Иоанн-вельденьне Шкайстонь Ёнь-куля/ТПО/04

←Колмоце Пакш

Иоанн-вельденне Шкайстонь Ёнь-куля  (1901) , translated by Барсов, Николай Петрович 4-це пакш

Ветеце Пакш→

Тяни-пингонь орфографиясь (ru: Современная орфография; en: Modern orthography)

Нилеце Пакш.

1. Мъзярда Иисузсь содазе Фарисейхненди кулянь пачкодемать, мес пяленза пря кстиндафтыда: Иоаннда лама сашендыхть,

2. (Сонць Иисузсь афоле и кярьмодькшне кстиндама-тевти, ся тевть тиенделезь тонафниензон),

3. Эста Сон Иудеять кадозе, мърдась меки Галилеяв.

4. Тоста киц Сонь ёталь Самариява.

5. Станяк Сон пачкоди Самариянь ошти Сихарь лемса, ся модать ваксса, конанц Иаковсь максозе эсь цёранцты Иосифти.

6. Тозк улель Иаковть эшиецка. Иисузсь, (тов) молемстонза сизеф, озась эшить лангс. Эста котоцекс цястошкадоль.

7. Ся пингста сай ведьс Самария-ава. Иисузсь корхтай теенза: симдемака Монь.

8. (Ся ёткова тонафниензон ошсольхть, ярхцамбяль рамсельхть).

9. Самария-авась корхтай Теенза: кода Тон, Иудеят, симдьфтят пря монь кядьстон, Самария-авань кядьста? Ватт, Иудейхне аф нежедькшнихть Самариэряйхнень ваксс.

10. Тянь лангс Иисузсь пшкядсь: содандярялить Шкайть казненц корхтайхтьке теть: симдемак, — тонць эняльделеть Сондеенза, и Сон симделензеть эрямань ведьта.

11. Авась корхтай Теенза: Тонь аш мезе мархта амолдамска, эшиське кърхка; коста ина сявсак Тон эрямань ведьцень?

12. Шли Тон Иаковть аляньконь эздонга оцюват, конац шувозе тя эшить, симондське ведьтонза иднек, жуватанек?

13. Іисузсь пшкядсь теенза: тя ведьта симить потмоц оду шяелгоды;

14. Моньстон максф ведьта кивок симондяряй, сянь потмоц аф шяелгоды мъзярдонга; максф ведезе потмосонза арай пингонь-пингсонь эрямать пяли шуди шудерьксокс.

15. Авась корхтай Теенза: Азорай! тукка тейне стама ведьцень, тяза шяелгода монь потмозе, тязан сашенда сей ведьска.

16. Корхтай теенза Иисузсь: архт, тердьк эсь мирдьцень да сак сей.

17. Авась пшкядсь: монь аш мирдезе. Иисузсь корхтай теенза: азфце виде: аш мирдьце:

18. Тонь, ватт, ветенестольхть синь, сявок, конац тяни эряй мархтот, аф мирдьце; сянь пяльде тон видеста азоть.

19. Корхтай Теенза авась: Азорай! няйса, Тон инголи-содайат (пророкат).

20. Минь атятне озондольхть ва тя пандть пряса; тинь эрь Иерусалимса озондома-вастть азондсасть.

21. Иисузсь корхтай теенза: кемомак Монь, сай пинге, аф тя пандть пряс куцихть, аф Иерусалиму молихть сюкуняманкса Аляньконьди.

22. Тинь озондтада эсь аф-содавиентенди; минь озондтама эсь содавиеньконди: Иудейхнень ёткса, ватт, ломатнень ваномасна.

23. Сай эрь пинге, саське ни сон, цебярь озондыхне кармайхть озондома Аляньконди ваймосост да видесост; стапт на озондыхть Аляньке вешендсыньге Эсьтеенза.

24. Шкайсь въдь дух; озондомска Теенза эряви ваймоньконь мархта и виденьконь мархта.

25. Корхтай Теенза авась: содсан, ва сай Мессиясь, сяка вал, Христозсь; Ся самок сембонь миндейнек азондсыне.

26. Корхтай теенза Иисузсь: Ся Мон, мархтот корхтайсь.

27. Тя ёткова састь Сонь тонафниенза дивадндазюстьке авать мархта корхтаманц кувалма; секе лангс конацка ашезе пшкядть: мезяма Теть эряви кядьстонза? али мезямонь кувалма корхтать мархтонза?

28. Эста кадозь тозк эсь ведень-кандоманц, авась тусь ошу ломатненьди корхтама:

29. Аряда, ваность ломанть, конац педе пес азондозень монь тийфнень: аф Сон-ъли Христозсь?

30. Синь ошста лисемок мольсть пялонза.

31. Тя ёткова Сонь тонафниензон корхтайхть Теенза: Равви! ярхцак.

32. Сон пшкядсь теест: Монь ули ярхцама-пяль, кодама теенть аф содави.

33. Сяс тонафниензон корхтальхть эсь ётковаст: шли ки-ки кандозе Теенза ярхцама-пяльхть?

34. Корхтай теест Иисузсь: Монь кучиезень мярьгоманц пяшкедемац, Сонь тевонцка прядомац — вага Монь ярхцама-пяльсь.

35. Аф корхтатада-ли тинь: ниле ковда меле сай нумась? Мон эрь корхтан теенть: ванфтыенть эсь сельментень няемс видефнень, конат акшемсть мякь нумс кенеремшкава.

36. Нуйсь сяви питне кочкайге кенерьф пингонь-пингсонь эряманцты; сянь кувалма видись нуйхть мархта кармайхть кенярьдкшнеме марса.

37. Тянь кувалма ладс сави корхтамась: фкясь видись, омбоцесь нуйсь.

38. Мон кучедезь нумс сянне, мезямонь лангса тинь ашеде трудя; илят трудясть, а тинь трудяфснон лангс саде.

39. Лама ся ошень Самариэряйде кемезь Сонь ся авать корхтаманц коряс ся ланга, кода (Христозсь) азондозень авати сембонь, месть сон тиендькшнесь.

40. Сяс Самариэряйхне, Теенза пачкодемок, эняльдезь Сонь, ащель пялост; Сон ащеське тоса кафта шить.

41. Эста сядонга лама тага кемезь Сонь Эсь ни валонц кувалма.

42. Ся авати корхтасть: аф тонь валдот ни кемсаськ, минцьке ни маряськ и содаськ: аньцек Сон улема мастор-лангстотнень Ванысна Христозсь.

43. Кафта шида меле Сон лиссь тоста и кирдезе кинц Галилеяв.

44. Сонць Иисузсь азондозе: аф шнакшнесазь инголи-содайхть эсь шачема-ширесонза.

45. Кодак Сон пачкодсь Галилеяти, Галилеэряйхне эстокиге нолдазь Сонь няемаснон кувалма сембонь, мезямот тийфтельхть кядьстонза Иерусалимса празьнекть ёткова, — синьге якасть эста празьнекти.

46. Станяк Иисузсь сувась тага Галилеянь Канав, коса ведть шарфтозе винакс. Эса кати-кодама оцязор-инголень баяр ульсь, конанц сярядсь цёрац Капернаум ошса.

47. Ся марязь Иисузть Иудеяста Галилеяв саманц, сась Соньдеенза, эняльдезьге тернезе Сонь самс пялонза цёранц пчкафтоманкса, конанц мялецоль куломс.

48. Иисузсь азсь теенза: няйфтярясасть оцюсодафкстомать да оцю-тевть, тинь аш кемомшканте.

49. Баярсь корхтай Теенза: Азорай! адя ина, мъзярс изь кула монь цёразе.

50. Корхтай теенза Иисузсь: архт, цёраце тонь шумбра. Сон, кемезь Иисузть азф теенза валонц, тусь.

51. Васедемстонза кить лангса урянзон, мярьгсть теенза: шумбра ни цёраце.

52. Сон кизефтезень: мъзяроцекс цястста тёждялгадсь сярядемац? Азсть теенза: исяк сисемце цястшкада урмац сонь кадозе.

53. Сянь кувалма аляц содазе эсь цёранц пъчкаманц сяка цястса, конаста Иисузсь азсь теенза: цёраце шумбра. Эста кемсь сон сембе эсь ломанензон мархта.

54. Тя омбоце вага оцю-тевсь тийф Иисузть кядьста мърдамдонза меле Иудеяста Галилеяти.