Gramat Volapüka/B. Lartig
| ← Ä. Subsat | B. Lartig Gramat Volapüka |
C. Ladyek → |
45. Lartig Volapükik binon el. Kanon lüsumön fomis manik e vomiki: hiel e jiel. Padeklinon äs subsat l. §§ 40 e 44!).
46. Dub foms difik oka: el, hiel, jiel‹ lartig binon genavöd, e dub deklinafoms oka binon polian deklinafoma. Vöds ko lartig fo oks kludo no nedons padeklinön; te lüsumons in plunum plunumafomi.
Samo el ‚Edelweisz‘ [èdĕlvaĭš] = ‚gnaphalium leontopodium Scop.‘ [gnáfàlium leóntópòdium škòpoli] padeklinon so:
| Balnum. | Plunum. | |
|---|---|---|
| 1 | el Edelweisz, | els Edelweisze, |
| 2 | ela Edelweisz, | elas Edelweisze, |
| 3 | ele Edelweisz, | eles Edelweisze, |
| 4 | eli Edelweisz, | elis Edelweisze, |
| 5 | o el Edelweisz! | o els Edelweisze! |
In vokatif kanoy moädön lartigi, kluo: o ‚Edelweisz‘! in balnum, ed o ‚Edelweisze‘! in plunum.
Noet: 6. El ‚Scop.‘ po nem nolavik plana at binon brefod ela J. A. Scopoli [i a škòpoli].
Noet: 7. Soäsä penunos löpo, vöds natapükik no padeklinons in vödem Volapükik; te lüsumons in plunum plunumafomi. Demü atos ozesüdos, das tefü foginavöds lüsumabik in vödabuks Volapükik i plunumafoms onas panunons. Pato atos omuton padunön in vödabuk siklopedik, keli kadäm i desinon ad pübön.
47. If geboy in vödem Volapükik vödis natapükik, kanos zesüdön pö jenets patik ad lenyümön len lartig poyümoti seimik. So kanoy gebön
| eli | ⸗an | ad | malön | pösodi: | elan, hielan, jielan, |
| » | ⸗af | » | » | nimi: | elaf, |
| » | ⸗ep | » | » | plani: | elep, |
| » | ⸗än | » | » | läni: | elän, |
| » | ⸗eän | » | » | nisuli: | eleän, |
| » | ⸗el | » | » | meli: | elel, |
| 22» | ⸗ak | » | » | laki: | elak, |
| » | ⸗äd | » | » | stelädi: | eläd, |
| » | ⸗ed | » | » | beli: | eled, ed |
| » | ⸗ot | » | » | yegi: | elot. |
48. Lartig pagebon
1ido fo vöds natapükik, kels blebons no petradutöls in Volapük;
2ido fo notodots pekoboseidöl; e
3ido fo vöds u fo dils vödas: silabs, yümots, tonats‹ kels binons plödü setatanam, e kels demü kod at no padeklinons, u kels it binons nedeklinoviks.
49. If kleil dubo no padämükon lartig kanon pamoädön in nominatif balnuma ed in vokatif, e fom neudik: el kanon pagebön pla foms manik e vomik: hiel, jiel. Sams:
El ‚The Times‘ [đĕ táĭms] binon delagased Linglänik gretik, kel papübon in ‚London‘ [lǻndĕn].
Elogol-li eli Genova [cènova]? Si! ebinob us ed elogob mebamali ele Cristoforo Colombo [kríštòforo kolómbo] pededietöli.
Belödans ela London [lǻndĕn] nemons hielis ‚Yeomen of the Guards‘ [yóŭmĕn óf đĕ gar̊z] cogiko nog suvo elis ‚Beefeaters‘ [bìfitĕr̊s].
Tüm: ‚Eiffel‘ [äfä́l] binon bumot geilikün vola, binon igo geilikum ka el ‚Woolworth Building‘ [wulwĕr̊ħ bíl-díŋ]: bumot geilikün ela ‚New York‘ [nyuyår̊k].
| ← Ä. Subsat | B. Lartig Gramat Volapüka |
C. Ladyek → |