо каятотсь цёрань эчке вайгель. Азорозо, тейтертне кода-бути сеске чарькодсть, — аккордеононзо марто Дораень Миколь.
— Миненек, тейтерть, аволь ве кива? — пшкадсь сон моразь молицятненень ды явинзе — совась юткозост.
— Тон каня а содасак Пандопрянь кинть? — пеедькшнезь мерсть тейтертне.
— Монень, маряви, тон алкукскак кадовить. Войнасо ульнить — ёнкс теть эзь саеве, — Куля, ней уш ськамонзо, поладызе кортамонть.
— Мезе теят, талакадынь — кавто пиче юткскак кадновкшныть, — мусь мезе меремс Миколь. — А тесэ пичетнень таркас истят тейтерть!
—Мезе виде-виде. Истят «пичетне» аволь ансяк кить човор-гавтнить, пряткак ёмавтнить, — каятотсть чоподасонть Налянь превс путыця валонзо.
— Тандавтнят? — пеедькшнезь кевкстизе Миколь мусколицянть.
— Мекс тандавтнян? Каня а сеедьстэ ёмсить мик превейтнеяк? — кевкстемасо-тонавтомасо тагояк поладынзе валонзо Наля.
— Весе, тейтерть, весе! Кедень кепедемат икеленк, — верьга вайгельть, кенярксов ёжосо мерсь Миколь. Полавтыксэлизе кортамо лувонть — эзь кенере...
— Тейтерь икеле?! — эзь ойма, седеяк лаказевсь марязденть пшти кель Наля.
Куля чатьмонсь, кунсолось вейкест-вейкест валсо сялгоницятнень. Истя пеедькшнезь-кортнезь эзь редявояк, кода пачкодсть сынст, чоподасонть покштояк покшокс неявиця кудост видьс. Куроютконть куншкава шешкезь «лишмень» кистэнть пурдак кельметнесэ токазь лугиненть ланга керш ёнов ды, ловт, кузтемпесат.
Миколь кандсь аккордеононзо кшнатнень вельде лавтовонзо [17] трокс, тейтертнень кирдсь кавалалдо. Кулянь кудонзо икелев пачкодезь, сон олякстомтызе Налянь керш кедензэ ды марявиксстэ лепштизе Кулянсенть. Тейтертне чарькодсть, кинень ков туема. Секскак Наля нусманясто мерсь «вастомазонок» ды сыргась эсензэ кива. Миколь кадовсь Куля марто.
Од ломантне апак капша ютасть Кулямезень латынесэ вельтязь кузтемпес. Кудонь стенанть ёжова нолдазь келей лазось-сэдявксось — эземень таркас. Сон валаня, ванькс. Секскак ён озамс аволь чалгамо, а сонзэ лангс.
— Теня... — ушодсь Миколь, кутьмерьстэнзэ «музыканзо» саемстэ ды Куля ваксс озамсто, ды пупордясь, эзь муеве тензэ, кекшсь валось, конань ёвтыксэлизе.
— Мон меревлинь... — текекс кундатотсь келезэ тейтеренть.
— Мон, мон ютась вестэ онстон неитинь, Куля, — муевсть, лиссть, окойники, оляв вейс сюлмавозь валтнэ. — Войнасолинь, ламо мезе неинь, ламо мезень пачк савсь ютамс, эзинь пеле, тесэ вана...
— Онстот? Алкукс? — кецязевсь ды теке марто тандадсь Куля. — Ды кода? Кода неимик?
— Келей-келей пакся... Троксканзо таргавсь крандазонь ки. Кавто ёнганзо — кенериця товсюро. Мольтяно те киванть кавонек, тон ды мон. Чикуншкань валдо, пси, чаманок палси вечкевикс экше варма... Апак учо, сеске, чипаенть копачизь тусто чопода пельть, кивчкадсь ёндол, мильк шкадо мейле зэрнезевсь пурьгине. Тон тандадыть ды, «вай» мерезь, лоткить, лекшкадыть эйзэнь... Лосьсэ тусь ушкс пизиця, варма марто пиземе. Учотано прядовоманзо. Сон яла моли. Начкинек пачк. Кеминек лотки. Эзь учово... Сыргозинь. Вана, колмо-ниле валсо ёвтнезь, те онось.
— Паро онось, парс, ансяк вана... — лотксезь, нусманясто ёвтынзе меельце кавто валтнэнь кунсолыцясь.
— Пелесь, пурьгинесь, мериксэлить? — снартынзе прядомс Кулянь валонзо ононь неицясь.
— А-а, те он, мезть ансяк а эрсить онстот! Истят чикерть-микерть — а кемевияк, — нардынзе Куля сюмора эсь арсеманзо, эзизе сае седей малас Миколень пельде марязентькак.
— Кодамо весь чопода, сельмс нерьгстатадызь — а неят, — полавтызе кортамо лувонть тейтеренть ёжосо озадо аштицясь. — Меремс, сёксь, а оно кодамо лембе. Истя эрси пиземеде икеле.
— Виде, туи, секень вант... Учок лов марто, — ёвтызе Куля мелензэ икелень шкадонть.
— Эждицяст арась, секс кельмть, — эльнезь, цельця вайгельсэ ёвтынзе валонзо кевкстеманть каршо Куля.
— Варьгинеть саемальть!
— Арсят, эждевлизь?..
— Сы шка, муеви сынст таркас лия эждицяяк.
— Арсят?..
— А мезть кавтолдомс.
— Сюк паро валот кис.
— Ванды вастовтано?
Каршо —кашт. Тейтересь арсезевсь. Миколь озась аламнеде лиякс ды вансь, вень чоподанть изнязь, вакссонзо тейтеренть чамас. Учось. Марявсь тензэ, пе а ули чатьмонемантень. Седеезэ лажнозь ловсь шкань пелькстнэнь.
— Тонь эйстэ, Миколь, ашти, — окойники апак капша ды виздезь ёвтызе мелензэ Куля.
— Монь?! — неть валтнэнь марязь, Миколь мезеяк эзь мере, важовсто, дёлязь кутмордызе вить кедьсэнзэ тейтеренть. Тона каршо эзь моле.
* * *
Кавто ковонь ютазь, Од иень само малава, Дораень покш кудост сорнось верьга вайгельть, кенярксонь марязь ёвтазь валтнэде, киштематнеде ды моротнеде. Сайсть урьва — Валдаень Кулянь. Одирьванть ялганзо ды ламо аватне оршнезь эрзякс: прясост цитнить пангот, лангсост мазыйстэ викшнезь руцят-покайть, пильгсэст, карень таркас, понань кемть. Горнойть, алякат, анда, тейтеренть ялганзо... Инжетнеде байтяк. Теде башка, ламо ваныцят. Кудось тыц пешксе. Веенст, кинень эзь кадово тарка ютамс икелев, седе малав, аштесть лепштявозь тарчкс вакссо, кой-кить эцесть каштлангс, ламот «чийневтить» вановтост стуворонть лангс путозь каванямкатнень ланга, аштить ярсыцятнень-симицятнень кутьмерест удало, лексить човонезэст. Эрсить вальмава ваныцяткак. Течи арасть. Якшамо. Суликатне копачазь эчке лекшсэ. Эрьвась бажи неемс мазый-аволь одирьвась, марямс урнематнень ды моравиця моротнень, неемс, кода оршазь, кода киштить, варчамс весенень явшевиця браганть растензэ. Тейтерень чиявтомась, урьвань саемась [19] аволь ве чи молиця спектакля. Вант, полгарьгавтнек сельметь, зяро мелеть, вант нильтякадомазот, кияк а кортавтанзат. Ды истят «ваноматне» визьксэв, амазый тевекс а лововить.
Эрзянь свадьбась седикеле гайгиль малав таргонь перть ды молиль моронзо-киштеманзо кувалма, илатнень педе-пес ванстоманть коряс опера ёнов. Ней уш сонзэ истямокс а несак, а кунсолосак. Ялатеке Дораень кудосо течи топавтовить свадьбань кезэрень пингень ламо илатне. Састь горнойть. Каванизь-симдизь. Стувор экшсэ аштезь, серьгедсть эрзянь моро. Тейтерень ды цёрань вайгельтнеде вальматне зуйнесть.
...Теленть, мельганзо эрязкалиця тундонть одтнэ ютавтызь Миколень тетянзо-аванзо кудосонзо. Сёксень лембе, коське шкастонть уш совасть эсест, пичень чапо, мик лазсо вельтязь, эйпаро покш кудос.
Валдай Клавдя, Кулянь авазо, трясь-кастась вете тейтерть. Авань ошмо. Дорай Федя, Миколень тетязо, пря шнакшнось ломань икеле цёрань сюпавчисэнзэ — вете эйстэст, весе шумбрат. Миколь сехте покшось. Сон — тетянстэнь васень лездыця. Лиятне зярс вишкинеть. Ялатеке Миколь мельга сеске молицятне — марявикс неже. Сонськак Федя, тетяст, зярс вийсэ-превсэ, велесэ, колхозсо ловови эрявикс ломанекс. Секс истя куроксто, нурька шкань перть стявтовсь цёранзо туртов гай од кудось. Псилгалемат, карязонь яжамот, якамот-пакамот, мелявкст ульнесть, содави, аволь аламо. Сень кис оно кодамо пазида «цярадсть»! Путызь кинть кувалт. Колмо вальманзо ваныть чикуншка ёнов, кавтотне — чивалгомав. Эрьвась эйстэст келей, сэрей, бажи неемс велень эрямонть эрьва лекстявксонзо.
Шкась моли.
Куля, Дораень урьваст, лисни важодеме эсест пень бригадав. Ков кучсызь. Нуеме, жнейка эли «лобогрейка» мельга пултонь сюлмсеме, скирдовамо-капамо, кочкомо, ледеме, пивсэме, сортовамс... Ламо мельть явовить канстентень. Шкастонзо таргама, ваявтома, костяма пазенть. Кенери — пивсэма, таргама-ваявтома сонсензэ мушконть. Сёксень меельце кавто ковтнестэ трестанть — костязь нетькстнэнь — тракторсо-машинасо ускома заводов. Каня лововить велень-сядонь тевтне? А зяро, колхозонсетнеде башка, кудоютконь, кардазонь ды пирень? Ансяк кенерть чарамо. А кенерят сявордомо вейкенть, омбоцесь прянзо кепси, терди, седе курок теемак. Ды петя чистэ-чис, иестэ-иес, эземпряс вецема шказот. Кулянень эзь савкшно тенень тонадомс. Сон эрьва ков кенерсь.
[20] Тевть паксянь, тингелангонь, лугань, кудонь... Тевть, тевть... Мезе улевель Моданть лангсо, мезекс, кодамокс теевель ломанесь ды эрямось сынтемест?.. Мезес пачкоди, мезе карми сон тееме, зярдо тыц эцесы пекензэ, питней кедьсэ-парсейсэ оршасы лангонзо? Кодат мельть совить превезэнзэ, зярдо кудонзо пештясы минень-сюнонь сюпавчиде? Чинек-венек удомо, телевизор икеле ве тарканзо ёзамо? Паряк, киштеме-морамо, чийнеме-кирнявтнеме? Кармить-арась аватне чачтнеме, эйкакшонь кастомо? А книгат, книгат кармить ловномо?
Эзть маштне тевензэ кудонь азоронтькак, Миколень. Нидензэ эзь кадново. Кудосо-кардазсо котьмамотнеде башка, омбоце ие уш нуи-уряды паксят. Тень лови сехте покш тевекс. Кузи кшнинь теине кузтемаванть «Сталинец» комбайнанть штурвалонзо экшс, варшты вармань коволтнэде сэтьместэ лымбиця, сырнекс кувтолдыця товсюронь паксянть сравтовозь мазычинзэ лангс, ды юмболк токасы седеензэ кецнемань лембе. «Вантая, кодат келейчить! Кодамо мазый модась-масторось! Кода шожда лексемс!» — эрьваксть ледить мелезэнзэ валтнэ перьканзо верде ванозь. Ды уш маряви тензэ: ашти аволь комбайнань — ожо иневедьга лымбакснезь састо уиця кораблянь сэдне лангсо. Ваны икелев, вети кшнинь венчензэ саезь ёнксонть пелев.
...Эрямось кода менельксэсь. Течи маней, валдо, валске стят — велькссэть сэнь паксятне педе-пес копачазь чопода, алов новолезь пельсэ. Весе мелявкстнэ-кеняркстнэ Дораень кудоютксо молить ве лувсо, вейке-вейкень марязь-чарькодезь, вейке-вейкенень савтозь. Лувось вейке — мелень ванома. Ялатеке лиясто та-кода апак учо верьгеди сёвнома. Ох-вах уш неть «пурьгинетне»! Мекс ломанесь кодаяк а эряви сынтемест, мекс? Паро, куш се, Миколь мокшнас а пачколи. «Чапамонть» лангскак ваны мельтеме — ули-арась...
Кой-зярдо мазыйстэ ёролдозь, мелень путозь пурназь-сэрнязь ниле стенатнень ютксо ацирьгалематне кивчкаить эйкакшонь аразде. Кавксоце ие уш Миколь ды Куля эрить вейсэ, пивтить тевтнесэ, оймсить, удсить вейсэ, а вана од, пиже лопа тарадке тенст эзь нолдаво. Панжсы Куля паксясто-косто самсто кенкшенть, ды маряви — сови чаво, эрицявтомо, стакасто лексиця кудос. А козкс, а валнэ. Сеске сайсы тошначи, нуваргады седеезэ, та-кода олы эрямонть мазычизэ. Истямо «бутрав» шкатнестэ ве чирькс вал, ды гувк кирвази булга. Аволь сеедьстэ, ялатеке истят «тевть» лиснить.
[21] Содасть, кавонест содасть тувталдонть. Пшкалесть нить-полат, ды а весть, шумбрачинь витицятненень, пачколесть ошовгак. Ансяк лезэсь... Доктортнэ текень кортасть: «зыянось» Микольсэ, сон «чумось», сон эзь маштово «видицякс», лемень-буень поладыцякс. Стакальть, седей раздесть неть ёжонь кольстиця валтнэ, нардтнесть эрямонть смустензэ. Кода улемс Кулянень? Шумбра од аванень а улемс авакс, а максомс цянавнеть, вечкевикс левкскеть туртов поте, а марямс потямстонзо гувноманзо, а неемс удомань пачк мизолкскензэ... — цидярдомс тень стака. Мирдезэяк шкань-шкань тарка эстензэ эзь мукшно. Сардокс кирдевсь прясонзо мелесь. «А чуман мон, а чуман! — серьгелесь сон эсь пачканзо «чумо» валонть марямсто, кадык сон ёвтавильгак аволь сонзэ лемс ды мездеяк лиядо кортамсто. Лиясто «калады» кайксэзэ, ёми мелезэ кундамс тевс, мик... эрямс. «Войнась чумо, войнась, идемевсь калгавлинзе сонзэ ушодыцянзо ды ветицянзо-поладыцянзо! Зяро ды кува ансяк эзинь пуворя госпиталень ацавкстнэнь, кинень эзинь пшкале — стяко. Натой муницяненьгак пачколинь. Косто, бути...» — истят шкатнестэ велить превсэнзэ нусманядо пешксе валтнэ.
Эрьва кодат мельть совсесть Кулянь превскак: «Кадомс неть стенатнень, мирдем ды мурдамс аванень?.. Мейле мезе? Мезе те максы? Каня теде пекиян? Каня менян чирялт варштавкстнэде? Стяконь арсемат. Теяк виде: монтеменьгак тосо ули кинень эрямс. Кавто сазорнэнь зярс апак чиявто. Арась, те а тев. Тесэ тенек оно кодамо «кошо» пурнавсь! Кадык «раесь» стувтсь совамс эйзэнзэ, ялатеке тельня ванстанзат якшамотнеде, кизна — пситнеде-цярахмантнэде. Микольгак... Ков сонзэ кадсак? Мезе карми тееме монтемень? Мезес пры аваломантеме? Каня сон чумо — истя колызе войнась?
...Кинь пельдеяк? Ве ёндо, а? Апак ёвта, салава. Каня истя а тейнить? Салава... Киде? Микольде? Ламотнеде кекшемс «тетянть» — а стака. А вана Микольде ... Сеске кевкстьсамам: косто муик? Вай, чаула! Мезть понгсь тапарят... Арсезеват седеяк: веленть кувалт ютат, муят-арась пекиявтыця? О-ох, пелян а муят истямо. Миколень иенсетне, седе сыретнеяк кадовсть, ловт, пелест тозонь, тюремань паксятнес. Ужока, баяга пря, мекс тон истя рипакадыть? Сыреть арасть — одт улить. Ну, эно истямось муеви. Теде мелявтомс а мезть. Охо-хо, ки соды ков туевить, кирдевтеме ава, ёртыть превстэть сюва мельтнень! Ознок уш, Микольнень понгить. Кадовлить кадалькакс, ськамонзо [22] кукордыця кукокс, вадря улевель? Мирдевтеметнеде войнась тейсь оно зяро! Уцяскат те тонь, седейнем, уцяскат... Сускить пееть ды кирдть.
Минь, ломантне, бешоконь, истяттано: яла тенек аламо, а саты, правттано саемс, лутамс, габордамс, таштамс седе ламо. Аноктано менелентькак юдмазонок эцемс! Пе а содатано. Инешкипаз, мекс истямокс чанстимизь? Берянь — арась эйкакшом, берянь, седе а ков. Арсян, мелявтан теде, пеняцян... Теке шкастонть стувтнян: Пазось макссь тень лия чансть — Миколень, сонзэ вечкеманзо, эрьва тевсэ ёрокчинзэ ды... цёрань виензэ. Каня те а чансть? Пекиямс а пекиян, а вана таркасо «налксеманзо» вечкевить, мелем витни. Марян прям авакс. Мекс тень кис а сюконякшномс, а озномс Инешкипазонтень? Каня те аламо?
Сеедьстэ ды ламонь пельде савкшны тень марсемс: «Монь те арась, тона, сень рамамаль, тонань!» Яла тенст мезеяк ды а саты, мезеяк ды эряви, ловить эсь пряст тень кувалма эль а пайстомокс. Мон истя меревлинь: «Кецнек улезентень, мезе теть казсть чачомстот тетят-ават, Пазось. Бажак а пеняцямс, а лайшемс.
Миколь, Миколь... Чинь тевтнень прядозь, чопотезь, окойники пачкодтяно таркалангс. Сизят-кедеть а кепедевить. Ансяк прят путсак тодовонть лангс, сон сеске кутморямо-палсеме. Теке чинь-чоп мерят аволь стака кшнить-мезть кепсесь — карвот чавнось. Палси, палси... Лиясто кавтолдозеван, арсян «чумочись» эйсэнзэ кармавты, пря истя иди. А содан, истя-аволь... Вечкевить кутморямонзо, васькамонзо-дёлямонзо. Секскак, дугинем-ялгинем, иля уле вармакрандазокс, ёртыть ды стувтыть верьга, тешттнень юткова ливтнемадо ансяконь арсемат...».
* * *
Читне ливтязь ливтить. Мельгаст лип-лип ковтне, иетне, эрямось... Шкань пелькстнэнень ялатеке: улят-арасят тон, паро ёжот эли ковгак а маштови, седейсэть верьгизт раздить эли цёковт морыть. Сынь а кевкстнить, мекс эйкакшот керькс, мекс — вейкеяк арась. Те сынст тунь а талновты.
Велесэ тевтнеде тельняяк куш сёлт сёлтак. Тунда ды кизна — ледстнемскак а мезть. Сядо улавсо а усковить! Улевельтькак эйстэст куш кой-конатне кевень кондят калгодот, иневедь жождасто пиряволь.
Миколь комбайнанзо таркас-станс аравтомадо мейле, уш [23] сундерьгадома малава, кенерсь пирест удалга лугиненть лангсто ветямс кардазс ды симдемс вазонть. Нолдынзе кардазс скалонть, реветнень, кандсь лисьмасто ведь, совавтсь пенгть. Ведьс омбоцеде лисемстэ кузтемпесэ вастовсь Куля марто, кона сась кизэнь лагерьстэ чокшнень потявтомадо мейле.
— Вазонть совавтык? — ульнесь аванть васенце кевкстемазо.
— Совавтыя.
— Тувонть андык?
— Андыя.
— Саразтнэнь андыть?
— Валске кайсинь... Пенгть совавтынь, скалонть нолдыя, тикше каинь, ведь кандтнян, тонь вечктян... Мезе кадовсь? Кадовсь вейке — потявтомс Сюракшонь, — мерсь Миколь ды та-кода аймельгадсь, чаракадсть превензэ. Ёжонзо берякадоманть нинстэнь эзизе невте, эскельдясь ведранзо марто лисьмалангов. «Вай, те истя мезе теевсь мартон!» — кивчкадсь превсэнзэ.
Куля фермань оршамонзо апак кая совась кудос, саизе моргань эземстэ потявтома ведранть, марлянть, кечес каясь лембе ведне ды лиссь кардазс фермань скалтнэде мейле эсензэнть потявомо. Мейле човов ловсонть педизе, кайсизе банкава, путызе кельме таркас. Тесэ ледстинзе коськеме понгавтнезь муськеманзо, капшазевсь пурнамост.
Ярсамо нить-полат озасть уш толонь вельмевтезь. Миколь Кавксть-колмоксть амольдясь каштомсто таргазь сывельямдонть, сусксь кши печтьстэнть ды чатьмонезь айгизе ваканонть, путызе пенчензэ.
— Мекс-бути ярсамо тень а моли, — прянь нолдазь видькстась Кулянень.
— Мездеяк эзить ярса? — талнозевсь авась.
— Мездеяк, теке... — арсезевсь Миколь.
— Юты. Вансак ва. Мезть а эрсить, — седей явсь, оймавтсь Куля ярсамодо лоткицянть. — Паряк, пек стомавитькак. Истяяк эрси.
— Монгак истя арсян, — мелень трокс муст-муст пейдезевсь цёрась ды видемтизе рунгонзо, лиссь стуворонть экшстэ.
— Ну, мон истямо мель кирдян: ёжонь васень вадрялгавтыцясь — сонсь рунгось. Сон весемеде виев идицясь. Секскак чийнемс шумбрачинь витема кудотнева эрьва пштикстэнть — а виде, — кедьгетнень пурнамсто-урядамсто поладынзе валонзо Куля.
— Ды тон, Куля, алкуксонь доктор, — мизолксонь пачк шнызе нинзэ Миколь коник ёнов кепе ютамсто.
Прядовсть чинь мелявкстнэяк. Азоравась нардтнинзе кедензэ, кайсесь, витинзе-петинзе чавачамонть икеле валдо тусто черензэ, мадстизе толонть ды мадсь мирдензэ ваксс. Кудосонть пси. Миколь аштесь кунст мадезь чова коцтонь тавадксонть лангсо. Эзь вельтя Куляяк. Матедевемадо икеле Миколь вечксь велявтомс вить бока лангс, кутмордамс нинзэ ды истя матедевемскак. Ней цёрась сырк эзь тее. Чатьмонсь. Арсезевсь, бешоконь, ёжонь берякадомадонзо.
«Те, видеяк, мезе-бути а истя, зярдояк истя арасель, — сась мельс мирдензэ вакссо кунст аштезь Куля, — мезеяк режниця-альтниця кургозонзо эзь сайне, ярсамо тензэ а моли... Истямояк арасель — а каямс лавтовом ланга кедензэ. Мекс? Паряк, алкукскак, ормань пансицятненень ардтнема? Берянь мезеяк илязо лисе. А! Стяконь талномат. Ёртыть превстэть. Юты-юты, мезть а эрсить. Чи, кавто, ды ёжозо полавтови... Зяроксть эсеньгак истя эрсесь.»
Авась оймавтызе талныця-кавтолдыця оймензэ, полавтызе мадема ёнксонзо ды кутмордызе мирдензэ. Истя матедевстькак.
Авань седей — мариця, содыця седей. Кода сонзэ Куля эзь оймавтне, эзь вадяша — эзь маняво. Лиссь потсонзо кекшезь кирдевиця меленть коряс. Микольнень эзь моле ярсамось омбоце чистэяк, колмоцестэяк, нилецестэяк... Марясь лавшочи, сэредсь, увнозь увнось прязо. «Те а тевть», — сась мельс Куля. Шканть таргсеме эзь карма. Вешсь машина ды ускизе поланзо буень-райононь шумбрачинь витема кудов. Кемсь: ванносызь-кунсолосызь, сёрмадстыть эрьва кодат таблеткат-микстурат ды — мекев, эсест латалов. Ломанесь содазьгак, кадык соды ламо-мезе, ды а кеми. Соды — кулы. Ялатеке кеми: карми эрямо певтеме. А уш апак сода — кемть мезес мелеть. Кемсь Куляяк. Ансяк кемемазо эзь топавтово. Манявсь.
Ванность, пупсесть-«андсть» ормаменьксстэ Миколень, чинь-кавтонь таркас, малав ков. А стяко. Кода а кода «салмукстнэ»-порошкатне лездасть. Сась кудов эсензэ «чаро» лангсо. Ялго. Вете вайгельпетнень изнинзе теке мезеяк мартонзо эзь теевкшнеяк, кодамояк орма эйсэнзэ эзь сэве, эзь наксавто. Рунгос, виде, аламнеде дёкушкадсь. Чамазо ловташкадсь. Ды те содави, кудось, косоль, аволь оймсема кудо, а таштат верьга-ланга килот, нармунькс ливтнеме а кармат.
[25] ... Самодо мейле Миколь талай котьмась кудонь тевтнесэ, мельспаросо лездась нинстэнь. Сэтьме эрямонь лувось, Кулянь чевте валонзо, мельганзо яксемазо, тантей каванявксонзо, неявсь, таблеткатнеде лезэвельть. Цёранть чамазо нацяс валакадсь, шкань-шкань якстерьгалиль, дёкушозояк ютась. Кодамо теть резыця-сэредиця?! Чирькекс мендявозь меште мараля.
Лангс ванозь, ламось мезесь неяви тунь лиякс. Ушосонть сёксь. Вана паксянь нуематненьгак прядызь Микольтеме. Тевтне кардазсо-юртсо аволь икелень туро. Колхозсояк сынь кизэнь коряс а лакить. Лиясто Миколь лисни тракторонь-машинань парков, мейсэяк ды лезды. Тракторонь мотор, машина кодамояк пурны, мезеяк ды витни. Яла тев! Яла аламнеде витеви мелеть ялга ютксо улемадонть, кортнят, лексят истя содавикс коштсонть. Вансак — чись ютась.
Кодат пинеть-псакат ангорясть цёранть седеензэ, кодат стакачить печтясь, содась ансяк сонсь. Мезень лезэ ули кинень-бути пеняцямотнеде? Кинень эрявить ризксэть-сэредьксэть? Сынь тонь. Тейть мартост мезе мелеть. Миевлить, содави, ды кинень? Кие рамасынзе?.. Латкс сявордовлить? А усковить. Ёвтнемс сындест эрьва киулосо а мезть. Келень човсематне — аволь ормаменькст. Кузвелень эрицятненень марявсь: Дораень Миколь Кулянзо марто экшелить уцяскань лембе эрькесэ. Эрить ды эрить, прок кавто псакинеть — а марят пельдест кежей вал, берянь куля. Сёпомс а мезть, лангозост ванозь, кой-кинь сельместкак сявалесть.
Ланга-верьга, седеяк, васолдо ванозь, ламось, сави меремс, а редяви, чуросто неяви зыяноськак. Валдокс, кувтолдыцякс, седеень витицякс неявсь эрямось Дораень кудосояк. Ансяк...
Шумбрачинь витема кудосто Миколень самодонзо мейле васень вестэнть Куля эзинзе маря матедевемадо икеле Миколень вадяшамонзо, эзизе кутморда, эзизе лепштя ёжозонзо. Зярдо снартызе тень теемс сонсь, цёрась велявтсь удалъёнт ды шаштсь стенанть ёжос. «Вай, кода тень чарькодемс? — юв-яв ютась пряванзо сэпей мелесь. — Ков, кувака ков араселинек вейсэ-маласо ды вант вана! Истят тевть зярдояк арасельть. Те мезе-бути а сонзэкс. Паряк, ормась педе-пес эзь паневе? Паряк, лепштизь ансяк?» Неть сюмора мельтне кувать кирдевсть превсэнзэ. Сынст марто стомазь матедевськак.
Эзь маняво Куля — Миколень ормазо педе-пес эзь паневе. Ансяк зярс-бути канкстомтызь, пиризь. Изнизь, паряк, вейкень, лиссь омбоце.
[26] Миколь таргсесь шканть, чатьмонсь, эзь панжо оймензэ, пельсь ёвтамс кодамо пайстомочи, кодат майсемат таго уш зяроцеде куродызь сонзэ. Ней сон эзь маштово аволь ансяк эйкакшонь нолдыцякс, тетякс улицякс, эзь маштово цёракскак. Кодамо эрямонь тансть тензэ пазось кадокшнось, сеньгак саизе. Мезе теемс, кода улемс? Ков молемс? Кинень пшкадемс? Савсь видькстамс, ёвтнемс Кулянень весе, педе-пес, кода ули.
Ёвтазесь марявсь авантень маней чистэ пурьгинень урномакс. Мезе-мезе — истямо эзь учне. «Кодамо чумонь кис сезизь ды нельгизь меельце кенярксонок? Мезень кис истя менелень ды модалангонь чопода вийтне нарьгить лангсонок?» — чарасть-велясть кевкстематне Кулянь превсэ.
Миколень видькстамодо мейле, ловт, сеске, Дораень кудосо-чисэ ушодовсть мейсэяк а витевиця кавто ёндо седеень ангорямот. Эрьвась эйстэст эрясь эсензэ лукшсо, эсензэ керьмесэ. Та-кода башка-башка. Седе ламо чатьмонсть. Авась бажась, вий путсь куш чевте валсо-мейсэ савтомс, лездамс поланстэнь, ансяк те парос эзь пачтя. Савсь, косо пеень сускозь, косо пеедькшнезь, панемс казямо-кельме ёжотнень. Ялатеке кажось, кода кортыть, ськамонзо а сакшны.
...Весть фермасто самсто Алопень куншка видьсэ Куля вастовсь од шкань ялганзо Нуянь Наля марто. Кулянь превсэ а олыця тешкскекс кирдевсь Миколь марто васенцеде вастовомань чокшнесь, ютксост вечкемань сыремемань шкась. Ульнесь «сакалов» сёксень чопода-чопода, шканзо коряс лембе ве. Сон ды Наля лиссть сестэ клубсто ды моразь, вейкест-вейкест кунсолозь, седе морось гайгезэ, сыргасть, саразонь эскелькссэ эскелязь, кудов. Миколь сасынзе ды эцесь юткозост. Миколь... Умок, вай, умок те ульнесь!
— Ужока, ужока, те тон?! — цяк эзь аймельгадо неезденть, эзь кирдеве, серьгедезь серьгедсь Куля ялганстэнь. Ушосонть тундонь васень эскелькст. Чикуншка. Тень лангс апак вано, экше. Наля оршазь телекс. Лангсонзо чопода-тюжа тюс ингельёнт велявтозь кувака шуба, прясонзо кодамо-бути пачань кедень шапка. Ошонь ава... Тейтерькс ульнесь нудей нетькске, ней — кандо, а кутмордави сисем цёранень. Секс сеске оянстэнь эзь содавгак.
— Мон, мон, Кулякай! Эзинь содаво, а? Сырединь? — лодорсо прасть артозь пейдиця турванзо ютксто валтнэ.
— Мекевланг. Од тейтерекс неяват. Мерят, иетькак эзть юта явовомадонок мейле. Ансяк вана келейгадыть вельть. Ну зяро [27] ней эйсэть? Ды лангсот оршавкстнэ... Боярава теке.
— Ды, те мон омбоценть чачтомадо мейле. Теке паро оргадо кепетинь. Визькс. А-а-а... Васенценть, Викань, чачтыя — мезеяк. Омбоценть—тороземинь, чапакс очкокс теевинь, а-а... — ветерди Наля, а арсеяк, кодат седеень пициця, апаро ёжот сыргавтан ёвтнемасонзо. «Васенценть чачтыя, омбоценть...»
Аватне апак капша эскелить Алопень куншкава Верепев ветиця нурдсо ардтнемань киванть. Эйзюрков. Чипаенть вановтозо, содави, аволь телень. Лембе. Ялатеке ловось зярс пря а максы, соламодо ансяк арси. Истя-аволь, колошавтомо кемсэ а якават. Те шкадонть веенст мерить «валдонь ков», омбонстнэ-«телень тундо». Видеть, мерема, тешкстаэ-мельтне. Кода иляст корта, кодат ловт-якшамот иляст уле, маряви-неяви: телесь пешксесэ тундосо.
— Кода тонсь, Кулякай? — поладынзе, певердезь певердсь валонзо ветерькай, эрязкалезь кортыця Наля. — Кода эрят-аштят? Кода Миколь? Ха-ха-ха! Мельсэть ильтемазо, эзик стувто? Умок те ульнесь. Монень, маряви, кеменьшка иеть ютасть. Содат мезе? Монь седейсэяк, видькстан, сон сестэ кирдевкшнесь. Умок те ульнесь.. .ды теке — исяк.
Микольде кевкстеманть Куля прок эзизе маря.
— Кода монсь? — стакасто укстась Куля. — Ёвтнемскак, паряк, аволь эряво. Мезе те максы? Мон аволь пеняцицятнеде. Содак, киненьгак эзинь ёвтне. Кулятнень сёлмост келейть, веркасто ливтнить, а цопить, сеске срадыть веленть келес. Мезекс те? Тонетькак... Арсезевинь, ней, нейке: чамдса, мерян, потмом, паряк, седе шождалгады канстом...
— А-а, иля тандале, Улякай. Косо мон — тосо кашт, нилексть стазь курго! Иля вано — кальдерькаян. Кортак, кортак! Иля пеле.
— Кода монсь? — омбоцеде ёвтынзе неке валтнэнь Куля. — Охо-хо-о... Чопода мельтькак тень сакшныть. Эрсить шкат, анокан килькш каямс кирьгаван. «Саты, путт пе...» — пачколян мельс.
— Вай, те кода истя? Кода? — полавтовсь Налянь молевксэзэяк.
— Весе те, Наля, эйкакшонь аразденть. Мезе истямось — улемс мирде экшсэ ды а нолдамс пургондавкст, эйдинеть — тон а содасак. Натой сельмень сявадыть лангозот ванозь. Алкукс. Эль кенерить эскельдямо колоньгементнень трокс — кавто поладыцят кастат! Шка сы — куломо аволь ськамочисэ кармат. Вейке, куш вейкине Пазось максоволь монень!
Наля кунсолось, вал эзь правто.
...Ламбамосто, кальцть чапамосто, кода илязо уле, — эринек.
[28] Ули-арась эйкакшонок, эрявлинек. Каня ськамонок истятнэде? Яла идинь пря, шождалгавтынь истя эрямом. Ансяк... А стяко кортыть: «Кажось-апарось ськамонзо а сакшны». Тедеде, теке кизэнь куншкава лов, прась лангозонок од апаро. Лиссь, мезде эзь арсевкшнеяк. Миколень сэредемадонзо марсить?
— А-а, — сорновтызе прянзо, ёвтась Наля.
— Косто... Ковшка шумбрачинь витема кудосоль.Сэредсь. Пек сэредсь. Мезеяк, стявтызь пильге лангс. Паро. Ве ёндо ванозь вадрялгадокшнось. Превс а саевиль — ломанесь аволь шумбратнеде. Лангс ванозь — одёр цёра, тумо. Мезе лиссь? Икелень орманзо поладызе омбоце — ёмась цёрань виезэ. Од, ниленьгеменьгак арасть — ава тензэ а эряви. Тон иля пейде! А содат, мезе истямось. Монгак а содылинь. Эрямонть истят коензэ: зярс а лоштятанзат — а чарькодьсак. Чиде икеле коникенек кувалт аравтынь эзем. Арсинь, мадемс седе оля ули, илязо токаво кодаяк удомсто, кежензэ теньсэ а сыргозтемс. Лиссь мекевланг. Валскестэнть, эзь кенере ашолгадомо, кармась музгордеме, мик сеереме. «А-а, ней мон тонеть а эряван, пелят малазон мадематкак, ломанькс а ловат, лангсон нарьгамо ушодыть. Мезекс те эзементь ладсик тезэнь? Каня аламо таркась...»
Эзементь сеске ливтия кудыкелев. Аха. Илязо неявояк. Омбоце чокшнестэнть теинь лиякс: ансяк сась мадема шканок, мон нолажтынь Миколем ёжос. Арсинь, вадяшаса-паласа ды теньсэ очобасынь седей сэредьксэнзэ. Вай, авакай! Кодат очобамот, кода чошкадьсамам, эль кияксос эзинь пра! Теке басом эрдекстэма: «Таго нарьгат!.. Каня эзинь корта — мезекскак а маштован?! А кирвазтеван, а кирвазтеван, мезть пецят, кадомак, илямак токше!»
Пижни Миколь, сонсь, кемат, лайши. Велявтни-велявтни, таргси-таргси оймензэ — сутями. Эрьва весь тень, Наля, адсо лакамо. Молян таркантень — монсь сорнан. Мелявтан, кода а токамс, кода а покордамс. Жаль тень маряви. Лездамс — а лездаван. Кода лездат? Мейсэ? Зяроксть тензэ ледстнинь, эрь ветнень башка ютавтнесынек. А мери. Вейсэ — таго мелезэнзэ а тукшны. Савтык азё! Вана истя пиштетяно. Лемезэ — эрятано. Кежть, ацирьгалемат, сельведть...
... Чикорды ютыцятнень Пильгест ало, кие-бути лангс пеняци исяк празь чевте ванькс ловось. Налкси, пеедькшни, алтни тундонь маней чить чипаесь. Лембедензэ кинть лангс таркань-таркань лиссть телень перть таштавкс шукштне. Либорк-либорк ливтнить озязтнэ, мезть-бути кочксить, тутма пештить. Ёжост, [29] мик вайгелесткак, якшамковонть коряс, допрок лиятат. Саразтнэяк а кадовить эйстэст.
Куля яла ёвтни авань пайстомочидензэ: певерить валонзо ловонь летьке кинть лангс. Кувакасто таргизе оймензэ, варштась вакссонзо эскелицянть лангс ды поладынзе валонзо.
— Те аламо, ну пес, пес пачтимизь кулелямонзо. Эрьва наксадсь палманенть лови эйзэнь педсиця цёракс. Ну, эрьванть, эрьванть... Аха. Тон, келя, анокат мадемс кинь понгсь алов, а кочксят вадрят-берять, кие понги. Фермасо потявтыцятне — ават, прявтось, виде, цёра. Содасак кие? Пошань Оло. Мельсэть? Ну кода эно! Пильгевтеме. Микольде иеде-кавтодо сыре. Васня сонзэ эйс «педявтокшнымим». Келя, тон сонзэ марто усксеват. Кодак сан чокшнень потявтомсто — кудосо зыката. Куш оргодть. «А-а, истямо-тавтамо, тон таго кадновить! Мон ялатеке стардтадызь, яжаса меельце пильгензэяк». Лиясто мекевланг, чатьмонемасо панды. Чокшнень перть вал а ёвты! Лиясто чи-кавто кургонзо а панжсы. Аха. Зяро вийть, Наля, эрявить, кирдемс тень весе!
Улкоть сэтьме коволс пракшнось. А сёвномат — а мезть. Исяк вана таго «кецневтимим» — «алужокс» тень ёвтась райононь кодамо-бути «начальник». Кие истямось, косто, а содан. Арсян, сонськак а содасы. Аха. Паро куш аватнес, потявтыцятнес а кулели! Сынст а токши. Тенень кецнян... — аламнеде пеедькшнезь, седе паро ёжосо ёвтынзе Куля меельце валонзо, теке мельга поладсь: — Чамдса уш потсон таштазенть педе-пес. Аха. Видькстан: вастовиндеряй эсень коряс цёраломань, пежетте пелеме а карман, туян тензэ апак кавтолдо. Мезень монь чумом, мезень кис зняро кирдян?! Нарьгамот, тандавтнемат, акемемат... Мезень кис?! Мейсэ чумом?! Ансяк колоньгементнень трокс ютынь. Мон эдь од ломань, ава, аволь коське пичень тарад... — Куля прядызе ёвтнеманзо ды марямга укстась.
— Кунсолынь, кунсолынь тонь, Кулякай, — кортазевсь Наля, — ёжомгак каладсь. А-а, аволь ламбамо эрямот. Превс путомам, дугай, вейке: кирдть! Тон, арсят, эйкакш мартотне чанстьсэ экшелить? А-а! Ойде-мезде ярсыть? А-а! Весе майсить. Весе! Ансяк эрьвась эсензэкс. Стакат, Кулякай, теветь. Ансяк каня Миколь чумо — истя лиссь мартонзо? Каня...
— Ну, тонсь кода? — каясь трокс вал Куля. — Ёвтнек. Мон, секень вант, налкставтытинь кортамосон... Тонсь кода?
— А-а. А мезть ёвтнемс! Тонь кунсолынь, монсь эсень эйстэ арсинь... Эседень?! Эрьванть, кортыть, эсензэ ормазо. [30] Канстозояк. А-а, тонь эсеть, монь — эсень. Монгак эрьва кодамо толонь пачк ютынь. Мирдем вейке, тетяст эйкакштнень — кавто. Чапик? А-а... Вейкесь — ...атявтом.
— Вай, авакай! Ну те кода истя? Каня эрси истя? — абунгадсь Куля марязденть Налянь кургсто. Мик эскелямсто пильгезэ лиякс чалгавсь.
— Эрси, лисни. Ёвтниндеряса весе... Э-э-э... Монень маряви, ризкстэнть, эрьведевеман коряс, сядоксть тондеть ламо нильнинь...
Вейкень-вейкень кунсолозь, кортнезь, эзизь редяяк киулос пачкодемаст. Седе тов, кудос, ялганзо ильтеме Куля эзь карма. Ёвтасть вейкест-вейкест туртов лембе валт, ды эрьвась тусь эсензэ киява. Кулянь фермасто само шказо ютась. Седеезэ палозь палы. Секень вант, учи эйсэнзэ апаро вастома. «Косолить?» — марясак, эль кенерят кенкшенть панжомо. Эх, эрямо, эрямо! Яла кортыть: «Пинень эрямо». Маряви, азортомо пинетненьгак сон седе сэтьме ды мик виде. Сынь, мерема, стяконь кис, кода ломантне, чирьстэ ёвтазь валонь, нулынень кис а амзорить вейкест-вейкест, а раздить.
Стяко эрязкалесь, стяко талнось Куля. Миколь редикскак эзь тее — сась низэ фермасто аламнеде шкадо мейле. Натой кевкстизе, кода эрсиль вемельсэ, апак ацирьгале эрямо шкастост: «Сизить? Пекеть вачсь?» Эзь кемевеяк, умок эзинзе марсе оймень эждиця неть валтнэнь.
* * *
...Миколень калмасть веленек. Ульнесь кизэнь гай, лембесэ-валдосо элякалиця чи. Теде икеле сиземань апак сода мольсть эрьва кодамо «тюсонь» пиземеть. Веенст пезерят ды «нузякст», прок аволь кизэньгак, нолдавсть чова сувтемень пачк, лиятне керязь керясть ушкс варма марто... Цёранть тоначив туема чистэнзэ менельксэсь полавтовсь. Пельтнень прядовсть начконь таштавксост ды срадсть. Менелесь невтизе валдосэнь чаманзо.
Войнань томбавксось, мельганзо мейсэяк а паневиця ормась, сынст кувалма кудосо аладямотне, сёвноматне-ацирьгалематне допрок одсто саизь Миколень чоподачив. Ютасть аволь аламо иеть, а вана войнанть сельведень кандыця тевензэ кодаяк а прядовить.
Ильтямонзо Дораень икелев пурнавсть ламо ломанть. Цёрат, ават, сыреть, одт... Алопева, мейле Верепева ды седе тов, калмазырев, ялганзо кандсть кандолазтнэнь лавтов лангсо, куш савсь [31] эскелямс колмо вайгельпе малава. Ломанькс ловсть Миколень ды вечкилизь веленек. Велень прявттнэ содылизь сонзэ, фронтовикенть, сырнень кедензэ. Эрьва тевенть тейсь мелень путозь, шкастонзо ды нардевстэ. Малав кемень иеть Вачаев Николаень, эли кода мерсть тензэ велесэ, Дораень Миколень, «Сталинецэзэ», мейле «СК-4»-зэ уйнесь ожосо артозь, варма шкасто лымбаксниця, важовсто сюконякшныця розень-товсюронь паксятнева. Нуицятнень ютксо сеедьстэ лиснесь изницякс. Фамилиязо гайгезь гайгсь буенть келес. Фотографиязо понгавтневсь неявикс таркава, сеедьстэ некшневсь газетань лопатнесэяк. Содылизь... А уш шабратне, малавиксэнзэ, лиятне, кинень эрявсь мейсэяк лездамс, мелень апак вите кедьстэнзэ эзть тукшно.
Ульнесь — арась. Истя мольсь, моли ды карми молеме: ломаненть эрявиксчизэ ды парочизэ чарькодевить, путови тенст питне туемадонзо эли, эрси истяяк, ёмавтомадонзо мейле. Зярдо сон вакссонок, сельменек икеле, а редясынек, мезекскак а ловсынек. Ёми, туи... Сестэ уш панжовить паро ёнксонзо.
Куля кадовсь ськамонзо. Чаво кудос. А вал, а козкстамо, а каштордома. Цирькунтнэяк кекшнесть та-кува, эзть маряво цирниця вайгелест. Каштмолемась, бешоконь, тандавтни сынст. Лиясто авантень марявиль — калдорк мери кудо кенкшесь, ды теке сови, эскельди тарчксонть трокс пенге керьме эли ведте пешксе ведра марто Миколь. Сови ды ёвтасынзе од шкань вечкевикс ды чевте валонзо: «Мезе, одирьва, анокстыть ярсамс?» Ёвтасынзе, юты икелев ды колдор-колдор каясынзе пенгтнень голландка курго икелев. А куш, тень таркас, а каш. Ней уш Куля аноколь кецнемс икелень машнетнематнескак, музгордематнескак. Сыньгак марявольть куш аламнеде оймень витицякс! Сеяк а стувтови: те кудосонть, путомстонзо саезь, эрямосост ульнесть аволь аламо валдо, кенярксонь кандый, морокс гайгиця, оймень эждиця шкат. Сынтемест авольть эряво лиятнеяк.