Zenajipul
Vom mana liegik sembal ävedof malädik, e ven äsenof, das fin ofa äbinom nilik, ävokof jisonili lebalik ofa al bed e äsagof: „Cil löfik, blibolöd ai relik e gudik, tän God löfik oyufom ai oli, e vilob disalogön al ol se sül e vilob binön lä ol.“ Tän äkikof logis e ädeilof.
Jipul ägolof vädelo seo al sep mota e ädlenof e äblibof relik e gudik. Ven nifüp äkömom, nif äseitom klöfi vietik su sep, e ven sol idezugom denu klöfi at de sep, man ämatom vomi votik.
Vom at äblinof jisonis tel in dom, kels älabofs logodis jönik e vietik, ab ladis hetlik e blägik. Nu tim badik äbeginom lafacile. „Gan at stupik li-sötof siedön lä obs in cem?“ äsagofs; „kel vilom fidön bodi, mutom melidön omi; mofö, ol kukajidünan!“ Ämosumofs klotis jönik ofe, äklotofs ofi in luklot bäledik e gedik e ägivofs ofe jukis boadik. Tän äsmilofs sukü sened ofa e ädukofs ofi in kuk. Is ämutof vobön töbiko, sustanön gödelo büf delam, polön vati, filäbön fili, kukön e vatükön. Zu jiblods äskanofs ofi in mod valik, äkofofs ofi e äjütofs ofe peilis e lenitibis in zen, das ämutof siedön e sesükön omis denu. Vendelo, ven ivobof so mödo, das äbinof fenik, no ädalof slipön in bed, sod ämutof seistön in zen lä filöp. E bi äbinof sukü atos ai püfik e stenik, änemofs ofi: „Zenajipul“.
Äjenos, das fat ävilom sembalna tävön al malüt. Äsäkom lafajisonis bofik, kisi sätom blinön ofes as legivot. „Klotis jönik“, jibalim äsagof, „magabis e nobastonis“ jivotim. „Ab ol, Zenajipul“, äsagom, „kisi vilol labön?“ „Fat, deblekolös plo ob letuigi balid, kel jokom häti ola ven ogetävol!“ Sikod älemom lafajiblodes bofik klotis jönik, magabis e nobastonis; e ven ämonitom getävöl da bujadem glünik, mogaletuig äjokom omi e ädonjedom häti oma. Ädeblekom letuigi at e äsumom omi ko ok.
Ven äkömom domo, ägivom lafajisones, kelosi ivipofs, e mogaletuigi Zenajipule. Zenajipul ädanof ome, ägolof al sep mota, äplanof letuigi su om e ädlenof so vemo, das dlens ädonfaloms e ävatoms letuigi. Ab at äglofom e ävedom bim jönik. Zenajipul ävisitom omi vädelo kilna, e bödil vietik äkömom alina su bim, e bödil ädejedom ofe valikosi, kelosi ävipof.
Äjenos nu, das reg ästitamom zäli gletik, kel äsötom dulön du dels kil, e al kel vilgins valik jönik läna pävüdofs, dat regason sevälomöd jigami oke. Ven lafajiblods at tel älifofs, das i ofs sötofs kömön, ävokofs Zenajipuli i äsagofs: „Köbolöd helis obes, kefolöd jukis obes e fimolöd jukatanis obes; golobs al matazäl in ledom regik“. Zenajipul älobedof, ab ädlenof, bi ävipof vemo danüdön äs votiks e äbegof lumoti, das givoföd ofe däli at. „Ol Zenajipul, fulik püfa e stena“, atof äsagof, „vilol golön al matazäl e no labol klotis! vilol danüdön e no labol jukis!“ Ab bi äfovof begön, lumot äsagof fino: „Ejütob lenu bovi lenitibas in zen, e if usesükol denu lenitibis ünü düps tel, dalol golön in ledom“.
Jipul ägolof in gad da yan poik e ävokof: „O pejenils dusik, o bödils löfik valik dis sil, komolsöde yufolsöd obe sesükön
badikis in mudil“.
Nu pejinils tel vietik äkömoms ino da kukalitöp, e tän pejinils votik e fino bödils valik, valik, kels binoms dis sil, äflitoms e äsmaflitoms ino e äpladoms okis zi zen. E pejinils ävinegoms me kapils e äbeginoms: „pikk, pikk, pikk, pikk!“ e tän valiks votik äbeginoms leigo: „pikk, pikk, pikk, pikk!“ e äsesükoms lenitibis valik gudik in bov. Valikos äbinos pefinöl in düp bal e tän valiks ämoflitoms denu.
Jipul äpolof nu bovi at lumot, ägälof oki e äniludof, das dalof nu visitön matazäli. Ab lumot äsagof: „No, Zenajipul, valiks äsmilomsöv dö ol; no labol klotis e no nolol danüdön.“ Bi jipul ädlenof nu, äsagof: „If kanol sesükön bovis tel fulik de lenitibs se zen, dalol golön!“ e ätikof: „No okanof dunön atosi!“ Nu äjütof bovis tel de lenitibs in zen, ab jipul ägolof in gad da yan poik e ävokof: „O pejinils dusik, o bödils löfik valik dis sil, komolsöd e yufolsöd obe sesükön
badikis in mudil“
Nu pejinils tel vietik äkömoms ino da kukalitöp e tän pejinils votik, e fino bödils valik, valik, kels binoms dis sil e äpladoms okis zi zen. E pejinils ävinegoms me kapils e äbeginoms: „pikk, pikk, pikk, pikk!“ e tän valiks votik äbeginoms leigo: „pikk, pikk, pikk, pikk!“ e äsesükoms lenitibis valik gudik in bovs. Valikos äbinos pefinöl büf düp lafik, e tän valiks ämoflitoms denu.
Jipul äpolof nu bovis al lumot, ägälof oki e äniludof, das dalof nu visitön matazäli. Ab lumot äsagof: „Valikos at no oyufos ole; no dalol golön in ledom, ibo no labol klotis e no nolol danüdön; ämutobsöv jemön tefü ol!“ Tän äflekof oki e ämogolof ko jisons tel pleidik oka.
Ven nek äbinom fälo domo, Zenajipul ägolof al sep mota dis mogabim e ävokof:
In golüd e silef klotolöd obi!“
Böd ädejedom nu ofe kloti golüdik e jukilis tel pestiköl me satin e silef. Nu äklotof oki in klot golüdik e äsumof jukilis, e tän ägolof al matazäl. Ab jiblods e lumot no älesevofs ofi e äniludofs, das binof jison rega foginik sembal, so jönik äbinof in klot golüdik. No ätikofs valiko Zenajipuli e äniludofs, das atof seistof domo in sten. Ab regason ägolom kosü of, ädagleipom nami ofa e ädanüdom ko of. E bi no ävilom danüdön ko jivotikel ek, ätönom ai nami ofa, e ven äkömom ek votik, al vüdön ofi tefü danüd, äsagom: „Atof binof jidanùdel obik“.
Ädanüdof, jüs vendel äkömom; tän ävilof golön domo. Ab regason äsagom: „Golob ko ol e okopanob oli!“ ibo ävilom logön, kime jipul jönik lönof. Ab äsäslupof ome e äbunof in pejinöp fata. Nu regason ävaladom, jü fat äkömom e äsagom ome, das jipul foginik äbunof in pejinöp. Fat ätikof: „Kif kanof binön atof?“ e dünans ämutoms manifön pejinöpi: ab nek äbinom ino. E ven äkömoms in dom, Zenajipul äseistof in zen peklotöl steniko; e in cem lit smalik älitom nekliliko; ibo Zenajipul ibunof foviko dono se pejinöp pö e igonof al mogabimil: is ivotof klotadi e iseitof klotis jönik su sep e böd imosumom omis denu, e Zenajipul isiadof oki denu peklotöl me klotil hetlik in kuk al zen.
Ven zäl äbeginom in del suköl e fat e mot ko lafajiblods imogoloms, Zenajipul ägolof denu al mogabim e äsagof:
In golüd e silef klotolöd obi!“
Böd äjedom donon su kloti nog mödo jönikum ka ädelo. E ven äpubof in klot at bevü danüdels, alim ästunom demü jön ofa. Ab regason ivaladom, jüs ikömof, ädagleipom nami ofa e ädanüdom te ko of. Ven votiks äkömoms e ävüdoms ofi al danüd, äsagom ai: „Atof binof jidanüdel obik“.
Ven vendel ikömom, ävilof mogolön; e regason äsukom ofe e ävilom logön, in dom kiom golof: ab äsäslupof ome e ägonof in gad po dom. Bim gletik ko büns jönikün ästadom us; su bim at äxänof vifiko äs yatil, e regason no änolom, kiöp idepubof. Ab ävaladom, jüs fat äkömom, e äsagom tän: „Jipul foginik äsäslupof denu obe e niludob, das äbunof su bünabim at“. Fat ätikof: „Kif kanof binön atof?“ e dünans ämutoms blinön lecüdi e fälön bimi, ab nek äbinom su om. E ven äkömoms in kuk, Zenajipul äseistof in zen, äs egelo, ibo idebunof de flan votik bima, iblinof klotis jönik bödile mogabima e iklotof oki in klot gedik ofa.
In del kilid, ven fat e mot e jiblods imogolofs, Zenajipul ägolof denu al sep mota e äsagof bimile:
In golüd e silef klotolöd obi.“
Bödil nu äjedom dono kloti, kel äbinom so jönik e nidik, äs no nog ilabof sembali, e juks äbinoms löliko golüdik. Ven äkömof in klot at bevü danüdels, ats ästunoms so, das no änoloms, kisi sötoms sagön sukü stun. Regason ädanüdom te ko of, e alif ek ävüdom ofi al danüd, äsagom: „Atof binof jidanüdel obik“.
Ven vendel ikömom, Zenajipul ävilof mogolön e regason ävilom kopanön ofi, ab äsäslupof so vifo, das no äkanom sukön. Ab regason igebom käfi e imekom gifön picini su sleb lölik: ven äbunof dono, jukil nedetik jipula ägeblinom peklöbel su sleb. Regason äsutovom omi: jukil äbinom smalik e dekik e löliko golüdik.
In gödel suköl äbüdom, das pavokosöd in län lölik: „Te jipul at ovedof jimatel obik, kela fut pötom al jukil golüdik, keli ätuvob su sleb“.
Jukil päpolom nu in dom, kö Zenajipul älödof. Latajiblods tel ofa ägälofs okis nu, bi älabofs futis jönik. Jibäledikumel ägolof ko jukil in cemil eävilof blüfön omi, e mot ästanof läs. Ab finap gletik no äkanom pastegön ino, bi juk äbinom tu smalik; sikod mot ägivof ofe neifi e äsagof: „Deflapolöd finapi: ven obinol jireg, no omutol fovo golön futo!“ Jipul ädeflapof finapi, ädlänof futi in jukil, to dol gletik ägolof seo al regason. Atägeilom ofi as jigami su jeval e ämomonitom ko of. Ab ämutom monitön bei sep; us pejinils tel äsiedoms su mogabimil e ävokoms:
Blud binom in juk,
Juk binom tu smalik, vo,
Nu regason älogedom al fut jipula e älogof, vio blud äflumom se om. Ägeflekom jevali, äblinom jigami nevelätik denu domo, e äsagom, das atof no binof jigam velätik; jiblod votik blüfoföd juki. Atof ägolof nu in smacem e finaps äkömoms beno in juk, ab taon äbinom tu gletik. Mot ägivof nu neifi ofe e äsagof: „Deflapolöd dili taona: ven obinol jireg, no omutol fovo futelön“. Jipul ädeflapof dili taona, ädlänof futi in juk, e to dol gletik ägolof seo al regason. At ägeilom ofi as jigami su jeval e ämomonitom ko of. Ven äkömoms bei mogabimil, pejinils et tel äsiedoms su om, e ävokoms:
Blud binom in juk,
Juk binom tu smalik, vo,
Regason älogedom disi al fut jipula e älogom, vio blud äflumom se juk e äxänom ledik len stogs vietik. Sikod ägeflekom jevali e äblinom jigami nevelätik denu domo. „I atof no binof jipul velätik“, äsagom, „no li-labols nog jisoni votik?“ „No“, man äsagom, „sibinos nog te zenajipul smalik e stenik, keli jimatel balid obik emotof obe; atof vo no kanof binön jigam pasüköl“. Regason äsagom, das sedomös ofi suso, ab mot ägepükof: „No, binof tu stenik; no dalof palogön“. Ab regason ävilom deno logön ofi e sukü atos Zenajipul ämutof pavokön.
Nu äklinof namis e logedi me vat, tän äkömof e äbiegof bif reigason, kel ägivom ofe jukili golüdik. Äsiadof oki su stupil bapik, äzugof futi nedetik se boadajuk vetik, ätopof omi su jukil golüdik e äpedof te boso, e fut ya äbinom in juk; at äpötom äsif äbinom-la pegiföl ove fut. Ven ägeilof nu logodi, älogom, das äbinof atof, ko kelof idanüdom, e äsagom: „Atof binof jigam velätik“. Lumot e jiblods bofik päjekoms e ävedoms vietik sukü lezun: ab regason ägeilom Zenajipuli su jeval e ämomonitom ko of. Ven äkömoms bei mogabimil, pejinils et tel vietik ävokoms:
Blud nonik in juk,
Juk no binom tu smalik, vo,
E ven ivokoms atosi, bofiks äflitoms diso e äsiadoms okis su jots Zenajipula, balim su jot detik, votim su jot nedetik, e us äbliboms siedöl.
Ven matazäl ko regason äsötom pazälön, jiblods nefiedik äkömofs, ävilofs getön göni dub fläts e dilsumön tefü läb Zenajipula. Ven gam e jigam nu ägoloms in glüg, jibäledikumel ägolof deto, jiyunikumel nedeto; pejinils äsecopoms nu jialime logi bal me tipamud; ven älüvomstän glügi, jibäledikumel ägolof nedeto, jiyunikumel deto, e pejenils äsecopoms nu jialime logi votik. So äbinofs pepönöl sukü badug e nefied ofsik du lifatim lölik.