နိ ဒါ န်း
 |
 |
|
|
|
|
|
ခပ်သိမ်းသော ကဝိအပေါင်းတို့၏ ဥသျှောင်ဖြစ်တော်မူသော မြတ်စွာဘုရား၏ ရွှေစက်တော်နှစ်ပြင်ကို ဦးထိပ်ရွက်ဆင် ကြည်လင်မြတ်နိုး ရှိခိုးပြီး၍ ဤ မဟာဂီတပေါင်းချုပ် မည်သော ကျမ်းကို ကြိုးပမ်း အားထုတ်ရခြင်း အကြောင်းကို ကောင်းစွာမြွက်ကြားပါဦးအံ့။။
၎င်းမဟာဂီတ သောတာလင်္ကာရ ပညာသည် ရှေးမြန်မာဘုရင် အရှင်နေမင်းတို့ ထွန်းလင်းတောက်ပသော ကာလအခါတွင် ပညာစွယ်စုံ အမုန်ရင့်ပြီး ကဝိကြီးအများ မင်းသား မင်းသ္မီး မှူးကြီးမတ်ရာ စသော ပုဂ္ဂိုလ်တို့ ဖွဲ့ဆိုသီကုံးပြီးကာ သာယာစွာ သီနည်း,ဆိုနည်း,တီးကွက်, စည်းချက်တို့ဖြင့် လေးနက်သော အဓိပ္ပာယ်များကို နောက်သားတို့ ဉာဏ်မမှီသဖြင့် အဆင့်ဆင့် ကူးယူဖန်များ၍ အမှားအယွင်းများစွာ အက္ခရာ မမှန်ခြင်း မေ့ပျောက်ကွယ်ပ တပိုဒ်ကျ နှစ်ပိုဒ်ကျတို့ဖြင့်သာ မှတ်သား ထားကြပြီးလျှင် သဘင်သည်များတို့သည် နည်းပါးသောပညာဖြင့် ရောက်တတ်ရာရာ ရေးကူးလျက် တဦးနှင့်တဦးမတူ မူအမျိုးမျိုးကွဲပြားပြီးကာ သူ့ဟာအမှန် ငါ့ဟာအမှန်ဟု ဂုဏ်မာန်ပလွှားလျက်သာ ရှိကြလေကုန်၏။
ထို့ပြင်တဖြာ ဤသောတာလင်္ကာရပညာကို ကောင်းစွာ မလေ့ကျက်ဘူးသောသူများသည် အမှားအမှန်ကို ဘာမျှမသိ မိမိ စီးပွားဖြစ်ဖို့လောက်ကိုသာ အားထုတ်သော လောဘဖြင့် ထိုမှ ဤမှ ကောက်ကရ ကူးယူစုဆောင်းထားသော သီချင်းကြီးများကို စည်းကမ်းမရှိ အရောရော အနှောနှော ဂီတစာအုပ်ဟု ပြုလုပ်ပုံရိုက် ရောင်းချကြကုန်၏။ ၎င်းတို့စာအုပ်များတွင် သီချင်းသား မူတင်ရင်းက မှားယွင်း လွဲချော်သည့် အပေါ်မှာ ပုံနှိပ်တိုက် စာလုံးစီသမားတို့နှင့် စာပြင်ဆရာတို့ညံ့ဖျင်း၍ လွန်စွာပျက်စီးလျက် နေကြသည်ကို အခါခါတွေ့ရှိရပေ၏၊ ထိုသို့ ရှေးပညာရှိ ကဝိပုဂ္ဂိုလ်တို့၏ အာဘော်၊ တော် ဝင်မင်းသုံးဖြစ်သော သီချင်းကြီးများကို နောက်သား သုတေသနတို့ ကျနမှန်ကန်စွာ မှတ်သားစေလိုသော ဆန္ဒအာသီသ ရှိလှသည့်အတိုင်း လွန်ခဲ့သောအနှစ်- ၂ဝ လောက်ကစ၍ တစ တစ ပညာရှိများနှင့်တကွ စိစစ်ဆွေးနွေးပြီးကာ မှန်ရာ မှန်ကြောင်းဖြင့် နှိုင်းညှိသုတ်သင်လျက် မူတင်၍လာခဲ့ရာ ယခုအခါ ဤ မဟာဂီတပေါင်းချုပ် မည်သော ကျမ်းကို ကြိုးပမ်း၍ ပုံနှိပ်လုပ်ဆောင်နိုင်ခဲ့ပါကြောင်း ။
