Xursheddek yuz ochding, ey dilrabo, muborak...
Xursheddek yuz ochding, ey dilrabo, muborak,
Ushshoq eli ko‘ziga berding safo muborak.
Gulzori husn ichra bordur iki yuzing gul,
Ul gulki doim o‘lg‘oy rangi liqo muborak.
G‘uncha dahoning ichra har bir tishing erur dur,
Bo‘lg‘ay hamul duringg‘a qadru baho muborak.
Komi muroding o‘lsun haq lutfi birla hosil,
Naxli qadingg‘a bo‘lg‘ay nash’u namo muborak.
Hech dilrabo emasdur sharmu hayoda sandek,
Bo‘lg‘ay sanga ilohi sharmu hayo muborak.
Mehru vafolar aylab berding farah ko‘ngulg‘a,
Sen dilrabog‘a bo‘lg‘ay mehru vafo muborak.
Mirzo turub saharlar umring duosin aylar,
Ushbu duosin etkil, yo rabbano, muborak.
|
This work was published before January 1, 1929, and is in the public domain worldwide because the author died at least 100 years ago. |