Wječorne rudźenje
Słónco za horami lehnyć khwata,
Ptačik w lěsu sebi wusnył je:
Łysačk zaškrěča raz hišće z hata,
Hdźe pak pokoj mój mi, hdźe mi, hdźe?
Z wěžow po kraju so swjatok zwoni,
W horach zwonow wothłós k měrej dźe;
Do wsy do hródźow skót pastyŕ honi -
Hdźe pak pokoj mój mi, hdźe mi, hdźe?
Hwězdy na njebju so pasu ćiše,
Měsac baje jim a wodźi je,
Sony čłowjekam do myslow piše -
Hdźe pak pokoj mój mi, hdźe mi, hdźe?
Z woknom do hwězdneje nocy hladam;
Njebjo w miłym měrje módre kće -
Z ćežkej myslu na stoł skoržo padam;
Hdźe pak pokoj mój mi, hdźe mi, hdźe?
- Author: Jakub Bart-Ćišinski (public domain)
- Source: http://luzice.euweb.cz/index_soubory/serbskacitanka.html
- Note: Stary prawopis