Од пингень вий/"Од ки"

From Wikisource
(Redirected from "Од ки")
Jump to navigation Jump to search
«Од ки»  (1934) 
by Раптанов, Тимофей Алексеевич, edited by Арапов И.
Т. А. Раптанов. Од пингень вий. Ёвтнемат ды очеркт. — Художественной литературань государственной издательствась, Москов, Ленинград, 1934. — с. 86—90
[ 86 ]

«ОД КИ»

Чись пейдезь педи менельстэнть. Экше варма коштось лыбакськавтни вирь лопатнень. Виресь лажны. Вешкить озяст, морыть цёковт. Тундонь читнестэ те вирсэнть 70 иесэ атя одксоми.

А седе берянь Ташто Наймансо, ней «Од ки» мерить тензэ. Истя жо гайгезь гайги велесь, прок галат полконь-полк молить од ломантне моразь эрьва чокшне клубов

А кода а весёлгалемс, ациргалемантень овсе тесэ а тарка. Кеме Найманонь ладозо, молить тевензэ [ 87 ]прок тракторт зэрнезь тапить ташто койтнэнь эйсэ. Прянь-полдань синдезь тусть ташто шкате, удалов велявтома кинть сельме крайсэ больше а нейсызь. Зярдояк а велявтыть се шкатне, кода веленть наргсесть кулактнэ.

Ней бедняктнэ ды середняктнэ парсте чаркодизь кулаконь маншематнень. Седеяк чаркодизь, што колхозсо вачо а кулат ды вадрядо башка мезеяк а ули. Сынь ней кеместэ содасызь, што ансяк колхозось ливтянзат нужасто.

Васень лозунгост ульнесь туремс васень тарканть кис.

— Виенек путсынек, те лозунгонть ютавсынек тевс, — истя покш паро мельсэ кортнесть «Од ки» колхозниктнэ, истя тевесь лиськак.

Вана мезе тейсь «Од ки» колхозось тедиде. Бути 1930 иестэ виднесть пинеме ды розь 525,30 га, тедиде виднесть — 939 га. Теде башка виднесть чичавка — 170 га, кснав — 26,50, вика — 148 га, канцть — 165,50 га, якстерькйть — 3 га, суро — 67 га, модарькат — 232 га, лияназ — 49 га, греця — 146,50 га, табак — 7,25 га ды чинжарамот — 44 га.

Те тевенть прядызь аволь самотёк лангс кемезь, сон прядовсь секс, што роботасть соцпельстамонь ды ударничествань келейстэ нолдазь. Истя жо вадрясто ды шкасто таркава аравтнезь виест, сбруест.

Большевикень темпасо районсонть сех икеле прядызь кочкомаст, истя жо сех икеле кундасть нуеме. Сеск жо кармасть пивсэме ды васень [ 88 ]сюронть якстере обозсо 26 улавт ускизь государстванень.

Колхозниктнэ валост эзизь полавт. Турсть алкокс «васень тарканть кис». Райононь организациятне «васень тарканть» казизь: «Од ки» колхозонтень макость кедте-кедьс якиця якстере знамя.

Васень тарканть кис туремстэ эрявсь ламо вий, ламо мельть. Эрявсь изнямс а сатыкстнэнь ды стакатнень, эрявсь маштомс обезличканть ды нузякс чинть.

Бригадиртнэ тевденть эзть тандат. Покш мельсэ кундасть тевентень, пурнызь перькаст активной колхозниктнэнь, конат лездасть бригадиртнэнень роботасонть.

Истя кармасть васень шкастонть туреме обезличканть каршо «васень тарканть кис», вейсэнь хозяйстванть кемекстамонзо кис.

— Весе тапасынек таштонть, тарказост сроятано од, — истя мерсь Романов ялгась.

— Те якстере знамянть, кис ударничестванть вельде, корматано туреме, лия колхозов а макссынек. — Микаень сакалонзо пок цилиган тенсть чавовсть мештезэнзэ, мокшнанзо кеместэ сювордызе, прок прянзо анокстызе туреме. Но кияк каршо вал тензэ эзь ёвта, Микай пейдезевсь.

Микайнень ведьгемень иеть топодсть, васенцекс совась колхозс, прянзо яволявтызе ударникекс ды роботыяк омбоце ие ударна.

— Вант вана, — таго пшкадсь Романов. — Те кудонть 5 чис строинек, ансяк красямс кадовсь.

[ 89 ]Романов яходсь правлениянть ёнов кедьсэнзэ, папироскань толось цитнесь, прок сырнень поколь ды тусто качамо лиссь кургстонзо. Романов пей юткованзо сельгсь ве бокав, ушодыксэль мезть бути кортамо, се шкастонть косто бути ве пельде каятодсь морамо вайгель:

Смело мы в бой пойдем...

Те моронть морась плотникень бригадась. Сынь течи прядсызь покш машинань кирдемс сеникенть. Мелем ульнесь кулсономс моронть педе-пес, но Романов яла ёвтнесь.

— Те кудосонть учреждениянок, — баси Романов.

— Мон содаса, — пшкадсь Пьянзин, колхозонть прявтось, — истят кудот райононь организациятненьгак арасть маласо.

Пьянзинэнь мызолды кургозо, сонензэ мельс паро — молить тевензэ вадрясто. Сон омбоце ие колхозсонть прявт.

— Вана мезе теинек тедиде.

Кармась ёвтнеме Пьянзин. Перьканок промсть ламо колхозникт.

— Васняяк путынек те кудонть. Тесэ колхозонь правлениянок, вельсоветэнек, сельпонь правлениянок, столовоенек, кухнянок, партиянь ячейканок, промксонь ютавтома залонок ды командировкас сыцянень кудо. Улить ацамонок, тодовонок, одеялонок. Октябрянь революциянь кемнилееце годовщинантень панжинек клуб, ШКМ, — седеяк псистэ кармась кортамо Пьянзин.

[ 90 ]Пьянзин яла толковась. Мон варштыть церькованть ёнов. Церкованть прясо якстере флаг.

— Мезень кис истяк кирдемс истяшка здания? — пшкадсь полеводось, сонсь кундст каизе прянзо ды вансь яла церькованть пряс.

— Вачкинек лембе кардо прязо ансяк кадовсь теемс. Тосо кармить улеме тельня скалонок.

— Ды омбоценьгак эль прядсынек, — покш мельсэ пшкадсь Микай. — Кардазтнэ улеме кармить лембеть ды толдо а пелицят. Эрьва кардазонть 85 метрать кувалмозо.

Путсть покш утом, весе урожаест кельгсь. Чувсть вейксэ силосонь ямат, пештеть силосто остатка яманть.

Роботаст моли сдельщинань коряс. Партиянь ячейкась вадрясто толковизе сдельщинанть лезэнзэ колхозниктнэнь. «Ки а роботы, се а ярсы» — те лозунгось теевсь васень лозунгокс а мельсэ роботыцятнень каршо бороцямсто. Те лозунгонть перька колхозниктнэнь пурнызь.

— Государствань заданиятнень прядынек шкасто. Течи-валске прядовить лов алов сокамонок. — Микай верей арсе кирнявтомо, мелезэнзэ паро: ней роботы эстензэ.

— Колхозонть роботань ловомась моли вадрясто, вейкеяк чи киньгак эзь ёма. Вете чинь ютазь бригадиртнэ макснить сводка правленияс, ки зяро роботась ды сёрмадсызь колхозникенть книжкас: зярс роботась, зяро тейсь ды кодамо роботанть качествазо. Истямо учётто мейле содави ки ударник, ки нузякс.