Wosud wutroby
Sam doma sedźu, sedźo sam sej płakam,
Mi šěri něšto wutrobu a spina,
Mje wabi zbože a mje traši wina;
Před winu ćěkam a na zbože čakam.
Kaž worjoł wysoko ja w myslach łakam
A nizko jimatej mje próch a hlina.
Kaž škowrončk zběhnyć a do zemje klina
Kaž błysk mohł wrjesnyć so! - Tuž sam sej płakam -
Chcył lećeć z wichorom, ze słóncom horić
A khodźić z hwězdami a rěčeć z róžu
A wobraz duše namkać we krystalu!
O hrozna hra! Hač zymny sym hač palu
So, ničo njejsym, ničo njezamóžu,
Haj ani sebje zujesć a wjesć a tworić!
- Author: Jakub Bart-Ćišinski (public domain)
- Source: http://luzice.euweb.cz/index_soubory/serbskacitanka.html
- Note: Stary prawopis