— 39 —
Ab vom fino omi logof:
»Kikod kötol us boadi?»
Säkof, «spidö, cil, kömolöd
»Len tab, els no getol büli.»
»No vo labob timi alos,
»O mot löfik», pul gesagom.
— »Iko-li? Tän kisi mekol?
»Nog nevelo so äpükom!»
— »Mekob bovi se kel füdo
»Büli fidön oimütol,
»If bäledik e bleinik
»Äslik fatel nu, uvedol».
E man e vom dö vöds cila
Vemo jekoms e muedoms:
E süpito tiks ledledlik
Ladi omas mufön kömoms.
E ko dlens de pönit dibik
Bofiks fate omsik begoms
Fögivami, e tän omi
Al plad omik len tab dukoms.
ABDALLA.
Abdalla äbinom pemotöl in Bagdad. Igelütom de paels omik labemi nebizugik, ab bi äbinom vemo monälik, ämödom labemi omik jüs älabom kämelis jöls. Äföködutom omis tedeles, kels ätävoms ko karavans al Nidän, Ägüpten e Räbän; äkopanom omis du tävs at ed ämelidom in tim blefik suamis vemik.
Dub atos desidam omik pästogom ye.
Vöno ven ägekömom de Balsora ko kämels nepefledöl, ätakedom lä fon, e du kämels omik äbälatom zi om ed ämeditom liko äkanomöv vedön nog liegikum, dervid (derviche) änakömom, kel äyümom oki lä om.
