[ 36 ]
Famül lölik te lesmalik,
Fa lit klilik filatopa
Pedalitöl, tabi zümom,
Su kel stanom lebov büla.
Man nepükom; loged voma
Binom murik e lezunik.
Fatel dlemon e lemufom,
E cil sägo binom stilik.
Spuns boadik te ziliko
Dete alik vobi givoms;
Nezediko de bov al mud
E tän denu al bov goloms.
[ 37 ]
Ab bäledan pöfik no plu
Kanom fidön ko vif somik;
Labom yelis ya jölselul,
Binom sudik, ti bleinik.
Ko töb mufom nami stifik,
Ed if ko spun kupön vilom
Se bov büla, tän log voma
Ko zun mödik omi sukom.
Ibo if nam stifik oma
Dukom al mud spuni fulik,
Tän bül anik falom su tab
E ve balib oma gedik.
E süpito ko puns in flans
Vom sevokof: «Man bäledik
»Dunom äs cil, ab nevelo
»Ämiotom so cil obsik!»
»Tabaklöfi, vö, vädelo
»Stenom, binos jemod gletik;
»Ab nu yulob das no denu
»Vilob sufön duni somik!»
Denu al vendelafidön
Famül smalik tabi zümom,
Ab plad bäledana pöfik
Smaspad filatopa binom.
Vom tädami äbefulof:
Labom len tab pladi nonik.
Us siedom, ko nam fibik
Kipom bülabovi talnik.
Ko glum in logs ti bleinik
Pladi vagik len tab logom,
Kö ya äsiedom as cil,
Ab kel ome no plu lönom.
[ 38 ]
E do blüfom fidön büli,
Binos ome lefikulik;
Dlen biedik ve cigs oma
Falom ai in spun alik.
So mekado aidlemoms
Ä mud, ä nam oma fibik,
Das bov talnik pedibleköl
Su glun falom, ko jov mödik.
»Milö!» vom nu äsevokof,
»No li-binos täno satik,
»Das omofob oli de tab?
»Blekol nog domömi obik!
»Ab lesagob ole, füdo
»Oikudob das ogetol
»Büli te in bov boadik,
»Keli no diblekön kanol!»
Denu al vendelafidön
Famül smalik tabi zümom,
E plad bäledana denu
Smaspad filatopa binom.
Äbefulof denu tädi
Pesepüköl ko zun gletik:
No plu bovi talnik labom,
Fidom nu se bov boadik.
No plu vipom pladi len tab,
Plekom das God fögivomös
Omes badi, e ladliko
Spelom das sun deilomös.
E bevüno ko lepötik
Ä man, ä vom fidoms büli,
Du neb fatel sonil omsik
Jäfom kötön te boadi.
[ 39 ]
Ab vom fino omi logof:
»Kikod kötol us boadi?»
Säkof, «spidö, cil, kömolöd
»Len tab, els no getol büli.»
»No vo labob timi alos,
»O mot löfik», pul gesagom.
— »Iko-li? Tän kisi mekol?
»Nog nevelo so äpükom!»
— »Mekob bovi se kel füdo
»Büli fidön oimütol,
»If bäledik e bleinik
»Äslik fatel nu, uvedol».
E man e vom dö vöds cila
Vemo jekoms e muedoms:
E süpito tiks ledledlik
Ladi omas mufön kömoms.
E ko dlens de pönit dibik
Bofiks fate omsik begoms
Fögivami, e tän omi
Al plad omik len tab dukoms.