Йәлләмәсе, әсәкәйем, мине,
Бәхете юҡ, тиеп ,ҡыҙымдың,
Йөрәккәйем телгеләнер бары,
Күреп маңлайҙағы һырыңды.
Намыҫым саф, уйым изге, әсәй,
Күңелем дә тыныс ул яҡҡа,
Моғайын да, тормош табынына
Саҡырылмай килдем ҡунаҡҡа.
Һый-хөрмәттең әселәре генә
Өлөшөмә яҙған күрәһең,
һинең генә күҙ йәштәрең, әсәй,
Телгеләп тә үтә үҙәгем.
Инде беләм, Аллаһ кешеләрҙе
Яралтҡанда бөртөк тамсынан,
Мин тыуаһы тамсы, ергә төшөп,
Йөҙ өлөшкә бүленеп, ярсылған
Һәм юғалған.
Шул саҡ, әсәкәйем,
Күҙҙәреңдән ынйы түгелгән,
Һағыш-йәшкә тулы шул бөртөктә
Минең йәшәү уты терелгән.
Йәлләмәсе, әсәй, яҙмышымдыр,
Йәштән тыуғас, йәшкә ҡойоноу,
Башҡаларға йәшле ғүңмеркәйем
Тик йылмайыу булып тойолһон.
