Од пингень вий/Ансяк Тарасбуй
| ←«Од ки» | Ансяк Тарасбуй (1932) by , edited by Арапов И. |
«Тонеть уш панжса»→ |
| Т. А. Раптанов. Од пингень вий. Ёвтнемат ды очеркт. — Художественной литературань государственной издательствась, Москов, Ленинград, 1934. — с. 91—95 |
АНСЯК ТАРАСБУЙ
Отяж валень районсонть а ламо рузт. Малав весе эрзят. Велетне покшт, секс тевесткак покшт.
Чугункань кистэнть колмо вайгельбеть. Батуш велес рудазов кияванть молемстэ эль пильгень таргсевсть. Чись манейстэ варштась, секс тустомсь пиземеденть мейле кияванть рудазосьгак.
Ботуш велесь прок пракста ацавсь икелень.
Покш веленть историязо кавто-колмо валсо а ёвтневи ды ловныцяненьгак а чаркодеви.
Чись весёласто пейдезь вансь мастор чамантень.
— Вадря течи пивсэмс, — Синьдяшкин, сонсь покш мельсэ вансь менелентень.
Чись недлячи. Батуш велесэ увны баяга. Попось ловны проповедь, зэрни церьковасонть вайгелезэ. Кулактнэ лепштизь седей грудест, оймень апак таргсе кувсесть ды проклянясть колхозонть.
Уш чиремсь чись валгома ёнов, народось яла церьковасо. Кияк течи а роботы колхозсонть. Сякой методт тевс нолдыть.
Конат-конат колхозниктнэ порить камакшост, чаркодизь попонть маншеманзо, ансяк а кинень жаловамс: велень прявтнэяк усковить мельга.
Колхозонь председателесь Ёрин, пильге лангсо а аштеви иредьсэ. Сон а мелявты чинть кис, сонськак празнови — лисема чи тензэ.
Экше варма коштось рикстядинзе умарь чувтнэнь эйстэ лопатнень, салавине моткодсть эсь кельсэст ки соды мезть.
[ 92 ]Ульцясь кода чить, истя чокшнеяк пешксе ломанде. Сельпонь председателесь ды колхозонь счетоводось иредьстэ молить ульцяванть, прок виев вармане эрьке чиресэ нудейть меншевить. Кроить ава лемсэ, морыть виськс морот...
— Минь ней тонть марто лисинек ломанькс... Кадсынек козяйканок ды урьвакстано. Од тейтерть эщо сайдяно.
Вельпонь председателенть сезьганов чамазо седеяк якстерьгадсь. Мелезэ ульнесь эщо кортамс, ансяк келесь а якавтови.
— Сайдяно, сейдяно... Минь тонть марто... — счетоводонтеньгак эзь прядовт, мезть арсесь кортамс.
Паметтеме симить «чапамодонть» велень прявтнэ ды хулиганичить. Тень кувалт аволь ансяк а роботыть коллективизациянь кепедемасонть, мик калавтыть эриця колхозонтькак.
Пурнась Ёрин правлениянь заседания ды мерсь:
— Вана сась уполномоченной, — невтсь монь лангс сурсонзо. — Мери сюронть ускомс государствас. Мон тензэ апак кевксть макснян 10 улавт. Ней думинк тынсь, можна эщо ускомс эли арась?
— Косто седе ламотнень? — уракадсь заместителезэ. Сон баптистэнь сектасо членкс.
— Вана ванодо атят. Монь койсэ седе ламось а косто саемс, — керш сельмезэ конявсь, витьсэнть трокс лангозон варштась. Эсь потмованзо трисподни сюдось эйсэнь.
— Виде, атят, — стясь таго баптистэсь. — Эли те [ 93 ]ломанденть беряньстэ Ёрин содасы, зяро сюронок? — Нолштынзе турванзо баптистэсь ды озась мекев тарказонзо.
Баптистнэнь уш истят обоцяст: коллективизациясь, сюронь анокстамось кирга парьсэ сардокс тенст маряви. Секс истя корты, шны Ёринэнь государствас сюронь а максоманть кис.
Вейке ков се шкантень ютась, кода велень прявтнэ кекшнесть 75 пондт сюро колхозниктнэнь экшстэ винас симемс. Муизь комсомолецтнэ сюронть, олго потсо валязь ульнесь.
— Те истя мекс сюрось тосо? — кевкстизь завхозонть комсомолецнэ. Лапность завхозонть турванзо. Мелезэ арась витькстамс, кармась маншеме.
— Расходось ламо колхозсонть, — отвечась завхозось. — Те сюрось ульнесь анокстазь частной рынкас, ансяк эзть кенерть миеманзо.
Августонь 23 чистэ мусть мельникенть кедьсэ гарецень сюро кекшезь. Мельникесь икеле свал киртнекшнесь ведьгевть. Ней колхозсо.
— Те гарецень сюронть ков тейсынк? — кевкстизь комсомолецтнэ. Мельникесь сормизе конянзо, кедьсэнзэ яходсь туемстэнзэ ды мери:
— Винас кадынь... Монень ней апак симть штоли эрямс? Мон а пелян, монь кедьсэ велень прявтнэ седеяк ламо глохтясть. Понкстомо тукшность кудов. Тфу, шайтян левкст!.. — Пек састь кежензэ атянть, тусь комсомолецнэстэ. Но комсомолецтнэнь ютксояк ульнесть «ревень кядьсэ верьгист». Тевесь ульнесь сентябрянь кеменце чистэ. Комсомолонь [ 94 ]ячейкань секретаресь салась сюро ды ускизе Тарасбуйс роднянстэнь. Кундызь, «сердешноенть».
Ламо эрьва кодат историят ульнесть Батуш велесэнть. Ули тосо вельпоть сад. Кинень кода паро, истя миить умартнень базаров. Зяро вельпонь председателесь уски, кияк а соды. Мельганзо меньгак учёт арась, секс улить ярмаконзо симемс чапамодонть. Мисть ве шкане умартнень ал лангс, алтнэнь миелизь кооперацияс. Конань тавартнэнь салыть миемс ал лангс, сынь явшелизь эстест.
Ульнесь велесэнть яслят. Вельпонь председателесь лоткась продуктань максомодо тенст. Састь кооперациянтень яслятнень лемс, печеният, сынь явшизь эстест. Ламо эщо кой-кодат ульнесть тамашат.
Батуш велестэ Тарасбуйс кавто вайгельбеть. Кияванть рудазов ведесь цильсэ пургси. Киньть кувалт ярвой паксясь лымбакстнесь икеленек.
Кода понгсь ёртнезь пултнэ лангсо — пиже озим. Батуш велень колхозонь правлениясь седей а сези, а уски копаняс пултнэнь, а пивсыяк. Не тевтнеде содась районось, кияк мезеяк эзь тейть.
Ансяк пачкодинек веле пентень, Тарасбуень молотилка вальгеесь увнозь каятотсь пилезэнек.
— Эх, эщо бу чи-кавто аволизь сайгак молотилкатнень — прядовленек весе, — истя покш мельсэ басить Тарасбуень колхозниктнэ.
Молотилкатне МТС-нь, сынст течи обедстэ сайсызь Батуш велев, секс колхозниктнэ эзть сода а сиземе, а мезе.
[ 95 ]Чись чиремсь валгомав. А пидить струнанзо истя, кода пидесть чинь седейстэнть. Эзизь сайть молотилканть Батуш велень колхозниктнэ. Сыненст нать а эряви пивсэмс. Эзть мелявт, што наксали паксяс сюрост.
Вадрясто роботась колхозниктнэ Тарасбуйсэ, кода эряви стомавсть чинь-чоп, трактороськак стакасто кувсесь тингенть лангсо.
Комсомолонь секретаресь пурнась ударной бригада. Пурнавсть бригадантень вельсоветэнь, колхозонь правлениянь ды эйкакшонь садонь роботниктнэ. Куш аволь весе, ну ламо эйстэст тусть моразь вень сменас роботамо.
Молотилкась эль таргси оймензэ, бригадась капши тензэ максомс вий.
— Ну, ребята, до утра! — ки бути тиньгенть лангсо рузкс рангстась бригадастонть.
Бригадась покш мельсэ кундась роботамо. Молотилкась вельмесь, трактороськак лоткась кувсемадо. Трактор вайгелесь ладясь молотилкань вайгелентень ды прок од тейтерень вайгельть каятотсть экше кошсонть.
Тарасбуй аволь Батуш веле. Тарасбуень тевензэ молить лиякс. Коллективизациясь кассь 80 процентс. Розень культуранть 229 гектартсо урядызь шкастонзо, товзюро урядасть — 118 гектарт, пинеме — 303 гектарт. Апак пивсэ пултнэ вачказь копаняс. Пиземе а лопавтсынзе, а наксадыть сюротне, кода Батуш велень. Анокстамо планост прядызь сядо процентс.
Тарасбуй Отяж велень районсо моли сех икеле.