УЛЬСЬ ПИНГЕ, ЦЬОРАЙ
— „Ульсь пинге, цьорай,
Мзярда уросне
Масторть келева
Ошка, велева
Срафтфтольхть —
Йоряфтольхть.
Яксесть вачеда,
Прясна нолдафтольхть,
Ашель андысна,
Ашель симдисна,
Пара эряфти
Перяфоль кисна.”
Вов кода морсезь
Урос иднятнень,
Оцязоронь пингть,
Стака шинятнень:
„Урос Ягорнясь,
Сюдуф цьоранясь;
Ялганзон йоткста
Нужань няинясь.
Колма кизоса
Тядяда илядсь,
Омба кизоня
Кулось сонь аляц.
Арась Ягорнясь
Кефки кизоса,
Фкявок шиц ащель
Топодьстонь пекса.
Постуфонь слава
Ягорнясь канды, —
[ 29 ]
Тундаста сьоксес
Жуватат ваны.
Топодьста эряй
Ягор кизонда,
Сянь инкса няи
Нужа тялонда.
Сьоксенда Ягор
Олькси-аварьди:
Мес йотась кизось —
Тялось малады.
Тялонда арай
Теенза якамс
Веледа велес,
Штоб кшиня анамс.
Сидеста арай
Ягор няендемс,
Кода вальмяти
Венепти кяденц.
Нолдасы вайгяленц
Сельме ведьня пачк:
— Максода теень,
Пеконязе вачсь. —
Тяфта йотафтсынь
Шабакс кизонзон,
Урос Ягорнясь
Весяла шинзон.”
А тяни, цьорай,
Эряфкясь морай,
Советтнень пингста,
Хоть улихть идсна
Урозда — урост,
Но синь ошева,
Оцю велева
Фкя кудняс пуроптфт.
Тоса тонафнихть,
Книгат морафнихть.
Тоса шарьхкодьсазь,
[ 30 ]
Кода веляфтф кевсь
Трудяйхнень лангста,
Кода од эряф
Тиема марса.”
* * *
Вов кода корхтась
Монцень атязе,
Идень кудста саф
Сире батязе.
Урос иттненди
Тоса покоди,
Йофкскат азонкшни,
Моронят морси:
— „Минь оттама,
Одня тихтяма,
Од эряфонкса
Тюринь иттяма.
Вию тюринкса
Минь ащетяма,
Пачкотьф виеньконь
Теест макстама!”
1928 к.
|
|