Zwei kleine Mädchen

From Wikisource
Jump to navigation Jump to search
Zwei kleine Mädchen.
Author: Fritz Reuter
Text type: Gedicht
Comment:

from: Polterabend-Gedichte

1855

:

Zwei kleine Mädchen,
von denen die eine einen Korb mit Eiern
die andere einen mit Birnen bringt.

(Ins Zimmer tretend.)
Anna:
Süh, kiek! Doa sitt dei Brüüjam!

Louise:
Un kiek. Doa sitt dei Bruut!
Un süh! Wo schmucking süht dat ut!
(Sie treten näher.)

Anna:
Gu'n Abend, miene Herrn.

Louise:
Gu'n Abend, miene Damen.
Wi beir sünd ok nah N. N. kamen,
Uns ok mit in den Saal tau schlieken
Un uns dat Poa mal tau bekieken.

Anna:
Un denn so nebenbie,
Doa dachten wieder
Mit einen von dei schönen Herrn
En Walze morgen aftauperrn.

Louise:
Seiht, sähr uns' Vahre, Dierns, hürt!
Wenn ji jug so bi't Danzen führt,
Dat ji jug in dei Ecken drückt
Un doa mi Peitessillen plückt,
Wenn ann're lustig rümme danzen,
Ji kennt mi woll, ick war jug schön kuranzen.

Anna:
Lawieschen, hei vestellt sich man!

(Zur Gesellschaft.)
Hei is en rechten gauren Mann,
Mit den'n man woll utkamen kann,
Natürlich steckt dei Bua doarin,
Un doa kann dat nich anners sin,
Dat hei uns fohrt en bäten an,
En Bua, dat is kein Eddelmann!

Louise:
Dat seggst du woll! Dat seggst du woll!
Hei is goa wunderlich, dei Oll.
Ick dans', ick dans' intwei dei Sahlen,
Un sünd s' intwei, kann hei s' betahlen.

Anna:
Ih! Dat wier mi denn ok ganz recht!
Doch dat is goa tau licht geseggt.
Wenn keine kümmt, üm di tau halen,
Denn blieben heil un ganz dei Sahlen,
Un geiht dat nich nah Vahres Kopp,
Denn maakt hei uns en richtigen Zopp.

Louise:
Na nu, na nu! Man nich den Kopp velieren!
Dei Saak, dei sall sich lieke woll regieren.
Wi birren hier dat schmucke Poa,
Denn is gliek allens klipp un kloa,
Giw du die Eia, ick mien Beeren,
Sei warn uns' Birr uns woll gewähren,
Sei känen äwe allns befehlen
Un unne all dei Herren wählen,
Sei hebb'n sei all hüt an den Strick,
Behöllt die Bruut dei Groten ok för sick.

(Zum Paar.)
So will ick birren, wat ick kann:
Oh, schicken S' mi doch af un an
Bloß einen von dei lütten,
Süs bliew ick sitten.
Du, schmuckes Poa!
Nich woah?
Mi ok en poa.