Vun Kiel na Schönbarg

Vun Kiel na Schönbarg.
Author:	Johann Meyer
Text type:	Gedicht
Comment:	from: Hellmuth Clasen: Die Probstei in Wort und Bild, 1898, S. 160
:

Hurrah! nu’s man en Kattensprunk,
Un’n Jeden to’n Gewinn,
So mit’n Togg för Old un Jung
Vun Kiel na Schönbarg hin!

Sunst gung dat mit den Omnibus, -
Nu geiht dat mit de Bahn!
Dat hett, dank ehr för de Genuß!
Uns’ Handelskamer da’n!

Um Pingsten sick mal hinbegeben
Vun Kiel in de Probstie, -
Un dar mal ’n Dag so to verlebn
Wer weer nich geern darbi?!

Denn singt de Lurk vun’n Himmelstelt
Ehr Leeder op Een dal!
Denn grönt so leevlich Wisch un Feld,
Un sleit de Nachtigal!

In’t Dörp rum mank de Appelböm,
Wa Hüs’ und Höf’ dar lacht!
Un alle Gaarn’s, so vull von Blöm,
Wa is dat doch en Pracht

Un wiederhin dat blaue Meer,
Dat schümt an’n grönen Strand,
Un all de Schep so hin un her, -
O, schön Probstierland!

Un’n Leben hier, als in’n Himmelriek
Um Pingsten öwerall!
In alle Dörpen Danzmusik,
Un’n ganze Wek lang Ball!

Un wat för’n Deerns, as Melk un Blot!
En wahre Pracht to sehn!
Un hest du Lust, denn wes’ so god
Un angascheer mal Een!

Ick seeg Di all, wa Du vergnögt
Mir ehr spatzeerst in’t Grön! -
Ja, Summers ock, nu Allns verdrögt,
Is’t hier noch wunnerschön!

In’n Kleewer gaht de bunten Köh,
Un supt de Imm sick dun!
De Kukkuk röppt all Morgns so fröh!
Gelgöschen singt in’n Tun!

In’n Tun wahnt Snaak un Ehrenslip,
Un Sneck un Hasselpock!
Un in de Nester seggt dat: piep
Un Sötblom wast dar ock!

In’n Tun, wat is in’n Tun nich los?!
Een lüttje Welt för sick!
In’n Tun blöht ock de wille Ros’,
Un rundum wat för’n Blick!

Dar hangt dat Koorn, vun Ahren swar,
So gollen in de Sünn!
Un Gottessegen, wunnerbar,
Swevt lisen öwerhin!

In Schleswig-Holsteen, stammverwandt,
Wa prächtig is dat ni!
Dar liggt somennig schön lüttj’ Land,
Un liggt ock de Probstie!

Un dar’s ock noch so’n olen Kult,
So spaßig un so nett! -
Un - wenn Du nu mal fenstern wullt,
Denn lös’ Di man’n Billjett!