Woka móc
Kaž jězor twoje woko je;
W nim z błyskotom so njebjo hlada,
Wóń kwětkow brjohi wopoja,
Kaž flety zynk přez rohodź pada.
Tym žołmam kosy spěwaju
A tujawki so w hnězdźe směja,.
A sołobiki dźěłaju,
Hdyž złote w nocy hwězdy kćěja.
Te ptački moje žady su,
Kiž k twojemu so tłóča woku
A z jeho kuzłom potajnym
So přeměnja do pěsni w skoku.
- Author: Jakub Bart-Ćišinski (public domain)
- Source: http://luzice.euweb.cz/index_soubory/serbskacitanka.html
- Note: Stary prawopis