Zapowědźena próstwa
Jump to navigation
Jump to search
Njerunych wobćežnosćow a wšelakich podćišćenjow dla přińdźe dźělba mjeńšich štyrinohakow před krala lawa wo pomoc a polóženje prosyć. Wušikna liška bě wot nich za rěčnika před kralom wuzwolena a rěčeše tež jara mócnje a dušnje. "Wšo dobre," wotmołwi kral, "ale ze wšim prawom dwěluju na wěrnosći a prawdźe wašeje wěcy, moji lubi, nic was skóržbnikow, ale wašeho zastupjenja dla, kotrehož lesnej hubje je ćim mjenje wěrić, čim lěpje rěči. Tuž dźiće a dajće mi pokoj, doniž njezměju druhich dopokazmow."
Chceš być derje zastupany,
Hladaj, štó će podpjera,
Jebak znaty, přewołany
Wěc najlepšu rozkida;
Z wopluskom ždyn jeho mjena
Je tež twoja prawda křćena.
- Author: Handrij Zejler (public domain)
- Source: http://texty.citanka.cz/pata/sc1-38.html
- Note: Stary prawopis