Од пингень вий/Октябрянь знамя
| ←Кадовсь Исайка ськамонзо | Октябрянь знамя (1933) by , edited by Арапов И. |
„Од ки“→ |
| Т. А. Раптанов. Од пингень вий. Ёвтнемат ды очеркт. — Художественной литературань государственной издательствась, Москов, Ленинград, 1934. — с. 70—86 |
ОКТЯБРЯНЬ ЗНАМЯ
Покш Толкан велесь прок ваясь латко потмаксонтень. Латко чаматне кавто ёндо, мерят, клещасо свистизь веленть.
— Лисема кияк нать тестэ а муят? — истя арсекшнесть ломанть, конат весенцеде совить велентень. Латконть потмакска бисёркс чольнезь-чольни Толкан леесь. Леенть чирева кальть, топольть касыть, пиже кудряст лымбакстнить лейсэнть. Чокшне ды зоря шкане кальтне ды топольтне прясо прок горниповт жойнить цёковтнэ. Ванат лиясто «Чиханонь» прясто, ломантне прок таракант бузмолдыть лазксо.
Весёласто, дружнасто строить вейсэнь эрямо. П.-Толканонь бедняктнэ ды середняктнэ тапить таштонть, тарказонзо теить од эрямо.
Седикеле тевесь мольсь лиякс, мольсь лиякс эрямоськак. Пек покш мельс а паро ульнесь бедняктнэнень сюпавтнэнь лангс. Ансяк савсь корост [ 71 ]кирдемс шказонзо. Пурнавить куцяс ды пеняцить эрямост лангс.
— Зря соватадо грехс, атят, — черничкань чова вайгельсэ пшкади Ларькань Петра. — Коли шачома иестэнек истямо прась доля, нать истя эрявсь пазнэнь.
Сон кортыль чуросто, стамбарнэ. Бедняктнэ прянь нолдазь кулсоность эйсэнзэ, седеест яла теке лаказь-лакась. Петра ломанесь пазонь содыця, пазонть вельде манчесь беднотанть эйсэ.
Петра ломанесь куш аволь манах, яла теке, кодак косо кулыця эли шачиця, васняяк моравтомо, ловномо сон. Тень кис Петрань зепс чудсь беднотань гроштнэ.
— Кияк чумо арась, Петракс, — валакавтынзе сакалонзо Каргонь Лютя. — Кода мелезэ пазонть, истя сави мастор лангсонть эрямскак.
Лютя эрсесь старостакс, мейле старшинакс. П.-Толканонь бедняктнэ ванкшность мелензэ. Ламо сельведь валсь эйстэнзэ беднотась, ансяк а ков молемс ульнесь. Савсь кирдемс корозо.
— Нама, брат, — пшкадсь сокор Аляка. — Те чисэ кодаяк, ансяк тона чисэ улезэ паро. — Аляка атя басясь чевтьстэ, сонсензэ потмозо палсь покш толсо. Сон содась а истя ладось, кода кортась Лютя. Мелезэ ульнесь позорямс Лютянь ды Петрань, ансяк пельсь эйстэст. Сускизе кель прянзо, кадовсть валтнэ потомозонзо апак ёвта.
— Бедной ломаннень хозяйства а ветяви. Эрявить превть, ды эщо кой мезть. Сюпав ломантеме минь ёматано, — Лютя прок керязь керизе [ 72 ]Алякань. Алякань ланга прок кельме ведь валсть. Не валтнэ ульнесть сюпавтнэнь «парост». Содась, кинь вийсэ ды ливезьсэ нажовазь сюпавтнэнь паро чист.
Бувала цитнезь-цитнить чинь каршо Чагаевень кудотнэ. Кавто этажсэт, пиже краскасо ваднезь, балкон марто прок одирьват. Весе камакшост поризь бедняктнэ кудонть лангс ванозь. Эсь мельсэст тартарары нолдавлизь Чагаевень ды весе паро чинзэ, ансяк виест эщо арасель. Лиси Чагаев блаконзо лангс ды прок карцяган ванны веленть лангс. Мельс паро сайсы: П.-Толканось пелезэ роботы сонзэ лангс. Машты Чагаев эсь коморсонзо кирдеме беднотанть.
Варшы Чагаев омбоце ёнов, базаронь площаденть лангс. Кавто рядсо лавкат. Чагаевень лавканзо аштить прок паро горобият. Пешксеть сынь эрьва мезде, нармунь ловсо ансяк арась эйсэст.
Чагаев ульнесь пек сюпав ломань. Сон потясь прок сеське П.-Толканонь бедняктнэнь верест. Чагаев сюпалгадсь фальшивой ярмаконь микшнезь.
Чагаевде авардсь аволь ансяк П.-Толканось, авардсть маласо велетнеяк. Те чис Олодянь Купа повнясы, кода Чагаевень кедьсэ роботникекс эрямсто синдтризь ирдиксэнзэ. Се шкась а стувтови. Чулксетить карязтнэ ненастиянь каршо, апак Фатя леди мелезэнзэ Чагаев. Купа, кода весе роботниктнэ, оймсема эзь сода. Куш моць аразьсэ улезэ, яла теке лисиль роботамо. Купа эзь мерне, мольсь мелем эли стака роботамс. Ломаньстэ роботасо эзь каднов, пильге лангсто прамс роботыль, яла вансь Чагаевень мелензэ, кода бу [ 73 ]авользе пань роботасто. Яла теке Купань семиязо ульнесь пельсь вачо, пельсь штапо. Семиянь кис седеень середьксэнть пачк Купа мезе бути сайсь салава Чагаевень экшстэ. Кундызь, сердешноенть. Понгсь Купа Чагаевень палачензэ коморо потмос — Малханонь кедьс.
— Понгить вачо киска! — Малхан прок вергиз каявсь лангозонзо, пеензэяк «чикорк» мольсть. Купань совавтызь кевень кардс. Летьке экше коштось каятотсь, прок ансяк чувозь калмсто. — Мадть пекеть лангс! — прок лазозь баяга вачкодевсь Малханонь вайгелезэ кевень стенатненень.
Чаракадсть Купань превензэ. Сон содась, што Малханонь коморо потсто шумбрасто а менят. Ледсть мелезэнзэ пельсь вачо эйкакшонзо, эрьгекс тусть сельведензэ, жаль маряви семиязо.
— Мезть учат? — рангстась таго Малхан ды лоштизе Купань пиле юрс. Чополгадсь Купань сельмензэ, прок ёртовсь летьке масторксонтень. Киштезь кармась киштеме Малхан Купа лангсо. Эзь кочксе, козой вачкодемс, чавсь козонь понгсь. Арсесь энялдомо Купа, се шкастонть вачкодизе Малхан сонзэ кемень фунтонь гирясо, Купа нилизе эсь валонзо, маштсь овсе паметезэ.
Малхан аволь ансяк Купань чи валдонзо маштыде. Кодак коньшты Чагаев кияк лангс, вант се ломаненть эжсь банязо. Чагаев сонсь киньгак сурсояк а токиль. Иля мелявт «грехс» прянзо а совавтсы. Чагаевень ульнесть ломанензэ, ульнесь кинень роботамс, ульнесь кинень указовамс, ульнесь кинень дубинка мартояк якамс.
[ 74 ]Чагаевень сех вечкеме ломанезэ Малхан. Лемеськак кискань ды соньскак а седе вадря. Ансяк кияк мезеяк токазо апак кевксть, Малахан пачк керясы ломаненть.
П.-Толканонь беднотантень оймсемс шка арасель, зярдояк вадрясто а оймить кедест-пильгест. Бути лисить кодаяк кудо бокас, кенярдыть калядамо, чинь-чоп проклянильть эрямост.
Ваксозост промить од ломантнеяк. Молемс тенст ульнесь а ков. Лисиль ваксозост Чагаевгак. Бедняктнэ пелильть кургост автеме Чагаевень пингстэ.
— Раматано, атят, вейке «штоф»? — пейдезь пшкаде Чагаев. Вейгелезэ Чагаевень прок парьсто лисель, дрожь сайдянзат, бувала.
— Арасть ярмактнэ, — виздезь ладсо отвечить бедняктнэ. Содасы Чагаев, тестэяк можна саемс доход. Тарги чапамоданть зепстэнзэ ды путсы икелест.
— Надо, атят, симинк. Содаса кинень максан. Тынк лангс уш а ёми. Мольдядо чи-кавто роботадо монень ды паро.
Атятне токшить бокаст. Ламо эйстэст чаркоделизь Чагаевень ривезень пулонзо, ансяк эрямось прок кев ломаненть тапась, согласильть симеме.
Токи атятнень пряс, седеяк ледить мелезэст стака читне, ловажань-пакарень янгамотне. Веляскадыть превест, молить кудов остатка трёшникест сайсызь, лията мик нельгезь-нельгсы козяйканзо кедьстэ ды кандсы Чагаевнэнь...
Кинь ярмаконзо арасть, Чагаев долгс явшель вина. Ансяк мызолды кургозо. Чагаев мельс паросо [ 75 ]ваны, кода прок качамо банясто чиремкшнезь лисить ломантне.
— Понгсь галашнянтень. Кадык глохтить, — пеедекшнесь Чагаев. — Малхан, валске жо пурнык долгонть. А сы роботамо — верьс керик, юты похмелиязо.
Истя ульнеськак.
Кода ансяк Чагаев эзь майсевть П.-Толканонь бедняктнэнь. Мейсэ понгсь, сень эйсэ манесь эйсэст. Бедняктнэнь эзь сатне виест Чагаевень каршо молемс, секс кирдсть коронзо, вансть мелензэ шказонзо.
Эрьва тунда парцейкс оршавтовиль Чагаевень садозо, пешкеди велесь тантей чинеде. Ламо бедняконь ливезь чудсь ды меншевтсть карязт те садсонть.
Чинек-венек тянксаясь паровой ведьгевезэ, кургс пешксельть сюродо утомонзо ды ламоль Чагаевень ули-парозо, конань нажовакшнызе беднотань вийсэ.
Чагаевде башка П.-Толканонь перька а седе беряньстэ эрясть помещикть: Дуин ды Вельцев. Сынь пирякшнызь вадря моданть канавасо, канаватнень чувовтызь П.-Толканонь беднякнень кедь вийсэ.
Остатка вадря модатнень саизь П.-Толканонь «прявтнэ»: Гавринкат, Борсукинкат, Латкинкат ды эщо истят кой-кодат паразитт. Кадовсть бедняктнэнень пандо чаматне ды песок таркатне, козо зярдояк паро сюрозо бедняконть эзь шачне.
Ардыть П.-Толканонтень помещиктне робочеень кис. Аволь эряв молемс бу, а пандовить долгтнэ, [ 76 ]пряськак эряви трямс. Савкшнось молемс. П.-Толканонь бедняктнэ роботыть ломаннень, эсист сюрост чави варма, калгить озяст.
Кизэнь читнень кувалмост ие. Кискакс стомават чинь-чоп мендевезь тарвазонть марто. Ярсамо пелесь ульнекшнесь коське куво марто ведь ды весе.
Арась ды нужа чись ломаненть толс, ведьс эцесы...
— Прядовить бояронть нуеманзо, азёдо кудов. Питнень кис сатадо мейле, — роботамонь кис истя каванясынзе бояронть прикащикезэ. Порить пеест бедняктне, чулксетить карязтнэ, лажныть коморо потмост — питне арась.
Лисить эсист ума лангс, тосо чаво олгось вешки вармадонть. Нусы ломанесь, ускомс пултнэ а мейсэ: конань арась лишмезэ, конань арасть сбруензэ. Секскак ульнесь, ладязь морось:
Сусекс каподсь, арасть почткензэ, |
Истя тевесь ульнеськак. Молят Степанкань Иваннэнь, сельведь марто энялдат, штобу усковлинзе пултот, ато ёмить паксяс.
— Усксынь шачк явозь, — лиясто пейде ломаненть лангсо Иван.
Прядовить эсинзэ ускоманзо, мейле моли бедняктнэнень. Эстензэ улав вачки колмо рядсо, азоронтень — кавто рядсо. Ато а ускови, келя, лишментень.
Прядовить кизэнь роботатне. Туить понав бурят, прок ашо панарсо оршавтови модась. Вармась [ 77 ]апак жаля сезни лопатнень. Появить коське якшамот. Бедняктнэнь арась оршамо пелест, пильгс карсемс а мезе. Берянь оршамо пельсэ якшамось кирьмасы ломаненть, ожолгады лопанть ладсо ды шкадонзо икеле туи кельме калмов.
Кувсить сюпавтнэнь утомост, мельс паросо аштить.
— Пасиба пазонтень: урядавсть сюротне, коськстэ понгсть сусекс, — покш мельсэ моткодсть сюпавтнэ. Бедняктнэнь палсть потмост. Козонь иля кунда — арась. Кадовсть сюрост апак пивсэ. Валсь сёксень перть лангозост пиземе, чавсь варма, мезе эйзэнзэ кадови? Арасть беднотанть пивсэма машинаст, арасельть понжавтомкасткак. Тельня пивсэкшнесть пивсэмасо, понжавтсть вармасо.
Роштовас ярсыть эсист сюродо, мейле сави саемс заём. Одс ламо эрявкшнось. Сюпавтнэ максыльть, иля мелявт, ансяк миик прят тенст сы кизэнень роботамс. Се эщо а ламо, телень перть пулькить бедняктнэ кардазсонзо: конат ливтнить лов, конат керить пенгть. Чись а мельсэ лангозост ваны менельстэнть. Мастор ёжованть юты, прок нузялды кепедеманзо верев. Шканзо самс а невтьсынзе пси кизэнь струнанзо, а эждясынзэ бедняктнэнь. Ор ладсо кекшеви чись пандтнэ экшс менельстэнть.
Толкан леесь яла чольнезь чуди. Ютыть читне, ютыть ветнеяк. Ютась гражданской войнась.
Сускизь келест кулактнэ, ансяк салава порить камакшост. Сась вачо иесь. Стака кевекс прась беднотанть лангс. Яла теке беднотась эзинзе ёмавт превензэ.
[ 78 ]Прясто пильгс сюдыть сюпавтнэ коммунистнэнь, секень вант бедняктнэнь сельмс аксырдыть. Латкинкат, Егорчинкат, Борсунынкат ды лият.
— Нолдызь кирга парьгаст минек ули-паронть, яла теке венимить. Паряк кирга орма пурдасызь, — кортасть кулактнэнь нист.
Чинек-венек сюдыть сюпавтнэ беднойтнень ды коммунистнэнь. Аволь изняяк Советэнь властесь, сатоволь сюпавтнэнь пельде беднотантень. Порезь поревлизе Борсук Верушка, малавгак живстэ авользе катт бедной ломаненть. Бедняктнэ кеместэ кирдсть властенть, кеместэ тапардавсть ошонь робочейтнень перька. Весе виест-мелест максызь сюпавтнэнь каршо туремантень.
Ютасть телень даултнэ, якшамотне. Варштась лембестэ чись, наолгадсь масторось.
Тусь чить манейть, пижелгадсь виресь, одс заводясть морот цёковт.
Трудицятне эзть удо, добовасть видмекс сюро.
— Ней листяно, — кортнесть бедняктнэ-середняктнэ. — Сусликте карматано ярсамо, яла теке вачо а кулотано кодаяк од сюрос.
Пси вармась шатавты тумо лопатнень. «Чихан» пандось яла ташто вановкссонзо ваны П.-Толканонть лангс. «Чихан» пандонтень а сёпови ютазь читнестэ вейкеяк. Ламо сельведть правтсть пандонть чамас, ламо мороткак прясонзо морасть од тейтерть.
Пиземесь пизи шкастонзо, пейдезь чись ваны менельстэнть. Касыть розтне, пижёлдыть прок чурькат товзюротне.
[ 79 ]Вачо иеденть мейле ульнесь сюронь шачома ие. Байтяк пурнасть сюронть. Эзь лиссть истя, кода кортнесть сюпавтнэ. Эзь учов властенть ёмамозо, эзть кулсе бедняктнэ. Властенть эзизь нолда эсь кедьстэст, куш пек ульнесь стака.
Шождынестэ таргизь оймесь бедняктнэ. Пурнасть велентень партиянь ды комсомолонь ячейкат. Пурнавсть батрактнэ ды бедняктнэ. Панжсть кооперация. Седеяк кеместэ кармасть бороцямо кулактнэнь каршо.
Пек стака ульнесь роботамс васень шкастонть. Яла теке панжсть клуб, ловнома кудо, эрьва недлячине тейнесть спектакольть, таргасть од ломантнень органзиацияс.
Комсомолс совамо бажасть ламо бедняконь ды середняконь од ломанть, ансяк эщо пельсть авадост.
— Кить комсомолсо? — мурнесть кудосо — Конат тетяст-аваст мезекскак а путыть, ансяк сынь. Шайтянонь киштема тарка эзиде некшне?
Кода эзть мурнекшне, кода эзть чавно, яла теке комсомолонь ячейкась кассь ды кемекстась.
Видсь взаимопомощень комитетэсь сюро. Рамась ведьгев, кассь доходозо. Сякойкс комитетэсь лезды беднойтненень. Ломаннень макснесть сюро, лишметь, скалт ды ярмаксояк. Васня а ламольть комитетэнть членэнзэ, кода неизь лезэнть, мейле прок мекшт кармасть прамо ды роботантень лездасть.
Партиянь ячейкась пурнынзе эсь перьканзо беднотанть ды батрактнэнь. Батрактнэ цють мезе, [ 80 ]батрачкомс — Шуляршин Ваньканень. Содасы Ванька мезть кулактнэнь марто тейнемс.
— Саемс церьковась школакс, — арсесть бедняктнэ. Эзь лиссть истя. Пултызь кулактнэ церькованть.
— Кадык а миненек, а сынест, — истя мотколесть пиледе-пилес сюпавтнэ.
Эрьва чине вешнить од методт бедняктнэнь каршо бороцямс. Лоткасть государствас сюронь максомадо. Секень вант беднятонть паньсызь вельсоветстэ. Мелест ульнесь путомс эсист ломанть. Бедняктнэнь эйсэ ульнесь эщо ташто пингень пелема. Сынь чопода чинть трокс сеедьстэ понгонесть кулаконь коморо потс. Апак фатя сонсь беднякось карми тюреме эсинза каршо.
Истя тевесь лиськак. Путызь председателекс Латкин Дригань. Сех сюпавт ульнесть велесэнть. Пелезэ велесь роботакшнось Латкинкань кедьсэ.
П.-Толкансо кулактнэ вансть Дригань мелензэ. Дригаяк эзь обидя эйсэст. Эцесь Дрига партияс, таргизе мельганзо Лацянь Степанонь. Дрига председатель, Степан — секретарь. Тевест мольсь лажсо. Састыне-састыне строясть велентень церькова. Арасельть се пораванть кеме коммунист П.-Толкансонть. Кодат тевть ансяк арасельть велесэнть!
П.-Толканонь тевтне пачкодсть волисполкомс, кучть уполномоченной. Пурнынзе перьканзо коммунистнэнь, комсомолецтнэнь, кемекстызь беднотань группатнень, промкстнэнь ды кулактнэнь каршо.
Кармасть тарксеме латксто кулаконь сюронть. [ 81 ]Тень кис Трондин получась сюпавтнэнь польде кев вельмава.
Дрига чаркодсь, што тевесь ашти сонзэ кувал а ладс, кадызе веленть ды оргодсь Ташкентэв. Кува эзь кекшне Дрига, кода эзь тейнек, — муизь сонзэ ды пачтизь П.-Толканонь бедняктнэнь икелев.
Того прась лов, таго тусть якшамот, даулт. Маштсь кизэнь пиштевксэсь. Кувакат телень ветне, ули шка лисемс кудо ютксто.
Эрьва чине промкс, чокшнетнестэ группань собраният. Арсеть, кода седе парсте эрямс.
Велесь секень вант явови колмов: вере пень группа, ало пень группа ды куншкасо куронь группа.
— Ялгат, минь веленть явинек панксонь-панкс. Явинек ламо артельть: Душаевка, Орловка, Прохоровка. Веленть явинек, колмов, кулактнэ яла мартонок, — кортнесь вельсоветэнь пленумсо Радев.
Радев ВКП(б)-энь член. Роботы вельсоветэнь председателькс. — Эряви пурнамс тенек колхоз... Кравтсынек кулактнэнь аволь ансяк велестэнть. Рав-куншкань крайстэнтькак.
Вайгелезэ прок цярахман тапась вальма сельмть. Бедняктнэнь мельс тусть Радевонь валтнэ.
Васень шкастонть покш мельсэ весе бедняктнэ, батрактнэ ды середняктнэяк совасть колхозонтень. Седе мейле лоткасть велентень меремадо П.-Толкан. Путсть од лем: «Октябрянь знамя». Тень эйсэ одкстомтызь кудо прясо лыйниця понгавтозь знамянть.
Но колхозсо роботамо тевесь ульнесь од. Арасельть сатышка роботник-руководительть. [ 82 ]Васень иестэнть тейсть покшт перегибт, тукшность колхозстонть байтяк батракт, беднякт, середнякт.
Лиссть видеме колхозниктнэ дружнасто, кармасть толковамо, што тундонь видема лангось покш политической кампания.
— Колхозось седеяк кемексты. Минек лангс ванозь совить остатка трудицятнеяк, тееви сплошь коллективизация, сонзэ вельде маштсынек кулаконть прок класс. Весемезэ видтяно, — кортась Инкин, — 4971,5 га эрьва кодамо культура алов, товзюро — 2710 га, пинеме — 162 га, суро — 100 га, кукуруза — 200 га, чинжарамот — 310 га, кснавт — 20 га, модарькат — 130 га, эмешть — 78,5 га, канцть — 20 га, лен — 2 га, скотинань андомс якстерькайть — 25 га, шуж — 5 га ды видезь уш розь 1211 га, тикше — 19 га. Вана зяро мода види тедиде колхозось!
Коськсь кирга парезэ цифратнень ловнозь Инкинэнь. Сянгорасто прядынзе остатка валтнэнь.
— Косто сайсынек видменть? — ки бути пшкадсь колхозниктнэнь ютксто.
— Да, ялгат, те виде, видмесь, а саты, — стясь Инкин стядо. — Ней весе активесь роботы видмень анокстамонть кувалт. Кавто чис весе бригадатне пурнасть сюро 250 пондо. Сюронть кекшизь эщо 1926 иестэ. Вана Атякшовонь мусть 190 пондо ды ламо лиянь. Вейке зёрна а займатано, ярвой паксянок видьсынек эсь видмесэнек — прядызе кортамонзо Инкин.
— Таргавтомс кулаконь кедьстэ кекшень сюронть! — рангстась Исай Охонянь Яхим.
[ 83 ]Истят митингт эрсильть эрьва оймсема шкасто. Колхозниктнэ парсте кармасть содамо пландонть. Настроенияст поркстомсь. Кармасть совамо колхозс остатка бедняктнэ, середняктнэ. Фатясть, а ладс лиссть колхозстонть.
Пазава марто паксяв эзть лисстне, урожаесь ульнесь пек паро. Государствас усксь «Октябрянь знамя» колхозось 22 тыща пондт сюро.
Кулактнэ кортнесть, што колхозсо кулыть весе вачо. «Октябрянь знамясо» ярсасть калацядо. Эзь лиссть кулактнэнь койсэ.
Кавто иес стясь пильге лангс «Октября знамя» колхозось. Ней седеяк шкасто ды дружнасто прядызь видема лангонть. Прок сурцемесэ судрявсь паксясь, пиже иведекс пижёлды ве ёндо. Сэтьме вармась лымбакськавтни розенть, прок иневедень волнат чавовить. Пси коштось човалякс налкси ве пелькссэнть. Маней.
Кадовкшность эщо ламо а сатыкст. Беряньстэ ульнесь аравтозь роботань ловома тевесь. Ульнесь обезличка. Кияк мезень кискак эзь отвеча, норма получасть вейкетьстэ. Ламо эрсесть сёвномат, а парот.
Ячейкась ветясь виев массовой робота.
Перть-пельде сы авань полк. Чись налксезь-налкси сёрмав нарядост лангсо. Неть колхозницат. Петянь Наста — бригадирэст. Мызолсо моли Настань кургозо, сельмензэ штердезь-штердить. Наста мельга налксезь чиить тейтернек-аванек. Мерят эзть сизеяк!
[ 84 ]— А паро мор саизь, ну и вайгельть монь бригадасо! Кода лоткатано оймсеме, истяк моро серьгедить.
Наста корты пек сеедьстэ, васенцеде марязь малавгак а чаркодеви. Сон пек шнась бригаданзо.
— Роботамо ломанень лиснеть вейкень пес ды свал моразь.
— Кудос кадовомс мелем зярдояк арась, мень бути тошна сайдянзат, — мерсь Маша пельс пейдезь.
Маша яла толковась. Сон васень ударница Настань бригадасо.
— Меля ламо ильведевкст ульнесть. Ки содась сдельщинадонть? Кияк эзь. Роботак куш кода тенть паро, получат яла теке зняро. Явшасть едак лангс. Ней маринк, кода мерсь Карпунин? Кить кармить роботамо, неть получить мезе эряви, ки а роботы, се мезеяк а получи.
— Нама, уш истя эряви, — каясь вал Лыткаринкань Аганя. Наста таргизе мешокстонзо кшинзэ, кшись прок калаця.
— Вана вант, мезде ярстано. Кить истямо кшиде икеле ярснесть? Ансяк кулакт. — Наста валтнэнь кочказь кочкси, кода бути мик складна корты, эрьва валонть тарказонзо путсы.
— Куш ки минек марто роботазь талакады. Кода меля ванынек колхозонть лангс? Се шкастонть кулактнэ мезть тейнесть? — цёх сельксь масторов Варка. — Кулактнэ кода машсть ансяк мешасть. — Неке валтнэнь пачк сралесть кудова.
[ 85 ]П.-Толкан ней аволь помещикень ды кулаконь кабаласо. Латкинкат, Гавринкат арасть. Тень эйсэ эщо эзь прядов классовой тюремась велесэ. Кулактнэ нейгак эщо эзть ойма. Улить эщо стака таркат. Яла теке тевесь поли виевстэ икелей.
Покш мельсэ роботыть колхозниктнэ. Содасызь, што сдельщина: ламо теят, ламо получат. Лиссть розень нуеме. Паксясонть виде-паро жив кино. Ве паксясонть нуить, жнейкатне мадстить сюронть, мельгаст лия бригадат ускить пулт. Сбруест анокстазь икеле — эрьвась содасы, косо роботы ды кодамо тевсэ. Пултонь ускицятнень мельга сокить тракторт, анокстыть мода тундонень.
А кенерить копанянь вачкамо, састь од пивсэма машинат «Серп и Молот». Истят машинат эзть некшне П.-Толканонь бедняктнэ. Вете чис прядызь розь нуемаст, планонь коряс эряволь прядомс 8 чис. Пурнасть государствас якстере обоз.
— Кодамо паро вейсэнь роботась, а? — кедензэ чави боказонзо Максим баба. — Вант, икеле осьминник а урядавиль кавто недляс, ней на вана 5 чис уш пивсэвстькак!
Колохозонь мастерскоентень ведьгевстэнть максыть электричествань валдо. Улить 5 школаст, икеле ульнесь 2. Нилень таркава эйкакшонь площаткат, лавсь кудот, эйкакш эйсэст 215 ломанть. Путсть покш сад — 90-шка га.
Паксясо эрьва бригадасо вейсэнь котёл, мартост макснить лапшат, ямкст, ой ды лия продуктат. Ули калонь кундыця бригадаст. Колхозниктнэнень макснить калт.
[ 86 ]Ней а якить эрьва тевень кис районов лишмесэ. Кодак эряви — чавт телефонсо.
Комсомолонь ячейкась кассь пек ды виензаськак. Бути 1923 иестэ ульнесть ниле-вете ломанть, ней кавто сядт комсомолецт. Сынь ней роботыть хозяйственной ды политической кампаниятнень эйсэ активнойстэ. Весемест пес ударнить. Лангозост ванозь ламо од ломанть сёрмадсть истя жо ударникекс. Силосонь яматнень чувизь весе комсомолецтнэ.
Истя жо анокстась покш пионер организация. Сынь ськамост 80 га сюро, истожась 4 сядт сусликт ды ламо тейсть истят тевть.
Истя вана топавтеви тевсэ Ленинэнь национальной политикась, истя вана покш экскелькссэ «чопода» эрзятне молить социализмав. Сынст вети партиясь виевстэ кулактнэнь каршо турезь.